د لاسرسۍ وړ لېنکونه

تازه خبر
پنجشنبه ۱۰ غبرګولی ۱۴۰۳ کابل ۱۱:۵۶

نړۍ

د نړۍ اوو سترو صنعتي هېوادونو د تهران په وړاندې د تازه بندیزونو خبرداری ورکړ

د نړۍ د اوو سترو صنعتي هېوادونو د بهرنیو چارو وزیران
د نړۍ د اوو سترو صنعتي هېوادونو د بهرنیو چارو وزیران

د نړۍ د اوو لویو سترو صنعتي هېوادونو یا جي اووه ډلې د بهرنیو چارو وزیرانو پر اسراییل د ایران د حملې له کبله، نن د تهران په وړاندې د تازه بندیونو خبرداری ورکړ.

دغو وزیرانو دغه راز له دواړو لوریو غوښتنه کړې چې په سیمه کې د کړکېچ له زیاتولو ډډه وکړي.

دا وروسته له هغې چې نن سهار د ایران پر اصفهان ښار د اسراییل د احتمالي ځوابي حملو خبرونه خپاره شول.

په همدې حال کې اسراییل د سوریې په جنوب کې د سوریې د هوايي ځواک پر یوه قطعه هوايي حملې کړې دي.

د سوریې د سانا خبري اژانس د خبر له مخې، په دې حمله کې مالي زیانونه اوښتي دي.

د ورځې تازه خبرونه دلته ولولئ

د سلوانیا حکومت د فلسطین خپلواک دولت په رسمیت وپېژانده

د سلوانیا صدراعظم روبرت ګلوب
د سلوانیا صدراعظم روبرت ګلوب

د سلوانیا حکومت نن د هغې پرېکړې د تصویب اعلان وکړ چې له مخې یې د فلسطین خپلواک دولت په رسمیت پېژندل کېږي.

د هغه هېواد صدراعظم روبرت ګلوب نن دغه اعلان وکړ، تر دې مخکې هسپانیا، ایرلنډ او ناروې هم د فلسطین د خپلواک دولت د رسمیت پېژندلو پرېکړې اعلان کړې وې.

د سلوانیا صدراعظم روبرت ګلوب نن په یوه کنفرانس کې وویل، د دوی حکومت فلسطین د خپلوک او ملي حاکمیت لرونکي دولت په توګه په رسمیت پېژني.

سلوانیا چې د اروپايي ټولنې غړی هېواد دی، باید د دې ټولنې له خوا هم د خپل حکومت د پرېکړې تصویب واخلي.

د اسراییل د بهرنیو چارو وزیر د سلوانیا حکومت دا پرېکړه غندلې ده.

دا پر اسراییل د روان او همغږي فشار برخه ده چې هدف یې د غزې د شخړې پای ته ورسول دي.

د ایران پر یوې مخکښې سیاسي مخالفې او دوو ورونو تازه تورونه لګېدلي

فاطمه سپهري د ایران د حکومت او د ایران د رهبر ایت الله علي خامنه اي له مخالفانو ده.
فاطمه سپهري د ایران د حکومت او د ایران د رهبر ایت الله علي خامنه اي له مخالفانو ده.

د ایران قضایه قوې د ایران د مخکښې سیاسي مخالفې فاطمې سپهري او د هغې د دوو ورونو پر خلاف تازه تورونه لګولي دي.

دوی د ایران د اوسنیو او پخوانیو رهبرانو د "سپکاوي" په تور په بند کې دي.

د تازه تورونو په باب نور توضیحات نه دي ورکړل شوي.

د فاطمې ورور اصغر سپهري پر ټولنیزو شبکو د دغو تورونو په باب څرګندونې کړي او ویلي یې دي، د مشهد یوه تحقیقاتي قاضي د هغه د خور او دوو وروڼو په دوسیه کې نور تورونه ورزیات کړي دي.

اصغر سپهري وايي، خور یې فاطمه سپهري له ۲۰ میاشتو راهیسې په زندان کې ده او ټلیفون یې په شدت کنټرولېږي.

ده په وینا، دوه نور ورونه یې محمد حسین سپهري او حسین سهپري د تېر لمریز کال له تلې یا میزان میاشتې په توقیف کې دي.

