د طالبانو حکومت سبا په سالنګونو او د هېواد د شمال ختیځ او لوېدیځ په ځینو ولایتونو کې د سختو بارانونو او احتمالي سېلابونو اټکل کړی.

ملي راډیو تلوېزیون چې طالبان یې اداره کوي پر خپله ایکس‌پاڼه د ټرانسپورټ او هوايي چلند وزارت د هواپېژندنې ریاست په حواله خبر ورکړی چې چهارشنبې د غويي په ۲۶مه نېټه په هرات، فراه، غور، بادغیس، سرپل، سمنګان، بلخ، بامیان، کندز، بغلان، تخار، بدخشان، نورستان، کونړ، لغمان، ننګرهار، پنجشېر، کاپیسا، پروان، میدان وردګو، غزني او لوګر ولایتونو کې د شدیدو بارانونو، تالندې او برښنا او د سېلونو د راوتلو اجتمال شته.

د تېرو څو ورځو بارانونو له کبله په بغلان او د شمال په څو نورو ولایتونو کې درانه سېلونه وبهېدل چې لویه انساني فاجعه یې رامنځته کړه.

دې سېلابونو، د ملګروملتو د ارقامو له مخې، له ۳۰۰ زیات خلک ووژل او زرګونه نور یې ټپیان کړل.

دې سېلابونو همداراز زرګونه کورونه او زرګونه جریبه کرنیزې ځمکې هم ویجاړې کړې.

د افغانستان د بیارغونې لپاره د امریکا د مرستو څارونکې ادارې سیګار اعلان کړی چې د روانې جنوري میاشتې په ۳۱مه یې فعالیت پای ته رسېږي.

سیګار د چارشنبې په ورځ (د سلواغې په ۸مه- د جنوري ۲۸مه) په یوه بیان کې له ټولو هغو کسانو مننه وکړه چې په تېرو ۱۷ کلونو کې یې د دې ادارې ملاتړ کړی، فعالیتونه یې څارلي دي او یا یې ګټه ترې اخیستې ده.

د امریکا کانګرس نوموړې اداره په ۲۰۰۸ کال کې په دې مقصد جوړه کړه چې د افغانستان د بیارغونې لپاره د امریکا د حکومت پر مرستو څارنه وکړي.

سیګار په دې کلونو کې د افغانستان د پرمختګ په پروژو کې د فساد په اړه ګڼ راپورونه خپاره کړل او ویل یې چې په افغانستان کې د امریکايي مالیه ورکوونکو په میلیونونه ډالره مرستو کې فساد روان دی.

د سیګار د معلوماتو له مخې متحدوایالتونو د طالبانو له بیاواکمنېدو وروسته هم له افغانستان سره څه باندې ۳ میلیارد ډالره مرسته کړې ده.

د ولسمشر ډونالډټرمپ ادارې د تېرکال په جنوري میاشت کې د امریکا بهرنۍ مرستې بندې کړې.

د آسیا د فوټسال د جام د سیالیو په دوام افغان لوبډله سبا جمعه (د سلواغې ۱۰مه) له مالیزیا سره لوبه کوي.

دا به په روانه لړۍ کې د افغانستان دوهمه لوبه وي. افغانستان په خپله لومړۍ لوبه کې د چارشنبې په ورځ سعودي عربستان ته درې- صفر ماتې ورکړه.

افغانستان د آسیا د فوټسال د جام په لړۍ کې په څلورم ګروپ کې له سعودي عربستان، مالیزیا او ایران سره یوځای دی.

د اندونیزیا په کوربه توب د لوبو دا لړۍ د ۱۶ لوبډلو په ګډون د روانې سلواغې میاشتې په اوومه پیل شوه او د همدې میاشتې تر ۱۸مې پورې دوام کوي.

د روسي رسنیو د راپورونو له مخې د ستراتيژۍ او پالیسۍ په چارو کې د طالبانو د حکومت د دفاع وزارت مرستیال له خپل روس سیال سره د کتنې پرمهال د افغانستان او روسیې ترمنځ د دفاعي همکاریو په اړه خبرې کړي.

