د اروپا اتلانو د فوټبال په پیل شوي لیګ کې نن یکشنبه د جون په ۱۶مه نېټه هم درې سیالۍ ترسره کېږي.

یادې سیالۍ چې د جرمني په کوربه‌توب پیل شوي، د نن ورځې لومړۍ لوبه به د پولنډ او نېدرلنډ ترمنځ وي، په دویمې سیالۍ کې به سلوانیا د ډنمارک پر وړاندې مقابله وکړي او د ورځې وروستۍ سیالي د انګلستان او سربیا ترمنځ ترسره کېږي.

د ویلو ده چې سبا به هم درې سیالۍ ترسره شي.

ټاکل شوې ده چې د امریکا د ملي امنیت سلاکار نن په سویس کې قطر له صدراعظم سره د غزې د اوربند په اړه خبرې وکړي.

د سپینې ماڼۍ د ملي امنیت سلاکار جیک سلیوان پرون شنبې اعلان وکړ، قطر او مصر پلان لري چې په غزه کې د اوربند لپاره د امریکا د ولسمشر جوبایډن له پلان سره سم ژر له حماس سره خبرې وکړي.

جیک سلیوان دا څرګندونې په سویس کې د اوکراین د سولې د کنفرانس په څنډه کې او د خبریالانو د پوښتنو په ځواب کې وکړې.

د سپینې ماڼۍ د ملي امنیت سلاکار ویلي چې د قطر له صدراعظم شیخ محمد بن عبدالرحمن آل‌ثاني سره یې لنډې خبرې کړي او په غزه کې د اوربند په اړه به له هغه سره د یکشنبې په ورځ په سویس کې بیا خبرې وکړي.

حماس، چې د امریکا د متحدوایالتونو او اروپايي ټولنې له‌خوا یوه تروریستي ډله ګڼل کېږي، اعلان کړی چې د امریکا د ولسمشر له‌خوا د اوربند له وړاندیز سره موافق دی.

امریکايي چارواکي وايي، حماس په غزه کې د وړاندیز شوي اوربند په ځواب کې د "څو بدلونونو" وړاندیز کړی دی.

اسراییل هم اعلان کړی چې حماس د دې پلان مهم عناصر رد کړي دي.

په همدې حال کې جیک سلیوان د شنبې په ورځ ټینګار وکړ چې امریکایي چارواکو د حماس ځواب په دقت سره څېړلی دی.

د بريتانيا د سمندري سوداګرۍ د عملياتو مرکز نن یکشنبې وويل، د يمن د المخا په جنوب کې يوې بېړۍ ته نژدې دوې چاودنې شوي، خو عمله يې خوندي ده او خپل مزل ته دوام ورکوي.

دې ادارې زیاته کړې چې چارواکي په دې اړه څېړنې کوي.

تر دې یوه ورځ مخکې د متحدو ایالتونو د مرکزي قوماندانۍ دفتر یا سینټکام، ویلي وو چې د وربینا کارګو بېړۍ عمله او ماڼوګان چې په اوکراین پورې تړلې او د یوه پولنډي شرکت له‌خوا اداره کېږي، د ایران پلوه حوثي ملېشو له برید وروسته خالي شوه، خو په هغې کې لا هم اور لګېږي.

د پنجشنبې په ورځ د عدن په خلیج کې د ایران په ملاتړ د حوثي ملېشو له‌خوا د وربینا په بار وړونکې بېړۍ د دوو کروز توغندیو برید وشو.

د کرکټ شل اوریز نړیوال جام په ترڅ کې نن یکشنبه د جون په ۱۶مه نېټه د کابل پر وخت سهار پنځه بجې د اسټرالیا او سکاټلنډ لوبډلو سیالي وکړه چې د ۵ وېکټو په توپیر اسټرالیا وګټله.

د اسټرالیا تر دې بریا وروسته د "نېټ رن رېټ" پر اساس انګلستان له بي B ګروپ څخه د "سوپر اېټ" پړاو یا اتو غوره لوبډلو پړاو ته لار پیدا کړه.

په نننۍ سیالۍ کې سکاټلنډ د ۱۸۱ منډو هدف ټاکلی و چې اسټرالیا په ۱۹.۴ اورونو کې پوره کړ.