فاطمه سپهري د ایران د حکومت او د ایران د رهبر ایت الله علي خامنه اي له مخالفانو ده.

د پاکستان پوځ: د افغانستان له خاورې د ترهګرۍ پلان شویو پېښو ته اندېښمن یوو

د پاکستان په کوټه کې د پولیسو پر یوه موټر چاودنه کې مرګ‌ژوبله اوښتې وه. د ۲۰۲۲م کال د نومبر ۳۰مه
د پاکستان په کوټه کې د پولیسو پر یوه موټر چاودنه کې مرګ‌ژوبله اوښتې وه. د ۲۰۲۲م کال د نومبر ۳۰مه

د پاکستان پوځ وایي، د ترهګرۍ هغو پېښو ته جدي اندېښنه لري چې په وینا یې د افغانستان په خاوره کې پلان کېږي.

د پاکستان د پوځ د عامه اړیکو له دفتره نن پنجشنبې په یوه خپره شوې خبرپاڼه کې ویل شوي چې په هغې غونډه کې چې پرون چهارشنبې په راولپنډۍ کې د پوځ د مشر جنرال سید عاصم منیر په مشرۍ جوړه شوې وه، وویل شول چې د پاکستان وسله‌وال مخالفين په هېواد کې د امنیتي ځواکونو او بې ګناه ملکي وګړو د په نښه کولو لپاره د افغانستان خاوره استعمالوي.

د پاکستان د پوځ د دغې ادعا په اړه د طالبانوحکومت تراوسه غبرګون نه‌دی ښودلی، خو له دې مخکې یې په کراتو کراتو دا ډول ادعاوې رد کړي او ویلي یې دي چې هیچاته به اجازه ورنه‌کړي چې د افغانستان له خاورې پر نورو د بریدونو لپاره کار واخلي.

د رفح اوسېدونکو په سیمه کې د سختو بریدونو خبر ورکړ

په رفح کې د روانې جګړې یوه څنډه
په رفح کې د روانې جګړې یوه څنډه

وروسته له هغې چې د اسراییل پوځ له مصر سره پر پوله د غزې د یوه ستراتیژیک کوریډور د نیولو خبر ورکړ، د غزې تړانګې د جنوبي ښار رفح اوسېدونکو نن وویل چې تېره شپه په سیمه کې د سختو بریدونو شاهدان وو.

د فرانس‌پرېس خبري آژآنس د راپور له مخې د اسراییل د پوځ ویاند ډانیل هګاري وویل چې اسراییل هغه تنګه سرحدي سیمه تر کنټرول لاندې راوستې چې شاوخوا شل تونلونه په‌کې موندل شوي دي.

په غزه کې عیني شاهدانو د رفح په مرکزي او لوېدیځو سیمو کې د نښتو راپورونه ورکړي دي.

دوی ویلي چې اسراییلي ځواکونو د ښار په ختیځه برخه کې چې اسراییلي ځواکونو د مې په اوومه پرې یرغل پیل کړی و، یو شمېر ودانۍ ویجاړې کړې دي.

په دغو نښتو کې د مرګ‌ژوبلو په اړه تراوسه راپورونه نه‌دي ورکړل شوي.

د راپورونو له مخې د اسراییلو له‌خوا د فیلادیلفي په نوم د دغه کوریډور نیول ښایي د اسراییل او مصر اړیکې هم پیچلې کړي، ځکه مصر له مخکې نیوکه کړې چې اسراییل یې د پولې پر لوري پرمختګ کړی دی.

اوکرایني ځواکونو د روسیې څو بې پیلوټه الوتکې او میزاییل له منځه وړي

ارشیف
ارشیف

د اوکراین د هوایي مدافعې ځواکونه وایي چې نن یې د روسیې څو ډرون الوتکې او میزاییل له منځه یووړل چې د اوکراین په څو سیمو کې یې پوځي او ملکي تاسیسات د بریدونو لپاره په نښه کړي وو.

دغو ځواکونو نن پر ټیلګرام په یوه بیان کې ویلي چې ۳۲ ډرونونه او ۱۹ توغندي یې د خمیلنڅکي، دنیپرو پتروسک، چیرکاسي، کیروهراد، زاپوریژیا، ادیسه، خیرسون، کییف او وینیڅیا د سیمو د پاسه راغورځولي دي.

