په ایران کې د یوه اعدام شوي معترض مدافع وکیل د رژیم ضد تبلیغاتو په تور په شپږ کاله بند محکوم شوی دی.

د ازادي راډیو د خبر د مرکزي څانګې د راپور له مخې په کرج کې د ایران انقلابي محکمې د اعدام شوي، محمد مهدي کرمي د کورنۍ مدافع وکیل امیرحسین کوهکن ته د بند دغه سزا ورکړې ده.

د بشري حقونو د فعالانو اړوند خبري آژانس ایچ‌آراې‌این‌اې HRANA د راپور له مخې کوهکن د غونډو او توطیو او د رژیم ضد تبلیغاتو په ګډون پر څو مواردو تورن شوی و.

نوموړی تېر کال د کرج د استخباراتو ریاست نیولی و چې وروسته د همدې کال په ډسمبر میاشت کې په مشروط ډول له توقیفه خوشې شوی و.

کوهکن د محمد مهدي کریمي چې د تېر ۲۰۲۳م کال په جنوري کې اعدام شو، دوسیه مخ ته وړله.

کرمي او نهه تنه نور د هغو اعتراضونوپه ترڅ کې نیول شوي او اعدام شوي چې په ۲۰۲۲م کال کې د بدحجابۍ په تورد ایران د پولیسو په توقیف کې د ۲۲ کلنې مهسا امیني د مرموزې مړینې په غبرګون کې پیل شوي و.

د کرکټ شل اوریز نړیوال جام د اتو غوره لوبډلو په پړاو کې دویمه سیالي د کوربه ویسټ اینډیز او انګلستان ترمنځ ترسره شوه چې د ۸ وېکټو په توپیر انګلستان وګټله.

سیالي نن پنجشنبه د کابل پر وخت سهار ۵:۰۰ بجې پیل شوې وه.

ویسټ اینډیز، چې لومړۍ توپوهنه کړې وه د ۴ لوبغاړو تر سوځېدو وروسته یې ۱۸۰ منډې کړې وې.

انګلستان د ۲ لوبغاړو تر سوځېدو وروسته په ۱۷.۳ اورونو کې هدف پوره کړ او په دې سره یې په دې پړاو کې لومړۍ سیالي وګټله.

سالټ، چې ۸۷ ناسوځېدلې منډې کړې وې د لوبې د غوره او اغېزناک لوبغاړي جایزې وګټلې.

د اتو غوره لوبډلو په مرحله کې به درېیمه سیالي نن د افغانستان او هندوستان ترمنځ د کابل پر وخت ماښام ۷:۰۰ بجې پیل شي.

کاناډا د ایران د سپاه پاسدران انقلاب ځواک د ترهګرو سازمانونو په نوملړ کې شامل کړی او په ایران کې مېشتو کاناډایانو ته یې سپارښتنه کړې چې له دې هېواده ووځي.

د کاناډا د عامه خوندیتوب وزیر ډومینیک لیبلانک پرون چهارشنبې په اوتاوا کې په یوه خبري کنفرانس کې د دغه اعلان په مهال وویل چې د تروریستي ډلو په نوملړ کې د سپاه پاسداران انقلاب ځواکونو د شاملولو پرېکړه، د ډېرو قوي او قانع کوونکو شواهدو پر بنسټ شوې ده.

د ۲۰۲۰م کال په جنوري کې په تهران کې د یوې مسافر وړونکې الوتکې د راغورځېدو له پېښې وروسته چې د وژل شویو ټولو ۱۶۷ سپرلیو شاوخوا نیمایي یې کاناډایي اتباع وو، د دغو قربانیانو کاناډا مېشتو نژدې خپلوانو هڅې پیل کړې وې چې د ایران د سپاه پاسداران انقلاب ځواک دې د یوه ترورستي سازمان په توګه ونوموي.

اوتاوا مخکې د دې ځواک د قدس څانګه د تروریستي ډلې په توګه په نوملړ کې شامله کړې وه او په ۲۰۲۲م کال کې یې د سپاه پاسدران انقلاب ځواک د غړیو په ګډون له لس زرو څخه زیات ایراني چارواکي د تل لپاره کاناډا ته له ورتلو څخه منع کړل.

