د پاکستان حکومت خبر ورکړی چې په کورمه کې د فرقه یي شخړو دواړو ښکېلو خواوو د اوربند تړون لاسلیک کړی دی.

په کورمه کې تېرو درېیو ورځو کې د سني او شیعه ډلو تر منځ په نښتو کې لږ تر لږه ۸۰ کسان وژل شوي او ۱۵۰ نور ټپيان دي.

د خیبر پښتونخوا د اطلاعاتو وزیر او د حکومت ویاند محمد علي سیف خبري اژانسونو ته وویل چې شیعه او سني مشرانو موافقه کړې چې لږترلږه د اوو ورځو لپاره بریدونه ودروي ځکه چې د اوږدې مودې حل په لټه کې دي.

د خېبر پښتونخوا صوبې په کورمه ضلع کې د سني او شیعه ډلو تر منځ تاوتریخوالی د نومبر په ۲۱مه وروسته له هغه پیل شو چې وسله والو د شیعه مسلمانانو پر یوه کاروان ډزې وکړې چې لږترلږه ۳۸ کسان یې ووژل.

تر اوسه کومې ډلې د دغه برید مسوولیت په غاړه نه دی اخیستی.

پولیس وايي٬ وسله والو کسانو دوکانونه، کورونه او دولتي ملکیتونه مخکې له دې چې سیمې ته یو حکومتي پلاوی د کړکېچ د کمولو په لټه کې شي، وسوځول.

د پاکستان د خیبرپښتونخوا په کورمه کې په فرقه ييزو نښتو کې د وژل شویو کسانو شمېر له ۸۰ کسانو اوښتی دی.

د یکشنبې په ورځ سیمه ییزو چارواکو او مشرانو د ازادې اروپا مشال راډیو ته دا هم تایید کړه چې لږ تر لږه ۱۵۰ نور کسان ټپيان شوي دي.

د سُني او شیعه ډلو تر منځ نښتې وروسته له هغه پيل شوې چې د مسافر وړونکو موټرو په کاروان باندې وسله وال برید وشو.

له شاوخوا درېیو ورځو په کورمه کې دا فرقه ييزې نښتې روانې دي چې د راپورونو له مخې دواړه خواوې پر یو بل سپکې او درنې وسلې کاروي.

د اسراییل پوځ اعلان کړی چې نن یکشنبې د دغه هېواد په منځنیو او شمالي سیمو کې د خطر زنګونه فعال شوي دي.

پوځ زیاته کړه چې د لبنان له‌خوا ۵۵ توغندي توغول شوي وو چې مخه یې ډب شوې ده.

د پوځ په بیان کې ویل شوي چې د خطر زنګ د اسراییل په یو شمېر مرکزي سیمو او د هېواد په بېلابېلو شمالي برخو کې غږېدلي دي.

د پوځ د دوو جلا خبرپاڼو له مخې، له لبنان څخه ۱۸ توغندي د اسراییل پر مرکزي برخې او شاوخوا ۳۰ توغندي د دې هېواد پر شمال ویشتل شوي دي.

د ځینو توغندو مخه په هوا کې نیول شوې او شنډ کړل شوي دي.

د لبنان حزب‌الله ډلې هم د یکشنبې په ورځ اعلان وکړ چې لسګونه توغندي او بې‌پیلوټه الوتکې یې د اسراییل په لور توغولي دي.

د ایران له ملاتړه برخمنې دې ډلې په یوه بیان کې ویلي چې په لومړي ځل یې د اسراییل په جنوب کې د سمندري ځواکونو پر اشدود اډې برید کړی چې په کې "یوشمېر بریدکوونکي بې‌پیلوټه الوتکې" کارول شوې دي.

په یوه بل بیان کې حزب‌الله د تل‌ابیب په یوه "پوځي هدف" د "پرمختللو توغندیو او څو بریدکوونکو بې‌پیلوټه الوتکو" په وسیله د برید خبر ورکړی دی.