په عین حال کې د خارکییف ښاروال ایهور تیریکوف وویل چې تېره شپه د دې ښار په شمال ختیځ کې چې د روسیې له پولې یوازې ۳۵ کیلومتره واټن لري، د روسیې په توپچي بریدونو کې د ګازو د نللیکې په شمول مهم تاسیسات زیانمن شوي دي.

د روسیې په دغو بریدونو کې د احتمالي ځاني تلفاتو په اړه څه نه‌دي ويل شوي، خو اوکرایني چارواکو پرون د روسیې په بریدونو کې د لږترلږه پنځو ملکي وګړو د وژل کېدو او شپږو نورو د ټپي کېدو خبرورکړی و.

بلوچستان کې د پاکستاني اتباعو پر موټر د ایراني ځواکونو ډزې؛ ۴ کسان وژل شوي

ایراني پوله ساتي ځواکونه
ایراني پوله ساتي ځواکونه

د ایران سرحدي ځواکونو په بلوچستان کې پر هغه موټر ډزې کړي چې پاکستاني اتباع په کې سپاره وو.

اسوشېټېډپرېس خبري اژانس نن پنجشنبه د پاکستاني چارواکو په حواله دغه راپور ورکړی او ویلې یې دي چې د ډزو په پرونۍ پېښه کې ۴ پاکستانیان وژل شوي او دوه نور ټپیان شوي دي.

په بلوچستان کې یوه حکومتي مسوول صاحبزاده اسفند ویلي، دوی ته دا معلومات نه‌شته چې ایراني پوله‌ساتو ولې پر پاکستاني اتباعو ډزې کړي.

د ایران دولتي سرچینو هم تراوسه په دې اړه څه نه دي ویلي، خو مخکې د ایران او پاکستان پوله ساتو ځواکونو سرحدي سیمه کې د قاچاق کوونکو او سخت دریځو ډلو د نیولو خبرونه ورکړي دي.

ایران تېره جنوري میاشته کې پرپاکستان هوایي برید هم کړی و چې پاکستان یې غچ واخیست او دواړو لورو د یوه او بل په خاوره کې د سخت دریځو ډلو د مرکزونو د په نښه کولو ادعا وکړه.

د اسراییل پوځ له مصر سره پر پوله د غزې د یوه ستراتیژیک کوریډور کنټرول ترلاسه کړی

له مصر سره پر پوله د غزې یو کوریډرو
له مصر سره پر پوله د غزې یو کوریډرو

د اسراییل پوځ وایي، له مصر سره پر پوله یې د غزې د یوه ستراتیژیک کوریډور کنټرول ترلاسه کړی دی.
اسوشیتید پریس خبري اژانس ویلي، اسراییل غواړي په دې کار سره حماس سخت دریځې ډلې ته چې امریکا او اروپایي ټولنه یې ترهګر بولي، قاچاقي تونلونه له منځه یوسي.

خبر کې راغلي چې د فیلادیلفي په نوم د دغه کوریډور نیول به ممکن د اسراییل او مصر اړیکې هم پیچلې کړي، ځکه مصر له پخوا شکایت کړی چې اسراییل یې د پولې خو اته پرمختګ کړی دی.

د اسراییلو یوه پوځي چارواکي د نوم نه ښودو په شرط ویلي، دوی مصر ته د دغه کوریډور د نیول خبر ورکړی.

دغه چارواکي زیاته کړې، د عملیاتو په ترڅ کې یې شاوخوا شل تونلونه چې یو شمېر یې دوی ته معلوم نه و، موندلي او دغو تونلونو ته د لاسرسي ۸۲ لارې یې هم پیدا کړي دي.

فرانس پرېس خبري اژانس د مصر د دولتي خبري اژانس القاهره په حواله ویلي، اسراییل د تونلونو ادعا د دې لپاره کوي چې د رفح عملیات توجیه کړي.

