د لاسرسۍ وړ لېنکونه

تازه خبر
شنبه ۲۳ چنګاښ ۱۴۰۳ کابل ۱۱:۳۴

نړۍ

غزې له میاشتو میاشتو ناکراریو وروسته یوه نسبتاً ارامه ورځ تېره کړه

د غزې یوه څنډه
د غزې یوه څنډه

غزې له میاشتو میاشتو ناکراریو وروسته پرون یوه نسبتاً ارامه ورځ تېره کړه.

دا ارامي وروسته له هغه رامنځته شوه چې اسراییلي پوځ د غزې په جنوبي سیمو کې د خپلو تعرضي عملیاتو یوه ورځنۍ تاکتیکي وقفه اعلان کړه.

دا وقفه د غزې په تړانګه کې د قحطۍ په اړه د ملګرو ملتونو د پرله پسې خبرداریو وروسته، غزې ته د لا زیاتو بشري مرستو د لیږد لپاره د مناسبو شرایطو د برابرولو په هدف اخیستل شوې.

د اسراییلو پوځ وايي، دغه تاکتیکي وقفه به هره ورځ د سهار له ۸ پیل او د ماښام تر ۷ بجو به دوام وکړي.

دا لا څرګنده نه ده چې دغه تاکتیکي وقفه به څومره وخت دوام وکړي.

د غزې په تړانګه کې د اسراییلو او د حماس د سخت دریځې ډلې ترمنځ له سختې جګړې اته میاشتې زیاتې واوښتې.

حماس د امریکا او اروپايي ټولنې له‌خوا د یوه تروریستي سازمان په توګه پېژندل کېږي.

د ورځې تازه خبرونه دلته ولولئ

د پاکستان قضا عمران خان او د هغه مېرمنې ته د غیرقانوني واده په قضیه کې برائت ورکړ

د پاکستان پخوانی صدراعظم عمران خان
د پاکستان پخوانی صدراعظم عمران خان

د پاکستان قضا نن پخواني صدراعظم عمران خان او د هغه مېرمنې ته د غیرقانوني واده په قضیه کې برائت ورکړ.

عمران خان او مېرمن یې بشرا بي بي په فبروري میاشت کې وروسته له هغه په ۷ کاله بند محکوم شول چې محکمې بشرا بي بي له خپل پخواني مېړه څخه تر طلاق وروسته د عدت د شرعي مودې په نه بشپړولو مجرمه وپېژندله.

دا دعوه د نوموړې پخواني مېړه محکمې ته وړاندې کړې وه.

عراق د ترکیې او سوریې ترمنځ د اړیکو ښه کېدو په هدف د خبرو کوربه‌توب اعلان وکړ

د عراق بیرغ
د عراق بیرغ

عراق نن شنبه اعلان وکړ چې په پام کې لري د ترکیې او سوریې ترمنځ د اړیکو ښه کېدو په هدف د خبرو کوربه‌توب وکړي.

له څه باندې یوې لسیزې د ګاونډیو هېوادونو ترکیې او سوریې ترمنځ اړیکې ترینګلې دي، په ځانګړي ډول په ۲۰۱۱م کال کې په سوریه کې د ولسي پاڅون تر پیل وروسته.

ترکیه د اپوزیسیون د هغو وسله‌والو ملاتړ کوي چې غواړي د سوریې د ولسمشر بشارالاسد رژیم نسکور کړي.

ترکیې له دیارلسو کلونو راهیسې په سوریه کې خپلو پوځي عملیاتو ته دوام ورکړی دی.

د عراق د بهرنیو چارو وزیر فواد حسین ویلي، چې هېواد یې د ترکیې او سوریې ترمنځ د منځګړیتوب لپاره اقدامات پیل کړی دي.

د عراق د دولتي اژانس (INA) د خبر له مخې ښاغلي حسین دغه څرګندونې د امریکا په متحدو ایالتونو کې کړې دي.

ملګرو ملتونو په لیبیا کې د "احمد سنوسي" په نوم د یوه خبریال د فوري خوشې غوښتنه وکړه

ارشیف
ارشیف

په لیبیا کې د ملګرو ملتونو مرستندوی ماموریت نن د یوه خبریال د فوري خوشې کېدو غوښتنه وکړه.

په پلازمېنه طرابلس کې دغه خبریال دوې ورځې مخکې نیول شوی دی.

د لیبیا لپاره د ملګرو ملتونو مرستندوی ماموریت (UNSMIL) ویلي، د جولای پر ۱۱مه د احمدسنوسي د خپلسرې نیونې په اړه سخته اندېښنه لري.

سنوسي چې په طرابلس کې خبریال دی، د وسط په نوم تلوېزیون کې یو تلوېزیوني هم پروګرام مخ ته وړي چې تر ډېره پر اقتصادي او ټولنیزو مسایلو بحث کوي.

هغه د تبدل په نوم انټرنېټي کانال هم لري.

له کله چې په ۲۰۱۱م کال کې د ناتو په ملاتړ د پاڅون پر مهال پخوانی رهبر معمر القذافي له واکه وپرځول شو، په دغه هېواد کې سیاسي کړکېچ روان دی.

