د لاسرسۍ وړ لېنکونه

تازه خبر
دوشنبه ۳ غویی ۱۴۰۳ کابل ۰۷:۳۱

نړۍ

نواز شریف د پاکستان د څلورم ځل صدراعظمۍ لپاره کاندید شو

نواز شریف او لور یې مریم نواز
نواز شریف او لور یې مریم نواز

د پاکستان د مسلګ لیګ (ن) ګوند وایي، پخوانی صدراعظم نواز شریف به په راتلونکو پارلماني انتخاباتو کې د دې ګوند له خوا د څلورم ځل لپاره د صدراعظمۍ څوکۍ ته کاندید وي.

نوازشریف چې درې ځلې یې د صدراعظم په توګه دنده ترسره کړې او لکه د نورو صدراعظمانو په څېریې هیڅ یوه بشپړه کړې نه ده، په لندن کې له څلورو کلونو جلا وطنۍ وروسته د روان کال په اکتوبرمیاشت کې بیرته پاکستان ته ستون شو.

نوموړی چې په فساد تورن او د بند له سزا سره مخامخ و، پاکستان ته له ستنیدو وروسته د استیناف محکمې هغه ته برائت ورکړ.

د محکمې دې فیصلې نوازشریف د پارلمان د یوې څوکۍ لپاره د نوماندۍ وړ وګرځاوه.

ټاکل شوې چې په پاکستان کې د مرکزي او ایالتي پارلمانونو لپاره انتخابات د راتلونکې کال د فبرورۍ میاشتې په اتمه نېټه وشي.

د ورځې تازه خبرونه دلته ولولئ

پاکستاني چارواکي: په خیبرپښتونخوا کې ۱۱ وسله‌وال وژل شوي

ارشیف: د پاکستان امنیتي ځواکونه په خیبرپښتونخوا ایالت کې د عملیاتو پر مهال
ارشیف: د پاکستان امنیتي ځواکونه په خیبرپښتونخوا ایالت کې د عملیاتو پر مهال

د پاکستان امنیتي ځواکونه په خیبرپښتونخوا ایالت کې په دوو جلا عملیاتو کې د یوولسو وسله‌والو د وژل کېدو خبر ورکوي.

چارواکي وايي چې په ډېره اسماعیل خان سیمه کې د امنیتي ځواکونو په عملیاتو کې لس وسله‌وال وژل شوي دي.

دا عملیات یوه ورځ وروسته له هغه وشول چې نامعلومو وسله‌والو د پاکستان د ګمرک دوه تنه کارکوونکي ووژل.

د امنیتي چارواکو په وینا، یو بل وسله‌وال په شمالي وزیرستان کې په یوه جلا برید کې وژل شوی دی.

پاکستاني ځواکونه دا عملیات تر ډېره د پاکستاني طالبانو پر ضد ترسره کوي.

د اسراییلو د پوځي استخباراتو مشر د حماس د تېر کال برید په تړاو استعفا کړې

د اسراییل د پوځي استخباراتو د څانګې مشر اهارون هلیوا چې له دندې یې استعفا کړې ده.
د اسراییل د پوځي استخباراتو د څانګې مشر اهارون هلیوا چې له دندې یې استعفا کړې ده.

د اسراییل پوځ نن دوشنبې وویل چې د پوځي استخباراتو د څانګې مشر اهارون هلیوا د حماس له لوري پر اسراییل د تېر کال د اکټوبر د اوومې نېټې د برید په تړاو له خپلې دندې استعفا کړې ده.

هلیوا د اسراییل لومړنی جګپوړی چارواکی دی چې د حماس چې متحده ایالات او اروپایي ټولنه یې د یوې ترهګرې ډلې په توګه پېژني، د دغه برید په تړاو له خپلې دندې استعفا کوي.

په دغه برید کې ۱۲۰۰ کسان ووژل شول او شاوخوا دونیم سوه نور یرغمل شول.

د اسراییل پوځ په یوه اعلامیه کې ویلي چې د پوځ لوی درستیز د هلیوا استعفا منلې او له هغه یې د خدمت په‌خاطرمننه کړې ده.

