د لاسرسۍ وړ لېنکونه

تازه خبر
شنبه ۱۶ چنګاښ ۱۴۰۳ کابل ۰۵:۳۳

نړۍ

د پاکستان پوځ په خیبرپښتونخوا کې له امریکا سره ګډ پوځي تمرینونه پیل کړي

د عکس ښي لور ته امریکايي ځواکونه او چپ لور ته پاکستاني ځواکونه په ګډ انځور کې
د عکس ښي لور ته امریکايي ځواکونه او چپ لور ته پاکستاني ځواکونه په ګډ انځور کې

د پاکستان پوځ په خیبرپښتونخوا ایالت کې له امریکا سره د ګډو پوځي تمرینونو خبر ورکوي.

د پاکستان د پوځ د عامه اړیکو دفتر نن په یوه بیان کې وویل چې دا تمرینونه د دواړو هېوادونو د پوځي ځواکونو ترمنځ د همکارۍ د کچې د پیاوړتیا او د تروریزم پر ضد د مبارزې په چاره کې د همغږۍ په هدف روان دي.

په بیان کې راغلي چې دا پوځي تمرینونه د جون په ۲۹مه په پبي سیمه کې پیل شوي او دوه اوونۍ دوام کوي.

خیبرپښتونخوا له ناامنه ایالتونو څخه دی او د پاکستان پوځ د وسله والو مخالفینو له هغې ډلې د پاکستان طالبانو د ځپلو لپاره هلته بیا بیا پوځي عملیات کړي دي.

د ورځې تازه خبرونه دلته ولولئ

د حماس تر ولکې لاندې روغتیا وزارت: په غزه کې د وژل شویو شمېر ۳۸زره ۹۸ ته ورسېد

د غزې په خان یونس کې د جګړو له کبله یوه ویجاړه شوې سیمه
د غزې په خان یونس کې د جګړو له کبله یوه ویجاړه شوې سیمه

د حماس تر ولکې لاندې د غزې روغتیا وزارت نن ویلي چې د فلسطینیانو په دغه قلمرو کې د نهه میاشتنۍ جګړې په نتیجه کې د وژل شویو شمېر ۳۸زره ۹۸ ته ورسېد.

د امریکا متحد ایالتونه او اروپايي ټولنه حماس ډله یو تروریستي سازمان ګڼي.

په وژل شویو کې هغه ۸۷ کسان هم شامل دي چې د وزارت په وینا په تېرو ۴۸ ساعتونو کې وژل شوي دي.

له کله چې د اکټوبر پر اوومه د حماس او اسراییل ترمنځ په غزه کې جګړه پیل شوې د غزې د روغتیا وزارت په وینا ۸۷زره ۷۰۵ نور کسان ټپیان شوي دي.

په غزې تړانګه کې دا جګړه وروسته له هغې پیل شوه چې لومړی توندلارې ډلې حماس د اکټوبر میاشتې پر ۷مه پر اسراییل په حملې سره ۱۲۰۰ کسان ووژل او شا و خوا ۲۵۰ نور کسان یرغمل کړل.

عربستان د ایران د ولسمشرۍ نوي بریالي شوي کاندید مسعود پزشکیان ته مبارکي ورکړې

مسعود پزشکیان د ایران ولسمشرۍ ټاکنو په دویم پړاو کې چې پرون ترسره شو، د اکثریت رایې په ګټلو سره بریالی اعلان شو.
مسعود پزشکیان د ایران ولسمشرۍ ټاکنو په دویم پړاو کې چې پرون ترسره شو، د اکثریت رایې په ګټلو سره بریالی اعلان شو.

د سعودي عربستان مشرتابه د ایران د ولسمشرۍ تر وخت مخکې ټاکنو کې اصلاح غوښتونکي کاندید مسعود پزشکیان ته مبارکي ورکړه او هیله یې ښودلې چې دا بریا د دواړو هېوادونو د اړیکو ودې ته زمینه برابره کړي.

مسعود پزشکیان د ایران ولسمشرۍ ټاکنو په دویم پړاو کې چې پرون ترسره شو، د اکثریت رایې په ګټلو سره بریالی اعلان شو.

سعودي عربستان او د هغه سیمه‌ییز رقیب ایران چې په یمن او سوریه کې د مخالفو جهتونو ملاتړ کوي، تېر کال د چین په منځګړیتوب خپلې اړیکې عادي کړې.

د سعودي عربستان دولتي اژانس ایس‌پي‌اې(SPA) خبر ورکړی چې ملک سلمان پزشکیان ته د مبارکۍ پیغام لېږلی او هیله یې ښودلې چې د دواړو هېوادونو ترمنځ به ډیپلوماتیکې اړیکې دوام ومومي.

