په تاجکستان کې د امریکا سفیر مانوییل میکالر Manuel Micaller د دې هېواد له چارواکو وغوښتل چې د خبریالانو او د دوی د بیان د آزادۍ د حق درناوی وکړي.

د ازادي راډیو د تاجکستان څانګې د راپور له مخې، د امریکا سفیردا غوښتنه نن دوشنبې داسې مهال کړي چې د منځنۍ آسیا په دې جمهوریت کې د مطبوعاتو ورځ ده.

نوموړي ټینګار کړی چې خپلواک مطبوعات د ډیموکراسۍ د جوړولو یو مهم عنصر دی.

په وروستیو کلونو کې یوشمېر تاجک خبریالان، د حقونو فعالان او مخالف سیاستوال د هغو تورونو له امله چې د بشري حقونو ډلو تش په نوم او سیاسي انګېزې بللې، په اوږدمهاله بند محکوم شوي دي.

د امریکا د متحد ایالتونو ولسمشر یو ځل بیا ایران ته ګواښ وکړ.

کله چې له ډونالډ ټرمپ څخه د پنجشنبې په ورځ خبریالانو د ده او د اسراییل د صدراعظم د خبرو په اړه پوښتنه وکړه ده وویل، که تهران د خپل اټومي پروګرام په اړه کومه موافقه ونه کړي نو ډیرې بدې پایلې به ولري، خورا بدې پایلي.

ټرمپ بیا وویل چې دی هیلمن دی چې له ایران سره به خبرې راتلونکې میاشت یوه نتیجه ورکړي.

د اسراییل صدراعظم بنیامین نتنیاهو بیا د پنجشنبې په ورځ، له امریکا څخه تر ستنیدو مخکې وویل چې ډونالډ ټرمپ داسې شرایط رامنځته کوي چې کولی شي له ایران سره "ښه تړون" ته لاره هواره کړي، خو نتنیاهو زیاته کړه چې دی له ایران سره هر راز توافق ته بدبینه دی.

د کرکټ د شل اورونو په نړیوال جام کې د جمعې په ورځ استرالیا له زیمبابوې سره، کاناډا له متحد عربي اماراتو سره او هالنډ د امریکا له متحد ایالتونو سره مسابقه کوي.

د پنجشنې د ورځې په لوبو کې ایټالیا نیپال ته په لسو ویکټو ماتې ورکړه دا په نړیوال جام کې د ایتالیا لومړۍ بریا ده. د پنجشنبې په بله لوبه کې سریلانکا عمان ته او هند نامیبیا ته ماتې ورکړه.

دا نړیوال جام د فبروري په اوومه د هند او سریلانکا په کوربتوب پيل شوی چې پایلوبه یې د مارچ په اتمه ده.

په داسې حال کې چې روسي ځواکونو تیره شپه د اوکراین پر پلازمینه کییف او نورو ښارونو د بالستیک توغندیو بریدونه وکړل د اوکراین ولسمشرولودمیرزیلینسکي هغه راپورونه ردکړل چې وایي، پراوکراین د روسیې د بشپړیرغل د څلورمې کلیزې سره سم به نوموړی د ولسمشرۍ انتخابات یا ټولپوښتنه اعلان کړي.

د کییف ښاروال په دې ښارکې پر یوه خصوصي هستوګنځای د یوه بالستیک توغندي د لګیدو په پیښه کې د لږترلږه دوو کسانو د ټپي کیدو خبره کړې ده.

چارواکو پرجنوبي ښار ادیسه د تیرې شپې په برید کې د ملکي تاسیساتو د ویجاړیدو او لږترلږه د یوه کس د ټپي کیدوخبر ورکړی دی. د اوکراین پریوشمیرنورو ښارونو هم د روسیې په تازه بریدونو کې د مالي زیانونو راپورونه ورکړل شوي دي.

په عین حال کې د اوکراین ولسمشرولودیمیرزیلینسکي د فایننشل ټایمز ورځپاڼې هغه راپور ردکړچې ګواکې دی په پام کې لري چې د فبرورۍ په ۲۴ د ولسمشرۍ انتخابات او ټولپوښتنه یا ریفرانډم اعلان کړي. هغه وویل دا ډیره مهمه نیټه ده، د جګړې څلورکاله پوره کیږي، د هغې جګړې چې د ده په خبره یو زیات شمیرخلکو د هیواد د دفاع لپاره خپل ځانونه قربان کړي دي.

د امریکا ولسمشر ډونالډ ټرمپ د چهارشنبې په ورځ په سپینه ماڼۍ کې د اسرائیل له صدراعظم بنیامین نتانیاهو سره تر لیدنې وروسته اعلان وکړ چې له ایران سره خبرې اترې باید دوام ومومي او یوې موافقې ته رسیدل د ده غوره لومړیتوب دی.

