پولیسو پرون ویلي، په پېښه کې شاوخوا ۱۰۰ کسان چې ماشومان هم په‌کې شامل دي، ټپیان شوي دي.

د پولیسو ویاند لاوان شیسو اډم ویلي، دغه چاودنه د چهارشنبې په ورځ په ماجیه ښارګوټي کې شوې او د ځینو ټپیانو وضعیت خراب دی.

راپورونه وايي، د ټانکر چلوونکي پر موټر کنټرول له لاسه ورکړی او ټرافیکي پېښه شوې ده.

ویل شوي، له خبرداریو سره-سره ځايي اوسېدونکي د پېښې په ساحه کې راټول شوي وو او هڅه یې کوله له ټانکر بهېدونکي پټرول ټول کړي.

د چهارشنبې په ورځ د پېښې په لومړیو کې د مړو شمېر ۱۴۰ ښوول شوی و.

د ایران د بهرنیو چارو وزیر له مصري چارواکو سره پرون په سیمه کې د کړکېچ د زیاتېدو پر مسئله خبرې وکړې.

دا له کله چې عباس عراقچي د ایران د بهرنیو چارو وزیر په توګه ټاکل شوی، دا یې قاهرې ته لومړی رسمي سفر و.

عراقچي پرون له خپل مصري سیال بدر عبدالعاطي، د مصر له ولسمشر عبدالفتاح السیسي سره د غزې او لبنان په وړاندې د اسرايیل د زیاتېدونکې شخړې د کمولو پر مسئله تمرکز وکړ.

د مصر ولسمشر په غزه کې د اسرايیل د جګړې د ختمولو غوښتنه وکړه، چې په یوه سیمه‌ییزه شخړه بدله نه‌شي.

السیسي په لبنان کې هم د زیاتېدونکې شخړې د مخنیوي غوښتنه وکړه او په لوېدیځه غاړه کې یې د سرغړونو د پای رسېدو غږ هم وکړ.

د ایران د بهرنیو چارو وزیر روانه میاشت د سوریې، لبنان، قطر، عمان او عراق له چارواکو سره هم کتلي او تمه کېږي تر مصر وروسته ترکیې ته لاړ شي.

د لبنان په جنوب کې د اسرايیلو له‌خوا د لبنان په جنوب کې د سې شنبې په ورځ د اکټوبر ۱۷مه د حزب‌الله پر مرکزونو بریدونه شوي.

د اسراییلو په دغه بریدونو کې ډېر شمېر ودانۍ ویجاړې شوي او د یوه لبناني ښار ښاروال هم وژل شوی دي.

امریکا، د ایران له ملاتړه برخمن حزب‌الله ډله د یوه ترهګریز سازمان په توګه پېژني او اروپايي ټولنې د دې ډلې یوازې پوځي څانګه په تور لېست کې اچولې ده.

حزب‌الله د لبنان د جنوب کې ډېری برخې په واک کې لري او د لبنان په پارلمان کې یې د سیاسي څانګې استازي شتون لري.

د امریکا د ولسمشر مرستیاله او د راتلونکې میاشتې په ولسمشریزو ټاکنو کې د ډیموکرات ګوند کاندیده کاملا هاریس چې له پخواني ولسمشر او د جمهوري غوښتونکي ګوند له نوماند ډونالډ ټرمپ سره سیالي کوي، د چهارشنبې په ورځ د اکټوبر۱۶مه د فاکس نیوز شبکې له یوه ویاند سره په یوه مرکه کې د ایران په مسئله تند بحث وکړ.

د ښي اړخي فاکس نیوز کوربه بریټ بایر له هاریس سره د مختلفو موضوعاتو په اړه لکه د غیرقانوني کډوالۍ، د بایډن ذهني سلامتي او د هغه پالیسۍ په هکله چې څنګه به د اوسنۍ ادارې سره چې دا یې یوه برخه ده توپیر ولري بحث وکړ.

د دې مرکې تر ټولو تند بحث چې د ایران په هکله هغه مهال رامنځته شو چې دوی د بهرنۍ پالیسۍ په اړه خبرې کولې.

بحث هغه وخت تند شو کله چې بریټ بایر د ایران په اړه د کاملا هاریس ته په یو پوښتنه کې وویل چې تهران د لګول شویو بندیزونو په لرې کېدو سره په ځانګړې توګه د تېلو د خرڅلاو له لارې په میلیاردونو ډالر ګټلی شي.

کامله هاریس په دې اړه مستقیم ځواب ورنه‌کړ او پر ځای یې د ایران او نړۍ د قدرتونو ترمنځ د ۲۰۱۵م کال له تړون څخه د امریکا د وتلو په اړه د ټرمپ پر پرېکړې تمرکز وکړ.

د هندوستان او نیوزیلنډ د کرکټ ملي لوبډلو ترمنځ د لومړۍ ټېسټ لوبې په لومړۍ پاڼۍ کې هندۍ لوبډله په ۴۶ منډو وسوځېده.

دغه ټېسټ لوبه د هند په کوربه‌توب په بنګلور ښار کې پیل شوې چې هندوستان د پچې تر ګټلو وروسته توپوهنه غوره کړه.

یادې لوبډلې ۳۱.۲ اورونه ولوبول، ۴۶ منډې یې وکړې او ټول لوبغاړي یې له لاسه ورکړل.

مخکښ منډه جوړونکی یې رېشب پانټ و چې په ۲۰ منډو وسوځېد.

په دې پاڼۍ کې ویرات کهولي، سرفرازخان، کیل راهول، رویندر جدیجا او روي چندرن اشوېن په صفر وسوځېدل.

