د لاسرسۍ وړ لېنکونه

تازه خبر
شنبه ۱۲ کب ۱۴۰۲ کابل ۰۱:۴۰

نړۍ

د چمن پرلت وال؛ د پاکستان حکومت به مو غوښتنې مني کنه ټاکنې یې ننګوو

د چمن یو شمېر پرلت وال
د چمن یو شمېر پرلت وال

د بلوچستان ایالت په چمن کې د پرلت مشران وايي، د دې لپاره چې د پاکستان چارواکي د دوی غوښتنو ته مثبت ځواب نه وايي، په خپله سیمه کې د انتخاباتو مخه نیسي.

په چمن کې زرګونو کسانو له تېرو ۱۰۸ ورځو راهیسي په دې خاطر احتجاج ته دوام ورکړی چې د پاکستان حکومت د افغانستان او پاکستان ترمنځ د تګ راتګ لپاره د وېزې او پاسپورټ شرط ایښی دی.

د چمن د پرلت ویاند صادق اڅکزي پرون (شنبه) د امریکا غږ ډیوې راډیو ته وویل چې د خپلو اعتراضونو په دوام کې به د دولتي دفترونو مخته کانتینرونه کښېږدي او د دولتي ادارو فعالیت به ودروي.

ده همداراز وویل، په چمن کې به یوازې په هغه صورت کې انتخاباتو ته اجازه ورکړي چې افغانستان ته د دوی تګ راتګ د پخوا په شان ازاد شي.

د ورځې تازه خبرونه دلته ولولئ

د پاکستان پارلمان ريیس وټاکه

د عکس ښي لور ته ایاز صادق، چې د مسلم لیګ نواز ګوند غړی دی، د پاکستان د ملي جرګې د غړیو د رایو په اکثریت ريیس غوره شو.
د عکس ښي لور ته ایاز صادق، چې د مسلم لیګ نواز ګوند غړی دی، د پاکستان د ملي جرګې د غړیو د رایو په اکثریت ريیس غوره شو.

د پاکستان پارلمان نن ريیس وټاکه.

ایاز صادق، چې د مسلم لیګ نواز ګوند غړی دی، د پاکستان د ملي جرګې د غړیو د رایو په اکثریت ريیس غوره شو.

د پاکستان په ملي جرګه کې د پخواني صدراعظم عمران خان په مشرۍ د تحریک انصاف پلوي غړیو د صادق له انتخابېدو سره مخالفت وکړ او ادعا یې وکړه چې د پاکستان د فبرورۍ د اتمې نېټې په انتخاباتو کې پراخه درغلي شوې ده.

د پاکستان ملي جرګه ۳۳۶ چوکۍ لري او د دې لپاره چې هیڅ ګوند پنځوس جمع یو رایې ترلاسه نه کړای شوې، اوس د څو ګوندونو د ايتلاف په نتیجه کې حکومت جوړېږي.

ټاکل شوې ده چې شهباز شریف د یکشنبې په ورځ د اعتماد رایې د ترلاسه کولو لپاره پارلمان ته حاضر شي.

مسکو کې امنیتي تدابیر؛ د کریمیلین کلک منتقد 'الکسي ناوالني' خاورو ته سپارل کېږي

په مسکو ښار کې نن په سختو امنیتي تدابیرو کې د کریمیلین کلک منتقد الکسي ناوالني خاورو ته سپارل کېږي.
په مسکو ښار کې نن په سختو امنیتي تدابیرو کې د کریمیلین کلک منتقد الکسي ناوالني خاورو ته سپارل کېږي.

په مسکو ښار کې نن په سختو امنیتي تدابیرو کې د کریمیلین کلک منتقد الکسي ناوالني خاورو ته سپارل کېږي.

سلګونه کسان په داسې حال کې چې د ګلانو ګېډۍ یې په لاسونو کې دي، د یوې کلیسا مخته راټول شوي څو د ناوالني جسد ته درناوی په ځای کړي.

په دې مراسمو کې پر ګډونوالو محدودیتونه هم زیات دي او ډېرو کسانو ته اجازه نه ده ورکړل شوې چې کلیسا ته ننوځي.

د الکسي ناوالني ویندویې کیرا یارمیش نن په یوه پیغام کې، چې پر ایکسپاڼه یې خپور کړی، لیکلي چې د خدماتو ادارې لومړی له سړخونې څخه کلیسا ته د جسد له وړلو انکار وکړ، خو په وروستیو شېبو کې یې موافقه وکړه.

د ناوالني د تدفین په مراسمو کې د هغه مېرمن یولیا ناوالینا نه شته.

