د لاسرسۍ وړ لېنکونه

تازه خبر
سه شنبه ۲ زمری ۱۴۰۳ کابل ۱۰:۰۱

نړۍ

د اروپا د ملتونو فوټبال جام؛ هسپانیه د فرانسې په ماتولو سره پایلوبې ته ووتله

د هسپانیې او فرانسې له لوبې یو انځور
د هسپانیې او فرانسې له لوبې یو انځور

د اروپا د ملتونو د فوټبال په اتلولۍ لوبو کې هسپانیه د فرانسې په ماتولو پایلوبې ته ووتله.

دا لوبه د مونشن په الینز ارینا لوبغالي کې وشوه.

د هسپانیې ټیم دوه پر یو لوبه وګټله.

هسپانیې تر دې مخکې درې واره د اروپا د ملتونو د فوټبال اتلولي ګټلې ده.

د اروپا د ملتونو د فوټبال سیالیو په دویمه نیمه پایلوبه کې به نن د چهارشنبې شپه د هالند او انګلستان ملي لوبډلې سره مخ شي.

د دې لوبې ګټونکی به په پایلوبه کې چې د یکشنبې په ورځ د جولای ۱۴مه کېږي له هسپانیې سره مخ شي.

د ورځې تازه خبرونه دلته ولولئ

تېره یک‌شنبه د جولای ۲۱مه د نړۍ په کچه تر ټولو توده ثبت شوې ورځ وه

د اروپا د هواپېژندنې یوه اداره وايي، تېره یک‌شنبې د جولای ۲۱مه د نړۍ په کچه تر ټولو توده ثبت شوې ورځ وه.

د اروپايي ټولنې د کوپرنیک د اقلیمي بدلون د خدماتو مرکز نن اعلان وکړ چې، د ځمکې د کرې د تودوخې متوسطه درجه په‌دې ورځ د سانتي ګراد ۱۷،۰۹ درجې وه، په‌داسې حال کې چې د تېرکال په جولای کې د تودوخې لوړه درجه ۱۷،۰۸ وه.

په تېره یوه اوونۍ کې د تودوخې څپې د متحده‌ایالاتو، اروپا او روسیې پراخې سیمې وسوځولې.

کوپرنیک مرکز رویټرز خبري اژانس ته تایید کړې ده چې، د تېرکال په جولای میاشت کې د دوی له‌خوا د تودوخې ثبت شوی ریکارډ، د یک‌شنبې په ورځ مات شو.

دا مرکز له ۱۹۴۰ کال راهیسې د هوا حالات څاري.

روسيه کې د دغه هېواد ملي سرود ته د سپکاوي په تور اته کسان جريمه شوي

د روسیې په کاباردینو- بالکاریا سیمه کې اته کسان په هغه تور چې د دې هېواد ملي سرود ته سپکاوی بلل شوی، جریمه شوي.

سیمه‌يیزو چارواکو ویلي چې، دا کسان د ملي سرود له اړوندو مقرراتو د سرغړونې په خاطر په درې زره روبل چې ۳۴ ډالره کېږي، جریمه شوي دي.

دا کسان وروسته له هغه تورن شول چې د روانې میلادي میاشتې په لومړیو کې د کاباردینو بالکاریا د یوه منځني ښوونځي د فراغت د مراسمو ویډیو پر انټرنیټ خپره شوه.

په ویډیو کې ښکاري چې یوشمېر زده‌کوونکي او د هغو میندې پلرونه د ملي سرود په درناوي له خپلو څوکیو اوچت نه شول او یوشمېر نورو د ملي سرود د خپرېدو پرمهال خپل غوږونه په ګوتو بند کړي وو.

په‌دې اړه د څېړنو غوښتنه د روسیې د پارلمان غړي اندرې کارتاپولوف کړې وه.

د اوکراين د بهرنيو چارو وزير چين ته تللی

د اوکراین د بهرنیو چارو وزیر دیمیتري کولېبا
د اوکراین د بهرنیو چارو وزیر دیمیتري کولېبا

د اوکراین د بهرنیو چارو وزیر دیمیتري کولېبا د اوکراین د جګړې د پای ته رسولو لپاره د چین د هڅو د څرنګوالي په اړه د خبرو لپاره پېکېنګ ته تللی دی.

د مسکو او چین ترمنځ اړیکې د اوکراین د جګړې له پیلېدو وروسته پیاوړي شوي دي.

که‌څه هم چین ویلي چې په‌دې جګړه کې بې‌پرې دی او د امریکا او د لوېدیځ د نورو هېوادونو برعکس له هيڅ لوري سره مرسته نه‌کوي، خو د پېکېنګ او مسکو نژدې مشارکت د دې سبب شوی چې ناټو چین د اوکراین په جګړه کې د مسکو د مهم ځواکمنوونکي په توګه معرفي کړي.

تمه ده چې چین ته د کولیبا سفر به د راروانې جمعې تر ورځې دوام وکړي.

