د لاسرسۍ وړ لېنکونه

تازه خبر
پنجشنبه ۶ غویی ۱۴۰۳ کابل ۰۷:۲۰

نړۍ

اروپايي ټولنې د روسیې په وړاندې د بندیزونو درېیمه بسته اعلان کړه

د اروپايي ټولنې د مرکزي دفتر پر ودانۍ د دې ټولنې بیرغ
د اروپايي ټولنې د مرکزي دفتر پر ودانۍ د دې ټولنې بیرغ

اروپايي ټولنې پر اوکراین د روسیې د غیرموجه یرغل د دوو کلونو پوره کېدو په مناسبت د روسیې په وړاندې د بندیزونو درېیمه بسته اعلان کړه.

د اروپايي ټولنې د بهرني سیاست مشر جوزیپ بوریل، نن جمعه په یوه اعلامیه کې وویل چې دوی د روسیې د پوځي او دفاعي سکټور په وړاندې د مجازاتوونکو اقداماتو د سختولو په حال کې دي.

هغه زیاته کړې چې د روسیې جنګي ماشین ته د ګوزار ورکولو او له ځانه د اوکراین د مشروع دفاع لپاره په مبارزه کې یوموټي پاتې کېږي.

دغه تازه بندیزونه د روسیې دفاعي صنعت په نښه کوي او د ۱۰۶ کسانو او ۸۸ بنسټونو شتمني کنګل کوي او پر سفرونو یې بندیز لګېږي.

له دې سره د هغو اشخاصو او بنسټونو شمېر ۲۰۰۰ ته ورسېد چې د اروپايي ټولنې د ۲۷ غړو هېوادونو له خوا د اوکراین ځمکنۍ بشپړتیا، ملي حاکمیت او خپلواکۍ ته د زیان اړولو له کبله بندیزونه ورباندې لګول شوي دي.

د ورځې تازه خبرونه دلته ولولئ

د فلسطینیانو د ملکي دفاع یوه ډله: ملګري ملتونه دې په غزه کې ترسره شوي جنایتونه وپلټي

په غزه کې د روانې جګړې له کبله د اوښتو زیانونو یو انځور
په غزه کې د روانې جګړې له کبله د اوښتو زیانونو یو انځور

د فلسطینیانو د ملکي دفاع یوې ډلې نن پنجشنبې له ملګرو ملتونو وغوښتل چې د غزې په یوه روغتون کې د هغه څه په اړه دې چې دې ډلې ترسره شوي جنګي جنایتونه بللي، پلټنه وکړي.

دې ډلې ویلي، وروسته له هغې چې اسراییلي سرتېري د روغتون له ودانۍ ووتل، شاوخوا ۴۰۰ جسدونه له ډله‌ییزو قبرونو څخه راایستل شوي دي.

د ملکي دفاعي ځواک په نوم دې ډلې په یوه خبري کنفرانس کې پرته له دې چې کوم شواهد وړاندې کړي وویل، داسې قضیې شته چې په ناصر روغتیایي مرکز کې ځینې ناروغان د جراحۍ پر مهال چې د عملیاتو جامې یې په ځان کې وې، ځای پرځای وژل شوي دي.

د رویټرز خبري آژانس د راپور له مخې وروسته له هغې چې اسرایي ځواکونه د خان یونس له ښاره ووتل، فلسطیني چارواکو وویل چې د غزې د مرکزي برخې په لوی روغتیایي مرکز، ناصر روغتون کې د سلګونو کسانو مړي له ډله‌ییزو قبرونو راایستل شوي دي.

د اسراییل پوځ ویلي، هغه ادعا چې فلسطینیان وایي چې د اسراییلو دفاعي ځواکونو مړي ښخ کړي، بې اساسه او بې بنسټه دي.

ملګري ملتونه: تېر کال په نړۍ کې نژدې ۲۸۲ میلیون وګړي له شدیدې لوږې سره مخامخ وو

ارشیف: په کابل کې اړمنې مېرمنې او ماشومان
ارشیف: په کابل کې اړمنې مېرمنې او ماشومان

ملګري ملتونه وایي، تېر۲۰۲۳م کال په نړۍ کې نژدې ۲۸۲ میلیون وګړي له شدیدې لوږې سره مخامخ وو.