هغې هم پرون د اروپا په پارلمان کې په وینا کې د روسیې ولسمشر ولادیمیر پوتین د ناوالني د ناببره مړینې مسوول وباله.

نوموړې وویل: "دوی وواژه، حتی وروسته یې د هغه د مړي سپکاوی وکړ، د هغه د مور سپکاوی یې وکړ. له بلې خوا ښکاره قتلونو ټولو ته یو وار بیا وښوده چې پوتین هر کار کولی شي او خبرې ورسره نه شي کېدای."

د ناوالني جسد یوه اوونۍ وروسته تر مړینې د فبرورۍ په ۲۴ مه د ده مور ته وسپارل شو او دې موضوع ډېرې پوښتنې وزېږولې.

د راپورونو له مخې، الکسي ناوالني د فبرورۍ په ۱۶ مه د ۴۷ کلونو په عمر ومړ.

د ده د مړینې په سند کې راغلي چې ناوالني په طبیعي مرګ ساه پرې کړې، خو ډېرو هېوادونو او نړیوالو موسسو د روسیې ولسمشر ولادیمیر پوتین او د دغه هېواد نور چارواکي د ناوالني د مړینې مسوول بولي.

یو روسی وګړی د مایکرو الیکټرونیکونو د قاچاق په تور مجرم وپیژندل شو

د امریکا د عدلیې وزارت ودانۍ
د امریکا د عدلیې وزارت ودانۍ

د متحده ایالاتو عدلي چارواکو د پنجشنبې په ورځ د فبرورۍ په ۲۹مه په یوه بیان کې وویل چې یو روسی وګړی له متحده ایالاتو روسیې ته د پوځي درجې مایکرو الیکټرونیکونو د لوی مقدار د قاچاق په تور مجرم وپیژندل شو.

۵۱ کلن ماکسیم مارچینکو د تېر کال په سپټمبر میاشت کې نیول شوی و.

هغه او دوه نور روسان تورن شوي چې د مایکرو الیکټرونیک د پېرنې د پټولو لپاره یې جعلي شرکتونه کارولي.

مایکرو الکټرونیک وړې ګرانبیه آلې دي چې د برقي وسایلو د بېلابېلو عملیو لکه القا، زېرمې او انتقال لپاره کارېږي.

د پنجشنبې په ورځ د فبروري په ۲۹مه مارچینکو د نیویارک په محکمه کې د پیسو مینځلو په یوه قضیه کې مجرم وپیژندل شو چې د 20 کلونو بند محکومیت لري.

همداراز له امریکا څخه د قاچاق په یوه قضیه کې چې په اعظمي توګه ۱۰ کاله بند لري مجرم وپېژندل شو او په خپلو جرمونو یې اعتراف وکړ.

ټاکل شوې د جون په شپږمه دغه روسی بیا محاکمه شي.

په خیبر پښتونخوا کې وسله‌والو یو واکسیناتور او یو پولیس وژلي

ارشیف: په پاکستان کې پولیسو د واکسیناتورانو امنیت ټینګ کړی دی.
ارشیف: په پاکستان کې پولیسو د واکسیناتورانو امنیت ټینګ کړی دی.

د خیبر پښتونخوا په لکي مروت کې نامعلومو وسله‌والو د پولیو یا د ماشومانو د ګوزڼ یو واکسیناتور او یو پولیس وژلي دي.

د وژل شوي واکسیناتور نوم غني الله ښودل شوی او د کورنۍ غړي یې وايي چې د نوموړي مړی یې پرون سهار کور ته نژدې ومونده.

له دې جلا د خیبر پښتونخوا په بنو کې د پولیسو پر یوې پوستې د وسله‌والو په برید کې لږترلږه یو پولیس وژل شوی دی.

دا پېښې په داسې حال کې شوي چې په لکي مروت او شاوخوا سیمو کې یې د فبرورۍ په ۲۶مه نېټه د ماشومانو د ګوزڼ پر ضد د واکسیناسیون کمپاین پیل شوی او نن یې وروستۍ ورځ ده.

پاکستان او افغانستان په نړۍ کې یوازېني دوه هیوادونه دي چې لا هم د ماشومانو د ګوزڼ ناورغي په‌کې محوه شوې نه ده.

پوتین نن خپل ملت ته وینا وکړه

RUSSIA-POLITICS-PUTIN
RUSSIA-POLITICS-PUTIN

د روسیې ولسمشر ولادیمیر پوتین نن پنجشنبې ملت ته وینا وکړه او د اوکراین په وړاندې د جګړې د پرمختګ او له لویدیځ سره د روسیې د اړیکو په اړه یې خپل لید لوری بیان کړ.

