د لاسرسۍ وړ لېنکونه

تازه خبر
چهارشنبه ۹ کب ۱۴۰۲ کابل ۰۸:۰۴

نړۍ

د پاکستان پولیسو د معترضانو د خورولو لپاره له اوښکې بهوونکي ګاز څخه کار اخیستی

پولیسو د معترضانو د خورولو لپاره له اوښکې بهوونکي ګاز څخه کار اخیستی دی.
پولیسو د معترضانو د خورولو لپاره له اوښکې بهوونکي ګاز څخه کار اخیستی دی.

د پاکستان پولیسو نن د هغو معترضانو د خورولو لپاره له اوښکې بهوونکي ګاز څخه کار واخیست چې د پخواني صدراعظم عمران خان په ملاتړ راوتلي وو.

اعتراضونه وروسته له هغه پیل شول چې د بندیوان عمران خان تحریک انصاف ګوند د هغه څه پر ضد چې دې ګوند په انتخاباتو کې درغلي بللې ده د مظاهرو غوښتنه وکړه.

د پارلمان د ۲۶۴ څوکیو لپاره په دې انتخاباتو کې ۹۲ تنه خپلواکو کاندیدانو چې له تحریک انصاف سره اړیکي لري بریالي شول او په دې توګه په پارلمان کې د اکثریت ګټلو او حکومت د جوړولو لپاره د پخواني صدراعظم نواز شریف چانس ضایع شو که څه هم خپلواک کاندیدان اجازه نه لري چې حکومت جوړ کړي.

د انتخاباتو کمېسیون وايي ۷۵ څوکۍ د مسلم لیګ ن ګوند او ۵۴ څوکۍ د پیپل ګوند غړو ګټلې دي.

تحریک انصاف ګوند ادعا کوي چې که درغلي نه وای شوې، دوی تردې زیاتې رایې ګټلې.

د ورځې تازه خبرونه دلته ولولئ

د اوکراین پوځ: اودیيفکا ښار ته له نژدې دوو کلیو مو ځواکونه وایستل

د اوکراین یو پوځي
د اوکراین یو پوځي

د اوکراین پوځ وايي چې ختیځ اودیيفکا ښار ته نژدې له دوو نورو کلیو څخه یې هم خپل ځواکونه ایستلي دي.

د اوکراین د پوځ ویاند دیمیترو لیخووي پرون پر خپله فیسبوکپاڼه ولیکل چې اوکرایني ځواکونه له ستیپوف او سیویرني کلیو څخه چې د اودییېفکا په لویدیځ کې پراته دي، ووتل.

ویاند زیاته کړه چې پرون په سیویرني کې درنه جګړه وشوه.

د هغه په وینا، په دې جګړه کې روسي سرتېرو ته درانه تلفات اوښتي دي.

اودیییفکا د روانې میاشتې په لومړیو کې روسي ځواکونو ونیوه او داسې مهال چې اوکرایني ځواکونه د تجهیزاتو او وسلو له کمښت سره مخامخ دي اوکراین د روسیې پرضد د جګړې په ډګر کې یوه بله ماته وخوړه.

امریکا: ایران پلوي او حزب الله ډله په بریدونو کې د حوثي وسله والو مرسته کوي

د یمن حوثیان
د یمن حوثیان

متحدایالات وايي چې ایراني فعالان په یمن کې له حوثي وسله والو سره د حملو په ترسره کولو کې مرسته کوي.

د یمن لپاره د متحدایالاتو ځانګړي استازي ټېم لیندرکینګ پرون د سنا یوې فرعي کمېټې ته وویل چې ایران او په لبنان کې د دې هېواد د متحدې ډلې حزب الله فعالان په یمن کې دننه حضور لري او له حوثي یاغیانو سره مرسته کوي چې پر نړیوالو کشتیو حملې وکړي.

هغه زیاته کړه چې ایران حوثي وسله وال تجهیزوي او مرسته ورسره کوي.

د لیندرکینګ په وینا، کره راپورونه شته چې په زیات شمېر د ایران او حزب الله فعالان په یمن کې دي او له حوثي یاغیانو سره مرسته کوي.

په نړیوالو اوبو کې پر نړیوالو کشتیو د حوثي یاغیانو له حملو وروسته متحدوایالتونو او برتانیا په دې وروستیو کې په یمن کې څوځلې هوايي حملې وکړې.

