نړۍ
د اردن د بهرنيو چارو وزير په يو ناڅاپي سفر ايران ته تللی
د اردن د بهرنیو چارو وزیر ایمن صفدي په یوه ناڅاپي سفر پرون یکشنبې په منځني ختيځ کې د مخ پر زیاتېدونکي کړکېچ په اړه د خبرو لپاره تهران ته تللی دی.
د فلسطین "سما او الجزیره" خبري اژانسونو د صفدي په حواله ويلي: "د اسراییلو لهخوا يې ایران ته کوم پیغام نهدی راوړی، خو په سیمه کې د سولې، ثبات او امنیت غوښونکی دی."
اردن له اسراییلو سره ښې اړیکې لري.
صفدي په تهران کې په هغه خبرې کنفراس کې چې د ایران د بهرنیو چارو وزیر علي باقري کني ترڅنګ ناست و وویل، د سفر موخه يې په سیمه کې د کړکېچ د زیاتېدو د مخنيوي په اړه په هغو روښانو خبرو اترو کې ګډون دی، چې د دواړو هېوادونو ترمنځ په صداقت او شفاف ډول ترسره او اختلافونه راکم کړي.
خو صفدي او کني، په تېرو دوو ورځو کې دوه ځلې په ټليفوني خبرو کې په تهران کې د حماس ډلې د مشر اسماعیل هینه د وژنې او په سیمه کې د بدلونو په اړه خبرې کړي دي.
امریکا او اروپايي ټولنه حماس وسلهواله ډله د ترهګریز سازمان په توګه پېژني.
ایران ته له ۲۰۱۵ کال راهیسې دا لومړی ځل دی، چې د اردن د بهرنیو چارو یو وزیر سفر کوي.
د راپورونو پر بنسټ، د دې ویره شته چې د غزې جګړه په سیمه کې پراخه شي.
ایران او ملاتړ ډلې يې د لبنان حزبالله ویلي، پر تهران او بیروت د مرګونو بریدونو غچ اخلو.
ایران وايي، دا بریدونه اسراییلو کړي دي.
د ورځې تازه خبرونه دلته ولولئ
امریکا په لبنان کې د حزبالله ډلې خلاف د اسراییل د بمباریو په څرګنده ملاتړ وکړ
د امریکا متحدهایالاتو پرون په لبنان کې د حزبالله ډلې خلاف د اسراییل د بمباریو په څرګنده ملاتړ وکړ.
په دې کې هغه هوايي حمله هم شامله ده چې په نتیجه کې یې په بیروت کې د حزبالله ډلې مشر حسن نصرالله ووژل شو.
امریکا په عین حال کې ویلي، اوس په لبنان او غزه کې د اوربند وخت راغلی دی.
د امریکا ولسمشر جو بایډن د حزبالله ډلې د مشر حسن نصرالله وژنه د زرګونو امریکایانو، اسراییلیانو او ملکي لبنانیانو په ګډون د هغه د ګڼو قربانیانو لپاره د عدالت یو اقدام ګڼلی دی.
بایډن په یوه اعلامیه کې د حزبالله، حماس او حوثي یاغیانو خلاف د اسراییل د ځان د دفاع د حق پر ملاتړ بیا ټینګار کړی دی.
د امریکا د ولسمشر مرستیالې کاملا هاریس چې د ولسمشرۍ ټاکنو لپاره کاندیده ده، حسن نصرالله یو تروریست یاد کړی چې لاسونه یې د هغې په وینا د امریکایانو په وینو سره وو.
د اسراییل پوځ پرون ویلي چې د حزبالله ډلې مشر حسن نصرالله د جمعې په ورځ د لبنان په پلازمېنه بیروت کې په یو لړ هوايي بریدونو کې ووژل شو.
زیلینسکي د روسیې پر وړاندې جګړه کې له ټرمپ څخه د ملاتړ معلومات ترلاسه کړي
د اوکراین ولسمشر ولودمیر زیلینسکي وايي، د امریکا د متحدهایالاتو له پخواني ولسمشر ډونالډ ټرمپ یې مستقیم معلومات ترلاسه کړي چې ټرمپ که په نومبر میاشت کې د ولسمشرۍ ټاکنې وګټي، نو د روسیې پر وړاندې په روانه جګړه کې به د اوکراین ملاتړ وکړي.
