د لاسرسۍ وړ لېنکونه

تازه خبر
سه شنبه ۴ غویی ۱۴۰۳ کابل ۰۵:۵۵

نړۍ

روسیې د امنیت شورا د بېړنۍ غونډې غوښتنه وکړه

د روسیې بیرغ
د روسیې بیرغ

روسیې پرون شنبه په سوریه او عراق کې د امریکا د متحدو ایالتونو د هوايي حملو په باب د ملګرو ملتونو د امنیت شورا د عاجلې غونډې غوښتنه وکړه.

په ملګرو ملتوو کې د روسیې د دایمي استازي لومړي مرستیال دمیتري پولینسکي پرون په ټولنیزو شبکو کې لیکلي:

«پر سوریې او عراق د امریکا د حملو له کبله سولې او خوندیتوب ته د ورپېښ ګواښ په اړه د ملګرو ملتونو د امنیت شورا د عاجلې غونډې غوښتنه کوو.»

د امریکا متحدو ایالتونو وړمه شپه په عراق او سوریه کې په لسګونو هغه ساحې بمباري کړې چې ایران پلوه وسله والو یا د ایران د سپاه پاسداران انقلاب د ګارد له لورې کارول کېدې.

دا بریدونه د تېرې اوونۍ د پیل د هغې حملې په ځواب کې وشوې چې په اردن کې پر امریکایي ځواکونو شوې وه او درې امریکایي سرتېري پکې وژل شوي وو.

د متحدو ایالتونو ځواکونو په اوو ځایونو کې تر پنځه اتیا ډېر اهداف په نښه کړل .

ولسشمر جوبایډن په یوه بیان کې څرګنده کړه چې په راتلونکې کې به نورې ورته حملې هم وشي.

د ورځې تازه خبرونه دلته ولولئ

د ایران ولسمشر نن او سبا هم پاکستاني چارواکو سره لیدنې او خبرې لري

د ایران ولسمشر ابراهیم رییسي او د پاکستان صدراعظم شهباز شریف
د ایران ولسمشر ابراهیم رییسي او د پاکستان صدراعظم شهباز شریف

ټاکل شوې چې د ایران ولسمشر ابراهیم رییسي به اسلام آباد ته د درې ورځني سفر په ترڅ کې نن او سبا هم له پاکستاني چارواکو سره لیدنو کتنو ته دوام ورکړي.

د دوه اړخیزو همکاریو د پیاوړتیا او د تروریزم پرضد د مبارزې په اړه بحث د دې سفر مهم هدف بلل شوی دی.

ښاغلي رییسي پرون له صدراعظم شهباز شریف سره تر لیدنې وروسته وویل پاکستان او ایران موافقه وکړه چې د دواړو هېوادونو ترمنځ د سوداګرۍ کلنۍ کچه لس میلیارد ډالر ته لوړه شي.

ښاغلي شریف هم هیله څرګنده کړه چې د دواړو هېوادو اړیکې به پیاوړي شي.

رییسي پاکستان ته خپل لومړی سفر یوازې څو میاشتې وروسته له هغه کېږي چې د روان کال په پیل کې د دواړو هېوادونو اړیکې د یوبل په خاورو کې د حملو له کبله ترینګلي شول.

برېتانیا به نن اوکراین سره څه باندې ۶۰۰ میلیونه ډالره مرسته اعلان کړي

د برېتانیا صدراعظم ریشي سوناک
د برېتانیا صدراعظم ریشي سوناک

تمه ده چې د برېتانیا صدراعظم ریشي سوناک به نن پولنډ ته د سفر پرمهال له اوکراین سره د ۶۱۷ میلیون ډالرو په ارزښت د برېتانیا د مرستې تر ټولو لویه بسته اعلان کړي.

د برېتانیا حکومت نن په یوه بیان کې وویل، د اوکراین پرضد د روسیې له وحشتناک یرغل سره د ټولې اروپا امنیت او ثبات له ګواښ سره مخامخ دی.