اوکرایني ځواکونه: د روسیې یوه اکتشافي او پنځه الوتکې مو راوغورځولې

د اوکراین په ادیسه کې د روسیې د ډرون حملو له کبله د اوښتو زیانونو یو انځور
د اوکراین په ادیسه کې د روسیې د ډرون حملو له کبله د اوښتو زیانونو یو انځور

د اوکراین هوایي ځواکونه وایي چې نن د ورځې په لومړیو کې یې د روسیې پنځه جنګي او یوه اکتشافي ډرون الوتکې را وغورځولې.

د دغو ځواکونو په وینا، روسیې د اشغال شوې کریمیا ټاپووزمې له کپ چاودا څخه ایراني ساخت شاهد ډوله ډرون الوتکې پورته کړې وې.

د چارواکو په خبره، روسیې همدارنګه د دونیڅک له سیمې رهبري شوي د الوتکو ضد درې توغندي توغولي و.

د اوکراین د ادیسه د سیمې والي اولې کیپر وویل چې ډرون الوتکو په سیمه کې یوه کرونده په نښه کړی و چې په نتیجه کې یې د غلو یو ګدام او د کرڼې ماشینونه ویجاړشوي دي.

د راپورونو له مخې په دغه برید کې چا ته زیان نه دی رسېدلی.

په نهو کلونو کې د ایراني حاجیانو لومړۍ ډله د عمرې حج لپاره عربستان ته لاړه

د بیت‌الله شریف یو انځور
د بیت‌الله شریف یو انځور

په نهو کلونو کې د ایراني حاجیانو لومړۍ ډله نن دوشنبې د عمرې حج لپاره سعودي عربستان ته ولاړه.

د رویترز خبري آژانس د راپور له مخې ایراني رسنیو په تېره ډسمبر میاشت کې ویلي وو چې سعودي عربستان پر ایرانیانو د عمرې حج د پرځای کولو بندیز لیرې کړی، خو په دې هدف الوتنې تراوسه ځنډېدلې وې چې تهران هغه تخنیکي ستونزې بللې وې.

د راپور له مخې دغه اقدام په منځني ختیځ کې د دغو دوو سترو قدرتونو ترمنځ د اړیکو د ښه‌والي نتیجه ده.

په تېره مارچ میاشت کې د چین په منځګړیتوب یوه موافقه وشوه چې له مخې یې ایران او سعودي عربستان خپلې ډیپلوماتیکې اړیکې چې په ۲۰۱۶م کال کې د ریاض له‌خوا د یوه شیعه ملا د اعدام او له هغه وروسته په تهران کې د سعودي عربستان پر سفارت د یرغل له امله کړکېچنې شوې، بېرته په بشپړه توګه اعاده کړې.

د دغو اړیکو له اعاده کېدو مخکې ایرانیانو ته یوازې د حج په اصلي مراسمو کې د ګډون اجازه ورکول کېده.

د سعودي عربستان پر لوري له تهرانه د ۸۵ حاجیانو د خدای پاماني په مراسمو کې په تهران کې د سعودي عربستان سفیرعبدالله بن سعود العنزي هم حضوردرلود.

سوریه کې د امریکا د یوې پوځي اډې پر لور ۵ توغندي توغول شوي

ارشیف
ارشیف

په عراق کې پرون یکشنبه له زمار ښار لږ تر لږه پنځه توغندي د سوریې په شمال کې د امریکا د متحدو ایالتونو د یوې پوځي اډې پر لوري توغول شوي دي.

رویټرز خبري اژانس د دوو امنیتي سرچینو په حواله دا راپور ورکړی دی.

د راپور له مخې، دا د فبروري میاشتې له لومړیو چې د ایران له ملاتړه برخمنو ملېشه وو په عراق کې پر امریکايي ځواکونو خپلې حملې درولې وې، په سوریه کې پر امریکايي ځواکونو لومړۍ حمله ده.

پرونۍ حمله په داسې حال کې کېږي، چې د شنبې په ورځ د عراق صدراعظم محمد شیاع السوداني د امریکا د متحدو ایالتونو له سفره عراق ته ستون شو.

هغه په سپینه ماڼۍ کې د امریکا له ولسمشر جو بایډن سره هم کتلي وو.

