د لاسرسۍ وړ لېنکونه

تازه خبر
شنبه ۳۰ چنګاښ ۱۴۰۳ کابل ۰۵:۵۶

نړۍ

ګرجستان: پارلمان د "بهرنیو عواملو" لانجمنه لایحه تصویب کړه

د دغې لایحې خلاف اعتراضونه
د دغې لایحې خلاف اعتراضونه

د ګرجستان پارلمان، د رایو په اکثریت سره د "بهرنیو عواملو" لانجمنه لایحه تصویب کړه.

روسیه هم ورته قانون لري، او د دې لامل شوی چې له بهر تمویلیدونکې ګڼې رسنۍ یا نادولتي موسسې خپل فعالیتونه ودروي او په ځینو مواردو کې خلک د دې قانون د نه مراعتولو له امله زنداني شوي هم دي.

په ګرجستان کې د دغه قانون وروستی تصویب پراخ ملي او نړیوال غبرګونونه راپارولي دي.

په زرګونو کسانو چې ډېری یې ځوانان دي، په پلازمېنه تبلیسي او د پارلمان د ودانۍ مخې ته مظاهرې وکړې.

متحده ایالاتو، اروپايي ټولنې او د بشري حقونو څارونکو دا لایحه غندلې ځکه د دوی په باور ورته قانون روسیه هم لري چې له امله یې ولادمیر پوتین خپل مخالفان او خپلواک بنسټونه ځپي او غږونه یې غلي کوي.

د ورځې تازه خبرونه دلته ولولئ

حوثي یاغیانو تل‌ابیب ته د بې‌پیلوټه الوتکې د استولو مسوولیت پر غاړه واخیست

پرون جمعه د تل ابیب په جافا سیمه کې یوه بې پېلوټه الوتکه ولوېده او بېړنی حالت یې رامنځته کړ.
پرون جمعه د تل ابیب په جافا سیمه کې یوه بې پېلوټه الوتکه ولوېده او بېړنی حالت یې رامنځته کړ.

د یمن حوثي یاغیانو، چې د ایران له خوا یې ملاتړ کیږي، تل‌ابیب ته د هغې بې پیلوټه الوتکې د استولو مسوولیت پر غاړه واخیست، چې د چاودنې په نتیجه کې یې یو تن وژل شوی دی.

پرون جمعه د تل ابیب په جافا سیمه کې یوه بې پېلوټه الوتکه ولوېده او بېړنی حالت یې رامنځته کړ.

دا د غزې د جګړې له پیله تراوسه پورې پر تل‌ابیب تر ټولو مهم برید دی.

د اسراییل د پوځ لوی درستیز د خپل هېواد پر پلازمېنه د بې پیلوټه الوتکو د دې ډول برید په اړه چې بې ساری و، د وضعیت د ارزونې لپاره غونډه وکړه.

په اسراییل کې د امریکا سفارت هم اعلان کړی چې وضعیت له نژدې څاري.

د حوثي یاغیانو د پوځي څانګې ویندوی انصارالله یحیی سريع د جمعې په سهار اعلان وکړ چې په تل‌ابیب باندې یو مهم برید شوی دی.

بلېنکن: ایران د اټومي وسلو د اړتیا وړ موادو له تولید څخه یوازې یوه یا دوه اوونۍ شا ته دی

د امریکا د بهرنیو چارو وزیر انټوني بلېنکن
د امریکا د بهرنیو چارو وزیر انټوني بلېنکن

د امریکا د بهرنیو چارو وزیر وايي، ایران د اټومي وسلو د اړتیا وړ موادو له تولید څخه یوازې یوه یا دوه اوونۍ شا ته دی.

انټوني بلېنکن د جمعې په ورځ د جولای په ۱۹مه وویل: "د دې لپاره چې اټومي موافقه له پامه غورځول شوې ده، ایران د دې پر ځای چې د اټومي وسلو له جوړولو سره لږ تر لږه یو کال واټن ولري، اوس ښايي یوازې یوه یا دوې اوونۍ ورته په‌کار وي."

