د لاسرسۍ وړ لېنکونه

تازه خبر
پنجشنبه ۴ زمری ۱۴۰۳ کابل ۱۱:۰۷

نړۍ

یوټیوب شبکې د ایران د بهرنیو چارو وزارت چینل وتړه

د ایران د بهرنیو چارو وزارت دروازه
د ایران د بهرنیو چارو وزارت دروازه

یوټیوب د دې ټولنیزې شبکې له مقرراتو څخه د سرغړونې له امله د ایران د اسلامي جمهوریت د بهرنیو چارو وزارت رسمي چینل بند کړی دی.

د ایرنا دولتي اژانس ایرنا خبر سه شنبې په ورځ اعلان وکړ چې یوټیوب دغه اقدام څه موده وروسته له هغه وکړ چې د بهرنیو چارو وزارت په یوټیوب په انګلیسي ژبه د «مقاومت، د فلسطین لپاره یوازینی انتخاب» تر سرلیک لاندې یوه ویډیو خپره شوه.

ایران د خپلو اعلاناتو او خبرونو لپاره د یوټیوب ټولنیزه شبکه داسې وخن کاروي، چې دا پلیټ فارم په ایران کې فلټر شوی او خلک یې د کارولو حق نه لري.

تر دې مخکې د «میټا» شرکت چې د انسټاګرام او فیسبوک خاوند دی، په دغو ټولنیزو شبکو کې د ایران د اسلامي جمهوریت د رهبر علي خامنه اي رسمي اکاونټونه بلاک کړل.

د ورځې تازه خبرونه دلته ولولئ

د اسراييل صدراعظم نن له ولسمشر جوبايډن سره ګوري

د عکس ښي لور ته د اسراییل صدراعظم بنیامین نتنیاهو او چپ لور ته د امریکا ولسمشر جوبایډن
د عکس ښي لور ته د اسراییل صدراعظم بنیامین نتنیاهو او چپ لور ته د امریکا ولسمشر جوبایډن

ټاکل شوې د اسراییل صدراعظم بنیامین نتنیاهو نن پنجشنبه له اوږده انتظار وروسته د امریکا له ولسمشر جوبایډن سره وګوري.

اسوشیتید پریس خبري اژانس لیکلي، سپینه ماڼۍ کې پلان شوي دغه ملاقات کې ښايي د امریکا مرستیاله ولسمشره او ټاکنو ته د دیموکرات ګوند نومانده کامالا هریس هم ګډون ولري.

له کله چې ۲۰۲۰ کال کې پخوانی ولسمشر ډونالډ ټرمپ له سپینې ماڼۍ وتلی، دا لومړی ځل دی چې د اسراییل صدراعظم دغې ماڼۍ ته ورځي.

دا لیده کاته داسې مهال ترسره کېږي چې پر همدې درې واړو سیاستوالو فشارونه زیات شوي چې د غزې نهه میاشتنۍ جګړه چې ترڅ کې يې څه باندې ۳۹ زره کسان وژل شوي، پای ته ورسوي.

نتنیاهو پرون د کانګرس ګډې غونډې ته داسې مهال وینا وکړه چې د کانګرس دننه یوشمېر کسانو او بهر زرګونه کسانو په غزه کې د اسراییل له روانې جګړې سره مخالفت څرګند کړ.

اسراییل د تېر کال په اکتوبر کې وروسته تر هغه پر غزې بریدونه پيل کړل چې حماس وسله‌والې ډلې چې امریکا او اروپایي ټولنه یې ترهګر بولي، پر اسراییلو غلچکي برید سره ۱۲۰۰ شاوخوا کسان ووژل او ۲۵۰ نور یې برمته کړل.

جوبايډن: څراغ يوه نوي نسل ته سپارم

د امریکا ولسمشر جوبایډن
د امریکا ولسمشر جوبایډن

د امریکا ولسمشر جوبایډن له کاندیداتورۍ څخه تر تېرېدو وروسته په خپله لومړنۍ وینا کې وویل: "څراغ یوه نوي نسل ته سپاري."

هغه د تېرې شپې په دغې وینا کې وویل، له ټاکنیزو منډو ترړو وځي، خو په خبره یې له خپل هېواد سره ډېره مینه لري.

بایډن راتلونکو ولسمشریزو ټاکنو ته له کاندیداتورۍ د تېرېدو لامل د هغه په ټکو د خپل ولس متحد کېدل وبلل.

