د لاسرسۍ وړ لېنکونه

تازه خبر
دوشنبه ۲۷ وری ۱۴۰۳ کابل ۱۱:۲۱

افغانستان

ډیکسن: طالب شارژدافیر سره مې د دوحې ناستې او نجونو د زده کړو په اړه خبرې وکړې

د افغانستان لپاره د برېتانیا شارژدافیر رابرټ سي ډیکسن
د افغانستان لپاره د برېتانیا شارژدافیر رابرټ سي ډیکسن

د افغانستان لپاره د برېتانیا شارژدافیر رابرټ سي ډیکسن Robert C Dickson وایي چې په قطر کې یې د طالبانو تر کنټرول لاندې د افغانستان د سفارت له شارژدافیر نعیم وردګ سره په دوحه کې د را روانې غونډې په ګډون پر ځینو مسلو خبرې کړې دي.

هغه بېګا په خپله ایکس پاڼه یا پخواني ټویټر کې له ښاغلي وردګ سره کتنه رغنده بللې او ویلي یې دي چې دوی له نړۍ سره د افغانستان د اړیکو د تنظیمولو لپاره د ملګرو ملتونو د امنیت شورا د ۲۷۲۱ پرېکړه لیک او په دوحه کې د فبرورۍ د اتلسمي او نولسمې د غونډې د فرصت او هم د نجونو د زده کړې د اهمیت پر موضوعاتو خبرې وکړې.

وردګ د دغې کتنې په اړه څه نه دي ویلي.

دا لیدنه داسې مهال شوې چې په دوحه کې د ملګروملتونو په کوربه توب غونډې ته پنځه ورځې پاتې دي.

تراوسه طالبانو چې دې غونډې ته بلل شوي، واضح نه دي ویلي چې په دې غونډه کې ګډون کوي که یې نه کوي.

د ورځې تازه خبرونه دلته ولولئ

فراه کې ۲ تنه د سېلابونو له امله مړه شوي

د افغانستان په نقشه کې فراه ولایت
د افغانستان په نقشه کې فراه ولایت

په فراه ولایت کې د طالبانو یو سیمه ییز چارواکی په دغه ولایت کې د سېلابونو له امله د دوو تنو د وژل کېدو خبر ورکوي.

د فراه په پشترود ولسوالۍ کې د طالبانو ولسوال ملا محمد انور فېروز پرون وويل دواړه قربانيان هغه ځوانان وو چې د تفريح لپاره يوې غرنۍ سيمې ته تللي وو.

تر دې مخکې د طالبانو د حکومت د طبیعي پېښو پر وړاندې د مبارزې د وزارت ویاند ملا جانان سایق پرون ویلي وو چې په تېرو درېیو ورځو کې د کابل په ګډون د افغانستان په بېلابېلو سیمو کې د سېلابونو له امله لږ تر لږه ۳۳ کسان وژل شوي دي.

هغه د ټپيانو شمېر ٢٧ تنه اعلان کړ او ويې ويل چې د افغانستان په کليو کې د سختو سېلابونو له امله ٦٠٦ کورونه ويجاړ شوي دي.

کرزی او عبدالله: پر اسراییل د ایران بریدونه دفاعي اقدام وو

د افغانستان پخوانی ولسمشر حامد کرزی او د پخواني جمهوري نظام پر مهال د مصالحې عالي شورا رییس ډاکتر عبدالله عبدالله
د افغانستان پخوانی ولسمشر حامد کرزی او د پخواني جمهوري نظام پر مهال د مصالحې عالي شورا رییس ډاکتر عبدالله عبدالله

د افغانستان پخواني ولسمشر حامد کرزي او د پخواني جمهوري نظام پر مهال د مصالحې عالي شورا رییس ډاکتر عبدالله عبدالله پر اسراییل د ایران بریدونه دفاعي اقدام او د اسراییلو د بریدونو په وړاندې عکس العمل بللی.

حامد کرزي او عبدالله عبدالله یکشنبه ناوخته په خپله ایکس پاڼو په دې تړاو بیانونه ورکړي.

کرزي ویلي چې د غزې جګړه باید سمدستي پای ته ورسیږي او هم د فلسطین، اسراییل او سیمې د ملکیانو ژوند خوندي شي.

اخوا عبدالله عبدالله ویلي د ایران له دریځه د ملاتړ تر څنګ ویلي چې د داسې کړکېچونو د سوله ییز حل غوښتونکی دی.

ډاکتر عبدالله ویلي، د ده په باور د ایران په وړاندې د اسراییل هر ډول اقدام به سیمه اغېزمنوي او د افغانستان پر وضعیت به هم مستقیم تاثیر ولري.

مخکې د طالبانو د بهرنیو چارو وزارت هم پر اسراییلو د ایران د توغندیزو او ډرون بریدونو ملاتړ کړی و او هغه یې مشروع بللي وو.

