د لاسرسۍ وړ لېنکونه

تازه خبر
چهارشنبه ۲۷ چنګاښ ۱۴۰۳ کابل ۰۶:۵۵

نړۍ

بایډن: پوتین به د نړۍ له نقشې د اوکراین د محوه کولو هدف کې بریالی نه شي

د عکس ښي لور ته د روسیې ولسمشر ولادیمیر پوتین او چپ لور ته د ده امریکايي سیال جوبایډن
د عکس ښي لور ته د روسیې ولسمشر ولادیمیر پوتین او چپ لور ته د ده امریکايي سیال جوبایډن

د امریکا ولسمشر جوبایډن وايي چې روسیه پرته له دې چې اوکراین د نړۍ له نقشې څخه محوه کړي، بل څه نه غواړي، خو بایډن په کلکه ټینګار وکړ چې د روسیې ولسمشر ولادیمیر پوتین به دې هدف ته په رسېدو کې بریالی نه شي.

بایډن په واشنګټن کې د ناټو د سرمشریزې په لومړۍ ورځ په خپله وینا کې زیاته کړه چې اوکراین د پوتین مخه نیولای شي او د لوېدیځو متحدانو په بشپړ ملاتړ به دا کار وکړي.

هغه اعلان وکړ چې امریکا او متحدان به یې له اوکراین سره د نورو وسلو او د هوايي مدافعې د اضافي سیستمونو مرسته وکړي.

د ورځې تازه خبرونه دلته ولولئ

ايران پر ډونالډ ټرمپ شوي بريد کې لاس لرل رد کړل

په ډونالډ ټرمپ د جولای ۱۳مه د ټاکنیز کمپاین پر مهال برید شوی و.
په ډونالډ ټرمپ د جولای ۱۳مه د ټاکنیز کمپاین پر مهال برید شوی و.

ایران هغه تورونه رد کړل چې د امریکا د پخواني ولسمشر ډونالډ ټرمپ د وژلو پلان یې طرح کړی.

"سي این این" تلوېزیون او پولیټیکو خپرونې پرون د یو شمېر سرچینو په وینا چې نومونه یې نه و یاد شویي خبر ورکړ چې امریکایي چارواکو څو اوونۍ مخکې تر دې چې پر ټرمپ ډزې وشي داسې راپورونه ترلاسه کړي و چې ایران د ټرمپ د وژلو پلان لري.

د ایران د بهرنیو چارو د وزارت ویاند ناصر کنعاني په یوه بیان کې چې د سې شنبې په ورځ خپور شو٬ ټینګار وکړ چې تهران د جولای د دیارلسمې نېټې په پېښه کې چې پر ټرمپ ډزې وشوې لاس نه درلود او نه هم داسې پلان لري چې ټرمپ ووژني.

کنعاني زیاته کړه چې د ایران اسلامي جمهوريت دا نیت لري چې ټرمپ د قاسم سلیماني د وژلو په جرم محاکمه شي.

د ایران د سپاه پاسداران انقلاب قوماندان قاسم سلیماني د ۲۰۲۰م کال په جنوري کې د ټرمپ په قومانده د امریکایي ځواکونو د هوایي برید په ترڅ کې ووژل شو.

په ګرجستان کې د ریښتر د ۴.۸ درجو په شدت زلزله وشوه

د ګرجستان نقشه
د ګرجستان نقشه

په ګرجستان کې نن د ریښتر د څلور اعشاریه اته درجو په شدت زلزله وشوه.

د ازادي راډیو د ګرجي ژبي د راپور له‌مخې د دې زلزلې مرکز د دیدوپلیس څکارو ښارګوټي لوېدیځ لور ته په پنځه کیلومترۍ کې و.

دا سیمه د ګرجستان له پلازمېنې تبلیسي څخه ۱۳۰ کیلومتره جنوب ختیځ ته پرته ده.

د امریکا د جیولوجي سروې د راپور له‌مخې بیا دا زلزله د ځمکې په تل کې نژدې ۲۹ کیلومتره ژوره شوې ده چې شدت یې ۴.۱ اټکل شوی دی.

دا زلزله چې نن په سیمه‌ییز وخت سهار شپږ بجې وشوه، په پلازمېنې تبلیسي کې یې هم ټکانونه احساس شول او تر اوسه یې د ځاني او مالي زیانونو راپورونه نه‌دي خپاره شوي.

غزه کې د اسراییلو د هوايي حملو دوام؛ له ۶۰ ډېر فسلطنيان وژل شوي

غزه کې له بمبارۍ وروسته د سیمې انځور
غزه کې له بمبارۍ وروسته د سیمې انځور

د غزې په جنوبي او مرکزي برخو کې د اسراییل په پرونیو هوايي حملو کې له ۶۰ زیات فلسطینیان وژل شوي دي.

یوه حمله په هغه سیمه کې شوې چې اسراییل یې د امن ساحه بولي او د اسراییلي پوځ د بریدونو له وېرې بې‌ځایه شوي کډوال په‌کې دېره دي.

