د لاسرسۍ وړ لېنکونه

تازه خبر
دوشنبه ۱ زمری ۱۴۰۳ کابل ۰۰:۱۳

افغانستان

د بغلان پر ۳۰۰۰ سېلاب ځپلو خواړه ویشل شوي

د بغلان یوه سېلاب ځپلې سیمه کې بېځایه شوې کورنۍ
د بغلان یوه سېلاب ځپلې سیمه کې بېځایه شوې کورنۍ

افغاني سرې میاشتې ټولنې د بغلان ولایت په بُرکې ولسوالۍ کې پر ۳۰۰۰ سېلاب ځپلو کسانو د خوړو د مرستو د وېش خبر ورکړ.

دغې ادارې پرون په یوه اعلامیه کې لیکلي چې د غرمې دغه پاخه کړي خواړه د کرکټ د مشهور لوبغاړي راشد خان او د افغان مسلم هندز خیریه بنسټ په مالي ملاتړ برابر شوي وو.

په بغلان کې د غويي یا ثور میاشتې د ۲۱مې نېټې ویجاړوونکو سېلابونو تر ۳۰۰ زیات کسان مړه او په زرګونو کورونه یا بشپړ یا څه ناڅه تخریب کړل.

په بغلان کې سېلابو ځپلیو پرون ازادۍ راډیو سره په خبرو کې شکایت وکړ چې تر یوې اوونۍ د زیاتې مودې له تېرېدو وروسته هم لازمه مرسته نه ده ورسره شوې.

د ورځې تازه خبرونه دلته ولولئ

رمضان بشردوست د طالبانو له‌خوا د ده د بندي کېدو اوازې دروغ وبللې

د تېر جمهوري نظام د ولسي جرګې غړی رمضان بشر دوست
د تېر جمهوري نظام د ولسي جرګې غړی رمضان بشر دوست

د تېر جمهوري نظام د ولسي جرګې غړي رمضان بشردوست ازادي راډیو سره خبرو کې وویل چې د ده د بندي کېدو په اړه خپرې شوې اوازې دروغ دي.

دی وایي، دا اوازه د کوم یوټیوب چینل له لوري په نامعلوم دلیل خپره شوې وه چې تر هغه وروسته ځینو رسنیو او د تېر جمهوري حکومت د ولسي جرګې مشر میررحمان رحماني یې هم په اړه په خپله ایکسپاڼه اندېښنه څرګنده کړې وه.

دا په داسې حال کې ده چې نن یکشنبه د بشردوست په ګډون په تخار ولایت کې د تېر جمهوري حکومت د ولایتي شورا مشر روح‌الله رووف یوبل او د پروډیسر، ویاند، پروډیوسر، سینمایي فعال او لیکوال سید رحیم سعیدي او په کندهار کې د ازاد خبریال محمد یار مجروح د نیول کېدو په اړه هم راپورونه خپاره شوي دي.

خو د سعیدي او مجروح خپلوانو ازادي راډیو سره خبرو کې د طالبانو د حکومت له لوري د دوی نیول کېدل تایید کړي دي.

د طالبانو د حکومت د استخباراتو عمومي ریاست ویاند خلیل همراز د دغو دوو کسانو د خپلو د ادعاوو په اړه د ازادي راډیو پوښتنې نه دي ځواب کړي.

ګیبریسیوس: ملګري ملتونه د افغانانو په تېره د ښځو او ماشومانو ملاتړ ته دوام ورکوي

د ارزګان د ولایتي روغتون یوه څنډه
د ارزګان د ولایتي روغتون یوه څنډه

د روغتیا د نړیوال سازمان یا "ډبلیوایچ‌او" مشر وايي، د ملګرو ملتونو دا اړونده اداره به د افغانستان د ټولو خلکو په تېره د ښځو او ماشومانو ملاتړ ته دوام ورکړي څو هغو ته روغتیايي اسانتیاوې چمتو کړي.