انټر فکس خبري آژانس پرون د روسیې د دفاع وزارت په حواله راپور ورکړ چې محمدفرید په مسکو کې له خپل روسي سیال واسیلي اوسماکوف سره د دې همکاریو په اړه مشورتي خبرې کړې دي.

په خبر کې راغلي دي چې دواړو چارواکو د علاقې وړ برخو کې د پوځي همکاریو د پیل اړه خبرې وکړې او موافقه یې وکړه چې د منظم کار د پیل لپاره به لازم ګامونه اوچتوي. د طالبانو د حکومت سرچینو تراوسه په دې اړه څه نه دي ویلي.

د طالبانو حکومت له روسیې پرته د نړۍ بل هېڅ هېواد تراوسه په رسمیت نه دی پېژندلی.

د ننګرهار ولایت په مرکز جلال آباد ښار کې د یوې دوه پوړیزې ودانۍ د نړیدو په نتیجه کې د یوې کورنۍ اوو غړو خپل ژوند له لاسه ورکړی او یوتن ټپي دی.

د طالبانو تر ادارې لاندې باختر خبري آژانس راپور ورکوي چې دا پېښه تېره شپه ناوخته د جلال آباد ښار په غوچک سیمه کې شوې او په نتیجه کې یې یوه مور او شپږ ماشومان یې وژل شوي او د ماشومانو پلار ټپي دی.

په خبر کې د پېښې علت نه دی ښودل شوی خو په تېرو څو ورځو کې د هېواد په ختیځ او نورو برخو کې سخت بارانونه او درنې واورې وشوې چې خلکو ته یې درانه مالي او ځاني زیانونه اړولي دي.

د هواپېژندنې ادارو د اټکل له مخې له سبا جمعې څخه د یکشنبې تر ورځې پورې د هېواد په ځینو سیندیزو حوزو کې د سختو بارانونو او د سېلابونو د راوتلو احتمال شته.

د طالبانو د حکومت د انرژۍ او اوبو وزارت نن پر خپله ایکس پاڼه په یوه بیان کې ویلي چې د هرات، غور، بادغیس، فراه، نیمروز، هلمند، کندهار، ارزګان، جوزجان، سرپل، فاریاب، بلخ، غزني، لوګر، میدان وردګو، کابل او پروان په سیندونو کې د اوبو د کچې د لوړېدو او د سېلابونو د راوتلو امکان شته.

په بیان کې له هغو خلکو چې د دې سیندونو ته نژدې ژوند کوي غوښتنه شوې چې باخبره واوسي او د سېلاب د راوتلو پرمهال هغه خلک خبر کړي چې په کوزنیو سیمو کې ژوند کوي.

د اسیا د فوتسال جام دلوبو په ترځ کې نن پنجشنبه هم ۴ سیالۍ ترسره کیږي.

لبنان له ویتنام او جنوبي کوریا له عراق سره لوبیږي. دغه راز د کویټ ټیم تایلند او په یوه بله لوبه قرغیزستان له اندونیزیا سره مخاخ کیږي.

پرونیو لوبو کې دافغانستان ټیم سعودي عربستان ته ۳-۰ ماته ورکړه ، د ازبکستان او تاجیکستان لوبه ۰-۰ مساوي شوه ، او دایران ټیم مالیزیا ته ۴-۱ ماته ورکړه او دغه راز د جاپان ټیم استرالیا ته ۶-۲ ماته ورکړه.

د افغانستان دفوتسال ملي ټیم ددغه جام په سیالیو کې خپله دوهمه لوبه د جمعې په ورځ د مالیزیا ټیم سره کوي.

افغانستان د جام په څلورمه ډله کې سعودي عربستان ، مالیزیا او ایران سره دی.

د اسیا د فوتسال دجام لوبې د ۱۶ ټیمونو په ګډون د سلواغې په اومه په اندونیزیا کې پیل او دهمدې میاشتې تر ۱۸ به دوام وکړي.