د پولنډ صدراعظم د اوکراین د غلو دانو د وارداتو د بندیز خبرداری ورکړ

د پولنډ صدراعظم، ډونالډ توسک
د پولنډ صدراعظم، ډونالډ توسک

د پولنډ صدراعظم وايي، که اروپايي ټولنه د خپلو بازارونو د ساتنې لپاره اقدام ونه کړي، له اوکراین څخه د غلو دانو پر وارداتو د ملي بندیز د غځولو امکان نه شي ردولای.

د سه شنبې په ورځ (فبروري ۲۷) د پولنډ صدراعظم ډونالډ توسک د چک جمهوریت پلازمېنې پراګ ته د خپل سفر پر مهال وویل چې په دې بندیز کې به نور محصولات هم شامل وي.

دا څرګندونې په داسې حال کې شوي چې زرګونه پولنډي بزګران سړکونو ته راووتل او له اوکراین څخه د خوراکي توکو د واردولو او د اروپايي ټولنې د شنو قوانینو پر ضد یې خپلو اعتراضونو ته زور ورکړ.

په ګڼو اروپايي هېوادونو کې وروستۍ څو ورځې بزګران د لاریون په پار سړکونو ته وتلي او د اروپايي ټولنې له خوا یې د نویو «تړونونو» او د اوکرایین د غله دانو د بې درېغه وارداتو په وړاندې چې دوی یې غیرعادلانه سیالي بولي خپل غږ پورته کړی.

روسیې د الکسي ناوالني یو پخوانی وکیل نیولی

د کرملین د سرسخته پخواني منتقد الکسي ناوالني دوه اوونۍ مخکې د روسیې په یوه زندان کې ومړ
د کرملین د سرسخته پخواني منتقد الکسي ناوالني دوه اوونۍ مخکې د روسیې په یوه زندان کې ومړ

د کرملین د سرسخته پخواني منتقد الکسي ناوالني یو وکیل واسیلي دوبکوف نیول شوی.

روسي رسنیو د سه شنبې په ورځ (د فبرورۍ ۲۷) خبر ورکړ چې د روسیې پولیسو واسیلي دوبکوف د نامعلومو تورونو په تور نیولی دی.

تېره اوونۍ، واسیلي دوبکوف د ناوالني له مور، لیوډمیلا ناوالنیا، سره په شمالي قطب کې د سالخارد ښار ته لاړ او له چارواکو یې غوښتل چې د الکسي ناوالني مړی دوی ته وسپاري.

الکسي ناوالني د فبروري په ۱۶مه د سایبریا په یوه زندان کې مړ شو.

د ناوالني درې پخواني وکیلان هم د نومبر په میاشت کې د افراطیت په تور نیول شوي وو.

د مسکو یوې محکمې په نومبر میاشت کې د تُوندلارۍ په تور د ناوالني د یوې بلې وکیلې اولګا میخایلووا د نیولو امر هم کړی و.

کریملین د کییف متحدانو ته خبرداری ورکړی

په بروکسل کې د ناټو پر مرکزي دفتر د دې ایتلاف بیرغ
په بروکسل کې د ناټو پر مرکزي دفتر د دې ایتلاف بیرغ

کریملین د کییف متحدانو ته خبرداری ورکړی چې که اوکراین ته خپل سرتېري واستوي نو له ناټو سره جګړه به د روسیې ناچاري وي.

دا خبرداری وروسته له هغه ورکول کېږي چې د فرانسې ولسمشر ایمانویل مکروز وویل په اوکراین کې د روسیې د بریا د مخنیوي لپاره باید د اوکراین په ملاتړ دې هېواد ته د سرتېرو د استولو په ګډون هېڅ امکان له پامه ونه غورځول شي.

د کریملین ویاند دیمیتري پیسکوف نن د فبروري ۲۷مه د مکرون د څرګندونو په ځواب کې وویل چې اوکراین ته د ناټو د غړو له لوري د پوځي قطعو د لېږلو احتمال به یوه ډېره مهمه نوې کیسه وي.

کریملین وویل: "موږ باید د روسیې او ناټو ترمنځ د جګړې د احتمال نه بلکې د جګړې د ناچارۍ خبره وکړو."

مکرون پرون د فبروري په ۲۶مه په پاریس کې د اروپايي مشرانو له سرمشریزې وروسته وویل د دوی په غونډه کې په دې اړه چې د اوکراین په ګټه نور سمدستي اقدامات وشي پراخه اجماع وه.