نوموړي په دغې وینا کې د امریکا ډیموکراسي وستایله او ويې ویل، نن واک له خلکو سره دی، نه له پاچاهانو او دیکتاتورانو سره.

دا له تېرې یک‌شنبې راهیسې چې هغه پر ایکس شبکې یا پخواني ټویټر له کاندیداتورۍ لاس په سر کېدل اعلان کړي و، ولس ته د هغه لومړنۍ وینا وه.

بایډن نن یوځل بیا له خپلې لومړۍ مرستیالې کماالا هریس څخه ټاکنو ته د ځای ناستې نوماندې په توګه ملاتړ اعلان کړ او هغه یې تکړه او با استعداده مېرمن وبلله.

بایډن وروسته تر هغه د تېرې یک‌شنبې په ورځ له ټاکنیزو منډو ترړو ووت چې، ګڼو ډیموکراتانو له ډونالډ ټرمپ سره د مناظرې پر مهال د کمزوري بریښېدو له کبله ترې غوښتنه وکړه چې ټاکنو ته دې له درېدو تېر شي.

شهباز شريف: د عمران خان په مشرۍ د تحريک انصاف ګوند د پوځ پر ضد تبليغات کوي

د پاکستان صدراعظم شهباز شريف
د پاکستان صدراعظم شهباز شريف

د پاکستان صدراعظم د عمران خان په مشرۍ تحریک انصاف ګوند تورن کړ چې، د هېواد او پوځ پر ضد کمپاین کوي او دا په هیڅ ډول د زغملو نه‌دی.

شهباز شریف دا خبره پرون د کابینې په غونډه کې وکړه.

تر دې خبرو دوې ورځې مخکې د پاکستان د پوځ ویاند جنرال احمد شریف چوهدري په یوه خبرې غونډه کې د دوی پرضد کمپاین ته د ډیجیټل ترورېزم نوم ورکړ او ویې ویل چې دا کسان د ترهګرو په څېر پوځ په نښه کوي.

د پوځ د دې ادعا په اړه د تحریک انصاف ګوند مشر عمران خان له زندانه په خپاره کړي پيغام کې ویلي چې، د پاکستان نوي فیصده خلک د دوی له ګوند سره دي او دغو ټولو ته د ډیجیټل ترهګرو خطاب د پوځ او عامه خلکو ترمنځ واټن زیاتوي او د کرکي د خپرېدو سبب کېږي.

عمران خان له پاکستانه د بنګله‌دېش بېلېدو ته په اشارې وویل، په نولس سوه اویایمو کلونو کې هم پوځ د ولس د یوې لویې برخې پرضد عملیات کړي وو چې بدې نتیجې یې درلودې، نو که اوس هم د هېواد یوې لویې برخې ته ترهګر وویل شي، پایلې به یې خطرناکه وي.

د چمن-سپین بولدک دروازه کې د تګ راتګ پر وړاندې لا هم محدودیتونه او خنډونه شته

د چمن - سپین بولدک لار خلاصه شوې، خو په ساعت کې پنځو کسانو ته د تېرېدو اجازه ورکول کېږي.
د چمن - سپین بولدک لار خلاصه شوې، خو په ساعت کې پنځو کسانو ته د تېرېدو اجازه ورکول کېږي.

د چمن-سپین بولدک پر دروازه له ویزې او پاسيورټ پرته تګ راتګ پیل شوی، خو محدودیتونه او خنډونه لا هم شته.

په سیمه کې د مشال راډیو خبریال وايي، نن چهارشنبې د جولای ۲۴مه په چمن کې په شناختي کارتونو او تذکرو تګ راتګ پیل شوی، خو دا بهیر خورا ورو روان دی.

د هغه خبره، په چمن کې د خلکو ګڼه ګوڼه ډېره ده او په یو ساعت کې پنځه کسانو ته اجازه ورکول کېږي چې له دروازې تېر شي.

په چمن کې نهه میاشتنی پرلت د جولای په ۲۱مه وروسته تر هغې پای ته ورسېده، چې د پرلت غړو او مشرانو وویل، حکومت ورسره د پخوا په څېر په شناختي کارتونو او تذکرو تګ راتګ مني.

خو د پاکستان حکومت رسماً تراوسه په دې اړه څه نه دي ویلي.

په داسې حال کې چې په چمن کې پرلت پای ته رسېدلی، خو لا هم د کوز جنوبي وزیرستان په انګور اډه کې خلک په پرلت ناست دي.