د خوراکي موادو د بحران په اړه نړیوال راپور کې چې پرون چهارشنبې خپور شوی، ویل شوي چې د افغانستان په ګډون د نړۍ په ۵۹ هېوادونو او سیمو کې کې ډېر خلک د خوراکي موادو له زښت کمښت سره مخامخ دي.

د دې راپور له مخې په ۳۹ هېوادونو او سیمو کې له ۳۶ میلیونه زیات کسان د شدیدې لوږې له بېړني حالت سره چې د قحطۍ څلورمې درجې ته یو ګام ورنژدې ده، مخامخ دي.

خوړو ته د اړو کسانو دوه پر درېیمه برخه یې د افغانستان او سودان وګړي یاد شوي.

د ملګرو ملتونو د مرستندویه ادارو د اټکل له مخې په روان ۲۰۲۴م کال کې هم ۲۳ میلیونه افغانان بشري مرستو ته اړتیا لري او ۱۷ میلیونه افغانانو ته د خوراکي موادو په ګډون د اړنیو مرستو رسولو لپاره درې میلیارد ډالرو ته اړتیا ده.

د حماس یوه مشر له اسراییل سره د ۵ کلن اوربند شرطونه په ډاګه کړل

له ارشیفه د غزې یو تصویر چې د اسراییلو وروستیو بریدونو سخته ویجاړي ور اړولې ده
له ارشیفه د غزې یو تصویر چې د اسراییلو وروستیو بریدونو سخته ویجاړي ور اړولې ده

د حماس یوه جګپوړي چارواکي د اسوشتید پرس آژانس ته ویلي چې دا ډله چې متحده ایالات او اروپایي ټولنه یې یوه ترهګره ډله بولي، چمتو ده له اسراییل سره یو پنځه کلن یا له هغه زیات اوربند وکړي، وسله پرځمکه کېږدي او پر یوه سیاسي ګوند بدل شي خو په دې شرط چې که د ۱۹۶۷ کال مخکې پولو پر اساس یوه خپلواکه فلسطیني دولت جوړ شي.

د خلیل الحیا په نوم دغه چارواکي دغه څرګندونې پرون چهارشنبې داسې مهال کړي چې د حماس او اسراییل ترمنځ د یوه اوربند لپاره خبرې له څو میاشتو راهیسې په ټپه ولاړې دي.

داسې ښکاري چې دغه وړاندیز چې حماس ځان بې وسلې کوي، د دې ډلې له لوري چې په ښکاره یې د اسراییل د له منځه وړلو ژمنه کړې، د پام وړ امتیاز دی چې ورکوي یې.

روسیې اوکراین سره د ۵۰ ماشومانو د تبادلې خبر ورکړ

روسیې سره د اوکرایني ماشومانو د تبادلې یو مخکینی تصویر
روسیې سره د اوکرایني ماشومانو د تبادلې یو مخکینی تصویر

د روسیې د ماشومانو د حقونو کمېشنرې له اوکراین سره د ماسکو د یرغل له امله د بې ځایه شویو شاوخوا پنځوسو ماشومانو د تبادلې د یوه تړون خبر ورکړ.

ماریا لووا بیلووا پرون وویل چې نهه ویشت ماشومان به اوکراین ته وسپارل شي او نولس به روسیې ته واستول شي.

لووا بیلوا زیاته کړه چې دا موافقه په دوحه کې له اوکرایني لورې سره د خبرو پرمهال شوې ده، خو د اوکراین د بشري حقونو کمېشنر دیمیترو لوبینیتس فرانس پریس اژانس ته وویل چې دی دا خبر نه شي تاییدولی.

