د ایران امنیتي ځواکونو د بشري حقونو د مخکښې فعالې نسرین ستوده مېړه نیولی دی.

د دوی لور مهراوه خندان پرون پر خپله انسټاګرام پاڼه ولیکل چې پلار یې رضا خندان سهار مهال په تهران کې له خپل شخصي کور څخه د امنیتي ځواکونو له خوا نیول شوی دی.

په عین حال کې مېرمن ستوده د آزادۍ راډیو فردا څانګې ته ویلي دي چې مېړه یې د ۱۳۹۷ کال د یوې قضیې په تړاو نیول شوی دی خو نوموړې زیاتوي چې ښاغلی خندان په هغه قضیه کې بښل شوی و.

مېرمن ستوده د چارواکو دا اقدام غیرقانوني بللی دی.

راپورونه وايي چې روسي ځواکونه د اوکراین ختیځ ستراتیژیک ښار پوکروفسک Pokrovsk ته نژدې شوي دي.

ډیپ سټېټ آنلان ویبپاڼه چې د ځواکونو د موقعیت نقشې ښيي، راپور ورکوي چې روسي ځواکونه د پنجشنبې په ورځ د پوکروفسک له جنوبي څنډې څخه یوازې درې کیلومتره لیرې وو.

په عین حال کې د اوکراین د پوځ جګپوړي چارواکي جنرال اولیکساندر سیرسکي پرون پر خپله فیسبوکپاڼه ولیکل چې د روسي یرغلګرو پرضد د جګړې په ډګر کې د اوکراین د دفاعي ځواک د پیاوړي کولو لپاره باید نامتعارفې پرېکړې وشي.

له بلې خوا د اوکراین ولسمشر ولودیمیر زیلینسکي چې تېره پنجشنبې د جبهې په لومړۍ کرښه کې د سرتېرو لیدو ته ورغلی و، سیمې ته د مرستندویو ځواکونو د استولو غوښتنه کړې.

روسې داسې مهال په اوکراین کې پوځي عملیاتو ته زور ورکړی چې د اوکراین د جګړې د پای ته رسولو لپاره ډيپلوماتیکې هڅې ګړندۍ شوي او ښکېل اړخونه غواړي دا جګړه، چې په اروپا کې یې په تېرو څو لسیزو کې ساری نه دی لیدل شوی پای ته ورسوي.

د نړۍ د اوو پرمختللو هیوادونو یا جی اوه ډلې مشران نن جمعه د (ډیسمبر۱۳مه) په یوه مجازي غونډه کې په سوریه کې د روان وضعیت په اړه خبرې کوي.

په سوریه کې د بشاراسد د رژیم له ړنګیدو وروسته موقت حکومت ژمنه کړې چې د قانون واکمني به ټینګوي.

دغو مشرانو ویلي، په سوریه کې د یوه ټولګډونه، غیرفرقه یې حکومت د رامنځ ته کیدو پرلور د انتقالي بهیر ملاتړکوي.

دوی د ښځو او لږکیو د حقونو په ګډون د بشري حقونو د ملاتړ د غوښتنې ترڅنګ په دې ټینګارکړی چې د اسد له رژیم سره دې د ترسره کړو جنایتونو په خاطر حساب کتاب وشي.

د فرانسپرس خبري اژانس د راپورله مخې د سوریې په نژدې څوارلسه کلنه کورنۍ جګړه کې له پنځو لکو زیات کسان وژل شوي، په میلیونونو کډوال شوي او د اسد درژیم په زرګونو مخالفان زنداني شوي یا وژل شوي دي.

د هیئت تحریر شام ډلې HTS په مشرۍ د افراطي ډلې نویو واکمنانو د اسد د واکمنۍ د قربانیانو لپاره د عدالت د تامین ژمنه کړې ده.

د دې ډلې مشر ابو محمد الجولاني، چې اوس له خپل اصلي نوم احمد الشرع څخه کار اخلي، له هیوادونو څخه غوښتي دي چې هر هغه مجرم دې بیرته وروسپاري چې د دوی هیواد ته ورغلی وي.

هغه ویلي، دا دې کار هدف د عدالت تامین دی.

د فلسطین روغتیايي چارواکي وايي په غزې تړانګه کې د اسراییل په تازه هوايي حملو کې د ۷ ماشومانو په ګډون لږ تر لږه ۲۸ کسان وژل شوي دي.

د ملګرو ملتونو عمومي اسمبلۍ د چهارشنبې په ورځ په لوی اکثریت هغه پرېکړه لیک تصویب کړ، چې په غزه کې د فوري اوربند غوښتنه په کې شوې ده.