تیدروس ادهانوم ګیبریسیوس دا خبره د طالبانو د حکومت د روغتیا له سرپرست وزیر نورجلال جلالي سره تر کتنې وروسته پر خپله ایکسپاڼه لیکلې ده.

هغه لیکلي چې له جلالي سره د تېرې اونۍ په کتنه کې یې د ماشومانو د ګوزڼ د ناروغۍ یا پولیو پر ضد د هڅو د ګړندي کولو او په افغانستان کې د نورو ساري ناروغیو د مخنیوي په اړه هم بحث وکړ.

د "ډبلیوایچ‌او" WHO مشر زیاتوي چې له جلال سره یې زده‌کړو او کار ته د ښځو د انډول حق د یقیني کولو په اړه هم خبرې کړي.

ښاغلي ګیبریسیوس نه دي ویلي چې دا کتنه په کوم ځای کې شوې، خو د طالبانو د حکومت د عامې روغتیا وزارت پرون په یو بیان کې وویل، جلال چې د روغتیا په برخه کې د پرمختګونو او له دې وزارت سره د نړیوالو ادارو د همغږۍ په اړه د خبرو لپاره له یوه پلاوي سره سویس ته تللی هلته له ګیبریسیوس سره لیدلي دي.

د افغانستان په اتو ولایتونو کې د باران ورېدو او سېلابونو د راوتلو اټکل شوی

په لغمان کې د وروستیو سېلابونو خلکو ته زیانونه اړولي دي.
په لغمان کې د وروستیو سېلابونو خلکو ته زیانونه اړولي دي.

نن د افغانستان د ختیځ په شمول چې تېره اوونۍ سېلابونو ځپلي، په اتو ولایتونو کې د بارانونو او د سېلابونو د بهېدو امکانات شته.

د طالبانو د ټرانسپورټ او هوایي چلند وزارت په یوه بیان کې ویلي چې په ننګرهار، کونړ، نورستان، لغمان، همداراز په بدخشان، لوګر، پکتیا او خوست کې د بارانونو او ورسره د سېلابونو د بهېدو اټکل کېږي.

د خبرپاڼې له مخې د افغانستان په یو شمېر شمالي، مرکزي او لوېدیځو ولایتونو کې د سختو بادونو اټکل شوی چې سرعت به یې په ساعت کې له پنځوسو تر نوي کیلومترو پورې وي.

د ملګرو ملتونو د یوه راپور له مخې چې د تېرې اوونۍ په پای کې خپور شو په ننګرهار، کونړ، نورستان او لغمان کې وروستیو سېلابونو او توپان تر ۴۰ ډېر کسان ووژل او له۳۴۰ ډېر کسان یې ټپيان کړل.

د طالبانو له لوري د سینما د یوه لوبغاړي د نیولو راپور ورکړل شوی

ارشیف: په کابل کې وسله‌وال طالبان
ارشیف: په کابل کې وسله‌وال طالبان

د سینما د لوبغاړي رحیم سعیدي یو شمېر خپلوان وایي چې سعیدي طالبانو نیولی دی.

دوی ادعا کوي چې سعیدي د تېرې اوونۍ له یکشنبې راهیسې د طالبانو استخباراتو بیولی دی.

طالبانو تر اوسه په دې اړه څه نه دې ویلي او خپلواکو سرچینو هم دا خبر تر دې دمه نه دی تایید کړی.

سعیدي د افغانستان د سینما د لوبغاړو د ټولنې غړی دی او له یو شمېر تلوېزیونونو سره یې کار کړی دی.

ژیرنوف: مسکو ښايي په افغانستان کې نورې کونسلګرۍ پرانېزي

په کابل کې د روسیې سفارت
په کابل کې د روسیې سفارت

په کابل کې د روسیې سفیر وایي، مسکو ښایي په افغانستان کې نورې کونسلګرۍ پرانېزي.

دیمیتري ژیرنوف دا خبره پرون د روسیې تاس اژانس ته وکړه او زیاته یې کړه چې د اوس لپاره دې ته اړتیا نه شته، خو په راتلونکې کې هېڅ شی څوک ردولی نه شي.