د فرانس پرېس خبري اژانس د راپور له مخې، نوموړي دا څرګندونې په کلوراډو کې په یوه غونډه کې وکړې او په ښکاره یې وویل چې د ایران اسلامي جمهوریت تر اوسه لا اټومي وسله نه ده جوړه کړې.

د اتومي انرژۍ د نړیوالې ادارې د وروستیو راپورونو له مخې، ایران اوس یورانیم ۶۰ سلنه غني کوي او که تر دې ډېر غني کړي د درو اتومي وسلو لپاره کفایت کوي.

تهران ټینګار کوي چې د اتومي پروګرام هدف یې په بشپړ ډول سوله‌ییز دی، خو د اسلامي جمهوریت چارواکو په دې وروستیو کې ویلي چې که پر ایران برید وشي او یا د اسراییل له‌خوا د هغه موجودیت له ګواښ سره مخامخ شي، ښايي پر خپل اتومي پروګرام بیا کتنه وکړي.

د پاکستان په پنجاب کې د القاعده یو مشر او د اسامه‌ نژدې همکار نیول شوی

د عکس ښي لور ته د القاعده پخوانی مشر اسامه بن لادن او چپ لور ته د پاکستان په پنجاب کې تازه نیول شوی د دې ډلې مشر امین‌الحق
د عکس ښي لور ته د القاعده پخوانی مشر اسامه بن لادن او چپ لور ته د پاکستان په پنجاب کې تازه نیول شوی د دې ډلې مشر امین‌الحق

پاکستاني چارواکي په هغه هېواد کې د القاعده د یوه مشر د نیولو خبر ورکوي.

د پاکستان د پنجاب ایالت له تروریزم سره د مبارزې ادارې، سي‌ټي‌ډي په یوه بیان کې د القاعده د دې مشر نوم امین‌الحق ښودلی او ویلي یې دي چې هغه د القاعده د وژل شوي مشر او پر امریکا د سپټمبرد ۱۱مې د حملو د اصلي طراح اسامه بن لادن نژدې همکار و.

د دې ادارې مشرعثمان ګوندل نن جمعه په لاهور کې په یوه خبري کنفرانس کې وویل چې نوموړی په ګجرات ښار کې د استخباراتي معلوماتو پر اساس د ترسره شویوعملیاتو په نتیجه کې نیول شوی دی.

هغه وویل چې نوموړي ته دوسیه پرانیستل شوې او تورن شوی چې په دې ایالت کې پر مهمو تاسیساتو د په نښه کولو لپاره یې تخریبي پلانونه جوړ کړي وو.

پاکستان په داسې حال کې په پنجاب کې د القاعده د دې مشرد نیولو خبر ورکوي چې د دې شبکې موسس او پر امریکا د تروریستي بریدونو اصلي طراح اوسامه بن لادن د ۲۰۱۱م کال په مې میاشت کې د امریکایي ځانګړیو ځواکونو د عملیاتو په ترڅ کې د پاکستان په ابټ آباد کې ووژل شو.

کرکټ؛ نن د ښځو اسیا جام سیالۍ پیل شوې

ارشیف
ارشیف

د کرکټ اسیایي شورا نن جمعه د جولای په ۱۹مه نېټه د ښځو د اسیا جام سیالۍ پیل کړې.

یادې سیالۍ چې د سریلانکا په کوربه‌توب پیل شوي، د اسیا ۸ لوبډلې یې ګډونوالې دي.

د کرکټ اسیایي شورا د راپور پر اساس دغه ۸ لوبډلې يې په دوه ګروپونو ویشلي دي چې په اې A ګروپ کې هندوستان، پاکستان، نیپال او د عربي متحده اماراتو لوبډلې یوځای دي، په بي B ګروپ کې بیا بنګله‌دېش، سریلانکا، مالیزیا او د تایلینډ لوبډلې یوځای شوي دي.

