د پاکستان دفاع وزیر وایي چې ښایي ځواکونه یې د افغانستان د خاورې دننه پوځي عملیات وکړي.

خواجه اصف له امریکا غږ اردو سره په مرکه کې چې نن خپره شوه، ویلي، که په عزم استحکام عملیاتو کې ضرورت پېښ شو، د پولې پورې غاړه به په افغانستان کې هم د تحریک طالبان پاکستان ډلې پر ضد عملیات وشي.

پاکستان د جون په ۲۲مه د عزم استحکام په نوم د عملیاتو اعلان وکړ.

ټاکل شوې چې پاکستاني پوځيان په خیبرپښتونخوا او بلوچستان کې دغه عملیات پيل کړي.

د پاکستان د حکومت مخالفو سیاسي ګوندونو، تحریک انصاف، عوامي نېشنل ګوند او جمعیت علمای‌اسلام د عزم استحکام له عملیاتو سره مخالفت څرګند کړی دی.

په کابل کې واکمنو طالبانو تر اوسه د خواجه اصف د خبرو په غبرګون کې څه نه دي ویلي.

پاکستاني جنګي الوتکو د مارچ په میاشت کې په خوست او پکتیکا کې بمبارۍ وکړې چې هغه وخت طالبانو دا حملې وغندلې او ویې ویل چې شپږ تنه ملکیان په پکتیکا او دوه تنه په خوست کې د دغو بریدونو له امله وژل شوې دي.

د افغانستان د بشري حقونو په برخه کې د ملګرو ملتونو ځانګړي راپور ورکوونکي ریچارډ بینېټ د دوحې په درېیمه غونډه کې د افغان ښځو او مدني ټولنې د غړیو په ګډون ټینګار کړی دی.

بینېټ په نیویارک ټایمز کې په خپره کړې مقاله کې چې نن خپره شوه، لیکلي چې د افغان ښځو، نجونو او مدني ټولنې د غړیو اغېزمن ګډون د دوحې په غونډه کې په‌کار دی.

د دوحې درېیمه غونډه د ملګرو ملتونو په کوربه‌توب د یکشنبې په ورځ پيلېږي چې د شاوخوا ۳۰ هېوادونو او نړیوالو موسسو استازي په‌کې برخه اخلي.

طالبان هم په دې غونډه کې ګډون کوي.

په افغانستان کې د ملګرو ملتونو د مرستندویه پلاوي یا یوناما مشرې روزا اوتنبایووا ویلي چې د افغان ښځو او مدني ټولنو استازې به د دوحې تر دوه ورځنۍ غونډې وروسته د سې شنبې په ورځ د قطر په پلازمېنه کې په یوې بلې غونډه کې ګډون وکړي.

پاکستاني رسنۍ وايي چې د افغانستان لپاره د پاکستان ځانګړی استازی اصف درانی به د دوحې په کنفرانس کې د دغه هېواد استازیتوب وکړي.

ډیپلوماتیکو سرچینو پرون د پنجشنبې جیو نیوز تلوېزیون ته وویل، پاکستان پرېکړه کړې چې د افغانستان په اړه د ملګرو ملتونو په کوربه‌توب د دوحې په درېیم کنفرانس کې ګډون وکړي.

د دې میاشتې په پیل کې، طالب چارواکو هم د دوحې د خبرو په درییم پړاو کې، چې ټاکل شوې د جون په ۳۰مه پیل شي، خپل ګډون تایید کړ.

سرچينې زياته کړې چې په دې خبرو کې به د افغانستان لپاره د پاکستان ځانګړى استازى اصف درانى او په بهرنيو چارو وزارت کې د لوېديځې اسيا لپاره د بهرنيو چارو وزارت مرستيال احمد نسيم وړایچ د پاکستان استازيتوب وکړي.

د طالبانو د ټرانسپورټ او هوايي چلند وزارت د هوا پېژندنې ریاست وايي، نن د سرطان ۸مه نېټه د افغانستان په ۱۶ ولایتونو کې د باران، تېزو بادونو او سېلابونو د راوتلو اټکل کوي.