اوکرایني ځواکونه: د روسیې د بې پیلوټه الوتکو د یوې بلې حملې څپه مو شنډه کړې

د اوکراین هوايي ځواکونو نن په ټلګرام کانال کې لیکلي چې نن سهار وختي د دوی دښمنانو د شاهد په نوم د ۲۷ بې پیلوټه الوتکو په ذریعه حملې کړې دي.
د اوکراین هوايي ځواکونو نن په ټلګرام کانال کې لیکلي چې نن سهار وختي د دوی دښمنانو د شاهد په نوم د ۲۷ بې پیلوټه الوتکو په ذریعه حملې کړې دي.

د اوکراین هوايي ځواکونه وايي، نن سهار یې د روسیې د بې پیلوټه الوتکو د یوې بلې حملې څپه شنډه کړې چې د اوکراین ۱۲ ساحې یې په نښه کړې وې.

تر دې مخکې د اوکراین یوه محلي چارواکي ویلي وو چې مسکو پر دونیڅک سیمې د رهبري شویو بمونو په حملې سره لږ تر لږه ۵ کسان ووژل او ګڼ نور ټپیان کړل.

د اوکراین هوايي ځواکونو نن په ټلګرام کانال کې لیکلي چې نن سهار وختي د دوی دښمنانو د شاهد په نوم د ۲۷ بې پیلوټه الوتکو په ذریعه حملې کړې دي.

د اوکراین دغه ځواک وايي، دوی توانېدلي د دغو الوتکو له جملې ۲۴ یې پر دنیپروپیټروفسک، پولتاوا، زاپوریژیا، خرسون، خارکیف، دونیڅک، سومي، چرنيهیف، وینیڅیا، کییف، کیروفوهراد او میکولاییف سیمو نسکورې کړي.

بلخوا د پلازمېنې کییف په شمالي سیمه سومي کې محلي چارواکو ویلي چې د روسیې بې پیلوټه الوتکو د اوبو د سیستم برښنا پرې کړې ده چې د اوبو د رسولو بهیر یې ټکنی کړی دی.

د اوکراین دولتي رسنیو په عین حال کې د پلازمېنې کییف په شمال ختیځه سیمه سسپلاین کې د څو چاودنو خبر ورکړی دی.

حماس د جګړې د پای ته رسېدو لپاره د امریکا وړاندیز منلی

په غزه کې د روانې جګړې له کبله د اوښتو زیانونو یو انځور
په غزه کې د روانې جګړې له کبله د اوښتو زیانونو یو انځور

حماس د امریکا د متحدو ایالتونو هغه وړاندیز منلی چې په غزه کې د جګړې د پای ته رسېدو لپاره د یوې موافقې له لومړي پړاو څخه ۱۶ ورځې وروسته د سرتېرو او نارینه‌وو په ګډون د اسراییلي یرغملو د خلاصون لپاره خبرې پیلوي.

د حماس یوې جګپوړې سرچینې نن شنبې وویل چې دا ډله چې امریکا او اروپایي ټولنه یې د یوې ترهګرې ډلې په توګه پېژني، له هغې غوښتنې چې اسراییل دې لومړی د دایمي اوربند لپاره ژمنه وکړي او له هغې وروسته به دوی موافقه لاسلیک کړي، تېره شوې ده.

دغې سرچینې د موضوع د حساسیت له کبله د خپل هویت پټ ساتلو په شرط رویترز آژانس ته ویلي چې حماس منلې چې په لومړۍ مرحله کې د شپږو اوونیو خبرو له لارې دې دغه هدف ترلاسه شي.

یوه فلسطیني چارواکي چې د سولې د نړیوالو هڅو څخه خبر دی، ویلي، که اسراییل دغه وړاندیز ومني، کېدای شي هغه په غزه کې د اسراییل او حماس ترمنځ د نهه میاشتنې جګړې د پای ته رسولو لپاره د موافقې یو چوکاټ رامنځته کړي.

مسعود پزشکیان د ایران د ولسمشرۍ د دوهم پړاو انتخاباتو ګټونکی اعلان شو

مسعود پزشکیان
مسعود پزشکیان

د ایران د انتخاباتو چارواکو اعلان وکړ چې اصلاح غوښتونکي کاندید مسعود پزشکیان د ایران د ولسمشرۍ د دوهم پړاو انتخابات وګټل.

د ایران د انتخاباتو د کمېسیون ویاند محسن اسلامي د ایران د دولتي تلوېزیون له لارې اعلان وکړ چې پخواني د زړه جراح پزشکیان ۵۳،۷ سلنه رایې ګټلې او د رایو شمېر یې ۱۶ میلیونه او ۳۸۴زره او ۴۰۳ ته رسېږي او د هغه سیال سعید جلیلي ۴۴،۳ سلنه رایې خپلې کړې او د رایو شمېر یې ۱۳ ملیونه او ۵۳۸زره او ۱۷۹ ته رسېږي.