د اسټرالیا مارکس سټاینېس د دې لوبې غوره لوبغاړی ټاکل شوی دی.

د ۸ غوره لوبډلو پړاو لپاره د افغانستان په ګډون ۷ لوبډلې مشخصې شوې دي او لا هم یوه بله لوبډله نا معلومه ده.

اتمه لوبډله به له ډي D ګروپ څخه مخکې ځي چې سبا دوشنبه به د بنګله دېش - نېپال او سریلانکا- نېدرلینډ تر سیالیو وروسته معلومه شي.

د شل اوریز نړیوال جام د ۸ غوره لوبډلو پړاو په اېA ګروپ کې افغانستان، اسټرالیا او هندوستان یوځای شوي او د بنګله‌دېش او نیدرلېنډ له لوبډلو به هم یوه ورته لار پیدا کوي.

په بي B ګروپ کې بیا انګلستان، سویلي افریقا، ویسټ اینډیز او امریکا مخامخ شوي دي.

د ویلو ده چې د ګروپي پړاو سیالۍ به د جون په ۱۸مه نېټه به د افغانستان او ویسټ اینډیز په سیالۍ سره پای ته ورسېږي.

راپورونه وايي چې د طالبانو حکومت د پوهنتون استاد او لیکوال رسول پارسي له بنده خوشې کړی دی.

د طالبانو د حکومت امنیتي ځواکونو رسول پارسي د تېر کال په وري میاشت کې ونیو او مقدساتو ته د سپکاوي او د نظام پر ضد د تبلیغ په تور یې په شپاړس کاله بند محکوم کړ.

د افغانستان کورنیو رسنیو او مدني فعالانو تایید کړې چې پارسي پرون شنبې له بنده خوشې شوی دی.

د بشري حقونو ډلو په وار وار د رسول پارسي او د نورو فعالانو د خوشې کېدو غوښتنه کړې وه.

د طالبانو سترې محکمې پرون په یوه بیان کې وویل چې د طالبانو د لوی مشر ملاهبت‌الله آخندزاده د فرمان په اساس ۳۴۹ تنه بندیانو ته عفو شوې او د نورو ۲۷۰ زندانیانو د حبس په موده کې تخفیف راغلی دی.

د کرکټ شل اوریز نړیوال جام ۳۴مه سیالي د یکشنبې په ورځ ناوخته د انګلستان او نامیبیا ترمنځ ترسره شوه چې د ۴۱ منډو په توپیر انګلستان وګټله.

که څه هم یاده سیالي د ورښت له امله تر ډېره ځنډېدلې وه، خو تر ورښت وروسته د لسو لسو اورونو سیالي ترسره شوه.

انګلستان په لسو اورونو کې د ۵ لوبغاړو تر سوځېدو وروسته ۱۲۲ منډې وکړې او هري بروک تر نورو زیاتې ۴۷ ناسوځېدلې منډې کړې وې.

د نامیبیا لوبډلې بیا په لسو اورونو کې یوازې ۳ لوبغاړي له لاسه ورکړل، خو ۸۴ منډې یې وکړې.

د یادې سیالۍ تر ګټلو وروسته انګلستان په خپل ګروپ کې تر اسټرالیا وروسته په دویم مقام کې راغی.

د یکشنبې په ورځ به د کابل پر وخت سهار پینځه بجې په همدې ګروپ کې د اسټرالیا او سکاټلنډ ترمنځ سیالي ترسره شي، که سکاټلنډ یې وګټي نو بل پړاو ته به ووځي او که د ورښت له امله ترسره نه‌شي بیا هم سکاټلنډ بل پړاو ته وځي او که اسټرالیا یې وګټي، نو د انګلستان د وتلو چانس زیات دی.

د روان زیږدیز کال د اروپا د فوټبال په لیګ کې د ایټالیا ملي لوبډلې البانیا ته ۲ـ۱ ماتې ورکړه.

د شنبې په ورځ د جون په ۱۵مه نېټه د جرمني په دورټمونډ ښار کې ایټالیا له البانیا سره سیالي وکړه چې په لومړنيو دقیو کې البانیا یو ګول وواهه، خو د لوبې د ټاکلې نیټې تر پای ته رسېدو سره ایټالیا دوه ګولونه ووهل او په روان فصل کې یې خپله لومړۍ سیالي وګټله.