ولسمشرټرمپ په خپلې ټولنیزې شبکې «ټروټ سوشیال» کې له نتانیاهو او د هغه د پلاوي له نورو غړیو سره کتنه «ډېره ښه» وبلله او زیاته یې کړه: زما له ټینګارپرته چې له ایران سره باید خبرې دوام ومومي"هیڅ وروستۍ پرېکړه ونه شوه، تر څو څرګنده شي چې ایا یوې موافقې ته د رسېدو امکان شته که نه."

ټرمپ زیاته کړه چې د اسرائیل صدراعظم ته یې ویلي، که داسې یوه موافقه ترلاسه شي، "دا به زموږ غوره انتخاب وي."

د امریکا ولسمشر داهم وویل چې که له ایران سره موافقه ونه شي، "باید ولیدل شي چې پایله به یې څه وي."

ولسمشرټرمپ د ایران پراټومي تاسیساتو د امریکا وروستیو بریدونو ته په اشاره وویل چې "تېر ځل ایران پرېکړه وکړه چې موافقه ونه کړي او د ‘نیمې ‌شپې چټک’ د عملیاتو هدف وګرځېد چې د هغوی لپاره یې ښه پایله نه لرله. ټرمپ زیاته کړه، دی هیله من دی چې دا ځل به ایران ډېر منطقي او مسؤلانه چلند وکړي.

د اسرائیل صدراعظم بینامین نتانیاهو د سه‌ شنبې په ورځ امریکا ته له سفر مخکې وویل چې له ډونالډ ټرمپ سره په خبرو کې به له ایران سره د مذاکراتو موضوع د ده اصلي لومړیتوب وي.

بېلابېلو رسنیو راپور ورکړی چې نتانیاهو د امریکا له ولسمشر سره په لیدنه کې د ایران د توغندیز پروګرام په اړه د واشنګټن د لا زیات سخت دریځ غوښتنه کړې ده.

د فلسطیني ادارې رئیس محمود عباس له متحدو ایالاتو او نړیوالې ټولنې وغوښتل چې د اسرائیلو د پلان په وړاندې چې غواړي په لویدیځه غاړه باندې خپله ولکه ټینګه کړې "پریکنده غبرګون" څرګند کړي.

د فرانسې دخبري اژانس خپل رپوټ کې زیاتوي چې محمود عباس ناروې ته دسفر په ترځ کې د چهارشبنې په ورځ وویل چې په دې هکله یې دناروې صدراعظم یوناس ګار استوره سره خبرې کړي دي .

محمود عباس داهم ویلي چې د ناروي صدراعظم سره یې د یهودي ښارګوټیو د اوسیدونکو د زورزیاتي او دهغو ۴ ملیارډو ډالرو د کنګل کیدو په هکله خبرې کړي چې د اسرائیلو لخوا فلسطینیانو ته تخصیص شوي وو.

محمود عباس خبریالانو ته وویل : "دغو جدي سرغړونو ته باید دامریکا او نړیوالې ټولنې لخوا پریکنده ځواب ځکه وویل شي چې د ولسشمر ټرمپ د هلوځلو مخه نیسي او د نړیوالو قوانینو څرګنده سرغړونې ګڼل کیږي."

داسرائیلو امنیتي کابینې دیکشنبې په ورځ یو لړ اقدامات تصویب کړل چې اسرائیلوته اجازه ورکوي ترڅو خپل کنټرول هغو سیمو ته وغځوي چې د اوسلو د ۱۹۹۰ کال تړون سره سم د فلسطینانو د خودمختارې ادارې ترکنټرول لاندې دي.

د ۲۰۲۶ شل اوریز نړیوال جام د سیالیو په دوام کې د پنجشنبې په ورځ د سیریلانکا ټیم د عمان په وړاندې ، نیپال د ایټالیا او د هند ټیم د نامیبیا په وړاندې لوبې کوي.

پرون د افغانستان ملي ټیم په دوهم سوپر اور کې لوبه جنوبي افریقا ته وبایلله ، دغه راز پرون داسترالیا ټیم ایرلند ته د ۶۷ رنزونو په توپیر او ویسټ انډیز د انګلستان ته د دیرشو رنزونو په توپیر ماته ورکړه.

د جام وروستۍ لوبه ټاکل شوې د راتلونکې مارچ میاشتې په اتمه وشي.

د اسراییل صدراعظم واشنګتن ته له رسیدو سره سم د سې شنبې په ماښام د امریکا د ولسمشر له ځانګړي استازي سټیف ویټکوف او د ولسمشر ټرمپ له زوم جیرد کوشنر سره، چې د ایران او امریکا د روغې جوړې د خبرو مشري کوي، وکتل.

د دې خبرو اترو جزییات نه دي خپاره شوي، خو دا خبرې د ډونالډ ټرمپ او نتنیاهو تر خبرو مخکې ترسره شوې دي. ټاکل شوې ده چې دا دواړه مشران نن په سپینه ماڼۍ کې وګوري.