د ایران د ولسمشرۍ په دې دوهم پړاو انتخاباتو کې چې پرون جمعه ترسره شول، د ګډونکونکو شمېر نژدې پنځوس سلنه ښودل شوی چې هغه د لومړي دور د ۴۰ سلنه په پرتله زیات دی.

مسعود پزشکیان له ۲۰۰۸م کال راهیسې د ایران د پارلمان غړی دی او د ۲۰۱۶م نه تر ۲۰۲۰ کاله پورې چې کله منځلارو او اصلاح پالو په پارلمان کې اکثریت درلود، د پارلمان د مرستیال په توګه دنده ترسره کوله.

پزشکیان په ایران کې پر ښځو د اسلامي حجاب د عملي کولو بڼه تر پوښتنې لاندې راوستې او له لوېدیځ سره یې د خبرو په ملاتړ غږ اوچت کړی دی.

خو نوموړی د اسلامي جمهوریت د اصولو ملاتړ هم کوي او ویلي یې دي چې د غوره کېدو په صورت کې به د ایران د ستر مشر علي خامنه يي تګلارې تعقیب کړي.

دغه انتخابات له وخت مخکې د ایران د پخواني ولسمشر ابراهیم رییسي چې د بهرنیو چارو له وزیر حسین امیر عبداللهیان او یو شمېر نورو چارواکو سره د مې میاشتې پر ۱۹مه د څرخي الوتکې د نسکورېدو په پېښه کې مړ شو، د ځای ناستې د ټاکلو لپاره ترسره شوې.

د اروپا فوټبال جام؛ په کوارټر فاینل کې انګلستان له سویس او هالنډ له ترکیې سره سیالۍ لري

د انګلستان له مخکېنۍ لوبې یو انځور
د انګلستان له مخکېنۍ لوبې یو انځور

د اروپا د ملتونو د فوتبال جام د کوارټر فاینل سیالیو په لړ کې نن انګلستان له سویس سره لوبه کوي او هالنډ هم له ترکیې سره مخامخ کېږي.

پرون هم د څلورو ټیمونو تر منځ لوبې وشوې.

فرانسې د پینالټي شوټونو په پړاو کې پرتګال ته ماتې ورکړه او نیمه پایلوبې ته یې ځان ورساوه.

د پینالټي شوټونو په پړاو کې د فرانسې لوبغاړو ۵ ګولونه ووهل، خو د پرتګال درې لوبغاړو ګول ترسره کړ او دوه په ګول وهلو بریالي نه شول.

په بله لوبه کې هسپانیا د ۲- ۱ په مقابل کې کوربه جرمني ته ماتې ورکړه او نیمه پایلوبې ته ورسېده.

د ولسمشرۍ لپاره د سیالیو له دوام څخه د بایډن د لاس په سر کېدو په هدف هڅې پيل شوي

د جو بایډن او ډونالډ ټرمپ د وروستۍ مناظرې یوه څنډه
د جو بایډن او ډونالډ ټرمپ د وروستۍ مناظرې یوه څنډه

امریکایی سناتور مارک وارنر په دې لټه کې دی چې د ډیموکراټ سناتورانو یوه ډله جوړه کړي څو له جوبایډن څخه وغواړي چې د جمهوریپالو له کاندید ډونالډ ټرمپ سره د تېرې اوونۍ په مناظره کې د خپل چلند له امله د ولسمشرۍ لپاره د سیالیو له دوام څخه لاس واخلي.

واشنګټن پوسټ ورځپاڼې دا خبره د دوو کسانو له قوله چې نومونه یې پټ ساتل شوي، خو له دغو هڅو خبر دي، نن په یوه راپور کې کړې ده.

په دغه راپور کې ویل شوي چې د ډیموکراټانو په منځ کې دغه احساس ورځ تر بلې پیاوړی کېږي چې بایډن نه شي کولای په سیالۍ کې پاتې شي.

د راپور له مخې سناتور وارنر نورو ته ویلي چې دی دې ته ژوره اندېښنه لري چې بایډن نه شي کولای د ټرمپ د ماتولو لپاره بریالۍ کمپاین پر مخ بوځي.

ټاکل شوې د امریکا د ولسمشرۍ انتخابات د نومبر د میاشتې په پنځمه ترسره شي.

