د لبنان روغتیا وزارت نن وویل چې په لبنان کې د پيجر "پيغام استونکي" په واسطه په یوه وخت چاودنو لږترلږه اته کسان وژلي او ۲۷۵۰ نور یې ټپيان کړي دي.

تر دې مخکې ایران پلوه حزب‌الله ډلې وویل چې په وژل شویو کې د دوی دوه کسان او یوه نجلۍ شاملې دي.

د لبنان د روغتیا وزیر فراس الابیض وویل چې د ۲۰۰ ټپيانو روغتیایي وضعیت نازک دی.

ایرانۍ رسنۍ وایي چې په دغو ټپيانو کې په بیروت کې د ایران سفیر مجتبی امیني هم شامل دی.

حزب‌الله وایي، هغه پيجرونه چې د دوی د ګوند غړي استعمالوي هغه په یوه وخت چاودلې دي.

د میټا د ټکنالوژۍ شرکت چې د فېسبوک د ټولنیزې شبکې خاونده ده، وايي چې پر خپلو پلټفارمونو یې د آر ټي RT او رشیا ټوډې Russia Today خبري شبکې او د روسیې نورې دولتي رسنۍ بندې کړې دي.

میټا په یوه بیان کې ادعا کړې ده چې دا رسنۍ د خپلو پټو نفوذي عملیاتو لپاره پر ټولنیزو شبکو له غولوونکو تکتیکونو کار اخلي.

د میټا د ټکنالوژۍ شرکت ویلي چې پر دې رسنیو د ممنوعیت کار به په راتلونکو ورځو کې عملاً پیل شي.

دا ممنوعیت د روسیې د دولتي رسنیو پر وړاندې د نړۍ د ترټولو لویې ټولنیزې شبکې د اقداماتو د سختېدو څرګندونه کوي.

د امریکا پخوانی ولسمشر او د ولسمشرۍ په راروانو انتخاباتو کې د جمهوریپال ګوند کاندید ډونالډ ټرمپ دوه ورځې وروسته له دې چې په فلوریډا کې یې د وژنې ناکامه هڅه وشوه، نن د سپمټبر ۱۷مه یوځل بیا انتخاباتي منډې ترړې پیل کړې او مشیګان ایالت ته یې سفر وکړ.

د یکشنبې په ورځ د ټرمپ د ګلف په کلب کې یو وسله‌وال کس وموندل شو.

امنیتي چارواکو ویلي چې مظنون برید کوونکي په یوازې ځان د ټرمپ د وژلو پرېکړه کړې وه.

ټرمپ غوښتل چې په دې پېښه کې ولسمشر جوبایډن او مرستیاله یې کمالا هاریس ښکېل کړي.

دې پېښې ته سیاسي اړخ ورکولو هغه هم د انتخاباتو په درشل کې په امریکا کې سیاسي کړکېچ زیات کړی دی.

په عین حال کې په انتخاباتو کې د ډیموکرات ګوند کاندیده کمالا هاریس به نن په پنسلوانیا ایالت کې د کمپاین غونډه جوړه کړي.

ایراني چارواکو اتریشی وګړی کریستیان ویبر چې په لوېدیځ اذربایجان ولایت کې په یوه جرمي قضیه کې نیول شوی و، نن خوشې کړ.

د ایران د قضا خبري اژانس میزان دا خبر ورکړی.

اتریش په ۲۰۲۲ کال کې ویلي و، یو وګړی یې په هغه قضیه کې چې د مهسا امیني د وژل کېدو له پېښې وروسته په ایران کې له پراخو مظاهرو سره ارتباط نه‌لري، نیول شوی دی.

د میزان د خبر له‌مخې ویبر د اسلام د عفوې د اصل په رڼا کې خوشې شوی دی.

خبر زیاتوي چې، نوموړی په تهران کې د اتریش سفیر ته سپارل شوی، ترڅو له‌‌دې هېواده د وتلو امکان ورته برابر کړي.

میزان د هغه جرم جزییات نه‌دي ورکړي چې ویبر یې له کبله نیول شوی و.

نوي ډيلي له مسلمانانو سره د هند د چلند په اړه د ایران د لوی مذهبي مشر ایت‌الله علي خامنه‌ای څرګندونې غندلې دي.

خامنه‌ای پرون په یوه وینا کې وویل که موږ په میانمر، غزه، هند یا نورو ځایونو کې د مسلمانانو له کړاوونو بې‌خبره و اوسو، ځانونه مسلمانان نه‌شو بللی.

د هند د بهرنیو چارو وزارت نن په ځواب د خامنه‌ای څرګندونې د نه منلو وړ وبللې او په یوه بیان کې یې وویل چې د دې څرګندونو اساس ناسم معلومات دي.

بیان زیاتوي، هغه هېوادونه چې په نورو هېوادو کې د اقلیتونو د حقونو خبره کوي، لومړی دې خپل عمل ته وګوري خو د هند د بهرنیو چارو وزارت ویاند ټينګار وکړ، چې نوې ډیلي او تهران په خپلو کې پیاوړې اړیکي پالي.

پرون دوشنبه د امریکا د متحده‌ایالتونو لږه تر لږه په پنځو ایالتونو کې ټاکنیزو چارواکو ته مشکوکې بستې لېږل شوي، خو په دغو بستو کې د خطرناکو موادو د موجودیت راپور نه‌دی ورکړل شوی.

په دغو کڅوړو کې پوډرو ته ورته مواد آیووا، نیبراسکا، ټینیسي، وایومینګ او اوکلاهما ایالتونو کې د بهرنیو چارو وزارت استازولیو او د ایالتو انتخاباتي دفترونو سکرټرانو ته لېږل شوي.

په دغو ایالتونو کې چارواکو دا موضوع تایید کړې ده.