له دې بستې سره، په روان مالي کال کې له اوکراین سره د برېتانیا د ټولو مرستو کچه ۳،۷۱ میلیارد ډالرو ته ورسېده.

په بیان کې دا یادونه هم شوې چې برېتانیا به اوکراین ته د تجهیزاتو یوه ډېره لویه بسته چې ساری یې له دې مخکې نه دی لیدل شوی، هم واستوي.

تمه ده د امریکا سنا نن اوکراین سره څه باندې ۶۰ میلیارده ډالره مرسته تصویب کړي

د امریکا او اوکراین بیرغونه
د امریکا او اوکراین بیرغونه

تمه ده چې د امریکا د مشرانو جرګه یا سنا نن د امریکا د پوځي مرستو بستې ته چې له اوکراین سره څه باندې شپېته میلیارد ډالره مرسته هم پکې ده رایې ورکړي.

د دې مرستو لایحه چې په کانګرس کې ډېر وخت وځنډېده، تېره شنبې د استازو د جرګې له خوا تصویب شوه.

په پام کې ده، دا بسته چې د اوکراین د پوځ د اړتیا وړ مرستې پکې دي، نن په سنا کې رایې اخیستو ته او د اوونۍ ترپایه د توشېح لپاره ولسمشر جوبایډن ته واستول شي.

سپینې ماڼۍ په یوه بیان کې ویلي چې ښاغلي بایډن پرون د اوکراین له ولسمشر ولودیمیر زیلینسکي سره په ټلفوني خبرو کې وویل چې متحدایالات به د روسیې پرضد د جګړې او هوايي مدافعې په برخو کې د اوکراین د بېړنیو اړتیاوو د لیرې کولو لپاره ډېر ژر د پام وړ امنیتي مرستې بسته دې هېواد ته وسپاري.

اوکراین له څو میاشتو راهیسې د روسیې له زیاتېدونکي فشار سره مخامخ ده ځکه د هوايي مدافعې او مهماتو د سیسټمونو زېرمې یې ورو، ورو په خلاصېدو دي.

اوکراین: په ادیسه ښار کې د روسیې د بې پیلوټه الوتکې برید د ۲ ماشومانو په ګډون۹ تنه ټپیان کړي

د پېښې سیمه
د پېښې سیمه

د اوکراین د ادیسه د سیمې والي اولې کیپر وایي، پر ادیسه ښار نن سهار وختي د روسیې د بې پیلوټه الوتکې د یوه برید له امله ۷ کسان ټپیان شوي چې دوه یې ماشومان دي.

هغه همدارنګه ویلي چې د دغه برید له امله په څو ودانیو کې اور لګېدلی.

د اوکراین هوایي ځواکونو نن پر ټیلګرام چینل په یوه بیان کې ویلي چې د هوایي مدافعې ځواکونو یې د روسیې د هغو ۱۶ بې پیلوټه الوتکو له ډلې چې پرادیسه، کییف، میکولاییف او چیرکاسي د بریدونو لپاره کارول شوې وې پنځلس یې راغورځولې دي.

د کییف اداري مشر سیرهې پوپکو ویلي چې ټول ډرونونه چې کییف یې په نښه کړی و، له منځه وړل شوي او په ښار کې یې هیڅ ځاني او مالي زیان نه دی پېښ کړی.

د فلسطینیانو لپاره د ملګرو ملتونو د مرستندویه ادارې په اړه د څېړنو پایلې ښکاره شوې

د فلسطینیانو لپاره د ملګرو ملتونو د مرستندویه ادارې تصویر او ورسره اسراییلي ځواکونه
د فلسطینیانو لپاره د ملګرو ملتونو د مرستندویه ادارې تصویر او ورسره اسراییلي ځواکونه

د فلسطینیانو لپاره د ملګرو ملتونو د مرستندویه ادارې، UNRWA په اړه د خپلواکې څېړنې ډلې د دې ادارې د بې پرې والي اړوند چې ډېره تمه یې کېده ځینې مسلې موندلې، خو یادونه یې کړې چې اسراییل تراوسه د خپلو لګول شویو تورونو په اړه چې د دې ادارې کارکونکي د ترهګرو سازمانونو غړي و، شواهد نه دي وړاندې کړي.