زیلینسکي دا څرګندونې په هغه مرکه کې وکړې چې پرون له فاکس نیوز تلوېزیوني شبکې خپره شوه.
زیلینسکي امریکا ته د سفر پر مهال د جمعې په ورځ د تړلو دروازو تر شا له ټرمپ سره وکتل او په خپله مرکه کې یې ویلي: "نه پوهېږم چې تر ټاکنو وروسته به څه پېښ شي او څوک به ولسمشر شي، خو له ډونالډ ټرمپ مې مستقیم معلومات ترلاسه کړل چې دی به زموږ پر خوا وي او د اوکراین ملاتړ به وکړي."
د هند امنیتي چارواکو د دوو وسلهوالو د وژلو خبر ورکړ
د هند امنیتي چارواکي وايي، پرون له افراطي وسلهوالو سره په شخړه کې دوه مشکوک وسلهوال وژل شوي دي.
دا پېښه داسې وخت کېږي چې د هند تر ولکې لاندې کشمیر کې چې اکثریت اوسېدونکي یې مسلمانان دي، د محلي ټاکنو لپاره رایه اچونه روانه ده.
د محلي ټاکنو دغه درېیم او وروستی پړاو تېره سې شنبه پیل شو او نتیجې به یې د اکټوبر پر ۸مه اعلان شي.
د هند پوځ په یوه اعلامیه کې ویلي، د امنیتي ځواکونو لهخوا دوه تروریستان ختم کړای شوي دي.
د هند رسنیو د پنځو امنیتي ځواکونو د ژوبلېدو خبر هم ورکړی دی.
دغه وسلهواله نښته د کشمیر د جنوب په کلګام ولسوالۍ کې شوې ده.
په نیپال کې تر سختو اورښتونو وروسته د بهېدلو سېلابونو له کبله د مړو شمېر ۳۲ ته ورسېد
د نیپال په پلازمېنه کټمنډو کې تر سختو اورښتونو وروسته د بهېدلو سېلابونو له کبله د مړو شمېر ۳۲ ته ورسېد.
د نیپال پولیسو پرون شنبه ویلي چې تر اوسه ۱۲ تنه لا هم تري تم دي.
د تېرې جمعې له ناوخته په دغه هېواد کې سخت بارانونه روان دي چې د اټکل له مخې نن به هم دوام کوي.
د نیپال د پولیسو ویاند بیشو ادهیکاري ویلي، تراوسه یو زر او ۵۳ کسان ټپیان شوي دي.
د ادهیکاري په وینا، په ټول هېواد کې د پولیسو پرسونل اته امر شوی چې د ژغورنې په چارو کې برخه واخلي.
پر لبنان د اسراییل د هوايي حملو زیاتوالی؛ څه باندې ۵۰زره کسان سوریې ته کډه شوي
د کډوالو په چارو کې د ملګرو ملتونو د لویې کمېشنرۍ مشر وايي، پر لبنان د اسراییل د هوايي حملو له زیاتېدو سره څه باندې ۵۰زره کسان سوریې ته کډه شوي دي.
فلیپو ګراندي پرون شنبه پر خپله ایکسپاڼه لیکلي چې ۵۰زره لبنانیان یا هغه سوریایان چې په لبنان کې یې ژوند کاوه، د اسراییل د هوايي حملو له کبله مجبور شوي چې سوریې ته کډه وکړي.
د ګراندي په وینا، تر ۲۰۰زرو ډېر نور کسان په لبنان کې دننه بېځایه شوي دي.
د کډوالو په چارو کې د ملګرو ملتونو د لویې کمېشنرۍ یوه ویاند ویلي چې په لبنان کې دننه د بېځایه شویو شمېر دوه لکه ۱۱زره ۳۱۹ ته رسېږي.
له کله چې د اکټوبر میاشتې پر اوومه په غزې تړانګه کې د اسراییل او حماس ډلې ترمنځ جګړه پیل شوې، د لبنان حزب اله ډلې هم د پولې په اوږدو کې د ټیټې کچې سرحدي شخړې پیل کړي چې په ځواب کې یې اسراییل مورچلونه ورته بمباروي.
