د عمان په کوربتوب د پیل شویو درې اړخیزو سیالیو په لړ کې نن یکشنبه د اکټوبر په ۱۳مه نېټه افغان الف لوبډلې له هانګ کانګ سره سیالي وکړه چې د ۷ وېکټو په توپیر افغانستان وګټله.

د دې لوبې پچه افغانستان وګټله او توپ اچونه یې غوره کړه.

هانګ کانګ د ۹ لوبغاړو تر سوځېدو وروسته ۱۱۱ منډې وکړې.

په افغان توپ اچونکو کې کریم جنت ۳ او فریدون داودزي دوه لوبغاړي وسوځول.

د هانګ کانګ هدف افغان الف لوبډلې په ۱۴م اور کې د درې لوبغاړو تر سوځېدو وروسته پوره کړ.

افغان لوبډلې ته کریم جنت ۴۷ ناسوځېدلې او ذبید اکبري ۳۷ منډې وکړې.

افغان لوبډلې به خپله دویمه سیالي سبا دوشنبه له عمان سره ترسره کوي.

د افغانستان د کرکټ الف او هانک ګانګ ملي لوبډلو ترمنځ د درې اړخیزو سیالیو په لړ کې لومړۍ لوبه پیل شوې ده.

دغه سیالي چې نن یکشنبه د اکټوبر په ۱۳مه نېټه د عمان په کوربتوب پیل شوې، افغانستان یې پچه ګټلې ده او توپ اچونه یې غوره کړې ده.

د افغانستان لپاره په ننۍ سیالۍ کې صدیق اتل، ذبید اکبري، دروېش رسولي، محمداسحاق، شرف‌الدین اشرف، شاهدالله کمال، ننګیالی خروټی، کریم جنت، الله محمدغضنفر، فریدون داودزی او بلال سمیع لوبه کوي.

د ویلو ده چې افغان لوبډله به خپله دوهمه سیالي سبا له عمان سره ترسره کوي.

د ایران د ماشومانو د حقونو د ملي ادارې منشي علي کاظمي وایي، په تهران کې له ۳زره ۲۰۰ پېژندل شویو ماشومو کارګرو څخه ۸۵ سلنه یې بهرنی اتباع دي.

کاظمي پرون شنبې له یوې ایرانۍ رسنۍ سره په مرکه کې څرګنده کړه چې د زده‌کړې نشتوالی او مالي ستونزې دا ماشومان مجبور کړي چې د تهران په سړکونو کې کار وکړي.

ده زیاته کړه، د بهرنیو اتباعو ادارې د ماشومانو په اړه د ملي قوانینو د سرغړونې له امله بې اسناده ماشوم کارګران ایستلي دي.

که څه هم کاظمي د بې اسنادو ماشومانو تابعیت په ګوته نه کړ، خو ایراني چارواکي اکثرا د "بې اسناده اتباعو" اصطلاح افغانانو ته کاروي.

په پاکستان کې د سرحد په نوم د سوداګرۍ او صنایعو د خونې مشر فضل مقیم د پاکستان او افغانستان د دوه اړخیزې سوداګرۍ د ښه کولو لپاره د ازادې سوداګرۍ د تړون پر لاسلیک ټینګار وکړ.

ده پرون شنبې له اسلام‌اباد او کابل څخه وغوښتل چې د تعرفو او ګمرکي محصول پر اوسني جوړښت بیا کتنه وکړي او هغه مطلوبې کچې ته راکم کړي.

د افغانستان او پاکستان ترمنځ سوداګري راکړه ورکړه د لارو د بندېدو او د پاکستان له لوري د افغانستان د مېوو پر صادراتو د تعرفې څو برابره زیاتېدو له کبله خورا ټیټه شوې ده.

د طالبانو دوو مخالفو ډلو ادعا کړې چې په کابل او غور ولایتونو کې یې طالبانو ته مرګ‌ژوبله اړولې ده.