بېلابېلې وسله‌والې ډلې د لیبیا پر بېلابېلو برخو کنټرول لري او څه باندې لس کاله کېږي چې وسله‌والې ډلې پر پلازمېنه طرابلس واک چلوي، خو په وروستیو کې یې موافقه کړې چې له دغه ښاره ووځي.

د لیبیا هغه حکومت چې په رسمیت پېژندل کېږي، د دغه هېواد پر لوېدیځ واکمن دی.

د ایران ولسمشر له اروپايي هېوادونو سره د اړیکو ښه‌والي ته په تمه دی

د ایران نوی ټاکل شوی ولسمشر مسعود پزشکیان
د ایران نوی ټاکل شوی ولسمشر مسعود پزشکیان

د ایران نوي ټاکل شوي ولسمشر مسعود پزشکیان پرون جمعه ویلي، دې ته په تمه دی چې له اروپايي هېوادونو سره د ایران اړیکې ښې شي.

خو ده بیا هم دغه هېوادونه تورن کړل چې پر تهران د امریکا د لګول شویو بندیزونو د اغېزو کمولو لپاره یې پر خپلو ژمنو سترګې پټې کړې دي.

پزشکیان دا څرګندونې په هغه مقاله کې کړي چې د ایران "تهران ټایمز" انګرېزۍ ژبې ورځپاڼې پرون خپره کړې ده.

مسعود پزشکیان تېره شنبه تر وخت مخکې ټاکنو په دویم پړاو کې د توندلاري کاندید سعيد جلیلي په وړاندې بریا خپله کړه.

۶۹ کلن پزشکیان له انزوا د ایران د راوتلو لپاره له غربي هېوادونو سره د رغوونکو اړیکو غوښتنه کړې ده.

هغه د ایران او نړیوالو قدرتونو ترمنځ د ۲۰‍۱۵م کال د اټومي تړون د بیا احیا کولو ملاتړ هم کړی دی.

واشنګټن په ۲۰۱۸م کال کې له دغه تړون څخه په یواړخیز ډول ووت او پر ایران یې بیا بندیزونه ولګول، ورسره ایران د تړون له شرایطو په تدریجي ډول شا ته کېدل پیل کړل.

پزشکیان ویلي له ټومي تړون د واشنګټن تر وتلو وروسته اروپايي هېوادونو ژمنه کړې وه چې د امریکا د بندیزونو د عواقبو کمولو لپاره به اقدامات کوي، خو پر خپلو دغو ژمنو یې سترګې پټې کړي.

په نیپال کې د پنځوسو تري تم شویو کسانو له ډلې لومړی مړی ترلاسه شو

په نیپال کې ژغورونکو ډلو نن د پنځوسو تري تم شویو کسانو له ډلې لومړی مړی ترلاسه کړ.
په نیپال کې ژغورونکو ډلو نن د پنځوسو تري تم شویو کسانو له ډلې لومړی مړی ترلاسه کړ.

په نیپال کې ژغورونکو ډلو نن د پنځوسو تري تم شویو کسانو له ډلې لومړی مړی ترلاسه کړ.

دغه کسان د پشه­کال تر اورښتونو وروسته د ځمکې­ښویېدنې له کبله لادرکه شوي دي.

د نیپال په مرکزي ولسوالۍ چیتوان کې پرون جمعه د ځمکې­ښویېدنه، سیند ته د موټرو د نسکورولو سبب شوه.

د پولیسو ویاند کمار نیوپاني د فرانسې خبري اژانس ته ویلي چې دغه مړی د پېښې له ځایه ۵۵ کیلومتره لیرې موندل شوی دی.

د اروپا د فوټبال اتلولۍ جام پایلوبه؛ اسپانیا او انګلستان سره سیالي کوي

د انګلستان لوبغاړي د یوې مخکېنۍ لوبې پر مهال
د انګلستان لوبغاړي د یوې مخکېنۍ لوبې پر مهال

ټاکل شوې د اروپا د ۲۰۲۴م کال د اتلولۍ جام پایلوبه سبا ناوخته وشي.

د اسپانیا او انګلستان ملي ټیمونه به سبا د کابل پر وخت د شپې یوولس نیمې بجې د برلین په المپیک لوبغالي کې سره مخامخ شي.

د نیمه پایلوبې په مرحله کې اسپانیا فرانسې او انګلستان هالنډ ته ماتې ورکړه او پایلوبې ته ووتل.

دغه مسابقې د جون میاشتې پر ۱۴مه پیل شوي چې ۲۴ لوبډلې په کې وې او د جرمني په لسو ښارونو کې وشوې.

د روسیې او امریکا دفاع وزیرانو د کړکېچ د احتمالي زیاتوالي د خطر کمولو په اړه خبرې کړي

د روسیې او امریکا بیرغونه
د روسیې او امریکا بیرغونه

د روسیې دفاع وزارت وایي، د روسیې دفاع وزیر اندري بیلوسوف او د امریکا دفاع وزیر لوید آسټین پرون جمعه په یوه ټیلیفوني تماس کې د کړکېچ د احتمالي زیاتوالي د خطر د کمولو په اړه خبرې وکړې.