افغانستان او روسیې له ۱۹۱۹م کال راهیسې دیپلوماتیک اړیکې ټینګې کړي او په کابل کې یې سفارت پرانېست، بیا یې یو وخت په مزارشریف کې کونسلګري پرانیسته او د اړتیا له مخې یې څو نورې کونسلګرۍ هم په بېلابېلو ښارونو کې پرانیستې.

د طالبانو حکومت د روسیې په ګډون هېڅ هېواد په رسمیت نه دی پېژندلی، خو روسیه له هغو څو ګوتو په شمېرو هېوادونو څخه یو دی چې د ۲۰۲۱م کال له اګست وروسته چې طالبانو کابل ونیو، دوی په افغانستان کې خپل سفارت بند نه کړ او په مسکو کې یې هم د افغانستان سفارت طالبانو ته وسپاره.

اسټرالیا یو شمېر افغان کورنیو ته د تاوان ورکولو مسئله څېړي

ارشیف: په افغانستان کې د اسټرالیايي ځواکونو د عملیاتو یو انځور
ارشیف: په افغانستان کې د اسټرالیايي ځواکونو د عملیاتو یو انځور

تمه ده چې اسټرالیا د هغو افغانانو کورنیو ته تاوان ورکړي چې په افغانستان کې د اسټرالیایي ځواکونو له لوري په غیرقانوني ډول وژل شوي دي.

په ۲۰۲۰م کال کې داسې راپور خپور شوی و چې په‌کې ادعا شوې وه چې د اسټرالیا پوځیانو د ۲۰۰۵م او ۲۰۱۶م کلونو ترمنځ په افغانستان کې ۳۹ زندانیان او ملکي افغانان وژلي دي.

د اسټرالیایي پوځي چارواکو په وینا، د لوی درستیز له لوري د ۲۰۲م کال د خپاره شوي راپور تر تایید وروسته به اسټرالیا د وژل شویو افغانانو کورنیو ته د تاوان د ورکولو مسئله وڅېړي.

اسټرالیا د نړیوالو ځواکونو په ډله کې شاوخوا ۴۰۰ عسکر افغانستان ته استولی وو.

پروان کې د يوې چاودنې له امله دوه کسان وژل شوي او شپږ ټپيان دي

په پروان کې یوې چاودنې ۲ کسان وژلي او شپږ نور یې ټپیان کړي دي.

په پروان کې د طالبانو د امنیه قومندانۍ ویاند فضل الرحیم مسکین یار په یوه اعلامیه کې ویلي چې، چاودنه په یوه کباړ اوسپنه کې د ماین له امله وه.

مړه او ټپیان ټول ملکیان دي او د کباړ اوسپنې به یې ټولولې.

په دې اړه نور جزییات نه دي ورکړل شوي.

د افغانستان لپاره د روسیې سفیر: د روسيې او افغانستان ترمنځ سوداګري ډېره شوې

د افغانستان لپاره د روسیې سفیر دیمیتري ژیرنوف
د افغانستان لپاره د روسیې سفیر دیمیتري ژیرنوف

د افغانستان لپاره د روسیې سفیر وایي، د روسیې او افغانستان ترمنځ دوه اړخیزه سوداګري څو چنده شوې ده.

دیمیتري ژیرنوف Dmitry Zhirnov د روسیې له تاس خبري اژانس سره په مرکه کې ویلي چې د تېلو د تولید په برخه کې د مسکو او کابل ترمنځ همکاري له مخکې پیل شوې او هغه مخ په پراخېدو ده.

د راپور له‌مخې نوموړي دا څرګندونې د طالب چارواکو د هغو څرګندونو په غبرګون کې وکړې چې ویلي یې دي، نیت لري د خوړو د خوندیتوب او د تېلو د تولید په برخه کې له روسیې سره همکارۍ ته پراختیا ورکړي.