د دې ټورنمنټ لومړۍ لوبه د نیپال او اماراتو ترمنځ پیل شوې ده.

افغانستان د کرکټ نړیوالې شورا یوازینی بشپړ غړی هېواد دی چې د ښځو د کرکټ ملي لوبډله نه لري او وخت ناوخت پرې په نړیواله کچه انتقادونه کېږي او دا نانندریزه موضوع لا هم حل نه ده.

د ویلو ده چې د ښځو روان اسیا جام به د جولای تر ۲۸مې نېټې پورې دوام لري.

د اسراییل په پلازمېنه کې د چاودنې له کبله یو کس وژل شوی

په تل‌ابیب کې د شوې چاودنې سیمه
په تل‌ابیب کې د شوې چاودنې سیمه

د ایران له ملاتړه برخمنو حوثي یاغیانو د اسراییل پر تلبیب ښار د بې‌پیلوټه الوتکې د یوه برید مسوولیت اخیستی، چې د چاودنې په نتیجه کې یې یو تن وژل شوی دی.

د فرانس پرېس خبري اژانس د راپور له‌مخې د حوثیانو پوځي ویاند یحی سریع په ټولنیزو شبکو کې په یوه بیان کې ویلي چې، دوی د یافا په نوم نوې بې‌پیلوټه الوتکې چې د دښمن د رادارو سیسټم یې نه‌شي موندلی، فعالې کړي دي.

تر دې مخکې د اسراییل د بېړنیو خدمتونو د ادارې یو ویاند وایي چې، نن سهار وختي په تلبیب کې د یوې چاودنې په نتیجه کې یو تن وژل شوی دی.

د اسراییل پوځ ویلي، د یوه هوایي هدف راغورځېدلې ټوټه د دغې چاودنې سبب شوې ده.

په‌دې اړه نورجزیات نه‌دي ورکړل شوي، خو د بېړنیو خدمتونو ادارې ویلي چې، چاودنه د دې ښار د مرکزي برخې په یوه ودانۍ کې سهاروختي پاو باندې درې بجې شوې ده.

یوې روغتیایي ادارې په‌دې چاودنه کې د دوو کسانو د سطحي ټپي کېدو خبر ورکړی، خو د پولیسو په لومړني راپورکې د اووه کسانو د ټپي کېدو خبره شوې وه.

ټرمپ د امریکا ولسمشرۍ لپاره خپله کاندیداتوري ومنله

د عکاس منځ کې ډونالډ ټرمپ
د عکاس منځ کې ډونالډ ټرمپ

د جمهوري غوښتونکو د ملي مجمع په وروستۍ ورځ ډونالډ ټرمپ د ولسمشرۍ لپاره خپله کاندیداتوري ومنله.

ټرمپ پنځه ورځې مخکې د یوې کمپاینې غونډې پر مهال په برید کې په ښي غوږ ټپي شوی و.

ټرمپ په میلواکي کې د وینا پر مهال د برید شېبه یاده کړه چې څنګه په ښي غوږ په مرمۍ ولګېد او که یې خپل سر نه وای تاو کړی نو ښايي دلته به نه وای.

هغه د خپلو پلویانه مننه وکړه چې د برید پر مهال ونه خوځېدل او تر پایه د ده لپاره ولاړ وو.

ډونالډ ټرمپ د جمهوري غوښتونکي ګوند د ملي مجمع په وروستۍ ورځ د امریکا د ولسمشر جوبایډن پر سیاستونو کلکې نیوکې وکړې او ویې ویل چې په ګډه به د امنیت، هوساینې او ازادۍ نوی باب خپلو خلکو ته پرانېزي.

په پاکستان کې پر خواله رسنیو بندیز لا هم دوام لري

ارشیف
ارشیف

په پاکستان کې پر خواله رسنیو بندیز، چې ظاهراً د عاشورا د ورځې په خاطر لګول شوی و، لا هم دوام لري.