پوتین ګواښ وکړ چې که لویدیځ اوکراین ته سرتېري واستوي؛ د ده په خبره له "ترخو" پایلو سره به مخ شي.

پوتین دغه وینا داسې مهال کوي چې څه کم درې اوونۍ وروسته په روسیه کې د ولسمشرۍ انتخابات ترسره کیږي او نوموړی به دې ته په پام چې جدي سیال نه لري، دغه انتخابات په اسانۍ وګټي.

پوتین بیا هم پرخپلې پخوانۍ خبرې چې په کراتو کراتو یې کړې؛ ټینګار وکړ او ویې ویل چې د روسیې له ملي حاکمیت څخه د دفاع لپاره پراوکراین یرغل ته اړتیا وه.

پوتین په دې وینا کې چې د روسیې ړ پارلمان یا دوما د دواړو جرګو غړیو ته یې کوله، پر لویدیځ تور پورې کړ چې د ده په وینا؛ روسیه د وسلو په سیالۍ کې ښکېلوي او هڅه کوي چې دا هېواد په ګونډو کړي.

د روانې اوونۍ په پیل کې د فرانسې ولسمشر ایمانویل مکرون په پاریس کې یوې غونډې ته وویل، سره له دې چې په اوس وخت کې په دې اړه چې په اوکراین کې د روسیې د بریالیتوب د مخنیوي لپاره دې د اوکراین په ملاتړ هغه هېواد ته د لویدیځ ځواکونو واستول شي یوه اجماع نشته؛ خو دا انتخاب له پامه نه شي غورځېدای.

خو پوتین وویل چې د لویدیځ دا ډول مداخله به، د ده په وینا ډېرې دردونکې پایلې ولري.

عيني شاهدان: اسراييلي ځواکونو په غزه کې پر مرسته ترلاسه کوونکو د ډزو پر مهال له ۱۰۰ زيات کسان وژلي

غزه کې د هوا له لارې د غورځول کېدونکو بشري مرستو لپاره ولاړ فلسطینیان
غزه کې د هوا له لارې د غورځول کېدونکو بشري مرستو لپاره ولاړ فلسطینیان

د غزې تړانګې په غزې ښارکې نن عیني شاهدانو وویل چې د فلسطینیانو پرهغې ګڼه ګوڼې چې د مرستو د ترلاسه کولو لپاره راټول شوي وو، د اسراییلي ځواکونو په ډزو کې له سلو زیات کسان وژل شوي دي.

د اسوشیتید پرس آژانس د راپورله مخې، په دغو وژنو سره د روغتیایي چارواکو په وینا په غزه کې د جګړې له پیل راهیسې د وژل شویو کسانو شمېر له ۳۰ زرو اوښتی دی.

له دې مخکې په سیمه کې د الشفاء روغتون چارواکو دا د خلکو پرګڼه ګوڼې د اسراییل هوایي برید یاد کړی و خو عیني شاهدانو وروسته وویل چې اسراییلي ځواکونو هغه مهال ډزې وکړې چې خلکو له لاریو اوړه او کنسر شوي مواد ښکته کول.

اسراییل په دې پېښه کې د خپلو ځواکونو د لاس لرلو په اړه له څرګندونو ډډه کړې ده.

د پاکستان د نوي پارلمان غړو لوړه وکړه

د پاکستان د پارلمان ودانۍ
د پاکستان د پارلمان ودانۍ

د پاکستان نوي مرکزي پارلمان یا ملي اسامبلې نن خپله لومړۍ غونډه وکړه او نویو ټاکل شویو غړیو یې له ترسره شویو انتخاباتو درې اونۍ وروسته چې پکې د درغلۍ پراخ تورونه لګول شوي، لوړه وکړه.

د پارلمان نویو غړیو ته د لوړې مراسم د دې پارلمان د پخواني رییس راجا پرویز اشرف له خوا ترسره شول.

ټاکل شوې چې سبا د پارلمان ریس او مرستیال یې وټاکل شي او د مارچ په ۴ به هم دوی د پاکستان نوی صدراعظم غوره کوي.

د پاکستان د فبرورۍ د اتمې په انتخاباتو کې د پاکستان د پخواني زنداني صدراعظم عمران خان ګوند له ګډونه منع شوی و، خو پلویانو ډېرې رایې ګټلي.

د پاکستان د اساسي قانون له مخې، صدراعظم باید د یوه ګوند یا ګوندونو له خوا چې ډېرې رایې یې ګټلې وي، وټاکل شي.