په کابل کې د روسیې سفیر وویل، دوه اړخیزه سوداګري اوس څو برابره زیاته شوې او هغه هم تر ډېره په‌دې خاطر چې روسیې افغانستان ته د غنمو، اوړو، غوړیو او د موټرو د تېلو په ګډون د ځینو توکو صادرات زیات کړي دي.

د روسیې سفیرهمدارنګه وویل، د افغانستان کام آیرخصوصي هوایي شرکت لېوالتیا ښودلې چې له کابل څخه مسکو ته مستقیمې الوتنې پیل کړي او زیاته یې کړه چې د اړتیا په صورت کې به روسیه ورسره مرسته وکړي.

د ښاغلي ژیرنوف په وینا روسیه یو له هغو محدودو هېوادونو څخه دی چې، د افغانستان د آریانا هوایي شرکت ته یې اجازه ورکړې چې په اوونۍ کې یو وار د مسکو او کابل ترمنځ الوتنې وکړي.

د طالبانو حکومت: په تېرو درې ورځو کې له ۴زره ډېر افغان کډوال بېرته خپل هېواد ته ستانه شوي

يو شمېر راستانه شوي افغان کډوال
يو شمېر راستانه شوي افغان کډوال

د طالبانو د کډوالو او راستنېدونکو چارو وزارت وايي، په تېرو دریو ورځو کې له پاکستان او ایران څخه ۴ زره ۲۳۳ تنه کډوال افغانستان ته راستانه شوي دي.

دغه وزارت نن (شنبې) په یوه خبرپاڼه کې ویلي چې، د دغو راستنو شویو کډوالو په منځ کې ۷۲۹ تنه له پاکستان او ۳ زره ۵۰۴ تنه له ایرانه ایستل شوي دي.

د طالبانو د کډوالو او راستنېدونکو چارو وزارت د معلوماتو پر اساس دا کډوال د تورخم، سپین بولدک، اسلام کلا او په نیمروز ولایت کې د ورېښم پُل له لارو افغانستان ته راستانه شوي دي.

ایران او پاکستان د افغان کډوالو ایستلو ته زور ورکړی او تقریباً هره ورځ له دواړو هېوادونو سلګونه کډوال ایستل کېږي.

ژیرنوف: د روسیې او افغانستان ترمنځ دوه اړخیزه سوداګري څو چنده زیاته شوې

د افغانستان لپاره د روسیې سفیر وایي چې د روسیې او افغانستان ترمنځ دوه اړخیزه سوداګري څوچنده زیاته شوې ده.

دیمیتري ژیرنوف د روسیې له تاس خبري آژانس سره په مرکه کې ویلي چې د تېلو د تولید په برخه کې د مسکو او کابل ترمنځ همکاري له مخکې پیل شوې او هغه مخ په پراخېدو ده.

د راپور له مخې نوموړي دغه څرګندونې د افغان چارواکو د هغو وروستیو څرګندونو په غبرګون کې وکړې چې ویلي یې دي، نیت لري د خوړو د خوندیتوب او د تېلو د تولید په برخه کې له روسیې سره همکارۍ ته پراختیا ورکړي.

په کابل کې د روسیې سفیر وویل، دوه اړخیزه سوداګري اوس څو چنده زیاته شوې او هغه هم تر ډېره بریده په دې خاطر چې روسیې افغانستان ته د غنمو، اوړو او غوړیو او د موټرو د تېلو په ګډون د ځینو توکو صادرات زیات کړي دي.

د روسیې سفیر همدارنګه وویل چې د افغانستان کام ایر خصوصي هوایي شرکت لېوالتیا ښودلې چې له کابل څخه مسکو ته مستقیمې الوتنې پیل کړي او زیاته یې کړه چې د اړتیا په صورت کې به روسیه ورسره مرسته وکړي.

د ژیرنوف په وینا، روسیه یو له هغو محدودو هېوادونو څخه دی چې د افغانستان د آریانا هوایي شرکت ته یې اجازه ورکړې چې په اوونۍ کې یو وار د مسکو او کابل ترمنځ الوتنې وکړي.

نور راوښيه

XS
SM
MD
LG