د پاکستان پوځ په خیبرپښتونخوا ایالت کې له امریکا سره د ګډو پوځي تمرینونو خبر ورکوي.

د پاکستان د پوځ د عامه اړیکو دفتر نن په یوه بیان کې وویل چې دا تمرینونه د دواړو هېوادونو د پوځي ځواکونو ترمنځ د همکارۍ د کچې د پیاوړتیا او د تروریزم پر ضد د مبارزې په چاره کې د همغږۍ په هدف روان دي.

په بیان کې راغلي چې دا پوځي تمرینونه د جون په ۲۹مه په پبي سیمه کې پیل شوي او دوه اوونۍ دوام کوي.

خیبرپښتونخوا له ناامنه ایالتونو څخه دی او د پاکستان پوځ د وسله والو مخالفینو له هغې ډلې د پاکستان طالبانو د ځپلو لپاره هلته بیا بیا پوځي عملیات کړي دي.

د اوکراین ولسمشر ولودیمیر زیلینسکي له لوېدیځو هېوادونو ته خپله هغه غوښتنه بیا تکرار کړې چې د ده هېواد ته د هوايي مدافعې پرمختللي سیستمونه او د لیرې واټن ویشتونکې وسلې ورکړي.

زیلینسکي دا غوښتنه وروسته له هغه وکړه چې په دنیپرو سیمه کې د روسیې د بې پیلوټه الوتکو او توغندیو په نننۍ حمله کې پنځه کسان ووژل شول.

زیلینسکي پر خپله ایکسپاڼه لیکلي چې یوازې دوه شیان د روسیې د روان وحشت مخه نیولای شي؛ د هوايي مدافعې سیستم او لیرې واټن ویشتونکې وسلې.

دی زیاتوي چې د نړۍ مشران په دې توګه د خلکو ژوند خوندي کولای شي.

زیلینسکي دا غوښتنه مخکې هم هغه مهال کړې وه چې په ویلنیانسک سیمه کې د جون په ۳۰مه د روسیې یوه توغندویي برید اوه کسان ووژل او ۳۵ نور ټپیان کړل.

د پاکستان او تاجکستان مشرانو په خپل ننني ملاقات کې پر دوه اړخیزو اړیکو سربېره پر افغانستان خبرې کړي او سوله‌ییز او سوکاله افغانستان یې د سیمې د خوندیتوب لپاره اړین بللی دی.

د پاکستان صدر اعظم شهباز شریف نن چهارشنبه په دوشنبې کې د تاجکستان له ولسمشر امام علي رحمان سره وکتل او تر خپل منځه یې د ستراتیژیکو همکاریو موافقه هم لاسلیک کړې ده.

د پاکستان بهرنیو چارو وزارت په یوه اعلامیه کې ویلي چې دواړو مشرانو په افغانستان کې د ثبات لپاره یو ټولشموله حکومت مهم بللی دی.

د اعلامیې له مخې شريف ویلي، دا مهال یې هېواد د کراچۍ بندر په وسیله د افغانستان له لارې تاجکستان ته مالونه لېږدوي، خو په خبره یې غواړي د سړک او رېللارې په وسیله تاجکستان سره وصل شي.

پاکستان او تاجکستان تر دې وړاندې ویلي چې دوی ته د افغانستان له خاورې امنیتي ګواښونه متوجه دي، خو طالبانو بیا دا اندیښنې بې ځایه بللي او ډاډ یې ورکړی چې هیچا ته به افغانستان له خاورې زیان نه رسېږي.

د ناټو غړو هېوادونو له اوکراین سره په راتلونکي ۲۰۲۵م میلادي کال کې د ۴۰ میلیارده یورو پوځي مرستې موافقه کړې ده.

رویټرز او د "جرمني ډي‌پي‌اې" خبري اژانسونو نن چهارشنبه د یو شمېر ډيپلوماتانو په حواله ویلي، د ناټو غړي لا هم نه دي توانېدلي چې جګړه ځپلي اوکراین ته د څو کلونو مرستو یوه بسته باندې سلا شي.

د ناټو سرمنشي ینس سټولټنبرګ له غړو هېوادونو غوښتي چې د راتلونکې اوونۍ تر غونډې مخکې چې په واشنګټن کې جوړېږي پر دې سلا شي چې هر کال به اوکراین ته ۴۳ میلیارده ډالر ورکوي.