د صدراعظمي څوکۍ ته د مسلم لیګ نواز ګوند چې د پاکستان له پیپلز ګوند او یو شمېر نورو کوچینیو ګوندونو سره یې د ایتلافي حکومت پر جوړولو سلاکړې، پخوانی صدرعظم شهباز شریف وړاندیز کړی دی.

امریکا د هوا له لارې غزې ته پر مرستو رسولو غور کوي

غزه کې د هوا له لارې د مرستو ښکته کول
غزه کې د هوا له لارې د مرستو ښکته کول

یوه امریکایي چارواکي وویل چې د ولسمشر جوبایډن اداره پر دې غور کوي چې په غزه کې د هوا له لارې په پوځي الوتکو کې مرستې ښکته کړي، ځکه د ځمکې له لارې د مرستو استول ډیر ستونزمن شوي دي.

پر غزې د اسراییل د برید له امله اکثر هغه سیمې چې ډیر خلک پکې اوسیدل ورانې شوې دي، په دې جګړه کې په لسګونو زره کسان وژل شوي او د غزې نژدې نیمایي کسان بې کوره شوي دي.

د ملګرو ملتونو د ارزونې له مخې، په فبرورۍ میاشت کې د جنورۍ د میاشتې په پرتله بشري مرستې نیمایي کمې شوې دي.

د ملګرو ملتو په وینا، په غزه کې لږ تر لږه پنځه لکه شپږ اویا زره کسان د قحطۍ په درشل کې دي.

الکسي ناوالني سبا په روسیه کې خاورو ته سپارل کیږي

د کریملین د سرسخت منتقد الکسي ناوالني د فبرورۍ په ۱۶ مه، د روسیې په یوه زندان کې ومړ
د کریملین د سرسخت منتقد الکسي ناوالني د فبرورۍ په ۱۶ مه، د روسیې په یوه زندان کې ومړ

ټاکل شوې چې د کریملین د سرسخت منتقد الکسي ناوالني مړی سبا خاورو ته وسپارل شي.

د ۴۷ کلن ناوالني چې چارواکو یې د مړینې خبر له زندانه ورکړ، مړی یې د فبرورۍ په ۲۴ د هغې مور ته وسپارل شو.

د ناوالني ویاندې کیرا یارمیش پرون په خپله ایکس پاڼه یا پخواني ټویټرکې لیکلي چې د مسکو په یوه کلیسا کې د دعا له مراسمو وروسته به د ناوالني مړی په نژدې، د بوریسوفسکوی په هدیره کې ښخ شي.

تراوسه نه ده څرګنده چې د ناوالني د مړي د ښخولو په مراسمو کې به څوک ګډون وکړي، خو د هغې میرمنې یولیا ناولانیا پرون د اروپا پارلمان ته په وینا کې وویل چې خاورې ته یې د مېړه د د سپارلو پر مهال د امنیتي ځواکونو احتمالي مداخلې ته اندېښنه لري؛ ځکه ډاډه نه ده چې په دې مراسمو کې به څوک ونه نیول شي یا به هغه په سوله ییز ډول ترسره شي.

د پاکستان تحریک انصاف ګوند د پیسو نړیوال وجهي صندوق ته لیک استولی

د پاکستان د تحریک انصاف ګوند یو شمېر غړي
د پاکستان د تحریک انصاف ګوند یو شمېر غړي

د پاکستان د پخواني زنداني صدراعظم عمران خان ګوند د ملګروملتونو د پیسو له وجهي صندوق، IMF څخه غوښتي، مخکې له دې چې پاکستان ته نورې مرستې ورکړي؛ باید دا یقیني کړي چې د فبرورۍ د اتمې د لانجمنو انتخاباتو په اړه څېړنه کیږي.

د عمران خان په مشرۍ تحریک انصاف پاکستان یا پي ټي آی ګوند پرون چهارشنبې وویل چې په دې اړه یې د پاکستان لپاره د IMF استازي ته یو لیک استولی دی.

که څه هم د عمران خان په مشرۍ ګوند په ترسره شویو انتخاباتو کې له ګډونه منع شوی و، خو غړیو یې په خپلواکه توګه ځانونه کاندید کړي او ترټولو ډېرې رایې یې ګټلې دي.

پاکستان چې د اقتصادي بې ثباتۍ د له منځه وړلو لپاره هلې ځلې کوي، تېرکال یې د پیسو له نړیوال وجهي صندوق څخه د درېیو ملیارډ ډالرو پور اخیستو یوه موافقه یقیني کړه؛ خو دا هېواد به وروسته له هغې چې نوی حکومت یې وټاکل شي، ډېرو نورو مرستو ته هم اړ وي.

نور راوښيه

XS
SM
MD
LG