خیبر پښتونخوا؛ بره باړه کې ۱۵ پاکستاني سرتېري ټپیان شوي

یو شمېر پاکستاني ځواکونه - ارشیف
یو شمېر پاکستاني ځواکونه - ارشیف

د خیبر پښتونخوا د خیبر سیمې په بره باړه کې د پاکستان پر امنیتي ځواکونو چاودنه شوې ده چې لږ تر لږه ۱۵ سرتېري یې ټپیان کړي دي.

په خیبر ضلع کې د ملېشه ځواک یوه چارواکي د خپل نوم پټ ساتلو په شرط د ازادي راډیو مشال څانګې ته د دې پېښې تایید وکړ او څرګنده یې کړه چې پرون د فرنټیر کور د یوسل اوشپږم کنډک پر کاروان د سړک د غاړې بم چاودلی.

د دغه چارواکي په وینا، په ټپيانو کې ۳ جګپوړي افسران او ۱۲ سرتیري دي چې د درملنې لپاره روغتون ته رسول شوي دي.

د دې چاودنې مسوولیت تر دې دمه چا نه دی منلی.

جرمني کې ۷ بهرنیان داعش سره په اړیکو او اروپا کې د بریدونو په پلان لرلو تورن شول

ارشیف
ارشیف

د جرمني فدرالي څارنوالي وایي، ۷ بهرني اتباع یې په جرمني کې د اسلامي دولت ډلې یا داعش د خراسان څانګې لپاره د حملو په پلانولو رسماً تورن کړي دي.

دې ادارې پرون چهارشنبې وویل چې دغه ۷ تنه د تاجکستان، ترکمنستان او قرغزستان اتباع دي.

پر دوی تور پورې شوی چې په جرمني او د لویدیځې اروپا په نورو برخو کې یې د پراخو حملو پلان درلود.

خو د جرمني د څارنوالۍ د دفتر له خوا په خپره شوې اعلامیه کې ویل شوي، کله چې امنیتي ځواکونو د دغو تورنو کسانو د نیولو لپاره اقدام وکړ، هغوی کوم ځانګړی پلان نه درلود.

د جرمني د څارنوالۍ دفتر ویلي، تورن کسان چې په ۲۰۲۲ کال په اوکراین کې د جګړې له پلیدو وروسته د اوکراین له لارې جرمني ته رسېدلي وو، د تېر کال په جولای میاشت کې نیول شوي دي.

ویل شوي چې دوی د اسلامي دولت ډلې یا داعش له خراسان څانګې سره چې په افغانستان کې په حملو سربېره یې تېره میاشت په مسکو کې د خونړي برید مسولیت هم اخیستی، اړیکه ټینګه کړې وه.

دغه راز ویل شوي چې دوی په هالنډ کې له یو شمېر نورو کسانو سره یوه تروریستي څانګه جوړه کړې وه.

حماس ډلې د یوه اسراییلي یرغمل ویډیو خپره کړې ده

یو شمېر اسراییلیان د حماس لخوا د یرغمل شوي اسراییلي د خپرې شوې ویډیو د نندارې پر مهال
یو شمېر اسراییلیان د حماس لخوا د یرغمل شوي اسراییلي د خپرې شوې ویډیو د نندارې پر مهال

حماس د یوه اسراییلي یرغمل ویډیو خپره کړې چې په هغې کې هغه د اسراییل حکومت د خپلو اتباعو په نه خوندیتوب تورنوي.

تراوسه نه ده څرګنده چې حماس چې متحده ایالات او اروپایي ټولنه یې د یوې ترهګرې ډلې په توګه پېژني؛ د دغه یرغمل شوي ۲۴ کلن اسراییلي دغه ویډیو ترکومو شرایطولاندې ثبت کړې ده.

د اسراییل رسنیو ویلي چې دغه یرغمل د امریکا او اسراییل دوه ګونی تابعت لري.

د اسراییل حکومت وایي تراوسه نه پوهیږي چې څومره یرغمل ژوندي دي، خو د هغوی شمېر د سلو نه تر۱۳۰ پورې اټکل شوی دی.

د اسراییل او حماس ترمنځ د مخکیني لنډ مهاله اوربند په نتیجه کې ۱۰۵ تنه یرغمل د اسراییل له زندانونو د ۲۴۰ فلسطیني بندیانو د خوشې کیدو په بدل کې خوشې شول.