د افغانستان د ازادۍ جبهې په خپله ایکس شبکه کې لیکلي چې د دوی ځواکونو تېر ماښام د کابل په دارالامان سیمه کې پر هغه رنجر موټر چې د طلحه په نوم د طالبانو د استخباراتو د ۹۰ ادارې سرګروپ یې لېږداوه، حمله کړې ده.

وړاندې ویل شوي چې په دې حمله کې د طالبانو د استخباراتو درې پوځیان وژل شوي او بل ټپي دی.

تر دې مخکې د افغانستان ځینو کورنیو رسنیو په دې سیمه کې د چاودنې خبر ورکړی و.

بل لوري ته د افغانستان د ملي مقاومت جبهې په یوه خبرپاڼه کې ویلي چې د دوی ځواکونو په غور کې څلور طالبان وژلي دي.

دغې جبهې ویلي چې دا حمله پرون تر غرمې مخکې د چهارسده ولسوالۍ پر لویه لار شوې ده.

په خبرپاڼه کې ویل شوي چې د طالبانو وسلې او مهمات د ملي مقاومت جبهې لاس ته ورغلي دي.

طالبانو د دغو ډلو د ادعاوو په باب څه نه دي ویلي او ازادي راډیو هم په بې پرې ډول دغه ادعاوې نه شي تاییدولی.

د افغانستان د کرکټ الف لوبډله نن یکشنبه د اکټوبر په ۱۳مه نېټه د هانګ کانګ ملي لوبډلې پر وړاندې شل اوریزه سیالي ترسره کوي.

دغه درې اړخیزې سیالۍ چې د افغانستان، عمان او هانګ کانګ په ګډون تېره ورځ پیل شوي، دا په‌کې د افغان لوبډلې لومړۍ سیالي ده.

دغه سیالي به د افغانستان پر وخت ماسپښین مهال پیل شي.

د دې درې اړخیزو سیالیو په لړ کې د افغانستان دویمه لوبه د اکټوبر په ۱۴مه نېټه له عمان سره ده.

کرکټ بورډ ویلي چې د دې سیالیو موخه د اسیا ایمریجنګ جام سیالیو ته چمتوالی دی چې د اکټوبر په ۱۸مه نېټه به په عمان کې پیل شي.

د فرانسې د تروریزم ضد څارنوالانو پرون ویلي، پولیسو یو ۲۲ کلن افغان چې د امریکا په متحده‌ایالتونو کې له خپل یوه هېوادوال سره په ارتباط کې و، د یوې حملې د طرحې په شک نیولی دی.

څارنوالانو په یوه اعلامیه کې ویلي، دغه کس چې سې شنبه د فرانسې په جنوب لوېدیځ کې نیول شوی، د اسلامي دولت ډلې یا داعش په ملاتړ تورن دی.

په فرانسه کې دغه نیول شوي ۲۲ کلن افغان له خپل هغه ۲۷ کلن هېوادوال سره ارتباط درلود، چې په امریکا کې ونیول شو.

د نصیر احمد توحیدي په نوم دا کس تېره اوونۍ د امریکا د متحدو ایالتونو په اوکلاهاما ایالت کې ونیول شو او په دې تورن شو چې غوښتل یې په نومبر میاشت کې د امریکا د ولسمشرۍ ټاکنو په ورځ د خلکو په ګڼه ګوڼه کې حمله وکړي.

دغې قضیې ته یوې نږدې سرچینې ویلي، دغه دواړه وروڼه دي، خو فرانسوي څارنوالانو دا موضوع تایید کړې نه ده.

په امریکا کې دېره مشکوک کس د ټیلیګرام له لارې له هغه چا سره په ارتباط کې و چې د تحقیقاتو فډرال ادارې (FBI) د داعش لپاره د کسانو استخداموونکی بللی دی.

ویل شوي امریکايي چارواکو په دې اړه خپلو فرانسوي همکارانو ته خبرداری ورکړ چې دا کار په فرانسه کې د عمده مشکوک کس په ګډون د یوه ۲۰ کلن او یوه ۳۱ کلن کس د نیولو سبب شو.