د ۲۰۲۲ کال په فبروري کې پر اوکراین د روسیې له یرغل وروسته دا لومړی ځل دی چې کولېبا چین ته سفر کوي.

روسيې د اوکراين د ۲۵ بې‌پيلوټه الوتکو د نسکورولو ادعا کړې

د مسکو یوه څنډه کې د بې‌پیلوټه الوتکې د برید له کبله د اوښتو زیانونو یو انځور
د مسکو یوه څنډه کې د بې‌پیلوټه الوتکې د برید له کبله د اوښتو زیانونو یو انځور

د روسیې دفاع وزارت وايي، د هوايي مدافعې ځواکونو یې نن سهار د اوکراین ۲۵ بې‌پیلوټه الوتکې ویشتلې او نسکورې کړې دي.

دې وزارت په یوه بیان کې ویلي دي چې، څلور ډرونونه یې د بریانسک او بېلګورد سیمو په فضا کې ویشتلي او ۲۱ نور یې د مسکو تر ولکې لاندې په اشغال شوې کریمیا ټاپووزمه او د تور سمندرګي سواحلو ته نژدې شنډ کړي دي.

په عین حال کې د سیواستوپول روس پلوي والي میخایل روز ووژایف په یوه جلا بیان کې ویلي دي، د کریمیا پر ښار هم د ۱۵ ډرونونو په وسیله برید وشو چې په نتیجه کې یې پر کرچ نومي پله چې مسکو د کریمیا له اشغال وروسته ورغاوه، تګ راتګ وځنډېد.

بل‌خوا اوکراین ویلي چې، روسیې تېره شپه د دې هېواد په شمال ختیځه سومي سیمه کې پر مهمو تاسیساتو برید وکړ، خو په‌دې اړه یې جزییات نه‌دي ورکړي.

ټاکل شوې جوبایډن د پنجشنبې په ورځ د اسراییل له صدراعظم سره وګوري

د امریکا ولسمشر جوبایډن
د امریکا ولسمشر جوبایډن

ټاکل شوې د امریکا ولسمشر جوبایډن د پنجشنبې په ورځ په سپینه ماڼۍ کې د اسراییل له صدراعظم بنیامین نتنیاهو سره وګوري.

رویټرز خبري اژانس بېګا ناوخته د یوه امریکایي چارواکي په حواله دغه خبر ورکړی دی.

بایډن له تېرې چهارشنبې راهیسې په کورونا اخته دی او په دیلاور کې خپل کور کې اوسیږي، خو ټاکل شوې نن سه‌شنبه واشنګټن ته ولاړ شي.

د اسراییل صدر اعظم چې پرون امریکا ته رسېدلی دی، د چهارشنبې په ورځ د امریکا د کانګرس ګډې غونډې ته وینا کوي.

نوموړی داسې مهال د امریکا په سفر وتلی چې جوبایډن د غزې په جګړه کې د هغه پر یوشمېر جګړه‌ییزو تګلارو نیوکې کړې دي.

د ډیموکرات ګوند یوشمېر مشرانو له کامالا هریس خپل ملاتړ اعلان کړی

کامالا هریس
کامالا هریس

د امریکا د ډیموکرات ګوند یوشمېر مهمو مشرانو په راتلونکو ولسمشریزو ټاکنو کې د جوبایډن د مرستیالې کامالا هریس د کاندیداتورۍ ملاتړ کړی دی.

د استازو جرګې غړې او د دغې جرګې پخوانۍ پياوړې مشرې نانسي پلوسي پرون په یوه بیان کې ویلي، دا په لېوالتیا سره د آغلې هریس د نوماندۍ ملاتړ کوي.

په نانسي پلوسي سربېره د میشیګن، ایلینویس، کینټکي او مرلنډ والیانو او یوشمېر سناتورانو هم د کامالا هریس د کاندیداتورۍ په پلوۍ ورته څرګندونې کړې دي.

د امریکا ولسمشر جوبایډن د یک‌شنبې په ورځ په یوه بې‌ساري ګام کې راتلونکو ټاکنو ته له کاندیداتورۍ لاس په سر شو او خپله مرستیاله کامالا هریس یې ځای ناستې نومانده وټاکله.

د ډیموکرات ګوند د نوماند یا نوماندې په اړه وروستۍ پریکړه به د دغه ګوند په څلور ورځنۍ ملي کنګره کې کېږي چې د راتلونکې اګست میاشتې په ۱۹مه په شیکاګو کې پيلیږي.

د اسراييل پوځ د غزې په "بشري زون" سيمه کې د عملياتو د پيلولو خبر ورکړی

غزه کې يو اسراييلي پوځي
غزه کې يو اسراييلي پوځي

د اسراییل پوځ د غزې تړانګې له هغې سیمې د خلکو د وتلو امر کړی چې د بشري زون په توګه بلل کېږي.