د امریکا د تحقیقاتو فډرال اداره FBI او د متحده‌ایالاتو د پوستي خدماتو اداره د دې موضوع په باب څېړنه کوي.

دا په تېر یوه کال کې دوهم ځل دی چې د انتخاباتو څو ایالتي دفترونو ته د پوستې له لارې مشکوکې بستې لېږل کېږي.

دا په‌داسې حال کې ده، چې په څو ایالتونو کې د ولسمشرۍ، مشرانو جرګې، کانګرس او ایالتي دفترونو لپاره تر ټاکنو دوې میاشتې مخکې رایه اچونه پیل شوې ده.

د اسرايیل حکومت پرون دوشنبه ویلي، د اسرايیل او د لبنان د شیعه ډلې حزب‌الله ترمنځ ښايي یوه بالقوه پراخه جګړه په نژدې کېدو و‌ي.

د اسرايیل دفاع وزیر یواف ګالانت د امریکا د متحده‌ایالتونو له منځ‌ګړي اموس هوخشټاین سره په کتنه کې ویلي، د یوې احتمالي موافقې لپاره وخت ځکه له لاسه په وتلو دی، چې حزب‌الله ډلې د فلسطینیانو له افراطي ډلې حماس سره ځان نژدې کړی دی او د شخړې له ختمولو یې ډډه کړې ده.

د امریکا متحده‌ایالتونه او اروپايي ټولنه حماس ډله یو تروریستي سازمان ګڼي.

ګالانت په خپلو خبرو کې ویلي، یوازنۍ لار دا پاتې ده، چې د اسراييل په شمال کې خپلو کورونو د بې‌ځایه شویو کسانو بېرته ستنېدل یقیني شي، چې دا کار یوازې په پوځي اقدام کېدای شي.

تر دې مخکې د اسرايیل صدراعظم بنیامین نتنیاهو هوخشټاین ته ویلي وو، تر هغو چې د اسرايیل په شمال کې امنیتي وضعیت ښه شوی نه وي، دا امکان نه‌لري، چې د اسرايیل بې‌ځایه شوي کسان خپلو اصلي مېنو ته ستانه شي.

۱۱ میاشتې مخکې په غزه کې د اسرايیل او حماس ترمنځ د جګړې له پیل وروسته تقریباً هره ورځ د اسرايیل د پوځ او حزب‌الله ترمنځ د پولې په اوږدو کې پوځي نښتې کېږي.

په پام کې ده د امریکا د متحده‌ایالتونو د بهرنیو چارو وزیر انتوني بلېنکن نن سه‌شنبه مصر ته لاړ شي.

د امریکا د بهرنیو چارو وزارت پرون دوشنبه په یوه اعلامیه کې ویلي، بلېنکن به له مصري چارواکو سره په غزه کې د اوربند د ټینګښت او د پاتې یرغمل شویو د خلاصون لپاره د یوې موافقې پر هڅو خبرې وکړي.

دا سفر داسې وخت کېږي، چې فلسطیني چارواکي وايي، پرون هم پر غزې تړانګه د اسرايیل په هوايي حملو کې د پنځو ښځو او څلورو ماشومانو په ګډون ۱۶ کسان ووژل شول.

د امریکا د متحده‌ایالتونو او مصر تر څنګ قطر هم له میاشتو راهیسې په غزه کې د اوربند د ټینګښت او د یرغمل شویو د خلاصون لپاره پر یوه موافقه د سلا کېدو د هڅو منځ‌ګړیتوب کوي.

د بې‌سرحده ډاکټرانو ټولنې يا MSF په روسیه کې خپل فعالیت وځنډاوه.

دې ټولنې چې مرکز یې په سویس کې دی، پرون (د سپټمبر ۱۶مه) په یوه بیان کې وویل، په روسیه کې خپل فعالیت په ډېرې خواشینۍ سره پای ته رسوي.

د MSF د روسیې د څانګې مشر ویلي چې، د دوی فعالیت د خپلواکۍ، بې پرې توب او اخلاقو پر اصولو ولاړ دی او خلکو ته د هغوی د اړتیاو پر اساس خدمات وړاندې کوي.

ايم‌ايس‌ايف له ۱۹۹۲ کال راهیسې په روسیه کې فعالیت کاوه، خو دا ټولنه وايي په تېره اګست میاشت کې د عدلیې وزارت له‌خوا په یوه مکتوب کې ورته وویل شول چې د دې مؤسسې نوم د غیرحکومتي ادارو له نوملړ څخه ایستل شوی دی.

د ایران نوی ولسمشر مسعود پزشکیان وايي، له هغه راهیسې چې ده د جولای میاشتې په پای کې د ولسمشر په توګه کار پیل کړی، روسیې ته هيڅ راز وسلې نه‌دي ورکړل شوي.

د ښاغلي پزشکیان له خبرو داسې ښکارېده چې غواړي له متحده‌ایالتونو سره د ایران د اټومي پروګرام په اړه د مستقیمو خبرو ور پرانیستی پرېږدي.

خو ۶۹ کلن پزشکیان چې ځینې څارونکي د نسبتا معتدل ولسمشر په سترګه ورته ګوري، په عین حال کې د ایران پر دولتي ټلوېزیون د خبرو پرمهال د بالستیک توغندیو د پروګرام په اړه د تهران پر پخواني سخت‌دریځ ټینګار وکړ.

نوموړي وویل، هېواد به یې د دې پروګرام د محدودولو په هدف د لوېدیځ له بندیزونو سره سره له‌دې پروګرام څخه هيڅکله په شا نه‌شي.

پزشکیان دا څرګندونې داسې مهال کوي چې، په ایران کې دننه او د سیمې په کچه د منځني ختیځ حالات خورا ډېر کړکېچن دي.