امریکا او ګڼو نورو لویدیځو هېوادونو بیا پر اسراییلو د ایران بریدونه په کلکه غندلي دي. د اسراییلو د جنګي کابینې وزیر بني ګانتز ویلي ایران به په مناسب وخت او شرایطو کې د دغو بریدونو تاوان پرې کوي.

ایران د شنبې په شپه د اسراییلو پر لور شاوخوا دوه سوه توغندي او ډرون الوتکې وویشتلې چې د اسراییلي چارواکو په خبره ۹۹ فیصده یې له اسراییلو دباندې فضا کې شنډ او نسکور شول.

د ازادۍ او مقاومت جبهو مشرانو په لومړي ځل یوه ګډه انلاین غونډه کې برخه واخیسته

د ازادۍ جبهې مشر یاسین ضیا - ارشیف
د ازادۍ جبهې مشر یاسین ضیا - ارشیف

د طالبانو د دوو مخالفو وسله والو جبهو مشرانو په یوه انلاین غونډه کې ګډون وکړ.

دا لومړی ځل دی چې د افغانستان د ازادۍ جبهې او د ملي مقاومت جبهې مشران؛ یاسین ضیا او احمد مسعود په یوه انلاین غونډه کې چې په ایکسپاڼه کې خپرېده، یوځای ګډون کوي.

دا غونډه د ازادۍ جبهې د یوه قوماندان او څو غړیو د وژل کېدو د تلین په مناسبت ترتیب شوې وه.

دوی ټینګار وکړ چې طالبانو سولې ته کومه لار نه ده پرې ایښې.

له پاکستان څخه خپل هېواد ته د څه باندې ۸ نیم زرو افغان کډوالو د ستنېدو خبر ورکړل شو

ارشیف
ارشیف

پاکستاني رسنۍ وايي، په داسې حال کې چې د افغان کډوالو د ایستلو د بل پړاو لپاره تیاري روانه ده، د روان اپریل له ۳ تر ۱۳ پورې په لسو ورځو کې ۸۵۸۱ تنه افغان کډوال خپل هیواد ته ستانه شوي دي.

د پاکستان سما ورځپاڼې نن راپور ورکړ چې د بې اسناده کډوالو د ستنولو په لومړي پړاو کې چې د تېر کال په اکتوبر کې پیل شو، نژدې ۵ لکه ۳۶ زره افغان کډوال خپل هېواد ته واستول شول.

پاکستاني چارواکو مخکې ویلي و چې له اختر وروسته به د کارت لرونکو کډوالو د ایستلو بهیر پیل کړي.

د بخښنې نړیوالې ادارې يا ایمنسټي انټرنیشنل د کډوالو د ايستلو د دوهم پړاو پر پیلېدو اندېښنه ښودلې او ویلي چې دا کار به ځینې افغان وګړي په ځانګړي ډول ښځې، نجونې، خبریالان او مدني فعالان له ګواښ سره مخامخ کړي.

د افغانستان په سیندیزو حوزو کې بیا د اوبو زیاتیدو او سېلونو وړاندوېنه شوې

ارشیف
ارشیف

د طالبانو د اوبو او انرژۍ وزارت له سبا دوشنبې څخه تر پنجشنبې پورې د هېواد په سیندیزو حوزو کې د اوبو د اندازې د لوړېدو او سېلونو د راوتو وړاندوېنه کړې ده.

دغه وزارت په یوه خبرپاڼه کې ویلي چې د ناڅاپي ورښتونو او سېلونو ډېر احتمال د هریرود، هلمند، شمال، کابل او امو په سیندیزو حوزو کې شته.

پرون د طالبانو د حکومت د ترانسپورت او هوايي چلن وزارت د هواپېژندنې ادارې وویل چې د یکشنبې په ورځ په ټولو ۳۴ ولایتونو کې د ورښتونو، تالندې او برېښنا او همداراز سېلونو احتمال شته.

د وروستیو ورځو د ورښتونو له کبله په یو شمېر ولایتونو په تېره بیا ارزګان او هلمند کې ډېرې کرنیزې ځمکې ویجاړې شوي او سېلونو لږترلږه درې ماشومان په ارزګان کې مړه کړي دي.

طالبانو کابل کې ۸۰ زره امنیتي کمرې نصب کړې دي

ارشیف
ارشیف

د طالبانو د حکومت د کورنیو چارو وزارت پرون وویل چې په کابل ښار کې یې ۸۰ زره امنیتي کمرې نصب کړې دي.

د دغه وزارت ویندوی عبدالمتین قانع پرون ملي راډیو ته وویل چې امنیتي کمرو د جرمونو له کمېدو او مخنیوي سره مرسته کړې او دوی غواړي چې په ولایتونو کې هم امنیتي کمرې نصب کړي.

قانع په دې اړه چې اتیا زره امنیتي کمرې یې په کومه بودیجه نصب کړي، څه نه دي ویلي.

طالب چارواکي وايي چې د اختر په درو ورځو کې هیڅ امنیتي پېښه ونه شوه.