د رویټرز اژانس د خبر له مخې، له وړمې شپې تر پرون پنجشنبې پورې یوه حمله پرون په النصیرات کې د کډوالو په کمپ کې پر یوه کور شوې ده.

دا خبره دیرالبلح ښار ته نږدې چې دا مرګ ژوبله په کې پېښه شوې د الاقصی د شهیدانو په نوم روغتون کړې ده.

په دوو نورو حملو کې ۱۵ هغه سړي وژل شوي، چې د محلي کمېټو غړي وو او دا کمېټې د مرستو د کاروانونو د خوندیتوب لپاره ګمارل شوې وې.

د ملګرو ملتونو په تازه تصویب شوي پرېکړه لیک کې د فلسطیني کډوالو لپاره د ملګرو ملتونو د ادارې ملاتړ هم شوی، چې اسرائیل یې پر فعالیت بندیز لګولی دی.

د امریکا د بهرنیو چارو وزیر انتوني بلینکن، چې منځني ختیځ ته په سفر تللی، د پنجشنبې په ورځ له اردن څخه انقرې ته ورسېد او د اسن‌بوغا په هوایي ډګر کې یې د ترکیې له ولسمشر رجب طیب اردوغان سره ولیدل.

د ترکیې د ولسمشر د دفتر په وینا، رجب طیب اردوغان په دې کتنه کې ټینګار وکړ چې هېواد یې د خپل «ملي امنیت» لپاره په سوریه کې د ټولو هغو سازمانونو پر وړاندې چې ترهګر یې ګڼي، مخنیوونکي اقدامات ترسره کوي.

اردوغان همداراز له نړیوالې ټولنې وغوښتل چې د سوریې د ادارو د بیا رغونې لپاره له یو بل سره همکاري وکړي.

له بلې خوا، د امریکا د بهرنیو چارو وزارت اعلان وکړ چې انتوني بلینکن په دې کتنه کې د دواړو هېوادونو د ګډو ګټو او په سوریه کې د واک لېږد په اړه خبرې وکړې او ویې ویل چې یو ځواب ویونکي او ټول‌شموله حکومت دې رامنځته شي.

ټاکل شوې ده چې د امریکا د بهرنیو چارو وزیر له خپل ترک سیال هاکان فیدان سره نن جمعه خبرو ته دوام ورکړي.

د رویټرز خبري اژانس پر اساس، امریکا او ترکیه دواړه د بشار اسد د حکومت د مخالفانو ملاتړ کوي، خو «د سوریې دیموکراتیک ځواکونو» په نامه د کردانو پر سر د دواړو خواوو ترمنځ اختلافات لا هم دوام لري.

د روسیې د بهرنیو چارو وزارت مرستیال له هیئت تحریر الشام ډلې سره د تماسونو خبر ورکړ.

په همدې حال کې بلومبرګ راپور ورکړی چې دواړه خواوې د سوریې په خاوره کې د روسیې د پوځي اډو د ساتنې په تړاو یوې موافقې ته نژدې شوي دي.

بلومبرګ د روسیې د یوې خبرې سرچینې په حواله راپور ورکړی چې دواړه خواوې د روسیې د پوځي اډو د ساتنې په اړه یوه «غیر رسمي تفاهم» ته رسېدلي، خو ټینګار شوی چې «په سوریه کې د بې‌ثباتۍ له امله دا وضعیت بدلیدای شي.»

له بلې خوا، د انټرفاکس خبري اژانس د راپور له مخې، د روسیې د بهرنیو چارو وزارت مرستیال، میخائیل بوګدانوف، ویلي چې مسکو په دمشق کې له هیئت تحریر الشام سره تماس نیولی او هیله لري چې دغه ډله به د بهرنیو ډیپلوماتانو د امنیت د ساتنې په اړه خپلو ژمنو ته وفاداره پاتې شي.

هغه زیاته کړه چې روسیه غواړي خپلې اډې په سوریه کې وساتي، ځکه چې «د ترهګرۍ او د داعش د پاتې شونو پر وړاندې مبارزه پای ته نه ده رسېدلې.»

روسیه په سوریه کې دوه پوځي اډې لري: د طرطوس سمندري اډه چې د مدیترانې په ساحل کې موقعیت لري، او د حمیمیم هوايي اډه چې د لاذقیې بندر ته نژدې ده.

د اروپایي ټولنې د عدلیې او کورنیو چارو وزیرانو هوکړه وکړه چې رومانیا او بلغاریا به د جنوري له لومړۍ نیټې څخه د دې ټولنې په شینګن زون کې شامل شي

د شینګین زون د غړیو هېوادونو وګړي او هغه کسان چې د دغه زون د غړیو هیوادونو اوږدمهالې وېزې لري، د زون ټولو هیوادونو ته بې وېزې سفر کولی شي.