د اوتاوا او تهران ترمنځ ډیپلوماتیکې اړیکې په ۲۰۱۲م کال کې پرې شوې دي.

د ملګرو ملتونو د ښځو د چارو اداره وایي، دا اداره هره ورځ په ښکاره د جنسي او جنسیت پر بنسټ د تاوتریخوالي ټول اعمال په هرځای کې، هر کله او د هر چا پر وړاندې چې ترسره کېږي غندي.

دا خبره دې ادارې پرون چهارشنبې د جنسي تاوتریخوالي د پای ته رسولو لپاره د نړیوالې ورځې په مناسبت په یوه بیان کې چې په خپله ویبپاڼه کې یې خپور کړی، کړې ده.

په بیان کې ویل شوي چې په دې ورځ د ملګرو ملتونو د ښځو د چارو اداره، د ښځو او نجونو د هغو دوامداره هڅو ستاینه کوي چې دوی یې د ګواښونو او محدودو امکاناتو سره سره د حل لارو، د ملاتړ شبکو د ایجادولو او د خپل غږ د اوچتولو لپاره مخ ته وړي.

د دې ادارې په وینا، په شخړو کې له جنسي تاوتریخوالي، د برید او جبر د ویجاړونکې بڼې په توګه د جګړې د تاکتیک په توګه کار اخیستل کېږي چې په ځانګړې توګه ښځې او نجونې اغېزمنې کوي.

د دې ادارې په وینا، د جنسي تاوتریخوالي ویجاړونکې پایلې پر نسلونو اغېز کوي، د ټولنو ټولنیز جوړښتونه سره پاشي او هغه همدارنګه د دې مخه نیسي چې ولسونه تلپاتې سولې ته ورسېږي.

د ملګرو ملتونو د ښځو ادارې که څه هم په دې بیان کې د افغان ښځو یادونه نه ده کړې، خو له دې مخکې یې په افغانستان کې د ښځو او نجونو پر وړاندې د طالبانو پرسختو چلندونو تل انتقاد کړی دی.

تمه کېږي چې د امریکا پوځ به نن پنجشنبې د غزې په سواحلو کې له موقتي تاسیساتو غزې ته د بشري مرستو رسولو بهیر بېرته پیل کړي.

دا خبره دوو امریکایي چارواکو د خپلو نومونو د نه افشا کېدو په شرط رویټرز خبري آژانس ته کړي دي.

دوی ویلي، دغه تاسیسات چې تېره اوونۍ په سمندر کې د خرابې هوا له امله په موقت ډول بل ځای ته لېږدول شوي وو، بېرته د غزې په ساحل کې ځای پرځای شوي دي.

د ملګرو ملتونو په وینا، د دغو تاسیساتو چې د امریکا پوځ د مې په اولسمه په سیمه کې ځای پرځای کړې وو، له لارې په ۱۳۷ لاریو کې بار شاوخوا ۹۰۰ ټنه بشري مرستې ترګدامونو پورې رسول شوې دي.

د راپور له مخې دغو تاسیساتو ترمیم ته اړتیا درلوده، ځکه تېره اوونۍ سمندري توپانونو ورته زیان اړولی و.

د امریکا د متحدو ایالتونو ولسمشر جوبایډن په مارچ میاشت کې اعلان وکړ چې په پام کې لري قحطۍ ځپلې غزې ته د بشري مرستو رسولو لپاره د غزې په سواحلو کې یو موقتي بندر ایجاد کړي.

د فوټبال د یورو جام په سیالیو کې نن پنجشنبه درې سیالۍ ترسره کیږي.

لومړۍ لوبه به د سلوینیا او سربیا، دویمه هغه د ډنمارک او انګلستان او درېیمه هغه به د اسپانیې او ایټالیا ترمنځ وي.

پرون په دغه جام کې درې لوبې وشوې چې په لومړۍ هغې کې البانیا او کروشیا یو- یو مساوي شوه.

په دویمه سیالۍ کې بیا جرمني هنګري ته دوه د صفر په وړاندې ماته ورکړه او درېیمه سیالي چې د ورځې په وروستیو کې وشوه د سکاټلنډ او سویس ترمنځ وه چې هغه هم یو- یو مساوي شوه.