د دې څېړنې په ۵۴ مخیز راپور کې ویل شوي چې د فلسطینیانو د بشري او اقتصادي پرمختګ لپاره دغه اداره نه جبران کیدونکې ده اوموجودیت یې حتمي دی.

د دغې ادارې د بې پرې والي په اړه د بیاکتنې ډلې دغه څېړنه په تېره جنوري میاشت کې وروسته له هغې پیل کړه چې اسراییل د UNRWA یو شمېر کارکوونکي د دې هېواد پر قلمرو د حماس له لوري د تېرکال د اوکتوبر د اوومې په برید کې په لاس لرلو تورن کړل.

د حماس وسله والو چې د امریکا متحده ایالات او اروپایي ټولنه یې یوه ترهګره ډله ګڼي، په دغه برید کې ۱۲۰۰ کسان ووژل، او شاوخوا دونیم سوه نور یې یرغمل کړل.

د اروپایي ټولنې د بهرنیو چارو وزیرانو پر ایران د بندیزونو د زیاتوالي هوکړه وکړه

د اروپایي ټولنې بیرغ
د اروپایي ټولنې بیرغ

د اروپايي ټولنې د بهرني سیاست مسوول جوزپ بوریل وايي، د اروپايي ټولنې د بهرنیو چارو وزیرانو د دوشنبې په ورځ موافقه وکړه چې پر اسرائیلو د ایران د وروستي برید په غبرګون پر تهران بندیزونه پراخ کړي.

اروپايي ټولنه اوس مهال پر ایران د ډله ییزې وژنې د وسلو د خپراوي، د بشري حقونو د سرغړونو او روسیې ته د بې پیلوټه الوتکو د رسولو په تړاو د بندیزونو څو پروګرامونه لري.

خو د دې اتحادیې څو هیوادونو د بې پیلوټه الوتکو په اړه د بندیزونو د پراخولو غوښتنه وکړه چې راکټونه او نیابتي ډلو ته د وسلو لیږدول هم پکې شاملیږي.

ولسمشر بایډین خپل اوکرایني سیال ته د مرستو د دوام ډاډ ورکړ

د امریکا ولسمشر جوبایډن
د امریکا ولسمشر جوبایډن

د امریکا ولسمشر جوبایډن د دوشنبې په ورځ د اوکراین ولسمشر ولودیمیر زیلینسکي ته په یوه ټیلیفوني تماس کې ډاډ ورکړ چې له دې هېواد سره به د پوځي مرستو مسوده ژر تر ژره لاسلیک کړي.

د امریکا په سنا کې د دې بستې په اړه سه شنبه رایګیري پلان وه او تر هغې وروسته به یې د توشیح لپاره ولسمشر بایډن ته لیږي. په دې لویو مرستو کې اوکرایین ته څه باندې شپېته میلیارده ډالره په پام کې نیول شوي.

زیلینسکي په خپل پیغام کې چې په ایکس یې خپور کړی ویلي له ولسمشر بایډن سره په خبرو کې یې له هغه ډاډ ترلاسه کړ چې د مرستو په دې کڅوړه کې هغه ډول مرستې شاملې دي چې اوکراین ورته اړتیا لري ترڅو د روسي ځواکونو د پرمختګ مخه ونیسي.

د شریف او رییسي لیدنه؛ په دوه اړخیزو اړیکو او تروریزم سره پر مبارزې غږېدلي

د عکس ښي لور ته د ایران ولسمشر ابراهیم رییسي او چپ لور ته د پاکستان صدراعظم شهباز شریف
د عکس ښي لور ته د ایران ولسمشر ابراهیم رییسي او چپ لور ته د پاکستان صدراعظم شهباز شریف

د ایران ولسمشر ابراهیم رییسي نن د پاکستان له صدراعظم شهباز شریف سره په اسلام آباد کې خبرې وکړې.