د دوی په خبره، ورته اجازه نه ورکول کېږي چې په شناختي کارتونو او تذکرو له کرښې تېر شي.

د پاکستان حکومت د تېر کال په اکټوبر کې اعلان وکړ چې د نومبر له لومړۍ نېټې څخه له افغانستان سره د تګ راتګ لپاره قانوني سفري اسناد لرل لازمي کوي.

د حکومت د دې پرېکړې پر ضد لومړی په چمن او بیا په انګور اډه کې پرلتونه پیل شول.

څه باندې ۳زره تاجک کارګرو روسیې ته د ننوتو اجازه نه ده ترلاسه کړې

د مسکو په ونکو هوايي ډګرې کې تاجک پناه غوښتونکي
د مسکو په ونکو هوايي ډګرې کې تاجک پناه غوښتونکي

تاجکستان وايي، په تېرو شپږو میاشتو کې څه باندې ۳زره تاجک کارګرو روسیې ته د ننوتو اجازه نه ده ترلاسه کړې.

د دې هېواد د ملکي او هوايي چلند ادارې مشر حبیب الله نظرزاده نن چهارشنبې د جولای ۲۴مه خبریالانو ته وویل، دا کارګر د ورسیې له هوايي ډګره په دې تور چې په اسنادو کې يې ستونزې وې، بېرته راستانه کړای شوي دي.

وروسته له هغې چې د مسکو په لمن کې د مارچ په میاشت کې د یوه کنسرت پر سالون په برید کې تاجکي وګړي ښکېل وګڼل شول، په روسیه کې دننه او روسیې ته د سفر پر مهال د تاجکستان اتباع له ګڼو بندیزونو سره مخامخ دي.

په هغه برید کې شاوخوا ۱۴۰ کسان وژل شوي وو.

پر اوکراین د روسیې تازه بریدونو کې دوه تنه وژل شوي او یو شمېر نور ټپیان دي

د برید ځای ته منسوب تصویر
د برید ځای ته منسوب تصویر

سیمه‌يیزو چارواکو نن د (جولای ۲۴مه) ویلي، د ایزومایل پر دانیوب بندر د روسیې په توغندیزو بریدونو کې د دې بندر زیربناوې ویجاړې شوي دي.

د چارواکو په خبره، د خرسون په سیمه کې یوه ۷۷ کلنه ښځه وژل شوې ده.

بل پلو، د خارکیف ښاروال پر خپل ټلېګرام ویلي، په‌دې ښار کې توغندیزو بریدونو یو ملکي وګړی وژلی دی.

د اوکرایین په جنوب کې د اودیسه والي وايي، د روسیې بې‌پیلوټه الوتکو د ایزومایل پر دانیوب بندر چې د اوکرایین د غلو دانو د صادراتو لپاره خورا مهم بندر دی، بریدونه کړي چې درې کسان په‌کې ټپیان شوي او د دې بندر زیربناوي يې ویجاړې کړي دي.

جرمني په هامبورګ کې د ایران "اسلامي مرکز" او ورسره تړلي بنسټونه تړلي دي

هامبورک کې د ايران اسلامي مرکز
هامبورک کې د ايران اسلامي مرکز

د جرمني د کورنیو چارو وزارت نن چهارشنبې (د جولای ۲۴مه) په یو بیان کې ویلي، د محکمې د حکم له‌مخې يې نن سهار د دې هېواد په اتو ایالاتونو کې د ایران د اسلامي مرکز اړونده ۵۳ ځایونه پلټلي دي.

د رویترز د راپور پر بنسټ، د"هامبورګ اسلامي مرکز" سربېره په فرانګفورت، مونیخ او برلین کې د دې مرکز اړونده څانګې تړل شوي دي.

د جرمني د کورنیو چارو وزارت په خبره، د شعیه‌ګانو څلور نور جوماتونه به هم په‌دې هېواد کې وتړل شي.

د جرمني استخباراتي ادارې د هامبورګ اسلامي مرکز او اړونده څانګې د سخت‌دریځو او اسلامپالو موخو د تعقیبولو په تور تړلي او زیاته کړې يې ده، چې په اکثر دې مرکزونو کې د یهود او اسراییلو ضد چلند ته وده ورکول کېده.

په هامبورګ کې د ایران اسلامي مرکز له دریو لسیزو راهیسې د جرمني حکومت تر څارنې لاندې فعالیت کوي، چې له‌دې وړاندې هم دا اسلامي مرکزونه د سخت دریځۍ او یهودیت ضد فعالیتونو په تور د پولیسو له‌خوا پلټل شوي وو.

