د خیبر پښتونخوا ایالت په کرمې ولسوالۍ کې د دو قومونو ترمنځ شخړو کې د وژل شویو کسانو شمېر لږترلږه ۳۷ ته رسېدلی دی.

په دغو خونړیو شخړو کې چې د دوو سني او شیعه قبیلو ترمنځ پیل شوې او نن یې پرله‌پسې شپږمه ورځ ده، له ۱۵۰ زیات کسان ټپیان شوي دي.

د فرانس‌پرېس خبري آژانس د راپور له مخې، په کرمه کې یوه چارواکي په دې شرط چې نوم یې خپور نه‌شي دې آژانس ته وویل چې د دې ولسوالۍ په لسو ځایونو کې سختې نښتې دوام لري چې په‌کې له درنو وسلو هم کار اخیستل کېږي.

د دغه چارواکي په خبره، د یوه اوربند لپاره د امنیتي چارواکو او نورو قومونو هڅو تراوسه نتیجه نه‌ده ورکړې.

دغه چارواکي په روانو نښتو کې د ۳۷ کسانو د وژل کېدو او ۱۵۳ نورو د ټپي کېدو خبره کړې ده.

په پېښورکې یوه بل چارواکي چې د هغه نوم هم پټ ساتل شوي، ویلي چې په روانو شخړو کې ۲۸ کورونه ویجاړ شوي دي.

د چارواکو په وینا، شخړې د ځمکې پر سر پیل شوي چې اوس یې فرقه‌‌یي بڼه خپله کړې ده.

تر دې مخکې د روان کال په جولای میاشت کې د دغو قومونو ترمنځ نښتو کې ۳۵ کسان وژل شوي وو چې وروسته دواړو خواوو د یوې جرګې په منځګړیتوب سوله وکړه.

اوکرایني چارواکي د داریوب بندر پر ایزمیل د روسیې د بې پیلوټه الوتکو یا ډرونونو په پراخو بریدونو کې د درې کسانو د وژل کېدو او ۱۱ نورو د ټپي کېدو خبرورکوي.

د ادیسه د سیمې والي اولې کیپرپر ټیلیګرام چینل د دغې مرګ‌ژوبلې خبرورکړی او ویلي یې دي چې په ټپیانو کې یو یې ماشوم دی.

ایزمیل چې د ناټو د غړې رومانیا پولې ته څېرمه پروت او د اوکراین د غلو د صادراتو یو مهم مرکز ګڼل کېږي، په ځلونو د روسیې په بریدونو کې په نښه شوی دی.

ایزمیل ته نژدې د رومانیا د تولسیا د سیمې چارواکو خلکو ته په یوه خبرداري کې ویلي چې بې پیلوټه الوتکې پولې ته نژدې لیدل شوي دي.

د اوکراین د هوایي مدافعې ځواکونو همدارنګه د خیرسون، میکولاییف او سمي په سیمو کې د روسیې د بې پیلوټه الوتکو او توغندیو د بریدونو په وړاندې خلکو ته خبرداری ورکړی دی.

په خیبر پښتونخوا ایالت کې د پولیسو په یوه مرکز کې په یوه چاودنه کې لږ تر لږه ۱۵ پولیس ټپیان شوي دي.

د پولیسو یوه افسر د ټیلیفون له لارې ازادي رادیو ته وویل چې چاودنه پرون ماښام د سپټمبر په ۲۶ مه د خیبر پښتونخوا د صوابۍ د پولیسو په سلاکوټ کې شوې ده.

یوه بل افسر، چې د پیښې په ځای کې حاضر و، وویل چې د ټپیانو شمیر ممکن تر ۳۰ پورې لوړ وي.

تر دې دمه کومې ډلې د دې پېښې مسوولیت نه دی منلی.

د ۲۰۲۳م کال په اپرېل میاشت کې د خیبر پښتونخوا ایالت په سوات سیمه کې د ترهګرۍ ضد پولیسو په دفتر کې په دوو چاودنو کې ۱۷ تنه وژل شوي وو.

د اوکراین ولسمشر ولودیمیر زیلینسکي پرون پنجشنبې په سپینه ماڼۍ کې د امریکا له ولسمشر جو بایډن سره وکتل.