که څه هم اسراییلو ویلي چې د غزې په شمال او جنوب کې یې د خپلو پراخو ځمکنیو عملیاتو شدت کم کړی او خپل ځواکونه یې په شا کړي، خو په تېرو څو ورځو کې د اسراییلي پوځ حملو په پرله‌پسې ډول فلسطینیانو ته مرګ‌ژوبله اړولې.

اسراییل پر امن سیمه چې د مدیترانې سمندرګي په اوږدو کې شاخوا ۶۰ کیلومتر مربع ساحه رانغاړي او اسراییلو بې‌ځایه شویو فلسطیني کډوالو ته هلته د استوګنې لارښوونه کړې تقریباً هره ورځ هوايي حملې کوي.

د یوه امریکايي سرتېري له‌خوا د يوې افغانې ماشومې د ساتنې حق ترلاسه کول رد شول

د امریکا بیرغ
د امریکا بیرغ

د امریکا د ویرجینیا ایالت د استېناف یوې محکمې پرون حکم وکړ چې د امریکا د پوځ سرتېري جاشوا ماست باید هيڅکله د جګړې یوه یتیمه ماشومه د اولاد په توګه نه وای منلې.

محکمې د دې افغانې ماشومې د ساتنې حکم، چې امریکايي سرتېري له درېیو کلونو راهیسې اتکا پرې کوله هم باطل اعلان کړ.

د امریکا د پلیو سمندري ځواکونو دې سرتېري له څو کلونو راهیسې د دې ماشومې چې په ۲۰۱۹م کال کې د جګړې پر مهال یتیمه شوې وه، د ساتنې د قانوني حق د ترلاسه کولو هڅه کوله، خو د محکمې پروني حکم د ده ټولې هڅې پر اوبو لاهو کړې.

دا یتیمه ماشومه دوه میاشتې وروسته پنځه کلنه کېږي.

هاریس د ټرمپ له  انتخاباتي ملګري څخه په یوه تلوېزیوني مناظره کې د برخې اخیستو غوښتنه کړې

د امریکا د ولسمشر مرستیاله کامېلا هاریس
د امریکا د ولسمشر مرستیاله کامېلا هاریس

د ولسمشر جوبایډن د انتخاباتي کمپاین یو چارواکي پرون وویل چې د ولسمشر مرستیالې کامېلا هاریس د جمهوریپال کاندید ډونالډ ټرمپ له انتخاباتي ملګري سناتور جې ډي وېنس څخه غوښتي دي چې د اګست په ۱۳مه د سي‌بي‌ایس CBS شبکې په بلنه له دې سره په تلوېزیوني مناظره کې برخه واخلي.

مېرمن هاریس وروسته له دې چې ډونالډ ټرمپ د دوشنبې په ورځ سناتور وېنس په سږنیو انتخاباتو کې د خپل مرستیال په توګه غوره کړ هغه ته یو غږیز پیغام استولی.

مېرمن هاریس له دې مخکې له سي‌بي‌ایس تلوېزیوني شبکې سره د مناظرې شرایط منلي وو، خو د ټرمپ کمپاین هڅه کوله چې دا مناظره د فاکس نیوز شبکې له لارې وشي مګر د بایډن کمپاین ورسره ونه منله.

رومانيا له امريکا سره د جنګي الوتکو د پېرلو تړون لاسلیک کوي

د امریکا جنګي الوتکې
د امریکا جنګي الوتکې

رومانیا وايي تمه لري چې په څو میاشتو کې له امریکا سره د ایف۳۵ جنګي الوتکو د پېرلو تړون لاسلیک کړي.

د روسیې له تېري اندېښمن، اروپایي هېوادونو دفاعي لګښتونه ډېر کړي دي.

د تېر کال په سپټمبر کې رومانیا وویل، دوی پلان لري چې د ۶.۵ ميلیارد ډالرو په ارزښت دوه دېرش باله، ایف۳۵ F-35 الوتکې له امریکا واخلي.

د رومانیا د دفاع وزیر انجیل ټیلوار د سه‌شنبې په ورځ د جولای په ۱۶مه وویل، په‌دې تړون کې لوژستیکي او روزنیز خدمتونه، د الوتنې برابرول او مهمات شامل دي.

رومانیا تر اوسه له ناروې څخه ۳۲ایف شپاړس جنګي الوتکې او ۱۷ نور الوتکې له پرتګال اخیستي.

د روسيې د سايبري امنيت يو شرکت په امريکا کې خپل فعاليت ځنډوي

ارشیف
ارشیف

د روسيې د سايبري امنيت يو شرکت په امريکا کې د خپل فعاليت د ځنډولو خبر ورکړی دی.

د روسیې د سایبري امنیت شرکت کاسپرسکي وايي، په امریکا متحده‌ایالاتو کې د دغه شرکت د سافټویر تر بندیز وروسته به په امریکا کې خپل ټول فعالیت وځنډوي.