عمده مشکوک کس په توقیف کې دی، خو دوه نور نیول شوي کسان خوشې شول.

د طالبانو عدلیې وزارت وایي، د صنعتي سیمو قانون د دوی د مشر ملا هبت‌الله تر توشیح وروسته نافذ شو او په رسمي جریده کې خپور شو.

دغه وزارت پرون په خپله ایکسپاڼه یا پخواني ټویټر کې لیکلي چې د صنعتي سیمو قانون شپږ بابونه، یولس فصلونه او اووه شپېته مادې لري چې په دې کې د دولتي، خصوصي او مشارکتي صنعتي ساحو د جوړولو، پراختیا او څارنې، یادو ساحو ته د ځمکې وېشلو او د صنعتي ساحو جوړولو لپاره غوښتونکو ته د مځکو د وېشلو شرطونه په اړه حکمونه راغلي دي.

د افغانستان عدلیې وزارت د دې قانون د تصویب خبر په داسې وخت کې ورکړی چې په تېرو څه باندې درې کلونو کې د قانون د پلي کېدو په برخه کې شفافیت نه شته او د صنعتي سیمو د غیرعادلانه ویش په برخه کې هم شکایتونه موجود دي.

د افغانستان د سولې لپاره د امریکا د متحده‌ایالاتو پخوانی استازی زلمی خلیلزاد وایي، د دوحې د تړون پټې برخې د افغانستان د راتلونکې حکومت په اړه نه دي.

خلیلزاد په یوه پاډکسټ کې چې پرون "دوحه ډیبیټز" خپور کړ، وویل د دوحې د تړون محرمې برخې د ترهګرۍ او له افغانستانه د بهرنیو ځواکونو د وتلو په ارتباط دي.

د امریکا متحده‌ایالاتو د۲۰۲۰م کال د فبروري په ۲۹مه له طالبانو سره د قطر په پلازمېنه دوحه کې د سولې تړون لاسلیک کړ.

د دې تړون یو شمېر مادې له رسنیو سره شریکې شوي او یو شمېر یې نه دې شریکې شوي.

په پروني پاډکسټ کې خلیلزاد زیاته کړه چې د دوحې تر ټړون مخکې د سولې د خبرو پر مهال واشنګټن هغه وخت دا نظر درلود چې د ځواکونو ایستل باید د طالبانو او افغان حکومت تر منځ له موافقې سره مشروط نه شي، ځکه چې افغانان په خپلو کې توافق ته نه رسېږي.

د پښتون ژغورنې غورځنک مشر منظور پښتین وايي، په پښتونخوا کې په تېرو شلو کلونو کې نژدې اتیا زره کسان وژل شوي، چې څه باندې ۹ زره يې د خبیر اوسېدنکي وو.

پښتين دا څرګندونې نن د خیبر په ریګي للمه کې د پښتنو قومي جرګه ته په خپلې وینا کې کړي دي.

پښتون ویلي، دا کسان په هغې جګړه کې وژل شوي چې د پښتنو نه وه.

د جرګې له سیمې د ازادي راډیو د مشال برخې خبریال وسیم سجاد وايي، د جرګې په ځای کې د لګیدلي لوی سکرین له لارې خلکو سره معلومات شریکیږي.

تمه وه، چې جرګه پرون پیل شي، خو د پي‌ټي‌ایم غړو او د جرګې تنظمیونکو ویلي، د امنیتي او انتظامي ستونزو له کبله دا جرګه نن د اکټوبر ۱۲مه رسما پیل شوه.

پښتنو دا درې ورځنۍ جرګه په سیمه کې د روانو ناامنیو، جبري لادرکه کېدو او د پښتون مېشتو سیمو د وسایلو د واک د ستونزو او یوشمېر نورو چارو د هوارۍ، او په اړه يې د پرېکړې کولو په موخه رابللې ده.

دغې درې ورځنۍ جرګې ته د بېلابېلو پښتون مېشتو سیمو څخه په زرهاوو کسان ورغلي دي.