د انټرنېټ څارونکې ویبپاڼو، نېټ بلاکس او همداراز ډاون ډیټیکټر پرون وویل چې په پاکستان کې له ایکسپاڼې یا پخواني ټویټر وروسته پر فېسبوک او انسټاګرام هم بندیز لګول شوی دی.

د پاکستان حکومت په دې اړه رسماً څه نه دي ویلي، خو داسي ښکارېده چې دا بندیز به یوازې د محرم په لسمه او یوولسمه وي، خو د خواله رسنیو کاروونکي وايي چې بندیز لا هم دوام کړی او دوی یوازی د "وي پي این" له لارې خواله رسنۍ لیدلی شي.

پر غزې د اسراييلي ځواکونو بريد کې نهه فلسطينيان وژل شوي

پر غزې د اسراییلي ځواکونو د برید له کبله یوه ټپي شوې مېرمن روغتون ته د درملنې لپاره لېږدول کېږي.
پر غزې د اسراییلي ځواکونو د برید له کبله یوه ټپي شوې مېرمن روغتون ته د درملنې لپاره لېږدول کېږي.

اسراییلي ځواکونو پرون چهارشنبې د غزې تړانګې د مرکزي برخې پر یو شمېر سیمو بریدونه وکړل چې د سیمه‌ییزو روغتیایي چارواکو په خبره په نتیجه کې یې لږترلږه نهه فلسطینیان وژل شوي دي.

په عین حال کې اسراییلي ټانکونو د غزې په جنوب رفح کې محدود وړاندې تګ کړی دی.

د رویترز خبري اژانس د راپور له‌مخې په غزه کې د روغتیا وزارت ویلي چې په تېرو ۲۴ ساعتونو کې د اسراییل په بریدونو کې لږترلږه ۸۱ فلسطینیان وژل شوي او ۱۹۸ نور ټپیان شوي دي.

د راپور له‌مخې دا وزارت د تلفاتو په اړه د شمېرو په اعلانولو کې د وسله‌والو او ولسي خلکو ترمنځ توپیر نه‌کوي.

په رفح کې روغتیایي چارواکو د اسراییل په یوه هوایي برید کې د دوو تنو د وژل کېدو خبر ورکړی او همدارنګه یې ویلي چې اسراییلي ټانکونو د ښار په شمالي برخه کې عملیات ترسره کړي او بېرته خپلو اصلي ځایونو ته ستانه شوي دي.

د اسراییل پوځ وویل، ځواکونو یې د رفح ښار اړوند سیمو کې د استخباراتو معلوماتو پر اساس دقیقو عملیاتو ته دوام ورکړی او زیاته یې کړه چې دوی یوه تروریستي څانګه او پر اسراییلي ځواکونو د برید یو ځای يې له‌منځه وړي دي.

اسراییل وروسته له هغې د حماس ډلې چې امریکا او اروپایي ټولنه یې د یوې ترهګرې ډلې په توګه پېژني، د له‌منځه وړلو ژمنه وکړه چې دې ډلې د تېر کال د اکټوبر په اوومه د اسراییل پر قلمرو برید وکړ، شاوخوا ۱۲۰۰ کسان یې ووژل او له دوه نیم سوو زیات یې یرغمل کړل.

په غزه کې روغتیایي چارواکو ویلي چې د اسراییل له‌خوا په بریدونو کې لږترلږه ۳۸ زره فلسطینیان وژل شوي دي.

ټرمپ به د ولسمشرۍ لپاره راروانو ټاکنو کې د خپل ګوند رسمي نوماندي ومني

د عکس ښي لور ته وېنس چې ټرمپ له لوري د ولسمشرۍ ټاکنو لپاره د مرستیال په توګه ټاکل شوی او چپ لور ته په خپله ډونالډ ټرمپ.
د عکس ښي لور ته وېنس چې ټرمپ له لوري د ولسمشرۍ ټاکنو لپاره د مرستیال په توګه ټاکل شوی او چپ لور ته په خپله ډونالډ ټرمپ.