دغه مسکو مېشته شرکت د سه‌شنبې په ورځ په یوه بیان کې وویل، کاسپرسکي به په تدریجي ډول په متحده‌ایالاتو کې خپل عملیات وځنډوي او د جولای له ۲۰مې څخه به امریکا کې پوستونه له‌منځه یوسي.

تېره میاشت، د متحده‌ایالاتو د سوداګرۍ وزارت د کاسپرسکي سافټویر په پلور باندې بندیز اعلان کړ، دلیل یې دا و چې له دغو محصولاتو څخه د امریکایانو د حساسو معلوماتو په برخه کې ناوړه ګټه اخیستل کېدای شي.

کاسپرسکي د امنیتي ګواښ خبره رد کړې وه.

اسرييلو ايران ته د جاسوسۍ په تور درې کسان نيولي

د اسراییل بیرغ
د اسراییل بیرغ

اسرايیلي رسنیو د سه‌شنبې په ورځ خبر ورکړ چې د دغه هېواد درې اتباع د ایران اسلامي جمهوریت ته د جاسوسۍ په تور نیول شوي او محاکمه به شي.

د دغو راپورونو له‌مخې دا درې واړه تورن دي چې د ایران د یوه استخباراتي اجنټ په غوښتنه یې په تېرو میاشتو کې په اسرايیلو کې ځانګړي اقدامات ترسره کړي.

دا درې کسان د (شباک)د اسراییلو د داخلي امنیت سازمان او د اسراییلو د پولیسو د نړیوالو تحقیقاتو د څانګې له‌خوا نیول شوي او د څه مودې لپاره ترې تحقیقات کېدل.

پر دوی د لګېدلو تورونو خبر د سه‌شنبې په ورځ هغه مهال خپور شو چې څارنوالۍ د دوی پر ضد درې تورونه محکمې ته وړاندې کړل.

د اسراییلو د داخلي امنیت سازمان رسنيو ته په خپله خبرپاڼه کې د دغو درېيو کسانو د نيولو، څېړنې او محکمې ته د هغوی وړاندې کول تاييد کړل.

خیبرپښتونخوا کې پر یوې امنیتي پوستې برید؛ دوه سرتېري وژل شوي او شپږ ټپيان دي

پرون په بنو کې هم وسله والو برید خلکو ته مرګ ژوبله اړولې وه.
پرون په بنو کې هم وسله والو برید خلکو ته مرګ ژوبله اړولې وه.

د خیبرپښتونخوا په ډیره‌ اسماعیل خان کې نن سهار د جولای ۱۶مه پر یوې امنیتي پوستې په وسله‌وال برید کې دوه سرتېري وژل شوي او شپږ نور ټپیان دي.

امنیتي چارواکو د نوم نه ښودلو په شرط د ازادي راډيو مشال څانګې ته ویلي، برید د ډيره‌ اسماعیل خان په کړي شموزۍ کلي کې شوی دی.

د چارواکو په خبره، د دواړو خواو ترمنځ جګړه روانه ده او درې بریدګر وژل شوي دي.

تراوسه کومې وسله‌والې ډلې د برید مسوولیت نه‌دی منلی.

پرون د خیبرپښتونخوا په بنو سیمه کې د پاکستاني پوځیانو پر یوه نظامي مرکز په برید کې اته پوځیان وژل شوي وو.

د چارواکو په خبره، په پروني برید کې ۷۷ کسان ټپیان شوي وو.

په کینیا کې د ۴۲ ښځو په وژنې تورن مشکوک کس نیول شوی

ارشیف: د کینیا پولیس د عملیاتو پر مهال
ارشیف: د کینیا پولیس د عملیاتو پر مهال

د کینیا په پلازمېنه نایروبي کې د ۴۲ ښځو په وژنې تورن مشکوک کس نیول شوی دی.

د روېټرز خبري اژانس د راپور پر بنسټ، دا ۳۳ کلن مشکوک کس کولینز جومایسي خالیسیا نومېږي.

دې کس د ۲۰۲۲م کال راهیسې د خپلې ښځې په ګډون ۴۲ ښځې وژلي دي.

د کینیا پولیسو دغه مشکوک کس پرون سهار په یوه میخانه کې هغه مهال ونیوه چې د اروپا د فوټبال پایلوبه يې ننداره کوله.

رویټرز په خپل راپور کې د کینیا د پولیسو په حواله ویلي، د وژل شویو ښځو له ډلې د نهو جسدونه په یو کان کې موندلي دي.

د پولیسو په خبره، د وژل شویو ښځو عمرونه د ۱۸ او ۳۰ کلونو ترمنځ دي.

د کینیا پولیسو ویلي، مشکوک کس د ۴۲ ښځو په تېر ایستلو، وژلو او په کان کې پر غورځولو يې اعتراف کړی دی.

د دوی په خبره، د مشکوک کس له کوره يې موبایلونو، لپ ټاپ، تذکرې او د ښځو د جامو په ګډون شواهد موندل شوي دي.

تراوسه د دې قتلونو انګېزه معلومه نه ده.

نور راوښيه

XS
SM
MD
LG