په دې کتنه کې بایډن یو وار بیا ټینګار وکړ چې روسیه به د اوکراین پر ضد په خپل یرغل کې بریالۍ نه شي.

ده زیلینسکي ته وویل چې امریکا به په هر پړاو کې د اوکراین ترڅنګ وي.

له زیلینسکي سره تر کتنې لږ مخکې بایډن په جګړه کې د اوکراین د بري لپاره دغه هیواد ته نژدې ۸ میلیارد ډالره نوره پوځي مرسته اعلان کړه.

زیلینسکي له بایډن سره په کتنه کې وویل چې د امریکا د مرستو او ملاتړ منندوی دی.

د متحدو ایالتونو د بهرنیو چارو وزارت د هغو معلوماتو په بدل کې چې د ایران د سپاه پاسداران د غړي شهرام پورصفی د نیولو یا محکومېدلو سبب شي، تر ۲۰ میلیون ډالرو پورې جایزه وړاندیز کړې ده.

د سپاه پاسداران غړی شهرام پورصفی دوه کاله وړاندې د امریکا د عدلیې وزارت له‌خوا په دې تورن شو چې د امریکا د ملي امنیت د پخواني سلاکار جان بولټن د وژلو لپاره یې یوه اُجرتي قاتل ته ۳۰۰زره ډالر ورکړي وو.

د ۲۰۲۳م کال په جون کې هم، د متحدو ایالتونو حکومت د سپاه پاسداران د بهرنیو استخباراتو پر مشر او یو شمېر نورو غړیو، چې شهرام پورصفی هم په‌کې شامل وو، بندیزونه اعلان کړل.

د امریکا د بهرنیو چارو وزارت له هغه بیان سره سم، چې پرون پنجشنبې یې خپور کړ، ویل شوي چې شهرام پورصفی په متحدو ایالتونو کې د ۲۰۲۱ له اکټوبر څخه تر ۲۰۲۲م تر اپرېل پورې هڅه کړې چې د جان بولټن د وژلو لپاره په ۳۰۰زره ډالره کسان وګوماري.

د پولنډ یوې محکمې یو د اوکراین او بل د بېلاروس وګړي روسیې ته د جاسوسۍ په تور په بند محکوم کړل.

د پولنډ دولتي خبري اژانس پاپ پرون پنجشنبه په یوه راپور کې ویلي، دا دوه کسان بېلاروس، اوکراین او روسیې د هغو ۱۶ وګړو په ډله کې وو چې د پولنډ د داخلي امنیت د ادارې له‌خوا نیول شوي وو.

دوی د یوې جاسوسۍ شبکې په اړه د تحقیقاتو په لړ کې نیول شوي وو چې په ماموریتونو کې یې اوکراین ته د پوځي تجهیزاتو د لېږد په اړه د اطلاعاتو راټول شامل وو.

وارسا وايي، د کییف د ملاتړ لپاره په خپل رول کې یې د روسیې د جاسوسۍ او سبوتاژ کلیدي هدف په نښه کړ.

د اوکراین ۲۳ کلن وګړی چې ماکسیم ال معرفي شوی په شپږکاله بند او د څه کم ۴۰۰۰ ډالره جریمې په ورکړه محکوم شو او د بېلاروس د اولادزیسلاو پي په نوم وګړی په لس میاشتني بند او څه باندې ۲۶۰۰ ډالره جریمې محکوم شوی دی.

پرون هم د سوډان په پلازمېنه خرطوم کې د تازه نښتو راپورونه ورکړل شول.

د اسوشېټېډ پرېس اژانس د خبر له مخې، د سوډان پوځ د چټک ملاتړ ځواکونو په نوم له ملېشه‌وو د خرطوم د شاوخوا سیمو د نیولو لپاره پرون خپل پوځي عملیات وکړل.

د سوډان رسنیو د خرطوم په مربوطاتو او امدورمان ښار کې د پوځي تحرکاتو او هوايي حملو د زیاتېدو راپورونه ورکړي دي.

د پوځ یوه ویاند د پوځي عملیاتو خبرونه تایید کړل، خو په دې اړه یې نور جزییات نه دي ورکړي.

په همدې حال کې د سوډان روغتیا وزارت وايي چې په دغه هېواد کې د کولرا وبا له کبله د مړو شمېر په وروستیو دوو ورځو کې نږدې سلو ته زیات شوی دی.