حزبالله چې یوه وسلهواله ډله او سیاسي ګوند دی، د لبنان د جنوب پر زیاتو برخو کنټرول لري او د متحده ایالاتو لهخوا د یو ترهګر سازمان په توګه پېژندل کېږي.
د حزبالله له مشر سره یوځای د ایران د سپاه پاسداران عملیاتي مرستیال هم وژل شوی
په بيروت کې د اسراییلو د برید له کبله د حسن نصرالله سره یوځای د ایران د سپاه پاسداران عملیاتي مرستیال عباس نيلفروشان هم وژل شوی دی.
په دې برید کې د حزبالله یو شمېر غړي هم وژل شوي او ټپیان دي.
رويټرز خبري اژانس د ايران په حکومت کې د سرچينو له قوله خبر ورکړی چې په بيروت کې د اسراييلو په هوايي بريد کې د حزبالله ډلې مشر حسن نصرالله تر وژل کېدو وروسته، د ايران مذهبي مشر علي خامنهيي د خونديتوب لپاره يو نامعلوم ځای ته بيول شوی دی.
د رویټرز په وینا، د ایران مشر د حزبالله د مشر نصرالله د وژنې په خاطر په دې هېواد پنځه ورځنی ملي ماتم اعلان کړ.
حزبالله د امریکا لهخوا ترهګره ډله ګڼل کېږي او اروپايي ټولنې بیا د دې ډلې پوځي څانګه په تور لېست کې شامله کړې ده.
حزبالله د اسراییلو په برید کې د خپل مشر وژنه تایید کړه
د لبنان حزبالله تایید کړه چې د دوی مشر حسن نصرالله د اسراییلو په یوه هوايي برید کې وژل شوی دی.
دا خبر رویټرز او اسوشېټېډ پرېس خبري اژانسونو ورکړی دی.
د اسراییلو پوځ نن وویل چې د حزبالله ډلې مشر حسن نصرالله یوه ورځ مخکې د لبنان په پلازمېنه بیروت کې په یو لړ هوايي بریدونو کې وژل شوی دی.
امریکا، حزب الله د یوې ترهګرې ډلې په توګه پېژني.
اروپايي ټولنه د حزبالله پوځي برخه په تور لېست کې شامله کړې ده.
د حزبالله سیاسي څانګه د لبنان په پارلمان کې استازي لري.
حزبالله یوه ملېشه ډله او یو سیاسي ګوند دی چې د لبنان د سویل لویه برخه کنټرولوي.
د اسراییلو د پوځ ویاند افیخای ادرعي په یوه بیان کې چې په ایکسپاڼه خپور شوی، ویلي چې د حزبالله د جنوبي محاذ قومندان علي کرکي او یو شمېر نور قوماندانان هم وژل شوي دي.
هغه زیاته کړه:"پیغام روښانه دی، موږ به هر هغه چا ته ورسېږو چې په شمال، سویل او یا نورو لرو جبهو کې اسراییلي اتباع ګواښي."
د اسراییلو دفاعي ځواکونو هم په ایکسپاڼه کې ویلي چې حسن نصرالله به نور د نړۍ د وېرولو توان ونه لري.
رویټرز د سرچینو په حواله راپور ورکړی چې د ایران رهبر ایتالله علي خامنهيي خوندي ځای ته وړل شوی او کلک امنیتي تدابیر نیول شوي دي.
اسراییلي رسنیو نن سهار خبر ورکړ چې د حزبالله د مشر لور زینب نصرالله هم د اسراییلو په برید کې وژل شوې ده.
حزبالله دغه راپورونه نه دي تایید کړي.
د حسن نصرالله زوی هادي په ۱۹۹۷ کال کې د اسراییلي ځواکونو پر ضد په جګړه کې وژل شوی و.
اسراییلو یو وار بیا د حزبالله پر اهدافو د بریدونو خبر ورکړ
د اسراییلو پوځ نن شنبه یو وار بیا د لبنان پلازمېنه بیروت کې په یو شمېر سیمو چې دوی یې د حزبالله اهداف بولي بریدونه کړي دي.