د فوټبال د یورو جام په سیالیو کې د چهارشنبې په ورځ د جون په ۲۰مه نېټه هم درې سیالۍ ترسره شوې چې یوازې جرمني وکړای شول چې ۲ـ۰ د هنګري لوبډلې ته ماتې ورکړي.

دغه راز د دې ورځۍ په لومړۍ سیالۍ کې د البانیا او کروشیا ترمنځ سیالي ۱ـ۱ مساوي پای ته ورسېده.

د ورځې وروستۍ سیالي بیا د سکاټلنډ او سویس ترمنځ وه چې هغه هم ۱ـ۱ برابره پای ته ورسېده.

د ویلو ده چې د پنجشنبې په ورځ به هم درې سیالۍ ترسره شي چې لومړۍ لوبه به د سلواکیا او سربیا ترمنځ، دویمه به د ډنمارک او انګلستان ترمنځ او درېیمه به د هسپانیې او ایټالیا ترمنځ ترسره شي.

د چاد د پلازمېنې نجامینا (N'Djamena) د پوځي مهماتو په یوه ډیپو کې پراخې اورلګېدنې لږ تر لږه ۹ کسان مړه او ۴۶ نور ټپیان کړل.

دغه پېښه سې شنبه ناوخته شوې، خو د دغه هېواد روغتیا وزیر د مرګ‌ژوبلې دا جزییات پرون چهارشنبه ورکړل.

عبدالمجید عبدالرحیم رسنیو ته وویلچې ممکن د مړو شمېر زیات شي، ځکه د زیاتو ټپیانو روغتیايي وضعیت ښه نه دی.

د دې پېښې د علت په باب څه نه دي ویل شوي او دغه ډیپو نړیوال هوايي ډګر ته نږدې پرته ده.

په نجامینا کې ۱ میلیون او ۶ لکه وګړي ژوند کوي چې د چاد د ټولو وګړو ۱۰ فیصده جوړوي.

پرون چهارشنبه هم په غزه کې د اسراییل هوايي حملې، دغه راز د اسراییلي پوځیانو او فلسطیني افراطي وسله‌والو ترمنځ وسله‌والې شخړې روانې وې.

تر دې مخکې د اسراییل پوځ خبرداری ورکړ چې د خپل هېواد په شمالي سنګرونو کې یې د لبنان د حزب الله ډلې پر خلاف پوځي عملیاتو چمتووالی نیولی دی.

عیني شاهدانو او د حماس تر ولکې لاندې غزه کې د ملکي دفاع یوه بنسټ راپور ورکړی چې اسراییل د غزې د رفح ښار لوېدیځې برخې بمباري کړې دي.

په دغه ځای کې روغتیايي کارکوونکو ویلي چې د بې پېلوټه الوتکو په حملو او د توپونو په ډزو لږ تر لږه ۷ کسان وژل شوي دي.

د امریکا متحد ایالتونه او اروپايي ټولنه حماس ډله یو تروریستي سازمان ګڼي.

د حماس تر ولکې لاندې د غزې روغتیا وزارت وايي، د څه باندې اتو میاشتو په جګړه کې په دغه قلمرو کې څه کم ۳۷زره ۴۰۰ کسان وژل شوي دي.

د روسیې یوې پوځي محکمې څلور تنه اوکراینیان د اوکراین په ختیځ کې د روس پلوو بېلتونپالو د یو قوماندان د قتل په قضیه کې د اوږده حبس په سزا محکوم کړي دي.

په ۲۰۱۶م کال کې په دونېڅک سیمه کې د بېلتونپالو د قوماندان ارسېن پاولوف چې په موتورولا مشهور و، د قتل په تړاو تورن اولیکساندر پوهوریلوف ته د عمري بند سزا واورول شوه، ارتیم یېنا په ۱۷ کاله بند، واسیلي چوریلوف په ۱۳ او اولیکساندر تیموشینکو په ۱۲ کاله بند محکوم شول.

څلور واړه تورن په ۲۰۱۷م کال کې د دونېڅک سیمې د بېلتونپالو د مشر الکساندر زاخارچینکو د وژنې لپاره په هڅه هم تورن شوي دي.

زاخارچینکو په ۲۰۱۸م کال کې په یوه جلا برید کې ووژل شو.