امریکا د ډیموکراسۍ پر لوري د مولداویا پرمختګونه وستایل

د عکس ښي لور ته د مولداویا ولسمشره مایا ساندو او چپ لور ته د امریکا د بهرنیو چارو وزیر انټوني بلېنکن د روغبړ پر مهال
د عکس ښي لور ته د مولداویا ولسمشره مایا ساندو او چپ لور ته د امریکا د بهرنیو چارو وزیر انټوني بلېنکن د روغبړ پر مهال

د امریکا د بهرنیو چارو وزیر د مولداویا له پلازمینې کیشینوف څخه د کتنې په ترڅ کې د ډیموکراسۍ پر لوري د دې هېواد د پرمختګونو ستاینه وکړه.

انټوني بلېنکن د مولداویا له ولسمشرې مایا ساندو سره له خبرو وروسته په یوه ګډ خبري کنفرانس کې له دې هېواد سره د انرژۍ د تامین او د روسیې له غلطو تبلیغاتو سره د مقابلې په برخو کې د ۱۳۵ میلیون ډالرو مرستې اعلان وکړ.

د ازادي راډیو د خبرد مرکزي څانګې د راپور له مخې نوموړي همدارنګه په اروپایي ټولنه کې د مولداویا د شاملېدو او د هغو ګواښونو پر وړاندې له دې هېواد څخه د واشنګټن په ملاتړ ټینګار وکړ چې د روسیې له‌خوا په اوکراین کې له جګړې وروسته دا هېواد ورسره مخامخ دی.

د امریکا د بهرنیو چارو وزیر هغه وروستي پرمختګونه وستایل چې کیشینوف د فساد پر وړاندې د مبارزې او له اروپایي ټولنې سره د یوځای کېدو په ګډون په ځینو برخو کې کړي دي.

بلېنکن له مولداویا څخه داسې مهال کتنه ترسره کوي چې د روسیې له‌خوا دې هېواد او ګرجستان ته ګواښونو یوځل بیا اندېښنې زیاتې کړي دي.

جرمني کې د ناقانونه نشه یي توکو د کارونې تلفات په بېساري ډول زیات شوي

د جرمني بیرغ
د جرمني بیرغ

په جرمني کې د ناقانونه نشه یي توکو د کارونې له کبله د مړینې شمېر په تېر ۲۰۲۳ کال کې بې سارې کچې ته لوړ شوی دی.

د جرمني خبري اژانس ویلي، تېر کال ۲ زره او ۲۲۷ کسان د دغو توکو له کبله مړه شوي چې دغه شمېر د وړم کال پرتله ۲۳۷ زیاتوالی ښيي.

دغه ناقانونه نشه یي توکي چې جرمني کې د خلکو د مړینې لامل شوي کوکاین، کریک کوکاین، هیروین او مخلوط نشه یي توکي بلل شوي دي.

د اعتیاد او نشه یي توکو په برخه کې د جرمني کمشنر بورخارد بلېنرت دغه شمېرې خطرناکې بللي او ویلې یې دي، تېرو لسو کلونو ته په کتو دوه برابره زیاتې شوې دي.

د امریکا او چین دفاع وزیران روانه اونۍ سنګاپور کې سره ویني

د امریکا او چین بیرغونه
د امریکا او چین بیرغونه

ټاکل شوې د امریکا او چین د دفاع وزیران د همدې اونۍ په پای کې په سنګاپور کې کم ساري لیده کاته وکړي.

د فرانس پریس خبري اژانس د راپور له مخې لویډ اسټن او ډونګ جون به د شانګري-لا ډیالوګ د غونډې په څنډه کې سره وګوري.

د دغې امنیتي غونډې بحثونو کې د پام وړ مسلې د تایوان پر سر د چین او امریکا پر ناندریو ورټولې وي.

دا لیده کاته یوه اونۍ وروسته تر هغه کیږي چې چین د تایوان ټاپو شاوخوا پوځي مانورې وکړې.

متحده ایالتونه د یوه ډیموکرات او خپلواک تایون ملاتړ کوي، خو چین بیا غواړي چې د دغه ټاپو واک په خپل لاس کې ولري.

له تېرو اتلسو میاشتو راهیسې لومړی ځل دی چې د متحده ایالتونو او چین لوړپوړي پوځي مشران مخامخ سره کیني.

نور راوښيه

XS
SM
MD
LG