تازه بریدونه یوه ورځ وروسته له هغه شوي چې په بیروت کې د حزبالله ډلې د قوماندې مرکز د اسراییل د توغندیزو بریدونو هدف وګرځېد.
د ایران له ملاتړ برخمن حزبالله ډلې د مشر حسن نصرالله د برخلیک په اړه سمدستي څه جزییات نهشته او نه هم د دوی ډلې څه ویلي.
خو اسراییلي رسنیو راپور ورکړی چې د حسن نصرالله لور زینب نصرالله وژل شوې ده.
د حسن نصرالله زوی هم په ۱۹۹۷م کال کې له اسراییلو سره په جګړه کې وژل شوی و.
حزبالله د امریکا لهخوا ترهګره ډله ګڼل کېږي او اروپايي ټولنې بیا د دې ډلې پوځي څانګه په تور لېست کې اچولې ده.
اخوا د ملګرو ملتونو سرمنشي انتونیو ګوتېریش په منځني ختیځ کې د سمدستي اوربند د ټینګښت غوښتنه کړې ده.
هغه ویلي، په لبنان کې جګړه به د نورو بهرنیو قدرتونو په ښکېلولو سره وضعیت لا کړکېچن کړي.
ګوتېریش دا څرګندونې په داسې حال کې کړي چې د اسراییلو او حزبالله ترمنځ شخړې زور اخیستی دی.
زیلینسکي: له ټرمپ سره مې ډېرې معنی لرونکې خبرې ترسره کړې
د اوکراین ولسمشر ولودمیر زیلینسکي وایي، د امریکا له پخواني ولسمشر ډونالډ ټرمپ سره یې ډېرې معنی لرونکې خبرې ترسره کړې.
دا په داسې حال کې ده چې د انتقاد کوونکو په خبره د ټرمپ د روسیې پلوه دریځ په خاطر د دواړو مشرانو ترمنځ اړیکې ښې نهدي.
د امریکا د ولسمشرۍ لپاره د جمهوریپالو له کاندیډ ټرمپ سره تر کتنې وروسته زیلینسکي پر ټیلیګرام ولیکل چې له هغه سره یې غونډه ډېره معنی لرونکې وه او زیاته یې کړه چې ټرمپ ته یې د بري پلان توضیح کړ.
د زیلینسکي په خبره: "دغه پلان د اوکراین وضعیت او دا چې جګړه زموږ د خلکو لپاره څه نتیجې لري، په جزییاتو بیانوي."
ټرمپ له زیلینسکي سره له خبرو مخکې چې هغه یې هم په خوا کې ولاړ و وویل چې که د نومبر د میاشتې انتخابات وګټي، نو به دوی له دواړو لورو سره کار وکړي چې په اوکراین کې جګړه پای ته ورسېږي.
په عراق کې د امریکا پوځي ماموریت تر راتلونکې کال پورې پای ته رسېږي
د امریکا متحدهایالاتو پرون جمعه اعلان وکړ چې د عراق له حکومت سره یې یوه موافقه کړې چې له مخې یې په دې هېواد کې د امریکا پوځي ماموریت تر راتلونکې کال پورې پای ته رسېږي.
د دغې موافقې له مخې به په عراق کې امریکایي ځواکونه چې نژدې دوه لسیزې په دې هېواد کې حضور لري، له خپلو ځینو اډو ووځي.
خو د اسوشېټېډپرېس خبري آژانس د راپور له مخې، د امریکا حکومت په دې اړه چې ایا په عراق کې یو شمېر امریکایي سرتېري به چې اوس یې شمېر شاوخوا ۲۵۰۰ ته رسېږي، پاتې کېږي او که دغه اعلان له دې هېواد څخه د امریکایي ځواکونو د بشپړ وتلو په معنی دی، له زیاتو جزییاتو ورکولو ډډه وکړه.
په عراق کې د امریکا په مشرۍ د ائتلافي ځواکونو ماموریت په دې هېواد کې د سخت دریځې اسلامي دولت ډلې یا داعش پر وړاندې جګړې متمرکز دی.