د لبنان حزب‌الله ډلې نن سهار اعلان وکړ چې، تل‌ابیب ښار ته نږدې دوه مهمې اډې او د حیفا په لوېدیځ کې د سمندري ځواکونو یوه اډه يې په نښه او ویجاړې کړې دي.

د لبنان حزب‌الله ډله یو سیاسي او پوځي ډله ده، چې د لبنان ډېرې جنوبي سیمې کنټرولوي.

امریکا، حزب‌الله ډله د یوې ترهګرې ډلې په توګه پېژني، خو اروپايي ټولنې بیا د دې ډلې یوازې پوځي څانګه د ترهګریزو سازمانونو په لېست کې شامله کړې ده.

دا په‌داسې حال کې ده چې د امریکا د بهرنیو چارو وزیر انتوني بلېنکن به نن د خپل سفر پر اوږدو کې اسراییل ته ځي او هلته به پر اسراییلو د اوربند موافقې ته د رسېدو لپاره لا زیات فشار راوړي.

د لبنان په جنوب او د پلازمېنې بیروت په جنوبي سیمو باندې د اسرايیلو له‌خوا د تېرې شپې له سختو بریدونو وروسته، حزب‌الله اعلان وکړ چې د تل‌‌ابیب په څنډه کې یې د ګلیلوت او نیرت په سیمه کې د پوځي استخباراتو مرکزونه په نښه کړي دي.

حزب‌‌الله همدا راز اعلان وکړ چې د اسرايیلو په شمال کې د حیفا څخه بهر یوه سمندري اډه یې هم په راکټونو ویشتې ده.

د تلفاتو په اړه سمدستي راپور نه‌شته.

اسرايیلي چارواکو ویلي، د تل‌‌ابیب په جنوب ختیځو سیمو کې د هوايي بریدونو لپاره د خطر زنګ هغه مهال وغږول شو، چې یوه توغندي له لبنان څخه تېر شو او په یوه ازاده سیمه کې ولګېده .

بريتانيا اوکراين ته د نورو وسلو د پېرلو لپاره ۲.۴ ميليارده ډالره پور ورکوي.

د بریتانیا د دفاع وزیر جان هیلي نن دا خبر په داسې حال کې اعلان کړ چې اوکرایني ځواکونه په ختیځ کې د روسي ځواکونو د سختو بریدونو پر وړاندې په جګړه بوخت دي او هره ورځ د اوکراین پر ښارونو او تاسیساتو د روسیې له‌خوا هوايي بریدونه دوام لري.

چارواکو ویلي، په دې وروستیو بریدونو کې د روسیې پولې ته څېرمه په سویل ختیځ ښار سومي کې د یوه ماشوم په ګډون درې کسان وژل شوي دي.

هغه پیسي چې بریتانیا یې اوکراین ته ورکوي د هغو ۵۰ میلیاردو ډالرو پور یوه برخه ده چې تېر جون د جي۷ G7 یا د نړۍ د اوو پرمختللو صنعتي هېوادونو له‌خوا اعلان شوی و.

دا پور باید په لوېدیځ کې د روسیې د کنګل شویو شتمنیو د عایداتو له لارې تمویل شي.

د ۲۰۲۲م کال د فبرورۍ له میاشتې راهیسې چې روسیې پر اوکراین پراخ برید کړی، د روسیې شاوخوا ۳۰۰ میلیارده ډالره بهرنۍ سرمایه په لوېدیځ کې کنګل شوې ده.

د امريکا د دفاع وزير لويډ آسټن د اوکراين چارواکو ته ويلي، هېواد به يې کيیف ته د روسي ځواکونو پر وړاندې په جګړه کې هر هغه څه ورکړي چې اړتيا ورته لري.

د ازادي راډيو د خبر د مرکز له مخې، آسټن دغه څرګندونې د اکټوبر په ٢١مه کيیف ته له رسېدو وروسته وکړې.

په عین حال کې مسکو د اوکراین په ښارونو او د هغه هېواد زېربناو باندې د نویو بریدونو څپې پیل کړي دي.

ويل کېږي په دغو بريدونو کې زيات ملکي وګړي ټپيان شوي او د دغه هېواد مهم بنسټونه ويجاړ شوي دي.