د افغانستان پاسپورټ په نړۍ کې تر ټولو کم اعتباره پاسپورټ وبلل شو

د افغانستان پاسپورټ
د افغانستان پاسپورټ

هنلي پاسپورټ انډیکس موسسې د افغانستان پاسپورټ په نړۍ کې ترټولو کم اعتباره او د سنګاپور تر ټولو با اعتبار پاسپورټ بللی دی.

دې سازمان پرون سه‌شنبې (د جولای ۲۳مه) په خپلې تازه ارزونه کې ویلي، پخوا افغان پاسپورټ لرونکو ۲۷ هېوادونو ته پرته له ویزې سفر کولی شو، خو په تېرو شپږو میاشتو کې دا شمېر ۲۶ ته راښکته شوی دی.

په ازرونه کې بیا د سنګاپور پاسپورټ یو ځل بیا د نړۍ تر ټولو با اعتباره پاسپورټ یاد شوی، چې وګړي يې کولی شي ۱۹۵هېوادونو ته بې له ویزې سفر وکړي.

فرانسه، جرمني، ایټالیا، جاپان او هسپانیه له سنګارپور وروسته هغه هېوادونه دي چې وګړي يې ۱۹۲ هېوادونو ته له ویزو پرته سفر کولی شي.

هنلي پاسپورټ انډیکس یوه نړیواله موسسه ده چې د پاسپورټونو ځواک د هغو هېوادونو د شمېر پر اساس ارزوي چې د یو هېواد وګړي ورته پرته له ویزې سفر کولی شي.

مسکو کې د امريکا سفارت د ازادي راډيو د خبريالې السو کورماشېوا د خوشې کېدو غوښتنه کړې

السو کورماشېوا
السو کورماشېوا

په مسکو کې د متحده‌ایالاتو سفارت د ازادې اروپا/ازادي راډیو د خبریالې السو کورماشېوا د خوشې کېدو غوښتنه کړې.

کورماشېوا چې د امریکا او روسیې دوه ګونی تابعیت لري د هغو تورونو لپاره چې دا، ازادي راډیو، د امریکا حکومت او د هغې پلویان یې سیاسي بولي او ردوي یې، په روانه اوونۍ کې د محکمې د حکم په اساس په شپږنیم کاله بند محکومه شوه.

د امریکا سفارت پرون پر ټولنیزو شبکو په یوه بیان کې وویل چې، یوځل بیا له روسي چارواکو غواړي چې السو او نور بندیوان ژورنالېستان راخوشې کړي.

محکمې السو د روسیې د پوځ په اړه د ناسمو معلوماتو په خپرولو تورنه کړې ده.

د ازادي راډیو مشر ستیفان کاپوس د کورماشېوا محاکمه او د حبس حکم، چې خبر یې لومړی ځل اسوشیتیدپریس خبري اژانس ورکړ، پر عدالت ملنډې بللي دي.

د ملاتړ ترلاسه کولو هيله؛ د اسراييل صدراعظم د امريکا کانګرس ته وينا کوي

د اسراییل صدراعظم بنیامین نتنیاهو
د اسراییل صدراعظم بنیامین نتنیاهو

د اسراییل صدراعظم بنیامین نتنیاهو نن د امریکا کانګرس ته په دې هیله وینا کوي چې د غزې د جګړې د دوام لپاره د متحده‌ایالتونو ملاتړ ترلاسه کړي، که څه هم دی دا وینا داسې مهال کوي چې د ولسمشر جوبایډن اداره له ده غواړي چې له حماس ډلې سره د سولې پر موافقه تمرکز وکړي.

امریکا غواړي اسراییل له حماس سره چې امریکا او اروپايي ټولنه یې یوه تروریستي ډله بولي، په غزه کې له نهو میاشتو راهیسې پیل شوې جګړه د خبرو له لارې حل کړي.

د اسراییل د صدراعظم د وینا چارې جمهوریپالو وکیلانو چې د استازو په جرګه کې اکثریت دي، تنظیم کړې دي او هغوی د تود هرکلي ډاډ ورکړی.

نتنیاهو به د نړۍ لومړی مشر وي چې د څلورم ځل لپاره د کانګرس ګډې غونډې ته وینا کوي، خو ډېری ډیموکراتان او خپلواک وکیلان پلان لري چې د هغه وینا تحریم کړي.

نور راوښيه

XS
SM
MD
LG