د هندوستان او اسټرالیا ترمنځ د لومړۍ ټېسټ لوبې درېیمه ورځ هم پای ته ورسېده او د دې ورځې په ورستیو ۲۴ دقیقو کې اسټرالیا ته د دوهمې توپوهنې نوبت ورغی، خو یو وار بیا یې ښه پیل ونه کړ.

هندوستان چې د خپلې دوهمې پاڼۍ لوبه تر ۴۸۷ منډو وروسته ونه غځوله، اسټرالیا ته یې د ۵۳۳ منډو هدف ورکړ.

په دوهمې پاڼۍ کې د هند لپاره یشسوي جایسوال ۱۶۱ او ویرات کولي پوره ۱۰۰ ناسوځېدلې منډې وکړې.

دا په ټېسټ کرکټ کې د ویرات کولي ۳۰مه سلیزه وه.

د اسټرالیا توپوهونکي په لومړۍ پاڼۍ کې په ۱۰۴ منډو سوځېدلي وو او په دوهمې پاڼۍ کې یې ۱۲ منډې جوړې کړې دي او درې مخکښ لوبغاړي یې سوځېدلي دي.

د دې لوبې لا هم دوه نورې ورځې پاتې دي.

په پلان کې ده چې هندوستان په دې سفر کې له اسټرالیا سره پنځه ټېسټ لوبې ترسره کړي.

امریکا، بریتانیا، فرانسې او جرمني د اتومي انرژۍ نړیوالې ادارې د شورا د وروستي پرېکړه‌لیک هرکلی کړی، خو پر دې یې ژوره اندېښنه څرګنده کړې چې ایران د ځواب ورکولو او همکارۍ پر ځای خپل اتومي پروګرام پراخ کړی دی.

دې څلورو لوېدیځو هېوادونو د شنبې په ورځ د لیندۍ درېمه نېټه په یوه ګډه اعلامیه کې له ایرانه وغوښتل چې د اتومي انرژۍ له نړیوالې ادارې سره د خبرو او همکارۍ لاره تعقیب کړي.

په دې اعلامیه کې، چې د امریکا د بهرنیو چارو وزارت په وېب‌پاڼه کې خپره شوې ده، راغلي: "موږ په جدي توګه د تهران د وروستیو څرګندونو په اړه اندېښنه لرو، او یادونه کوو چې ایران د دې پر ځای چې پرېکړه‌لیک ته په همکارۍ ځواب ووايي غواړي خپل اتومي پروګرام پراخ کړی."

ایران د پنجشنبې په شپه، د اتومي انرژۍ د نړیوالې ادارې د حکمانو د شورا د پرېکړه‌لیک له صادرېدو سمدستي وروسته، اعلان وکړ چې د یورانیمو غني کولو سرعت او ظرفیت به "په پام وړ ډول" زیات کړي او یو شمېر نوي او پرمختللي سنتریفیوژونه به فعال کړي.

په پاکستان کې د پولیو درې نورې مثبتې پېښې ثبت شوې او ورسره په دغه هېواد کې سږ کال د پولیو د ثبت شویو پېښو شمېر ۵۵ ته ورسېد.

پاکستاني رسنیو نن یکشنبې وویل چې تازه پېښې په خیبرپښتونخوا او بلوجستان ایالتونو کې ثبت شوي دي.

په پاکستان کې له ۵۵ پېښو څخه ۲۵ په بلوچستان، ۱۵ په خیبرپښتونخوا او نورې د دغه هېواد په سند او پنجاب ایالتونو سره کې ثبت شوي دي.

افغانستان او پاکستان په نړۍ کې هغه دوه هېوادونه دي چې د پولیو ویروس په‌کې له منځه نه دی تللی.

د اردن په پلازمېنه عمان کې د اسراییل سفارت ته نږدې د ډزو راپورونه ورکړل شوي دي.

رویټرز خبري اژانس، یوې امنیتي سرچینې او دولتي رسنۍ نن یکشنبه ویلي چې په دې پېښه کې یو وسله وال کس وژل شوی او درې پولیس ټپیان شوي دي.