د امریکا د بهرنیو چارو وزیر انټوني بلېنکن د دوشنبې په ورځ منځني ختیځ ته تللی چې په غزه کې د اوربند د راوستلو لپاره نوې هڅې وکړي.

په داسې حال کې چې د امریکا ولسمشرۍ ټاکنو ته دوه اوونۍ پاتې دي، بلېنکن د حماس د مشر یحیی سنوار وژل کېدل د اوربند لپاره یو نوی فرصت ویني.

حماس د امریکا متحده ایالاتو او اروپايي اتحادیې له‌خوا د تروریستي سازمان په توګه پېژندل شوی دی.

دا له تېر اکټوبر د اسراییلو او حماس ترمنځ د جګړې له پیل راهیسې منځني ختیځ ته د دغه جګپوړي امریکايي دیپلومات ۱۱م سفر دی.

انټوني بلېنکن د اګست په میاشت کې اسراییلو ته د خپل وروستي سفر په ترڅ کې خبرداری ورکړ چې ممکن د امریکا په مشرۍ د اوربند د طرحې لپاره دا وروستی چانس وي.

د روسیې ولسمشر ولادیمیر پوتین به د برېکس سرمشریزې په پای کې د ملګرو ملتونو له سرمنشي سره وګوري.

د پوتین مرستیال یوري یوشاکوف د دوشنبې په ورځ وویل چې له انټونیو ګوټېرېش سره به دا لیدنه په کازان کې د سرمشریزې په څنډه کې وشي.

د برېکس سرمشریزه به نن د سه شنبې په ورځ پیل شي او تر پنجشنبې پورې به دوام وکړي.

په دې سرمشریزه کې د روسیې پر ولسمشر سربېره، د برازیل، هند، چین، جنوبي افریقا او یو شمېر نورو هېوادونو مشران ګډون کوي.

مسکو هڅه کوي چې له دې فرصت څخه په استفادې داسې وښيي چې پر اوکراین د برید له امله د روسیې د منزوي کولو لپاره د لوېدیځ هڅې ناکامې شوي دي.

که څه هم ټاکلې شوې د پنجشنبې په ورځ ګوټېرېش له پوتین سره وګوري، خو له دې سره هم داسې نه ښکاري چې مسکو یا کییف دې د جګړې د پای ته رسولو لپاره پراخو خبرو اترو ته چمتو وي.

ګوټېرېش تل د مسکو پر کړنو نیوکه کړې او ویلي یې دي چې پر اوکراین کې د روسیې اوسنی عملیات د نړۍ لپاره یوه "خطرناکه سابقه" رامنځته کوي.

د ملګرو ملتونو عمومي منشي تل د عادلانه سولې غوښتنه کړې چې په هغه کې نړیوال قانون او د اوکراین ځمکنۍ بشپړتیا ته درناوی وشي.

ملګرو ملتونو د لبنان د حزب‌الله پر اړوند یوه شرکت د اسراییلو بریدونه غندلي او ویلي یې دي چې دغو بریدونو "بېلابېلې ښاري او د استوګنې سیمې" په نښه کړي او ملکي تاسیساتو ته یې ډېر زیان اړولی دی.

د ملګرو ملتونو د بشري حقونو د دفتر اعلامیه وايي، په دغو بریدونو کې القرض الحسن مالي ټولنې پورې تړلي تاسیسات په نښه شوي دي.

د یکشنبې په ورځ اسراییلي ځواکونو په بیروت، د ختیځې بقاع درې او جنوبي لبنان کې د دې ادارې پر څانګو بریدونه وکړل.

دا مالي شرکت، چې په رسمي ډول د خیریه بنسټ توګه ثبت شوی د ۱۹۸۰ کلونو راهیسې خپلو پېرودونکو ته د سرو زرو د ګروۍ په بدل کې له سود پرته پور ورکوي.

د دې موسسې ډېری مراجعین شیعه مسلمانان دي، خو سني مسلمانان او عیسویان هم د دې ادارې له خدمتونو ګټه اخلي.

امریکا پر دغه بنسټ بندیزونه لګولي او د لبنان حزب‌الله یې تورن کړی چې له دغه بنسټ څخه د خپلو مالي فعالیتونو د پټولو او نړیوال مالي سیستم ته د لاسرسي لپاره کار اخلي.