د ناټو غړو هېوادونو تراوسه د سټولټنبرګ د دغې غوښتنې ملاتړ نه دی کړی.

د اسټرالیا د کرکټ ادارې یوځل بیا ویلي چې په افغانستان کې د ښځو د حقونو تر تامینېدو پورې له دغه هېواد سره دوه اړخیزې لوبې نه کوي.

کریک انفو ویبپاڼې نن چهارشنبه د اسټرالیا د کرکټ د اجرایوي مشر نیک هاکلي په حواله ویلي چې دوی د افغانستان له کرکټ بورد سره وخت نا وخت پر دې مسئله غږېږي او هیله کوي چې راتلونکې کې بېرته لوبې پيل کړي.

اسټرالیا له ۲۰۲۲م کال راهیسې درې ځله په همدې دلایلو له افغانستان سره د کرکټ پلان شوې دوه اړخیزې لوبې لغوه کړي، خو لوبډله یې بیا په پنځوس اوریز او شل اوریز نړیوال جام کې له افغانستان سره مخامخ شوې ده.

افغان لوبډلې په شل اوریز نړیوال جام کې چې تازه پای ته ورسېد، اسټرالیا ته ماتې ورکړه.

د اسټرالیا کرکټ بورد داسې مهال افغانستان کې د ښځو د حقونو پر تامین ټینګار کوي چې تازه په اسټرالیا کې د افغانستان د کرکټ یو شمېر ښځینه لوبغاړو د کرکټ له نړیوالې شورا غوښتي چې دوی ته په کډوالۍ کې د لوبډلې د جوړېدو اجازه ورکړي.

د کرکټ نړیوالې شورا تراوسه د افغان کرکټرانو دغه لیک ته ځواب نه دی ورکړی.

دوحې ته د طالبانو د حکومت د تللي پلاوي مشر او د حکومت ویاند ذبیح‌الله مجاهد وایي، د غونډې په څنډه کې یې له امریکایي استازو سره د زندانیاتو پر تبادلې هم خبرې کړي دي.

مجاهد نن چهارشنبه په کابل کې خبریالانو ته وویل، دوه امریکایي اتباع دا مهال د دوی په زندان کې دي او په خبره یې د ازادۍ لپاره یې باید د طالبانو د حکومت شرطونه ومنل شي.

هغه وايي: "له امریکایي استازو سره د خبرو پر مهال ځینې مسایل چې باقي پاته وو، تر بحث لاندې راغلل. هغو کې د دوو امریکایي اتباعو موضوع هم چې افغانستان کې بندیان دي یاده شوه. د هغوی د خلاصون په اړه مخکې هم مونږ دوی سره بحثونه کړي وو. د افغانستان شرایط باید ومنل شي، مونږ هم اتباع لرو چې امریکا او ګوانتانامو کې بندیان دي. مونږ باید د امریکایانو په بدل کې خپل اتباع را خلاص کړای شو. څرنګه چې هغوی ته امریکایي اتباع مهم دي، مونږ ته افغانان مهم دي."

مجاهد دا معلومات ورنه کړل چې څه شمېر افغانان دا مهال په ګوانتانامو او د امریکا په زندانونو کې بندیان دي.

مجاهد دوحې ته د خپل پلاوي سفر هم ګټور یاد کړ او وې ویل، یوه لاسته راوړنه یې داوه چې غونډه د دوی له شرایطو سره سمه ترسره شوه.

د دوحې په غونډه کې د افغان ميرمنو او مدني فعالانو ځای خالي و.

ټاکل شوې د امریکا ولسمشر جوبایډن او د اسراییلو صدراعظم بنیامین نتنیاهو د همدې جولای میاشتې په وروستیو کې په واشنګټن کې سره وګوري.

رویټرز خبري اژانس نن چهارشنبه لیکلي چې نتنیاهو د امریکا کانګرس ته د غزې د جګړې په اړه د وینا په هدف واشنګټن ته سفر کوي.

نوموړی به د جولای میاشتې په ۲۴مه د امریکا کانګرس ته وینا وکړي.

که څه هم امریکا د غزې په جګړه کې د اسراییل سیاسي او پوځي ملاتړ کوي، خو ولسمشر بایډن په ځینو مواردو کې د اسراییلو پر چلند اندېښنه ښودلې ده.