د دې غونډې ګډونوالو موافقه وکړه چې د روسیې د یرغل پر وړاندې د مقابلې لپاره باید اوکراین ته د منځني او لیرې واټن ویشتونکو توغنديو او بمونو د ورکولو لپاره یو ایتلاف رامنځ ته کړي.

په شل اوریزو سیالیو کې د چټکې سلیزې ریکارډ مات شو

د نامیبیا کیڼ لاسي توپ وهونکي جان نیکول د یوې درې اړخیزې لوبلړۍ پرمهال د نيپال پر وړاندې په ۳۳ توپونو سلیزه وهلې ده.
د نامیبیا کیڼ لاسي توپ وهونکي جان نیکول د یوې درې اړخیزې لوبلړۍ پرمهال د نيپال پر وړاندې په ۳۳ توپونو سلیزه وهلې ده.

د نامیبیا کیڼ لاسي توپ وهونکي جان نیکول د یوې درې اړخیزې لوبلړۍ پرمهال د نيپال پر وړاندې په ۳۳ توپونو سلیزه وهلې ده.

دا په شل اوریزو سیالیو کې تر ټولو چټکه سلیزه ده.

۲۲ کلن نیکول چې په ۵م نمبر توپوهنې ته راښکته شوی و په ۳۳ توپونو یې ۱۰۰ منډې پوره کړې دي.

هغه ۸ شپږیزې او ۱۱ څلوریزې ووهلې.

تر نوموړي وړاندې دا ویاړ د نیپال د لوبغاړي کوشال مالا په نوم و چې په ۳۴ توپونو یې د نامیبیا خلاف سلیزه وهلې وه.

دا سیالي د فبرورۍ په ۲۷مه نېټه نن سه شنبه په نیپال کې ترسره شوه چې د ۲۰ منډو په توپیر نامیبیا وګټله.

د نیوزیلینډ د ټېسټ کرکټ مخکښ توپ اچونکي تقاعد اعلان کړ

نیل واګنر د خپل هېواد لپاره ۶۴ ټېسټ سیالۍ ترسره کړي، په ۱۲۲ پاڼیو کې یې ۲۶۰ وېکټې اخستې وې.
نیل واګنر د خپل هېواد لپاره ۶۴ ټېسټ سیالۍ ترسره کړي، په ۱۲۲ پاڼیو کې یې ۲۶۰ وېکټې اخستې وې.

وروسته له هغې چې د اسټرالیا پر وړاندې د راتلونکو دوو ټېسټ سیالیو لپاره کیڼ لاسی چټک توپ اچونکی نیل واګنر غوره نه‌شو، هغه هم په سمدستي توګه له نړیوال کرکټ تقاعد اعلان کړ.

ټاکل شوې چې د راتلونکې پنجشنبې په ورځ د فبرورۍ په ۲۹مه نېټه د اسټرالیا او نیوزیلینډ ترمنځ د دوه ټېسټ سیالیو لوبلړۍ پیل شي.

واګنر د یوه رسنیز کنفرانس پرمهال وویل، ورته سخته ده چې د تقاعد پرېکړه کوي، خو وی ویل: "فکر کوم نور د دې وخت نږدی شوی چې له نړیوال کرکټ لاس په سر شم او نويو ځوانانو ته د لوبېدو موقع ورکړم."

۳۷ کلن واګنر چې د رسنیز کنفرانس پر مهال یې له سترګو اوښکې روانې وې وویل، تېره اوونۍ یې د نیوزیلینډ له مشر روزونکي سره ډېرې خبرې وکړې، خو مثبت ځواب یې ترلاسه نه کړ.

د نوموړي په خبره، مشر روزونکي ورته ویلي چې نور د نیوزیلینډ د ټېسټ کرکټ په ۱۱ کسیزه لوبډله کې ورته ځای نه‌شته.

نیل واګنر د خپل هېواد لپاره ۶۴ ټېسټ سیالۍ ترسره کړي، په ۱۲۲ پاڼیو کې یې ۲۶۰ وېکټې اخستې وې.

د هغه د توپ اچونې اوسط ۲۷.۵۷ و.

نوموړي په یوه پاڼۍ کې یې ۷ لوبغاړي سوځولي وو او ۹ ځل یې د ټېسټ کرکټ په یوه پاڼۍ کې ۵ لوبغاړي سوځولي وو.