د نیوزیلنډ په توپ اچونکو کې مت هنري۵، ویلیم اوروک۴ او ټیم ساوتي یوه ویکټ واخیسته.

دا د لومړۍ ټېسټ لوبې دوهمه ورځ ده، په لومړۍ ورځ د ورښت له امله هېڅ لوبه ونه شوه.

د ویلو ده چې دا د ټېسټ اتلولیو اړوند سیالۍ دي چې دواړه لوبډلې به درې ټېسټ لوبې ترسره کړي.

د ایران د بهرنیو چارو وزیر عباس عراقچي تېره پرون چهارشنبه مصر ته ورسېد.

دا له شاوخوا دولسو کلونو وروسته مصر ته د ایران د بهرنیو چارو د یوه وزیر لومړنی سفر دی.

وروستی ځل د ایران د هغه وخت د بهرنیو چارو وزیر علي اکبر صالحي افریقا ته د سفر پر مهال د ۲۰۱۳م کال په جنورۍ کې قاهرې ته تللی و.

عراقچي چې دا مهال د څو هېوادونو په سفر بوخت دی، د اردن له سفر وروسته مصر ته ورسېد او هلته یې له خپل سیال ایمن صفادي سره وکتل.

د ایران د بهرنیو چارو وزارت ویاند اسماعیل بقايي وايي، دواړو چارواکو په سیمه کې د پرمختګونو او پر غزې او لبنان د اسراییلو د بریدونو په اړه خبرې وکړې.

عراقچي تېره اوونۍ لبنان، سوریې، سعودي عربستان، عراق او عمان ته سفرونه وکړل چې د کړکېچ د کمولو لپاره هڅې وکړي.

د ایران د بهرنیو چارو وزارت ویلي، عراقچي به له مصر وروسته ترکیې ته هم سفر وکړي.

د ښځو د کرکټ د شل اورونو په نړیوال جام کې نن په لومړۍ نیمه پایلوبه کې استرالیا له جنوبي افریقا سره مخامخېږي.

دوهمه نیمه پایلوبه به سبا جمعه د وېسټ اینډیز او نیوزیلنډ ترمنځ وشي.

دا نړیوال جام چې د اکټوبر په درېیمه په متحده عربي اماراتو کې پيل شو، پایلوبه به یې د یکشنبې په ورځ د اکټوبر په شلمه په دوبۍ کې ترسره شي.

د اوکراین ولسمشر ولودمیر زیلینسکي نن چهارشنبې یو لړ اقدامات په ګوته کړل چې د ده په وینا هغه به د کییف په ګټه د جګړې څرنګوالی بدل کړي او ښایي راتلونکي کال له روسیې سره جګړه پای ته ورسوي.

زیلینسکي نن چهارشنبې د اوکراین پارلمان ته په وینا کې له خپلو لوېدیځو شریکانو وغوښتل چې د اوکراین پر ټولو هغو سیمو چې روسیې اشغال کړي، د روسیې پر خاوره او د دښمن پر پوځي تاسیساتو د بریدونو لپاره له کییف سره په مرسته شویو لیرې واټن ویشتونکو وسلو باندې لګول شوي محدودیتونه لیرې کړي.

د اوکراین د ولسمشر د بریا په شپږ ماده‌ییز پلان کې د اوکراین د خاورې له لاسه ورکول رد شوي او غوښتنه شوې چې ناتو دې له دې پوځي تړون سره د اوکراین د یوځای کېدو لپاره کییف ته له قید او شرط پرته بلنه ورکړي او هم غوښتل شوي چې په اوکراین کې له ستراتیژیکو اټومي وسلو پرته دې په دې هېواد کې د دفاع په هدف یو ځواک ځای پرځای شي.

په نایجیریا کې د تېلو د یوه ټانکر د چاودنې له امله د مړو شمېر تر ۱۴۰ کسانو واوښت.

د نایجیریا پولیسو دغه ارقام پرون د چهارشنبې په ورځ ناوخته اعلان کړل او ویې ویل چې په پېښه کې د ماشومانو او ښځو په ګډون شاوخوا ۵۰ کسان نور ټپیان شوي دي.

د جرمني د "ډي‌پي‌اې" خبري اژانس د راپور له مخې، دا پېښه وروسته له هغه رامنځته شوه چې د سه شنبې په شپه د تېلو د یوه ټانکر له چپه کېدو وروسته ګڼ خلک د پیښې ځای ته ورغلل.

د نایجیریا چارواکو ویلي چې د پېښې له ځای څخه د لیرې کېدو لپاره د پولیسو له خبرداریو سره سره خلک هلته د تېلو د وړلو په خاطر ورټول شول چې چاودنه پرې وشوه.

تېره میاشت هم د نایجریا په شمال لوېدیځ کې د تېلو د ټانکر او مسافر وړونکي موټر د ټکر پېښه کې ۵۰ کسان مړه شوي وو.

د اروپایي ټولنې او د خلیج د شپږو هېوادونو چارواکو د منځني ختیځ په تړاو د لومړي ځل لپاره په بروکسل کې غونډه وکړه.

د اروپایي کمېسیون مشرې اورزلا فون دیر لاین پرون د دې غونډې په پرانیستې وینا کې د مهمو جیوپولیټیک مسایلو په تړاو لکه د اوکراین د جګړې او په غزه او لبنان کې د جګړې په تړاو پر همکاریو ټینګار وکړ.

اسوشېټېډ پرېس اژانس د چارواکو په وینا څرګندوي چې په دې برخو کې د یوه مشترک بیان خپرېدل سخته دي، ځکه چې د اروپایي ټولنې یو شمېر غړي هېوادونه د روسیې په برخه کې متفاوت نظر لري.