د هوا پېژندنې ریاست پرون په یوه خبرپاڼه کې وویل چې د سالنګونو په شمول په پروان، بغلان، کابل، بدخشان، تخار، پنجشېر، نورستان، کونړ، لغمان، کاپیسا، ننګرهار، سمنګان، میدان وردګ، پکتیا، بامیان او لوګر ولایتونو کې د بادونو، باران او سېلابونو احتمال شته.

د خبرپاڼې پر اساس، د باران اندازه په بېلابېلو سیمو کې له ۱۵ تر ۳۵ میلي مترو او دغه راز د بادونو د سرعت کچه په بېلابېلو برخو کې په ساعت کې له ۵۰ تر ۸۰ کیلومتره پورې اټکل شوې ده.

د چهارشنبې په ورځ د باراوانو او ورپسې د سېلابونو د جاري کېدو له کبله د بامیان ولایت په ورس، پنجاب، اول نمبر یکاولنګ او کهمرد ولسوالیو کې لږترلږه ۱۹ تنه مړه او ۱۰ تر پرون ناوخته پورې د ۹ تنو مړ ژوندی نه و موندل شوی.

په بدخشان کې بیا سیلونو خلکو ته مالي زیانونه اړولي دي.

په افغانستان کې د ملګرو ملتونو د بشري مرستو د تنظیم ادارې یا اوچا پرون له افغانستان سره د اسټرالیا د ۲،۶ میلیون ډالره مرستې خبر ورکړ.

اوچا وويل، دا پيسې د افغانستان د بشري مرستو صندوق ته ورکړل شوې دي.

اوچا پرون پنجشنبې پر خپله ایکسپاڼه یا پخواني ټویټر لیکلي چې له افغانستان سره د اسټرالیا د دې مرستې مننه کوي.

د ملګرو ملتونو د دې ادارې پر اساس، اسټرالیا د افغانستان د بشري مرستو له صندوق سره تر اوسه پورې څه باندې ۷۴ میلیون اسټرالیايي ډالره مرسته کړې ده.

دغه صندوق په ۲۰۱۴م کال کې په افغانستان کې تاسیس شو او د ملګرو ملتو په وینا له هغه وخت راهیسې یې تر یو میلیارد ډالرو زیاتې مرستې ترلاسه کړي دي.

تر دې مخکې اوچا اعلان کړی و چې د افغانستان د بشري مرستو صندوق تېر کال ۸۱،۶ میلیون ډالره مالي مرسته ترلاسه کړې وه.

ملګري ملتونه وايي، په افغانستان کې نژدې ۲۵ میلیون وګړي بشري مرستو ته اړتیا لري.

د طالبانو تر کنټرول لاندې باختر خبري اژانس لیکي، د ملګرو ملتونو د ماشومان د ملاتړ صندوق په هرات کې د زلزله ځپلو ښوونځیو په بیا رغونه او د دې ولایت خلکو ته د پاکو اوبو رسولو په برخو کې مرستې کوي.

دا خبرې نن د جون ۲۷مه د هرات والي نور احمد اسلام جار او په افغانستان کې د ملګرو ملتونو د ماشومانو د ملاتړ صندوق مشر ډاکتر تاج الدین اویوالي ترمنځ شوي دي.

د اژانس په ټکو، اسلام جار د ماشومانو د ملاتړ صندوق له هغوو مرستو هم مننه کړې چې د کهسان ولسوالی خلکو ته د پاکو اوبو خدمتونه برابر کړي.

تېر کال په هرات کې پرله‌پسې زلزلو په سلګونه کسان مړه او په زرګونه نور بې کوره کړل.

دې زلزلې د کورونو سربېره ډېر شمېر ښوونځي هم ویجاړ کړي وو.

د طالبانو په کنټرول کې د کندهار ولایت د سرپوزې زندان چارواکي وايي، هغه درې بندیان يې نیولي چې غوښتل يې له دې زندانه وتښتي.