نیل واګنر یوازېنی لوبغاړی و چې په هېڅ نړیواله یو ورځنۍ سیالۍ کې یې د لوبېدو چانس ترلاسه نه کړ.

اوکراین د روسیې د ۱۱ بې پيلوټه الوتکو د ویشتو خبر ورکړ

له ارشیفه د یوه اوکرایني پوځي تصویر
له ارشیفه د یوه اوکرایني پوځي تصویر

د اوکراین پوځي چارواکي وايي چې نن سهار یې د روسیې له ۱۳ بې پیلوټه الوتکو څخه ۱۱ ویشتلي او راغورځولې دي.

د اوکراین هوايي ځواک نن په یوه بیان کې همداراز وویل چې د روسیې له شپږو کروز توغندیو څخه یې هم دوه له منځه وړي دي.

د اوکراین پوځ وايي چې دا بې پیلوټه الوتکې او توغندي د خارکییف، سوُمي، دنیپروپیتروفسک او څو نورو سیمو په فضا کې په نښه شول.

له بلې خوا د فرانسې ولسمشر ایمانویل مکرون وايي چې د اروپايي ټولنې مشرانو په خپله سرمشریزه کې د داسې یوه ایتلاف پر جوړولو موافقه کړې چې د روسیې د یرغل پر وړاندې د مقابلې لپاره اوکراین ته د منځني او اوږده واټن ویشتونکي توغندي او بمونه ورکړي.

له مکرون سره په دې غونډه کې چې تر بیګا ناوخته پورې یې دوام وکړ د جرمني صدراعظم اولاف شولڅ، د پولنډ ولسمشر اندری دودا او د بالتیک د حوزې د هېوادونو مشران هم شامل وو.

بایډن: که حماس د یرغمل شویو کسانو خلاصون ومني اسراییل به روژه کې جګړه ودروي

د امریکا د متحدو ایالتونو ولسمشر جوبایډڼ
د امریکا د متحدو ایالتونو ولسمشر جوبایډڼ

د امریکا د متحدو ایالتونو ولسمشر جوبایډڼ وایي،که له حماس سره د برمته شویو یو شمېر کسانو د خلاصون موافقه وشي؛ اسراییل به د را روانې روژې میاشتې په جریان کې په غزه کې جګړه بنده کړي.

د امریکا متحده ایالتونه او اروپایي ټولنه حماس ډله یوه ترهګره ډله ګڼي.

د متحده ایالاتو، مصر او قطر مذاکره کوونکي د یوې موافقې پرطرحې کارکوي چې له مخې به یې حماس د یوشمېر فلسطیني بندیانو د خوشې کولو او د شپږو اونیو لپاره د جګړې د درولو په بدل کې په لسګونو یرغمل شوي کسان خوشې کړي.

سخت دریځې حماس ډلې د اوکتوبر پراومه پراسراییل له برید سره شاوخوا ۱۲۰۰ کسان ووژل او ۲۴۰ نور یې یرغمل کړل.

د مخکیني لنډ مهاله اوربند په ترڅ کې د اسراییل له زندانونو د یوشمیرفلسطیني بندیانو د خوشې کیدو په بدل کې په لسګونو یرغمل آزاد شوي، خو ویل کیږي چې ترسلو زیات کسان لاهم یرغمل دي.

د هنګري پارلمان په ناټو کې د سویډن غړیتوب ته رایه ورکړه

د هنګري پارلمان
د هنګري پارلمان

د هنګري پارلمان پرون په ناټو کې د سویډن د غړیتوب لایحه تصویب کړه.

له دې سره په داسې حال کې چې د اوکراین جګړه لاهم روانه ده، په ناټو کې د اروپا د شمال د دې هېواد غړیتوب ته لاره اواره شوه.

هنګري د ناټو وروستی غړی دی چې له څو میاشتو ځنډ وروسته په دې ټلواله کې د سویډن غړیتوب مني.

د پارلمان غړو په ۱۸۸ موافقو او شپږ مخالفو رایو دا اقدام تایید کړ. په دې برخه کې د هنګري ځنډ د ناټو غړي هېوادونه په غوسه کړي وو.

د سویډن صدراعظم اولف کریسترسن Ulf Kristersson په غبرګون کې دا یوه تاریخي ورځ وبلله او ویې ویل سويډن چمتو دی چې د اروپا او اتلانتیک د امنیت د ټینګښت لپاره خپل مسوولیتونه ترسره کړي.

نور راوښيه

XS
SM
MD
LG