دغه راز د دې ورځې په دویمې سیالۍ کې بیا هسپانیې ۳ د صفر پر وړاندې د کروشیا لوبډلې ته ماتې ورکړې وه او د ورځې لومړۍ سیالي سویس ۳ د یو پر وړاندې له هنګري ګټلې وه.

ټاکل شوې ده چې نن یکشنبه به هم درې سیالۍ ترسره شي چې په لومړۍ لوبه کې به پولنډ د نیدرلینډ پر وړاندې، سلوانیا د ډنمارک پر وړاندې او صربیا د انګلستان پر وړاندې سیالۍ ترسره کړي.

په لسګونو زره کسانو تېر ماښام په تل‌ابیب او د اسراییل په نورو ښارونو کې د مظاهرې پر مهال په غزې تړانګه کې د پاتې یرغمل شویو د خلاصون په ملاتړ لاریون وکړ.

د لاریون برخوالو له صدراعظم بنیامین نتنیاهو غوښتنه وکړه چې د غزې جګړه پای ته ورسوي څو د یرغمل شویو د خلاصون لپاره یوې موافقې ته زمینه برابره شي.

په یوه ثبت شوې ویډیويي وینا کې یوه کس چې وايي تېره اوونۍ د اسراییل د پوځ له‌خوا له یرغمل خلاص شوی وویل، په غزه کې د پاتې یرغمل شویو د خلاصون لپاره یوه لار پاتې ده چې هغه د اسراییل او حماس ډلې ترمنځ موافقه ده.

د امریکا متحد ایالتونه او اروپايي ټولنه حماس ډله یو ترویستي سازمان ګڼي.

د یرغمل شویو د کورنیو اتحادیې ویلي، پرونی لاریون د اکټوبر له اوومې چې په غزه کې جګړه پیل شوې، تر ټولو پراخ و.

د اسراییلو پوځ وايي چې اته سرتېري یې پرون شنبې د غزې په تړانګه کې په یوه چاودنه کې وژل شوي دي.

د پوځ ویاند دانیال هګاري تېره شپه ناوخته وویل، د دې سرتېرو زغرګاډی د یوه ایښودل شوي ماین یا د ټانک ضد توغندي په وسیله په نښه شوی دی.

د فرانس‌پرېس آژانس د راپور له مخې د تېر کال د اکټوبر له اوومې نېټې راهیسې په غزه کې د اسراییل د پوځ د تلفاتو شمېر تراوسه ۳۰۶ ته رسېدلی دی.

د غزې جګړه د اکټوبر په اوومه پر اسراییلو د حماس له برید وروسته پیل شوه.

په دې برید کې نژدې ۱۲۰۰ اسراییلیان ووژل شول او ۲۴۹ نور یرغمل شول.

متحدایالات او اروپايي ټولنه حماس د یوې تروریستي ډلې په توګه پېژني.

په سویس کې د اوکراین د سولې کنفرانس پرون شنبې پیل شو او تمه ده چې نن به هم ګډونوال پر اوکراین د روسیې د یرغل د پای ته رسولو په اړه بحث وکړي.

د اوکراین ولسمشر ولودیمیر زیلینسکي د سویس لوڅرن ښار ته څېرمه په غزنۍ تفریحي سیمه کې د دې غونډې په درشل کې خبریالانو ته وویل: "دا زموږ د ګډې بریا ورځ ده. په حقیقت کې موږ بریالي شوو چې ډيپلوماسۍ ته یو فرصت ورکړ. اوکراین هیڅکله دا جګړه نه ده غوښتې او دا مطلقاً د روسیې یو بې دلیله او جنایتکارانه تېری دی او یوازېنی څوک چې دا تېری یې غوښت پوتین و، خو نړۍ په هر صورت تر هغه ځواکمنه ده."

په دې دوه ورځنۍ غونډه کې د ۱۰۱ هېوادونو او نړیوالو موسسو استازي راټول شوي، خو د ګډونوالو په ډله کې د روسیې او چین نه شتون د دې غونډې د بریا تمه یوڅه پیکه کړې ده.

پر اوکراین د روسیې غیرموجه یرغل د ۲۰۲۲م کال د فبروري په ۲۴مه نېټه پیل شو، خو تراوسه د دې جګړې د پای ته رسېدو نښې نه ښکاري.