په غزه کې چې پرروانې جګړې یې څه باندې دوه سوه ورځې تیریږي، تراوسه یې د پای ته رسېدو هیڅ نښې نښانې نه لیدل کیږي.

ولسمشر بایډن له اوکراین سره د مرستو تصویب شوې لایحه توشیح کړه

د امریکا د متحدو ایالتونو ولسمشر جو بایډن
د امریکا د متحدو ایالتونو ولسمشر جو بایډن

د امریکا د متحدو ایالتونو ولسمشر جو بایډن د پوځي مرستو د بستې هغه لایحه توشیح کړه چې تر دې څو ساعته مخکې د امریکا مشرانو جرګې تصویب کړې وه.

هغه ویلي اوکراین ته به په څو ساعتونو کې د څه کم ۶۱ ملیار ډالرو په ارزښت د امریکا د دغې پوځي مرستې رسول پیل شي.

په سپینه ماڼۍ کې د دې لایحې تر لاسلیک وروسته ولسمشر بایډن وویل، د مرستو دغې بستې ثابته کړه چې امریکا او متحدان یې د روسي ځواکونو د یرغل په وړاندې د اوکراین بشپړ ملاتړ کوي.

د هغه په وینا، د دې مرستې تصویب مهم و چې وښيي موږ د روسیې د ولسمشر ولادمیر پوتین په وړاندې درېږو.

د مرستو په دغه بسته کې د اوکراین لپاره څه کم ۶۱ ملیارد ډالره ځانګړي شوي، ۲۶ ملیارد ډالره د اسرائیل او څه باندې ۸ ملیارد ډالره په هندوپسفیک یا هند- ارام سمندرګي سیمه کې د چین د نفوذ د مخنیوي لپاره اختصاص شوي دي.

راپورونه: د ایران د رژیم یو مخالف سندرغاړی توماج صالحي په مرګ محکوم شوی

توماج صالحي
توماج صالحي

د ایران یوې ورځپاڼې راپور ورکړی چې د ایران د رژیم یو مخالف رپ سندرغاړی توماج صالحي چې په زندان کې دی، په اصفهان کې د یوې محکمې له خوا په مرګ محکوم شوی دی.

شرق ورځپاڼې نن راپور ورکړی چې صالحي په ۲۰۲۲م کال کې په اعتراضونو کې د خپل ګډون له کبله د بند شپږکلنه موده تېروي.

هغو اعتراضونو د څو میاشتو لپاره ایران ته ټکان ورکړی و.

د توماج صالحي مدافع وکیل امیر ریسیان دغې اصلاح غوښتونکې ورځپاڼې ته ویلي، پر موکل یې پر ځمکه د فساد خپرولو تازه تور لګول شوی او په مرګ محکوم شوی دی.

هغه ویلي دوی به د استیناف غوښتنه وکړي.

د ایټالیا پولیسو د تاجکستان ۸ سیاسي فعالان نیولي

د ایټالیا پولیس - ارشیف
د ایټالیا پولیس - ارشیف

د تاجکستان د اپوزیسیون یوې ډلې فعالانو نن وویل چې په ایټالیا کې پولیسو د دوی اته تنه د سې شنبې په ورځ نیولي دي.

د تاجکستان د څلرویشت ډلې په نوم د اپوزیسیون یو شمېر فعالان له اروپایي هېوادونو څخه د ایټالیا پلازمېنې روم ته تللي دي.

دوی غواړي چې ایټالیا ته د تاجکستان د ولسمشر امام علي رحمان د سفر پرمهال په یوه لاریون کې برخه واخلي او د هغه پر تګلارو انتقاد وکړي.

امام علي رحمان د دوشنبې په ورځ ایټالیا ته په رسمي سفر ولاړ.

د څلرویشت ډلې موسس عمرعلي قوت اوف د دوه زره پنځلسم کال په مارچ کې د ترکیې په استانبول کې وژل شوی و.

نور راوښيه

XS
SM
MD
LG