په پاکستان کې د ماشومانو د ګوزڼ یا پولیو د پېښو له زیاتېدو سره ټاکل شوې په دغه هېواد کې د پولیو ضد واکسین نوی کمپاین پیل شي.

په دې کمپاین کې چې راتلونکې اونۍ پیلېږي او ډېری تمرکز به یې د پاکستان په شمال لوېدیځ، د افغانستان سرحد ته نږدې سیمو کې وي، ټاکل شوې چې لږتر لږه ۳۲ ملیونه ماشومانو ته په کې واکسین وشي.

د پوليو واکسين کمپاین د کارکوونکو او د هغو پوليسو پر وړاندې تاوتريخوالی چې د هغوی ساتنه کوي، تل په پاکستان کې د پوليو د له منځه وړلو د هڅو د شنډولو لامل ګرځي.

سږ کال په پاکستان کې د پولیو مثبتې ثبت شوې پېښې ۳۹ او په افغانستان کې بیا دا شمېر ۲۲ ښودل شوی دی.

د پولیو ضد واکسیناسیون او د عامه پوهاوي د پروګرامونو په پلي کولو کې کمښت د پولیو د پېښو د زیاتېدو لامل ګرځېدلي.

پولیو یوه ساري ویروسي ناروغي ده چې هېڅ درملنه نه لري او یوازې واکسین کولی شي ماشومان له دې خطرناکې ناروغۍ وژغوري.

له افغانستان او پاکستان پرته په ټوله نړۍ کې پولیو له منځه وړل شوې ده.

د البانیا مخکېنی ولسمشر ایلیر میټا د فساد د هغو تورونو له کبله نیول شوی چې د دې هېواد د فساد ضد ځانګړې څارنوالۍ له‌خوا پرې لګېدلي دي.

د دې تورونو جزییات نه دي روښانه شوي، خو د میټا ویاند نن یوې خبري غونډې ته وویل، د پخواني ولسمشر نیول یو غیرمسوولانه اقدام دی.

میټا په تېره جون میاشت کې هم د ځینو مسایلو په اړه چې ده بې معنا خبرې بللې وې د ګروېږنو لپاره احضار شوی و، خو ده هغه مهال ویلي وو چې دا مسایل په ده پورې اړه نه لري.

میټا له دې مخکې د البانیا د صدراعظم، د پارلمان د رییس او بهرنیو چارو وزیر پر دندو هم کار کړی و.

اسراییلو نن د لبنان په جنوب کې د هغه هوايي برید له کبله بخښنه وغوښته چې په نتیجه کې یې درې لبناني سرتېري ووژل شول.

د اسراییل پوځ وايي، د لبنان د پوځ پر ضد جګړه نه کوي، خو عسکرو یې داسې انګېرله چې د ایران پلوې حزب‌الله ډلې د وسله‌والو کوم موټر یې په نښه کړی دی.

د اسراییلو په برید کې د حزب‌الله د یوې اړوندې مالي ادارې له لسو ډېرې څانګې هم په نښه شوې دي.

اسراییلي چارواکي وايي چې په دې مالي اداره کې ډېرو عامو خلکو هم خپلې د سپما پیسې ساتلې.

په داسې حال کې چې د حماس ډلې د مشر یحیی سنوار وژنې ټول منځني ختیځ ته ټکان ورکړی حزب‌الله تېره اونۍ اعلان وکړ چې د اسراییلو د اشغالګرو ځواکونو پر ضد یې د جګړې نوی پړاو یې پیل کړی دی.

د امریکا دفاع وزیر لویډ اسټین له اوکرایني چارواکو سره د خبرو لپاره نن دوشنبه د اکټوبر ۳۰مه کییف ته ورسېد.

دا په داسې حال کې ده چې روسیې پر اوکراین تازه بریدونه کړي چې له امله یې یو شمېر ملکیان ټپیان شوي او مهم تاسیسات ویجاړ شوي دي.

اسټین په ایکس‌پاڼه یا پخواني ټویټر کې لیکلي چې دا څلورم ځل دی چې د امریکا د دفاع وزیر په توګه اوکراین ته ځي، او دا ښيي چې امریکا له نړیوالې ټولنې سره په ګډه د اوکراین ملاتړ ته ژمنه ده.