دې زندان نن د جون۲۷مه د یوې خبرپاڼې په خپرولو سره ویلي چې له دې بندیانونو څېړنې روانې دي.

د راپورونو پر بنسټ، دا کسان د قلمي وسلو او نشه‌يي مواد د لېږد په تور زنداني شوي دي.

د طالبانو په بیاځلي واکمنېدو سره دا لومړی ځل دی چې له یوه زندانه د تېښتې هڅه کېږي.

د هواپېژندنې ریاست وايي، نن او سبا د سالنګونو په ګډون په نورستان، پنجشېر، پروان، بدخشان، تخار، سمنګان، بغلان، کونړ، ننګرهار، لغمان، کاپیسا، کابل، لوګر، پکتیا او میدان وردګ کې د تالندې برښنا او اورښتونو اټکل شوی چې اندازه به یې له ۱۵ تر ۳۵ ملي مټرو پورې وي.

د طالبانو د ټرانسپورټ او هوايي چلند وزارت د هواپېژندنې ریاست نن په یوه اطلاعیه کې ویلي چې د سالنګونو په ګډون په شمالي، لوېدیځو او مرکزي ولایتونو کې د تېرو بادونو، خاورو او دوړو اټکل هم شته، چې د بادونو سرعت به په یوه ساعت کې له ۵۰ تر ۸۰ کیلومترو پورې وي.

د طالبانو سترې محکمې خبر ورکړی چې د کونړ ولایت په مروره ولسوالۍ کې یوه ښځه او یو نارینه د "نامشروع اړیکو" په تور په ۳۹- ۳۹ دُرو ووهل شول.

دغې محکمې نن په یوه خبرپاڼه کې ویلي چې د تعزیري سزا دغه پرېکړه د سترې محکمې له‌خوا تایید او بیا تطبیق شوې ده.

تر دې مخکې هم د افغانستان په بېلابېلو ولایتونو کې خلکو ته د تعزیري سزاګانو ورکولو خبرونه ورکړل شوي دي.

د بشري حقونو د ملاتړ ډلو د دغه ډول سزاګانو د پای ته رسېدو غوښتنه کړې ده.

د کرکټ د شل اوریز نړیوال جام په لومړنۍ نیمه پایلوبه کې سویلي افریقا د ۹ وېکټو په توپير افغانستان ته ماتې ورکړه او پایلوبې ته یې لار پیدا کړه.

دا لومړی ځل دی چې سویلي افریقا د شل اوریزو سیالیو پایلوبې ته رسېږي.

یاده سیالي چې نن پنجشنبه د کابل پر وخت سهار ۵:۰۰ بجې پیل شوې وه، پچه یې افغانستان وګټله او توپوهنه یې انتخاب کړه.

افغان لوبډلې د ټولو لوبغاړو په له لاسه ورکولو سره په ۱۱.۵ اورونو کې ۵۶ مندې وکړې.

په افغان توپوهونکو کې یوازې عظمت‌الله عمرزي ۱۰ منډې وکړې، نور ټول توپوهونکي یې تر لسو په کمو منډو وسوځېدل.

د سویلي افریقا لپاره په توپ اچونه کې مارکو یانسن او تبریز شمسي ۳ـ۳ لوبغاړي، نارکیا او رباډا دوه دوه لوبغاړي وسوځول.

د سویلي افریقا لوبډلې ورکړل شوی هدف د یوه لوبغاړي تر سوځېدو وروسته په ۸.۵ اورونو کې پوره کړ او پایلوبې ته ورسېدل.

تر یادې سیالۍ وروسته په نړیوال جام کې د افغانستان ملي لوبډلې سفر هم بشپړ شو.

ټاکل شوې چې نن سه شنبه به دویمه نیمه پایلوبه د هندوستان او انګلستان ترمنځ د کابل پر وخت ماښام ۷:۰۰ بجې پيل شي.

د دویمې نیمه پایلوبې ګټونکې لوبډله به د جون په ۲۹مه نېټه له سويلي افریقا سره پایلوبه ولوبوي.