په غزه کې د اسراییلو د جګړې له پيله تراوسه د څه باندې ۳۸ زره ملکیانو د وژلو راپورونه ورکړل شوي دي.

د غزې جګړه د تېرې اکټوبر میاشتې په ۷مه، وروسته تر هغه پيل شوه چې حماس وسله‌والې ډلې چې امریکا او اروپایي ټولنه یې ترهګر بولي، پر اسراییلو غلچکي برید سره شاوخوا ۱۲۰۰ کسان ووژل او ۲۵۰ نور یې برمته کړل.

اروپایي چارواکي وایي، چیني او روسي کمپنۍ په ګډه غواړي چې د ایران شاهد ډوله بې پیلوټه الوتکو په څېر نور جنګي ډرونونه جوړ کړي.

دغو اروپایي چارواکو د نوم نه ښودو په شرط بلومبرګ ته ویلي، دغو کمپنیو تېر ۲۰۲۳م کال کې پر دې خبرې پيل کړي چې د شاهد په څېر الوتکې جوړې کړي او یوه هغه یې سږ کال د ازمېښت لپاره روسیې ته هم لېږلې ده.

د چین د دفاع ویبپاڼې او یو شمېر رسنیو یې ویلي چې هېواد یې د همداسې بې پیلوټه الوتکو پر جوړولو کار کوي.

شاهد داسې بې پيلوټه الوتکې دي چې د توغندي په څېر توغول کیږي او هدف ته د رسېدو په وخت کې چاودنه کوي.

لوېدیځ هېوادونه ایران تورنوي چې روسیې سره د اوکراین په جګړه کې د دې ډول الوتکو مرسته کوي.

د ازادي راډيو د خبر مرکزي څانګې نن چهارشنبه د اروپایي چارواکو په حواله ویلي، چینایي شاهد الوتکې تراوسه د اوکراین په جګړه کې نه دي کارول شوي.

د هند په اتر پردېش کې د مذهبي مراسمو پر مهال د ټېل ماټېل له کبله د مړو شمېر ۱۲۱ ته پورته شوی دی.

د جرمني "ډي‌پي‌اې" خبري اژانس لیکلي، د هند په شمال کې دغو پرونیو مراسمو ته شاوخوا یونیم لک کسان راټول شوي وو او د مراسمو د پای په شېبو کې خلک تر پښو لاندې شوي دي.

د راپورونو له مخې ګڼ شمېر خلک د چټلو اوبو یوې ویالې ته لوېدلي او ګڼو نورو بیا د خلکو تر پښو لاندې سا ورکړې ده.

په مړو شویو کې ګڼ شمېر یې ښځې دي او لږ تر لږه ۷ ماشومان هم په کې شامل دي.

د اتر پردېش د پوهنې وزیر ساندیپ سنګ ویلي، د پېښې په اړه پلټڼې پیل شوي او په خبره یې هر هغه څوک چې ملامت وپېژندل شي، سزا به ورکړل شي.

د یمن حوثي یاغیانو د سې شنبې په ورځ اعلان وکړ چې دوی د عراق له اسلامي مقاومت ډلې سره په ګډه د اسراییل پر ضد ګډ پوځي عملیات کړي او په حیفا کې یې پر یوه مهم مرکز برید کړی دی.

د حوثي یاغیانو ویاند یحیی سريع په یوه تلوېزیوني وینا کې پرته له دې چې د برید دقیق ځای ته اشاره وکړي، ویلي چې دا پوځي برید د یو شمېر کروز توغندیو په مرسته شوی دی.

حوثي یاغیانو په غزه کې له فلسطینیانو سره د پیوستون په ادعا له نوومبر راهیسې پر نړیوالو بېړیو ګڼ بریدونه کړي دي.

خو په دې وروستیو اوونیو کې د "عراق د اسلامي مقاومت" غورځنګ، چې د حوثي یاغیانو متحد بلل کېږي، له دوی سره ګډ عملیات کوي.

په عراق کې د اسلامي مقاومت ډلې د تېرې چهارشنبې په ورځ د اسراييل په جنوبي بندري ښار ايلات کې د بريد مسووليت پر غاړه واخيست.

په هغه ورځ د اسراییل پوځ په یوه خبرپاڼه کې په ايلات بندر کې برید تایید کړ، خو ويې ويل چې بهرنۍ بې پيلوټه الوتکه ونه توانېده چې د اسراییل حریم ته ننوځي.