فوټبال؛ فرانسه د پرتګال په ماتولو سره نیمه پایلوبې ته ورسېده

د فرانسې او پرتګال د سیالۍ یوه څنډه
د فرانسې او پرتګال د سیالۍ یوه څنډه

د فوټبال د یورو کپ په دویمې منځلوبې کې فرانسې د پینالټي شوټونو په پړاو کې پرتګال ته ماتې ورکړه او نیمه پایلوبې ته یې ځان ورساوه.

د جمعې په شپه ناوخته د جرمني په کوربتوب د فرانسې او پرتګال ترمنځ د کوارټرفاینل سیالي د لوبې د اضافي وخت په لوبولو سره هم مساوي روانه وه.

د پینالټي شوټونو په پړاو کې د فرانسې لوبغاړو ۵ ګولونه ووهل، خو د پرتګال درې لوبغاړو ګول ترسره کړ او دوه په ګول وهلو بریالي نشول.

دا سیالي فرانسې ۵-۳ وګټله او نیمه پایلوبې ته ورسېده چې د جولای په ۹مه نېټه به له هسپانیې سره مخ شي.

په دې سیالۍ کې د فوټبال دوه مخکښو لوبغاړو ګیلین ایمباپې د فرانسې او کرېسټیانو رونالډو د پرتګال لوبډلمشري کوله.

ټاکل شوې چې د شنبې په ورځ د جولای په ۶مه نېټه د کوارټرفاینل دوه نورې سیالۍ ترسره شي، لومړۍ سیالي به د انګلستان او سویس ترمنځ او دویمه به د نیدرلینډ او ترکیې ترمنځ وي.

تمه ده چې د یورو کپ پایلوبه د جولای په ۱۴مه نېټه ترسره شي.

په ایران کې تر وخت مخکې ټاکنو پایلې ښایي نن اعلان شي

په ایران کې د ولسمشرۍ ټاکنو له بهیره یو انځور
په ایران کې د ولسمشرۍ ټاکنو له بهیره یو انځور

په ایران کې د ولسمشرۍ تر وخت مخکې ټاکنو نتیجې ښايي نن شنبه اعلان شي.

دغه ټاکنې د تېرې شپې تر ۱۲ بجو پورې تمدید شوې.

دغه ټاکنې د تېرو انتخاباتو د دوو مخکښو کاندیدانو، اصلاح غوښتونکي مسعود پزشکیان او د تندلاري سعید جلیلي ترمنځ وشوې.

په ایران کې چې د وګړو شمېر یې څه باندې ۸۵ ملیونو ته رسېږي، دغه ټاکنې د پخواني ولسمشر ابراهیم رییسي د ځایناستي د ټاکلو لپاره وشوې.

د تېرې جمعې په ټاکنو کې یوه کاندید هم اکثریت رایې ونه ګټلې، ځکه ټاکنې دویم پړاو ته لاړې.

د ایران پخوانی ولسمشر ابراهیم رییسي، د بهرنیو چارو وزیر حسین امیر عبداللهیان او ځینې نور چارواکي د مې میاشتې پر ۱۹مه د څرخي الوتکې د نسکورېدو په پېښه کې مړه شول.

حماس تمه لري څو په غزه کې د جګړې د درېدو لپاره ژر له اسراییل ځواب ترلاسه کړي

غزه کې د اسراییلي ځواکونو د عملیاتو یو انځور
غزه کې د اسراییلي ځواکونو د عملیاتو یو انځور

د حماس ډلې، چې د امریکا متحد ایالتونه او اروپايي ټولنه یې یو تروریستي سازمان ګڼي یو مخکښ مشر وايي، دوی تمه لري چې په غزه کې د جګړې د درېدو لپاره ژر له اسراییل ځواب ترلاسه کړي.

د حماس دغه چارواکي اسامه حمدان د فرانسې خبري اژانس ته پرون ویلي، ممکن دغه ځواب نن شنبه سهار دوی ته ورسېږي چې ورسره په غزه کې جګړه ودرول شي او د یرغمل شویو خلاصون ته زمینه برابره شي.

په همدې حال کې د اسراییل مرکچیان چې مشري یې د استخباراتي ادارې مشر ډېوېډ برنیا کوي، په دوحه کې له قطري منځګړو سره له خبرو وروسته پرون خپل هېواد ته روان شول.

د حماس ډلې لوړرتبه چارواکي اسامه حمدان ویلي، د حماس ډلې پوځي څانګه لا هم په ښه وضعیت کې ده او د اسراییلي ځواکونو په وړاندې د جګړې توان لري.

په غزه کې د اسراییل او حماس ډلې ترمنځ جګړه وروسته له هغې پیل شوه چې لومړی حماس ډلې د اکټوبر میاشتې پر اوومه پر اسراییل په حملې سره ۱۲۰۰ کسان ووژل او ۲۵۰ نور یرغمل کړل.

نور راوښيه

XS
SM
MD
LG