په جرمني کې د لیرې واټن ویشتونکو توغندیو د ځای پر ځای کولو پرېکړه چې کرملین یې په وړاندې خبرداری ورکړی، کېدای شي د سړې جګړې په بڼه تقابل بېرته احیا کړي.

د روسیې دفاع وزارت په یوه بیان کې ویلي، د امنیتي ګواښونو د مخنیوي او د احتمالي تاوتریخوالي د خطر د کمولو په اړه خبرې وشوې.

د پنټاګون ویاندې سبرینا سینګ هم تأیید کړه چې دا ټیلفوني تماس د مسکو په نوښت شوی و، خو نور جزییات یې ورنه کړل.

سپینې ماڼۍ د جولای په لسمه اعلان وکړ چې د دفاعي اقدام په توګه به په جرمني کې اوږد واټنه وسلې ځای پر ځای کړي.

نایجریا کې د یوه ښوونځي د ودانۍ نړېدل؛ لږترلږه ۲۲ کسان مړه شوي

ارشیف
ارشیف

د نایجریا په مرکزي برخه کې د یوه ښوونځي د ودانۍ د نړېدو په پېښه کې لږترلږه ۲۲ تنه مړه شوې دي.

دا پېښه پرون جمعه د نایجریا د مرکزي ایالت پلاتوو په جوس ښار کې رامنځته شوې ده.

د چارواکو په وینا، شاوخوا ۱۳۰ کسان په نژدې روغتونونوکې تر درملنې لاندې دي.

ډېری قربانیان زده کوونکي او د ښوونځي کارکوونکي دي.

چارواکو ویلي چې، ښایي د مړو شمېر زیات شي ځکه شاوخوا دوه سوه زده‌کونکو د دې ښوونځي د ودانۍ په هغه برخه کې په ټولګیو کې په زده‌کړو بوخت و چې پرې راونړېده.

د ژغورنې کارکوونکي د نړېدلې ودانۍ تر خاورو خښتو لاندې د احتمالي ژوندي پاتې شویو لټه کوي.

ویل شوي چې د ښوونځي دوه پوړیزه ودانۍ وروسته له هغې راونړېده چې څو ورځې په سیمه کې سخت بارانونه و ورېدل.

د دې پېښې د اصلي لاملونو په اړه پلټنه پیل شوې ده.

الخیر فاونډېشن په غزه کې د خپل یوه لوړپوړي چارواکي د وژل کېدو خبر ورکړ

په غزه کې د روانې جګړې یو انځور
په غزه کې د روانې جګړې یو انځور

په بریتانیا کې دېره یوه مرستندویه بنسټ وویل، په غزه کې یې یو لوړپوړی چارواکی پرون جمعه د اسراییل په یوه هوایي برید کې وژل شوی دی.

الخیر فاونډېشن په یوه بیان کې وویل چې د اسراییل دغه هوایي برید د دوی پر ګدامونو چې د اسراییل له‌خوا اعلان شوې د بشرپالنې په خوندي سیمه کې موقعیت لري، شوی دی.

دې بنسټ همدارنګه په دې برید کې د نورو مرستندویه ټولنو د درې کارکوونکو د وژل کېدو خبر ورکړی چې له دې ګدامونو یې کار اخیست.

د اسراییل پوځ ویلي، د الخیر فاونډېشن وژل شوی غړی حسام منصور په حقیقت کې د حماس یو جګپوړی وسله‌وال و.

پوځ ویلي، هغه د بشري مرستو په دې بنسټ کې له خپل موقف څخه په استفادې د حماس لپاره چې امریکا او اروپایي اتحادیه یې د یوې ترهګرې ډلې په توګه پېژني، د پیسو راټولو لپاره کار اخیست.

کینیا کې د اعتراضونو پر مهال د پولیسو پر اقداماتو نیوکې؛ ولسمشر یې د پولیسو د مشر استعفا منلې

د کینیا کې د وروستیو اعتراضونو یو انځور
د کینیا کې د وروستیو اعتراضونو یو انځور

د کینیا ولسمشرۍ ماڼۍ پرون تایید کړه چې ولسمشر ویلیم رتو (William Ruto) د دغه هېواد د پولیسو د مشر جافیت کومي (Japhet Koome) استعفی ومنله.

د کینیا د پولیسو مشر کومي په دغه هېواد کې په وروسته له هغې استعفی وکړه چې د ځوانانو په مشرۍ د وروستیو اعتراضونو پر مهال د پولیسو پر اقداماتو او چلند سخت انتقادونه وشول.

په دغو اعتراضونو کې چې د مالیې د زیاتېدو خلاف تنظیم شوي وو، لږ تر لږه ۳۹ کسان ووژل شول.

په ځینو مواردو کې پولیسو د خلکو پر ډلو چې پر پارلمان یې یرغل وروړی و، ډزې وکړې.

نور راوښيه

XS
SM
MD
LG