د امریکا له پخواني ولسمشر ډونالډ ټرمپ څخه به نن هغه مهال د جمهوریپالو په کنګره کې تود هرکلی وشي چې دی د امریکا د ولسمشرۍ لپاره راروانو ټاکنو کې د دې ګوند له‌خوا رسمي نوماندي ومني او ملت ته چې په پنسلوانیا کې پر نوموړي د څو ورځې مخکې برید سیوری غوړولی، وینا وکړي.

تمه کېږي چې له پخواني ولسمشر ډونالډ ټرمپ څخه به نن په میلواوکي کې د جمهوري غوښتونکو د ګوند د کنګرې په وروستۍ ورځ د یوه اتل په توګه هرکلی وشي.

په پنسلوانیا کې د انتخاباتي کمپاین په یوه غونډه کې د یوه وسله‌وال له‌خوا د شنبې د ورځې په برید کې چې یو کس ووژل شو، نوموړی په ښي غوږ ټپي شو.

د فرانس‌پرېس خبري آژآنس د راپور له مخې په داسې حال کې یو شمېر جمهوري غوښتونکو هڅه کړې چې پر ټرمپ د برید ملامتي پر هغو ډیموکراټانو واچوي چې د ټرمپ ضد ویناوې کوي، خو په خپله میلیاردر ټرمپ ویلي چې د تهاجمي وینا نسخه یې بدله کړې او په نوې نسخه کې هیله‌من دی چې هېواد یو موټی کړي.

ټاکل شوې چې په امریکا کې د ولسمشرۍ لپاره انتخابات د نومبر میاشتې په پنځمه نېټه ترسره شي.

د ټرمپ پر وړاندې به د ډیموکراټانو د ګوند له‌خوا اوسنی ولسمشر جوبایډن سیالي کوي.

په روسیه کې د امریکایي خبریال "ایوان ګیرشکوویچ" د محاکمې بهیر بیا پیل شوی

په روسیه کې زنداني امریکایي خبریال ایوان ګیرشکوویچ
په روسیه کې زنداني امریکایي خبریال ایوان ګیرشکوویچ

په روسیه کې د زنداني امریکایي خبریال ایوان ګیرشکوویچ د محاکمې بهیر بیا پیل شوی دی.

د امریکایي والسټریټ ژورنال ورځپاڼې دغه خبریال چې د ۲۰۲۳م کال د مارچ په ۲۵مه د روسیې په یکاترینبورګ ښار کې نیول شوی، په جاسوسۍ تورن شوی، هغه تور چې والسټریټ ژورنال او د امریکا حکومت رد کړی او هغه یې سیاسي انګېزه بللې ده.

د یکاترینبورګ سیمه‌ییزې محکمې پرون چهارشنبې د هغه د محاکمې د بیا پیلېدو خبر ورکړ.

که ۳۲ کلن ګیرشکوویچ چې موراو پلار د پخواني شوروي اتحاد پر مهال امریکا ته کډوال شوي او دې هلته زېږېدلی، مجرم وپېژندل شي، د شلو کالو بند له سزا سره مخامخ دی.

پر نوموړې سربېره د ازادي راډیو خبریاله او د روسیې او امریکا دوه ګوني تابعیت لرونکې السو کورماشیووا بله امریکایي خبریاله ده چې په اوس وخت کې په روسیه کې زنداني ده.

نوموړې چې د تېر کال په اکټوبر کې په کازان ښارکې نیول شوې، پرې تورپورې شوی چې د روسیې د قانون له مخې یې د یوه بهرني اجنټ په توګه نوم نه‌دی ثبت کړی.

نور راوښيه

XS
SM
MD
LG