رویټرز اژانس د باخبره سرچینو په وینا راپور ورکړی چې اسراییل اندیښمن دی چې واشنګتن له تهران سره په خبرو اترو کې د محدود اټومي تړون په لټه کې دی چې پکې د ایران د بالیستیک توغندیو د پروګرام محدودیدل نه دې شامل همداراز د حماس او حزب الله په څیر د وسله والو نیابتي ډلو لپاره د تهران د ملاتړ پای ته رسول د دې خبرو برخه نه دي.

په کاناډا کې یوې ښځې نهه کسه وژلي او په لسګونو نور یې ټپیان کړې دي.

دا پېښه د سې شنبې په ورځ د برټش کولمبیا په ټمبلر ریج سیمه کې رامنځته شوه. د کاناډا پولیسو په یوه بیان کې وویل چې د ټپيانو شمیر اووه ویشتو ته رسیږي چې دوه یې مرګوني دي.

پولیسو د بریدګرې د هویت په اړه ډیر جزییات له رسنیو سره نه دې شریک کړي، دوی یوازې دومره ویلي دي چې برید کوونکې ځان وژلی دی.

تر دې پېښې وروسته د کاناډا صدراعظم چې ټاکل شوې وه نن په مونیخ کې په نړیوال امنیتي کنفرانس برخه واخلي، د دې پېښې په خاطر خپل سفر وځنډاوه.

پاکستاني چارواکي پاکستان ته د هغو شاوخوا ۱۱ سوه محصلانو د ستنېدو خبر ورکوي چې په افغانستان کې زده کړې کوي.

دا محصلان وروسته له هغه له افغانستانه وځي چې د افغانستان او پاکستان ترمنځ له نښتو وروسته د دواړو هېوادونو ترمنځ ترانزیتي لارې بندې شوې.

د آی ان پي خبري سایټ د راپور له مخې د پاکستان د فدرالي حکومت د پارلماني چارو وزیر طارق فضل چودري پرون سه شنبې (د سلواغې ۲۱مه) د پاکستان ملي اسمبلې ته وویل چې شاوخوا ۱۱ سوه پاکستاني محصلان چې په افغانستان کې زده کړې کوي، د دواړو هېوادونو ترمنځ د ترانزیني لارو له بندېدو وروسته پاکستان ته ستانه شوي چې له دې ډلې ۲۶ تنه یې د ځمکې له لارې او پاتې نور د هوا له لارې هلته رسېدلي دي.

ښاغلي چودري زیاته کړه چې ۹۴۷ پاکستاني محصلان لاهم په افغانستان کې دي. د هغه په وینا په کابل کې د پاکستان سفارت له پاتې محصلانو سره په تماس کې دی او د هغو د امنیت او هېواد ته د خوندي ستنولو لپاره لازم اقدامات کوي.

د تېرکال په اکتوبر میاشت کې د افغانستان او پاکستان ترمنځ د ډیورنډ کرښې په اوږدو کې له نښتو وروسته پاکستان له افغانستان سره ټولې ترانزیتي لارې بندې کړې او وروسته د طالبانو حکومت وویل دا لارې به تر هغه وخته خلاصې نه شي چې اسلام آباد د هغو د بیا نه بندولو ضمانت نه وي ورکړی.

د اسراییل صدراعظم بنیامین نتنیاهو وايي چې د امریکا له ولسمشر ډونالډټرمپ سره د ده د خبرو مهمه برخه به له ایران سره د امریکا روان مذاکرات وي.

تمه ده چې ښاغلی نتنیاهو نن له ولسمشر ټرمپ سره وګوري. دا د ټرمپ د ولسمشرۍ د دوهمې دورې له پیله تراوسه واشنګټن ته د هغه شپږم سفر دی.

نتنیاهو د دې سفر په درشل کې پرون ‎په یوه ویډیويي پیغام کې وویل چې له ټرمپ سره د ده په خبرو کې به د غزې او سیمې مسایل شامل وي خو هغه زیاته کړه چې له ایران سره خبرې "طبعا تر هرڅه مهمې دي."

اسراییل د ایران د بالستیک توغندیو د پروګرام په مسئله کې له متحدوایالتونو د کلک دریځ غوښتنه کوي.

تهران تردې دمه له واشنګټن سره په خبرو کې د اټومي پروګرام له اوسنۍ موضوع هاخوا د نورو مسایلو په اړه د خبرو احتمال رد کړی دی خو واشنګټن هم غواړي چې د ایران د بالستیک توغندیو او له سیمه ایزو وسله والو څخه د دې هېواد د ملاتړ مسئله د خبرو په اجنډا کې وي.

نتنیاهو او ټرمپ یوازې څو ورځې وروسته له هغه سره ګوري چې د ایران او امریکا استازو په عمان کې مذاکرات وکړل.