طالبانو د اختر په شپو ورځو کې په ښارونو کې کلک امنیتي تدابیر غوره کړي وو.

یو ایرانی پولیس افغان پولې ته نږدې وژل شوی

له ارشیفه د ایران د سرحدي ځواکونو تصویر
له ارشیفه د ایران د سرحدي ځواکونو تصویر

د ایران دولتي خبري اژانس، ایرنا پرون (شنبې) خبر ورکړ چې یو پولیس یې د افغانستان پولې ته نژدې د سیستان او بلوچستان ولایت په هیرمند ولسوالۍ کې وژل شوی دی.

دغه اژانس د ځايي چارواکو په قول ویلي چې دا پولیس د مخدرو موادو له قاچاقبرو سره په نښته کې وژل شوی دی.

د ایران سیستان او بلوچستان ولایت د افغانستان له فراه او نیمروز ولایتونو او د پاکستان له بلوچستان ایالت سره پوله لري.

په وروستیو ورځو کې دا ولایت د جېش العدل په نوم د وسله والې ډلې او د ایران د امنیتي ځواکونو د څو خونړیو نښتو میدان و.

رسنۍ: د افغانستان په اړه د تماس سیمه ییزې ډلې جوړېدل ځنډیدلي

ارشیف
ارشیف

پاکستاني رسنۍ وايي، د افغانستان په اړه د سیمه ییز تماس ډلې د جوړېدا وړاندیز په دې ګروپ کې د هند له ګډون سره د پاکستان د مخالفت له کبله له خنډ او ځنډ سره مخامخ شوی دی.

د ملګرو ملتونو سرمنشي انتونیو ګوتیریش د فبرورۍ په اتلسمه او نولسمه د دوحې له دوه ورځیني غونډې وروسته د داسې یوې ډلې د جوړېدو وړاندیز کړی و.

د دوحې د غونډې هدف د افغانستان لپاره د یوه ځانګړي استازي د ټاکلو او د تماس ډلې د جوړولو په اړه سلامشوره وه.

د ښاغلي ګوتیریش د وړاندیز پر اساس، ټاکل شوې وه چې دا ډله د افغانستان د نژدې ګاونډیانو او اغېز لرونکو هېوادونو له لوري جوړه شي.

د پاکستان ایکسپریس تریبیون ورځپاڼې ته پرون د دغه هیواد په حکومت کې ځینو سرچینو ویلي چې د تماس ډلې جوړېدا له دې کبله ځنډېدلې چې کوم هېوادونه باید په دې ډله کې شامل وي.

دا ځنډ په داسې حال کې دی چې په وروستیو کې د طالبانو د حکومت او اسلام اباد اړیکې نسبتاً ترینګلې شوي، خو د هند او طالبانو د حکومت اړیکې نسبتاً ښې شوې دي.

بدخشان کې ترافیکي پېښه؛ د یوې کورنۍ څلور غړي مړه شوي

ارشيف
ارشيف

د بدخشان په شهر بزرګ ولسوالي کې د یوې کورنۍ څلور غړي په یوه ترافیکي پېښه کې مړه شوي او اووه تنه ټپيان شوي دي.

د بدخشان لپاره د طالبانو د امنیه قومانداني ویاند احسان الله کامګار وایي، د سورلیو موټر د تېز سرعت له امله له لارې اوښتی چې له کبله یې موټروان، دوو مېرمنو او یوه ماشوم ژوند له لاسه ورکړی او د څلورو ماشومانو په ګډون اووه تنه ټپیان شوي دي.

د راپور له مخې په ټپيانو کې د درېیو روغتیایي وضعیت نازک دی.

رسنۍ: طالبانو په نیمروز کې د داعش ډلې دوه تاجکستاني غړي نیولي

د داعش بیرغ
د داعش بیرغ

ایراني رسنیو د افغانستان په لوېدیځ کې د داعش خراسان څانګې د دوو تاجکستاني غړیو د نیولو خبر ورکړی دی.

د ایران مهر اژانس پرون د افغان طالبانو د چارواکو په وینا وویل چې دا دوه تنه د دوی د امنیتي ځواکونو له لوري په نیمروز کې نیول شوي دي.

په راپور کې راغلي چې دې کسانو غوښتل له نیمرزو څخه کوټې ته ولاړ شي او هلته تروریستي روزنه ترلاسه کړي.

په وروستیو کې په افغانستان کې د داعش خراسان څانګې د هلو ځلو راپورونه زیات شوي، په ځانګړي ډول وروسته تر دې چې دې ډلې په مسکو کې د مارچ په ۲۲مه د ترورستي برید مسوولیت ومانه او تر هغه مخکې یې په جنوري کې په ایران کې د قدس ځواکونو د قوماندان قاسم سلیماني د تلین په مراسمو کې ځان وژونکي بریدونه وکړل.

نور راوښيه

XS
SM
MD
LG