اروپایي شورا دا پریکړه نن په اروپايي ټولنه کې د رومانیا او بلغاریا له غړیتوب څخه نژدې اتلس کاله وروسته اعلان کړه. دواړو هېوادونو لپه تېرو ۱۵ کلونو کې په شینګڼ زون کې د شمولیت لپاره ټاکلي تخنیکي معیارونه پوره کړي دي.

د هنګري د کورنیو چارو وزیر ساندور پینټر چې هیواد یې د اروپایي ټولنې دوره يي مشري کوي دا پریکړه تاریخي وبلله چې بلغاریا او رومانیا د شینګین له زون سره یوځای شول.

له بلغاریا او رومانیا سره د اروپایي ټولنې د اووه ویشت غړیو هیوادونو له ډلې پنځه ویشت د شینګین غړي شول چې استوګن یې له ویزو پرته دغو هیوادو ترمنځ سفر کولی شي. اوس یوازې قبرس او ایرلنډ پاتې دي چې د شینګین بشپړ غړيتوب ترلاسه کړي.

د ماشومانو د ژغورنې نړیوال سازمان وايي، د یونان د کډوالو په کمپونو کې د افغانانو په ګډون ماشومان له سخت وضعیت سره مخامخ دي.

د سیف د چیلډرن په یو نوي خپور شوي راپور کې راغلي چې د کډوالو لپاره د یونان شورا د دې هېواد د کډوالو په کمپونو کې هغه ترخه واقعیتونه په ګوته کړي چې ماشومان ورسره لاس و ګرېوان دي.

د ماشومانو د ژغورنې نړیوال سازمان وویل، په ۲۰۲۴ کال کې یونان ته د ماشومانو راتګ دوه چنده زیات شوی دی.

د ماشومانو د ژغورنې نړیوال سازمان وايي، د ۲۰۲۴ کال په لومړیو ۱۱ میاشتو کې یونان ته د کډوالو راتګ ډېر شوی، چې د کال په لومړیو ۱۱ میاشتو کې تر ۵۷۳۰۰ اوښتی دی.

دغه سازمان زیاتوي، سږ کال تر ۱۳۰۰۰ ډېر ماشومان د سمندر له لارې یونان ته رسېدلي، چې د تېر کال په پرتله ۵۰ سلنه ډېر دي. له ترکیې یونان ته په اوښتونکو کډوالو کې ګڼ شمېر افغان کډوال هم شامل دي.

د اوکراین په زاپوریژیا ښارکې پر یوه کلینیک د روسیې په برید کې د وژل شویو کسانو شمیر ۸ تنو ته رسیدلی دی.

د اوکراین د بیړنیو خدمتونو ادارې نن چهارشنبې په یوه بیان کې وویل، په دې برید کې ۲۲ کسان ټپیان شوي هم دي.

د دې ادارې په خبره، ژغورونکي تراوسه د پیښې په ځای کې عملیات مخ ته وړي. روسیې په دې وروستیو کې د اوکراین پر ښارونو او د انرژۍ پرتاسیساتو د بې پیلوټه الوتکو او توغندیو بریدونه زیات کړي دي. په عین حال کې د اوکراین ولسمشرولودمیرزیلینسکي پرون سې شنبې له خپلو متحدینو وغوښتل چې د لسو او دولسو ترمنځ د هوایي مدافعې نور پټرویټ سیسټمونه ورکړي څو وکولای شي چې د روسیې د بریدونو په وړاندې خپل هوایي قلمرو په بشپړه توګه خوندي کړي.

خامنه یې نن چهارشنبه ( د لیندۍ ۲۱مه) د ایران دولتي تلویزیون سره په خبرو کې، بې له دې چې د کوم بل هېواد نوم واخلي، وویل چې یوه ګاونډي هم په دې تحول کې لاس درلود.

د ډي.پي.اې خبري اژانس د راپور له مخې په ظاهره د خامنه یي اشاره ترکیې ته وه چې د سوریې د پخواني حکومت د مخالفانو ملاتړ یې کاوه.

ایران او روسیه بیا هغه هېوادونه وو چې د بشارالاسد په مشرۍ د سوریې د پرزیدلي حکومت ملاتړ یې کاوه.

خامنه یي ټینګار وکړ چې د بشار الاسد د حکومت سقوط د ایران د کمزورۍ په معنا نه ده، د هغه په خبره، ایران پياوړی او ځواکمن دی او نور به هم پياوړی شي.

تر دې وړاندې د امریکا منتخب ولسمشر ډونالډ ټرمپ ویلي و چې ایران او روسیه کمزوري موقف کې دي او له همدې کبله یې د اسد د حکومت ملاتړ هم ونه شو کړای.