د پاکستان او ایران ترمنځ په تېره فبروري میاشت کې د یو بل په قلمروونو کې له توغندويي حملو وروسته دا لومړی ځل دی چې د دواړو هېوادو مشران سره ګوري.

د رییسي د سفر پرمهال سلګونه اضافي پولیس او ملېشه ځواکونه د امنیتي تدابیرو لپاره په اسلام آباد کې ځای پرځای شوي وو.

د پاکستان حکومت په یوه بیان کې ویلي چې شریف او رییسي د دوه اړخیزو اړیکو د پیاوړتیا د پرمختګ، د تروریزم پر ضد د مبارزې او په نورو برخه کې د دواړو هېوادونو ترمنځ د همکاریو پر پراختیا خبرې وکړې.

پاکستان ته د رییسي درې ورځنی سفر چې نن پیل شو، د هغو هڅو یوه برخه ده چې دې دوو هېوادونو د خپلو اړیکو د رغونې لپاره پیل کړې دي.

ایران او پاکستان تقریباً ۹۰۰ کیلومتره ګډه پوله لري چې په دواړو خواوو کې یې بلوڅ بلتونپال د تهران او اسلام آباد مخالفت کوي.

پاکستاني چارواکي: په خیبرپښتونخوا کې ۱۱ وسله‌وال وژل شوي

ارشیف: د پاکستان امنیتي ځواکونه په خیبرپښتونخوا ایالت کې د عملیاتو پر مهال
ارشیف: د پاکستان امنیتي ځواکونه په خیبرپښتونخوا ایالت کې د عملیاتو پر مهال

د پاکستان امنیتي ځواکونه په خیبرپښتونخوا ایالت کې په دوو جلا عملیاتو کې د یوولسو وسله‌والو د وژل کېدو خبر ورکوي.

چارواکي وايي چې په ډېره اسماعیل خان سیمه کې د امنیتي ځواکونو په عملیاتو کې لس وسله‌وال وژل شوي دي.

دا عملیات یوه ورځ وروسته له هغه وشول چې نامعلومو وسله‌والو د پاکستان د ګمرک دوه تنه کارکوونکي ووژل.

د امنیتي چارواکو په وینا، یو بل وسله‌وال په شمالي وزیرستان کې په یوه جلا برید کې وژل شوی دی.

پاکستاني ځواکونه دا عملیات تر ډېره د پاکستاني طالبانو پر ضد ترسره کوي.

د اسراییلو د پوځي استخباراتو مشر د حماس د تېر کال برید په تړاو استعفا کړې

د اسراییل د پوځي استخباراتو د څانګې مشر اهارون هلیوا چې له دندې یې استعفا کړې ده.
د اسراییل د پوځي استخباراتو د څانګې مشر اهارون هلیوا چې له دندې یې استعفا کړې ده.

د اسراییل پوځ نن دوشنبې وویل چې د پوځي استخباراتو د څانګې مشر اهارون هلیوا د حماس له لوري پر اسراییل د تېر کال د اکټوبر د اوومې نېټې د برید په تړاو له خپلې دندې استعفا کړې ده.

هلیوا د اسراییل لومړنی جګپوړی چارواکی دی چې د حماس چې متحده ایالات او اروپایي ټولنه یې د یوې ترهګرې ډلې په توګه پېژني، د دغه برید په تړاو له خپلې دندې استعفا کوي.

په دغه برید کې ۱۲۰۰ کسان ووژل شول او شاوخوا دونیم سوه نور یرغمل شول.

د اسراییل پوځ په یوه اعلامیه کې ویلي چې د پوځ لوی درستیز د هلیوا استعفا منلې او له هغه یې د خدمت په‌خاطرمننه کړې ده.

نور راوښيه

XS
SM
MD
LG