پوځ ویلي، د حماس د جنګیالیو پر ضد عملیات پيلوي نو ځکه یې د دې سیمې خلکو ته د وتلو امر کړی.

حماس د امریکا او اروپايي ټولنې له‌خوا ترهګر سازمان ګڼل کېږي.

د اسراییل پوځ ادعا کړې چې حماس له‌دې سیمې د اسراییلو په لور د راکټونو د توغولو لپاره کار اخیست.

په بشري زون کې ختیځه برخه مواسي هم شاملیږي.

ګڼ فلسطینیان د اسراییلو په تېرو شاوخوا لس میاشتنیو بریدونو کې څو څو واره د امن سیمو د لټون په هدف بې‌ځایه شوي.

د ډونالډټرمپ د وژنې هڅه د امريکا د خفيه ادارې عملياتي ناکامي وبلل شوه

ډونالډ ټرمپ، پر نوموړي له بريد څو شېبې وروسته
ډونالډ ټرمپ، پر نوموړي له بريد څو شېبې وروسته

د امریکا د خفیه خدماتو د ادارې مشرې د مخکېني ولسمشر ډونالډټرمپ د وژنې هڅه په تېرو څو لسیزو کې د دې ادارې تر ټولو ستره ناکامي بللې ده.

کیمبرلي چیتل نن د استازو جرګې د څار او احتساب په کمېټه کې د وکیلانو د پوښتنو په ځواب کې وویل، دا پېښه په تېرو څو لسیزو کې د امریکا د خفیه خدماتو د ادارې تر ټولو لویه عملیاتي ناکامي وه.

هغې زیاته کړه چې د دې ادارې د مشرې په توګه د دې پېښې ټول مسوولیت دا مني.

د توماس کروک په نوم یوه شل کلن ځوان د جولای په ۱۳مه نېټه د پنسلوانیا ایالت په بټلر ښار کې د انتخاباتي کمپاین له یوې غونډې څو سوه متره لیرې د یوې ودانۍ له سره پر ټرمپ د نیمه اتومات وسلې په ذریعه ډزې وکړې.

کروک سمدستي د خفیه خدماتو د ادارې د یوه مامور په ډزو ووژل شو.

د روسیې یوې محکمې د ازادې اروپا/ازادي راډیو خبریاله "السو کورماشېوا" په شپږنیم کاله بند محکومه کړه

د ازادي راډیو د روسي څانګې خبریاله السو کورماشېوا چې دا مهال روسیه کې بندي ده.
د ازادي راډیو د روسي څانګې خبریاله السو کورماشېوا چې دا مهال روسیه کې بندي ده.

د روسیې یوې محکمې د ازادې اروپا/ازادي راډیو خبریاله السو کورماشېوا د روسیې د پوځ په اړه د ناسمو خبرونو د خپرولو په تور په شپږنیم کاله بند محکومه کړه.

د اسوشیتید پریس خبري اژانس د راپور له‌مخې د مېرمن کورماشیوا د حبس حکم تېره جمعه په کازان ښار کې اعلان شو او په همدې ورځ په ایکاترینبورګ ښار کې د وال سټریټ ژورنال ورځپاڼې ایوان ګریشګوویچ د جاسوسۍ په تور په ۱۶ کاله بند محکوم شو.

کورماشېوا چې د امریکا او روسیې دوه ګونی تابعیت لري، د ازادي راډیو د تاتار، باشکیر څانګې لپاره کار کاوه.

د ازادې اروپا/ازادي راډیو لوی مشر ستیفان کاپوس له اسوشیتدپریس سره په خبرو کې د السو کورماشېوا محاکمه او حکم، پر عدالت ملنډې بللي او غندلي یې دي.

ښاغلي کاپوس په یوه بیان کې چې اسوشیتید پریس خپور کړی ویلي چې، کورماشېوا باید ډېره مخکې خوشې شوې وای او له خپلې کورنۍ او عزیزانو سره یوځای شوې وای.

فرانسوي چارواکو د المپيک لوبو پر مهال د اسراييلي لوبغاړو د امنيتي خونديتوب خبر ورکړی

د فرانسې د کورنیوچارو وزیر وايي، د پاریس د المپیک لوبو پرمهال به اسراییلي لوبغاړو ته ۲۴ ساعته امنیتي خوندیتوب ورکړل شي.

جرالډ درمانین دا څرګندونې وروسته له هغه وکړې چې یوه کیڼ پالي افراطي وکیل وویل، د اسراییلو د لوبغاړو ډله په فرانسه کې د منلو نه‌ده او په المپیک کې د هغو د ګډون پر ضد یې د اعتراضونو غوښتنه وکړه.

د پاریس المپیک د راروانې جمعې په ورځ (د جولای ۲۶مه) پیلېږي او دا په‌داسې حال کې ده چې په اروپا کې د اوکراین او غزې د جګړې له کبله امنیتي اندېښنې زیاتې شوې دي.

نور راوښيه

XS
SM
MD
LG