د اردون دولتي خبري اژانس پیترا (Petra) د یوې امنیتي سرچینې په حواله راپور ورکړی چې پولیسو پر ‎‎یوه وسله وال کس وروسته له هغې ډزې وکړې چې لومړی هغه د پولیسو پر ګزمه ډزې پیل کړې.

عیني شاهدانو ویلي چې د اردن پولیسو د ډزو د غږونو له اورېدو وروسته د سفارت ساحه چې پولیس په کې پراخ حضور لري٬ کلابنده کړه.

په دې ساحه کې وخت ناوخت د اسراييل ضد مظاهرې کېږي.

په هند کې یو سړی مخکې له دې چې مړی یې په اور کې وسوځول شي ژوندی شو.

۲۵ کلن روهیتاش کومار د هغې ناروغۍ له کبله چې په افغانستان کې د میرګي په نوم یادېږي، د راجستان په یوه روغتون کې بستر شوی و او یوه ډاکتر روغتون ته له رسېدو سره سم د هغه مړینه تایید کړې وه.

د روغتون مسوولو کسانو د دې په ځای چې د ناروغ د مړینې د علت د معلومولو لپاره لازم معاینات وکړي، هغه یې د روغتون سړې خونې ته یووړ څو وروسته د هندو مذهب له رسم سره سم وسوځول شي.

د روغتون سرطبیب ډي سېنګ فرانسپرس خبري آژانس ته وویل څو شېبې مخکې له دې چې اور ولګول شي، د روهیتاش وجود په حرکت راغی.

د ډي سېنګ په وینا، نوموړی ژوندی و او سا یې ایسته.

کومار سمدستي بیا روغتون ته ولېږدول شو، خو پرون د علاج پر مهال یې په رښتیا ساه وخته او دا ځل یې مړینه تایید شوه.

چارواکو د درې واړو ډاکترانو دندې ځنډولي او پولیسو په دې اړه تحقیقات پیل کړي دي.

د اوکراین ولسمشر ولودیمیر زیلینسکي وايي روسیه هڅه کوي مخکې له دې چې منتخب ولسمشر ډونالډ ټرمپ په کار پیل وکړي کورسک سیمه بېرته له اوکراین څخه ونیسي، خو هغه دا یادونه هم وکړه چې د اوکراین په دونېڅک سیمه کې روان پوځي وضعیت خورا ډېر کړکېچن دی.

زیلینسکي پرون په یوه خبري غونډې کې وویل، دی ډاډه دی چې د روسیې ولسمشر ولادیمیرپوتین غواړي د ۲۰۲۵م کال جنوري په شلمه د ټرمپ له لوړې مخکې پر اوکراین فشار زیات کړي.

اوکراین د سږني کال په اګست میاشت کې د روسې د کورسک سیمې شاوخوا ۱۴۰۰ مربع کیلومتره ساحه ونیوله.

دې ته پام سره چې ټرمپ د اوکراین د جګړې د پای ته رسولو ژمنه کړې ده، که مسکو ژرترژره اوکرایني ځواکونه له کورسک څخه ونه باسي نو بیا به اړ وي چې د اوکراین اشغال شوې سیمې له کورسک سره تبادله کړي.

چارواکو د شنبې په ورځ وویل چې د کانګو په جګړه ځپلي ډیموکراتیک جمهوریت کې تر سختو بارانونو وروسته د ځمکې ښویېدنې له امله د یوې مور او د هغې د اوو ماشومانو په ګډون نهه کسان وژل شوي دي.

د فرانسې خبري اژانس د راپور له مخې، چارواکو دا هم ویلي چې په نکوبي ښارګوټي کې د دې پېښې له کبله کورونه زیانمن شوي، د سیمه‌ییز کرنیز کوپراتیف یوه وداني ویجاړه شوې او ډېرې کروندې زیانمنې شوي دي.

یوه سیمه‌ییز چارواکي توماس باکینګا ویلي، یوه مور او د هغې اووه ماشومان د کور د نړېدو په پېښه کې مړه شول.

سخت باران د جمعې په ورځ د نکوبي ښارګوټي په شاوخوا کې چې د یوې شنې غونډۍ په لمنو کې پروت دی، پیل شو.