د اسراییل صدراعظم بنیامین نتنیاهو پرون پنجشنبه وویل چې د هغه حکومت د لبنان له وسله‌والې ډلې، حزب‌الله سره د اسراییل په جګړه کې د ۲۱ ورځني اوربند لپاره د امریکا د متحده‌ایالاتو او د هغو د متحدانو فشار ته ځواب نه دی ویلی.

د نتنیاهو له دفتره په یوه بیان کې ویل شوي: "دا د امریکا او فرانسې وړاندیز دی چې صداعظم یې لا هم ځواب نه دی ورکړی."

د بیان له مخې، صدراعظم خپل پوځ ته امر کړی چې "په بشپړ ځواک سره جګړې ته دوام ورکړي."

د اسراییل پوځ په جلا خبرپاڼه کې ویلي چې د ټانکونو یوې لوا یې پرون سهار "د لبنان د پولې په څوکیلومترۍ کې په غرنیو سیمو کې" پوځي تمرین وکړ.

په خبرپاڼه کې ویل شوي: "د تمرین په ترڅ کې اسراییلي ځواکونو په شمالي محاذ کې د دښمن په قلمرو کې د مختلفو جنګي سناریوګانو لپاره خپل عملیاتي او لوژستیکي چمتووالی پیاوړی کړ."

په همدې حال کې د اسراییل دفاع وزیر یوآف ګالنت ژمنه کړې چې پر حزب‌الله ډلې به حملې دوام کوي.

تمه ده د امریکا د کانګرس یو دوه اړخیزه پلاوی چې پر پخواني ولسمشر ډونالډ ټرمپ د برید په تړاو څېړنې پیل کړې وې، غونډه وکړي.

دغه پلاوی به خپله لومړنۍ استماعیه غونډه نن د سپټمبر۲۶مه ځکه جوړوي چې قانون جوړونکي د امریکا په راتلونکو ټاکڼو کې د نوماندانو د امنیت په اړه اندېښمن دي.

دغه پلاوی چې اووه جمهوري غوښتونکې او شپږ ډیموکراتان په کې شامل دي، په تېرو دوو میاشتو کې يې هڅې کړې څو هغه امنیتي تېروتنې ومومي چې په پایله کې يې د جولای په ۱۳مه په پنسلوانیا کې پر ډونالډ ټرمپ له یوه بام څخه ډزې وشوې.

دغه پلاوی د هغه وسله‌وال کس په اړه هم څېړنې کوي چې په فلوریډا کې د ټرمپ د ګلف میدان ته نژدې هڅه کوله چې پر هغه برید وکړي.

د راپورونو پر بنسټ، دغه وسله‌وال د هغوو ونو له منځه چې د ټرمپ د ګلف میدان ته نژدې دي، ټرمپ په نښه کړې و چې یو پولیس افسر وپېژنده.

د امریکا ټاکڼې د راون کال په اکټوبر میاشت کې دي.

د خیبر پښتونخوا ایالت په کرمه سیمه کې د شیعه او سنیانو ترمنځ په روانو نښتو کې د وژل شویو شمېر ۳۴ ته رسېدلی دی.

روغتیايي چارواکو له سیمې د ازادي راډیو مشال برخې ته ویلي، تر ننه د سپټمبر۲۶مه پورې په دې نښته کې ۳۴ کسان وژل شوي او تر ۱۰۰ ډېر نور ټپیان دي.

د شیعه او سنیانو ترمنځ دا نښتې د روانې میاشتې په شلمه په بوشهره کې د ځمکې پر سر پیل شوي دي.

د سیمې اوسېدونکو د ازادي راډیو مشال برخې ته ویلي، دواړو خواوو د یوبل پر ضد درنې او سپکې وسلې کاروي چې خلکو ته يې د ځاني زیانونو سربېره، مالي زیانونه هم اړولي دي.

تر دې مخکې د روان کال په جولای میاشت کې هم په دې سیمه کې د ورته جګړې له امله د دواړو خواوو لسګونه کسان وژل شوي او ټپیان شوي وو.

کرمه په وروستیو کلونو کې د شیعه او سني اوسېدونکو ترمنځ د فرقه‌يي تاوتریخوالي شاهده ده.