د افغانستان د کریکټ ملي ټیم د ۲۰۲۶ کال د کریکټ د نړیوال شل اوریزجام د تمریناتي لوبو مهالویش سره سم راتلونکې اونۍ سکاتلند او ویست اندیز سره لوبې کوي.

دافغانستان کریکټ بورډ د چهارشنبې په ورځ په خپله فیسبوک پاڼه ولیکل چې دافغانستان او سکاتلند د ټیمونو ترمینځ شل اوریزه تمریناتي لوبه د سلواغې په ۱۳ مه د دوشبنې په ورځ او د ویست اندیز په وړاندې لوبه د سلواغې په ۱۵ مه د چهارشنبې په ورځ ترسره کیږي.

د ۲۰۲۶ کال دشل اوریز نړیوال جام لوبې دهند او سیریلانکا په کوربه توب د سلواغې په ۱۹ مه پیلیږي.

افغانستان کې د طالبانو حکومت وايي د سوالګرو د راټولولو دلړۍ د پیل راهیسې یې په مجموع کې د کابل له ښاره تقریبا ۷۵ زره سوالګر را ټول کړي چې په دوی کې ۳۸ زره تنه د مرستو مستحق او ۳۷ زرتنه حرفه اي سوالګر پیژندل شوي دي.

د ریاست الوزرا د اقتصادي مرستیال ملا عبدالغني برادر دفتر د چهارشنبې په ورځ وویل چې مستحق کسان سرې میاشتې ته معرفي شوي دي او هره میاشت د بانک له لارې ورسره نقدي مرسته کیږي.

اعلامیه زیاتوي چې ځینې دغه سوالګر دتداوي لپاره روغتیا وزارت اوځینې نور دکار موندنې لپاره دکابل شاروالی ته معرفي شوي دي.

تر دې مخکې کابل کې یوشمیر سوالګرو ازادي راډیو ته ویلي وو چې تراوسه یې کومه مرسته نه ده ترلاسه کړې.

د طالبانو حکومت په ۱۴۰۱ کال کې سوالګري منع کړه او په بیلابیلو ولایتونو کې یې د سوالګرو راټولول پیل کړل.

فقر او بیکاري د سوالګري عمده عوامل ګڼل کیږي.

د افغانستان د بشري مرستو صندوق د ترکیې د ۵ لک ډالرو مرستې خبر ورکوي.

دغه صندوق د چهارشنبې په ورځ په خپله ایکسپاڼه د انقرې لدې مرستې مننه وکړه.

صندوق وايی دغه پیسې د ستنوشویو کډوالو او داخلي بیځایه شویو کسانو په ضروري اړتیاوو لګول کیږي.

دغه ځانګړی صندوق د ملګرو ملتونو لخوا تاسیس شوی دی.

د ملګرو ملتونو دبشري مرستو د همغږی دفتر ، اوچا، وايي په روان ۲۰۲۶ کال کې شاوخوا ۲۱.۹ ملیونه کسان په افغانستان کې مرستو ته اړتیا لري.

اوچا زیاتوي ددغه شمیر خلکو اړتیاوو د پوره کولو لپاره ۱.۷۲ ملیارد ډالرو ته اړتیا ده.

د طالبانو عدلې وزارت نن په خبرپاڼه کې ویلي چې د دوی ټول تقنیني اسناد له شریعت سره سم تدوین شوي دي او له دې قوانینو سره مخالف کسان به د قانوني تعقیب لپاره عدلي او قضایي ارګانونو ته معرفي شي.

طالبانو روانه اونۍ یوی نوی قانون تصویب کړ چې له مخې یې افغان ټولنه پر ملایانو اشرافو، متوسطه او ټیټې کچې ویشل شوې او پکې ویل شوي دي چې د همدې طبقاتي سیستم له مخې به خلکو ته سزاوې ورکول کیږي.

پر دې قانون د بشري حقونو یوشمیر ډلو انتقادونه کړې دي او پرون د افغانستان لپاره د اروپایي ټولنې ځانګړی استازي ژیل برتراند ازادي راډيو ته وویل چې د دې قانون تصویب جدي اندیښنې پيدا کړې دي.