ایراني چارواکي: له افغانستان څخه ایران ته هېڅ اورګاډی نه دی راغلی

ارشیف: د خواف رېللاره چې افغانستان له ایران سره وصلوي.
ارشیف: د خواف رېللاره چې افغانستان له ایران سره وصلوي.

ایراني چارواکي وايي، له افغانستانه دې هېواد ته هېڅ اورګاډی نه دی ورغلی.

له دې مخکې ځینو ایراني رسنیو راپور ورکړی و چې ایران د افغانستان لومړني ټرانزیټي اورګاډی ته چې ترکیې ته روان و، له دې هېواده د تېرېدو اجازه نه ده ورکړې، خو پرون ماښام ایراني رسنیو د اورګاډي شرکت د عامه اړیکو د ادارې په حواله خبر ورکړ چې له افغانستانه دې هېواد ته هېڅ اورګاډی نه دی ورغلی.

د مخکینو راپورونو له مخې د افغانستان یو اوګاډی چې ۱۱۰۰ ټنه معدني تیږې په‌کې بار وې له هرات ولایت څخه د ایران روزنک تمځای ته ننوتی دی.

په راپورونو کې تایید شوې وه چې ایران دا اورګاډی درولی، خو چارواکو یې د دې اقدام په اړه جزییات نه دي ورکړي.

زیلینسکي: اوکراین به دوهم افغانستان نه شي

د اوکراین ولسمشر ولودیمیر زیلینسکي
د اوکراین ولسمشر ولودیمیر زیلینسکي

د اوکراین ولسمشر وايي، د ده له هېواد سره د متحدوایالتونو مرسته ښيي چې اوکراین به دوهم افغانستان نه شي.

ولودیمیر زیلینسکي دا څرګندونې پرون د غويي دوهمه وکړې.

له دې یوه ورځ مخکې د امریکا د استازو جرګې له اوکراین سره د ۶۱ میلیارد ډالره پوځي مرستې لایحه تصویب کړه.

دا لایحه د یوې اوږدې مودې لپاره د استازو په جرګه کې بې برخلیکه ځندېدلې وه.

زیلینسکي پرون له این‌بي‌سي NBC تلوېزیون سره په مرکه کې وویل چې د امریکا نوې مرسته به د اوکراین وړتیاوې پیاوړې کړي او کریملین ته به دا پیغام ورسوي چې اوکراین به دوهم افغانستان نه شي.

متحدوایالتونو له نژدې شل کلن پوځي حضور وروسته خپل ځواکونه د ۲۰۲۱م کال په اګست کې له افغانستانه وایستل چې په نتیجه کې یې د افغان ځواکونو لیکې ورانې شوې، جمهوري نظام وپرځېد او طالبان یوځل بیا پر افغانستان واکمن شول.

ایران د حجاب د نویو مقرراتو تطبیق لپاره نوی ځواک جوړ کړی

د ایران ځواکونه د حجاب په تړاو له یو شمېر مېرمنو سره په خبرو بوخت دي.
د ایران ځواکونه د حجاب په تړاو له یو شمېر مېرمنو سره په خبرو بوخت دي.

د ایران په پلازمېنه تهران کې د سپاه پاسداران انقلاب ځواک قوماندان حسن حسن زاده پرون د هغه نوي اضافي ځواک د جوړېدو اعلان وکړ چې دنده به یې د ښځو د حجاب په برخه کې د نويو محدودیتونو تطبیق وي.

حسن زاده وویل د دې ځواک غړي د دې لپاره روزل شوي چې په عامه ځایونو کې د حجاب نوي مقررات په جدي ډول عملي کړي.

دا اعلان وروسته له هغه کېږي چې ایراني چارواکو په وروستیو ورځو کې د امر باالمعروف او نهی عن المنکر اړوند فعالیتونه پراخ کړي او په دې ترڅ کې یې د یونیفورم لرونکو مامورینو تصویرونه خپاره کړي چې د "رڼا" تر سرلیک لاندې د ځانګړو عملیاتو په ترڅ کې ښځو ته سپارښتنې کوي.

د ۲۰۲۲م کال په سپټمبر میاشت کې وروسته له دې چې د مهساامیني په نوم یوه پېغله د چارواکو په معیار د حجاب د نه مراعاتولو په تور ونیول شوه او بیا یې د پولیسو په توقیف کې سا ورکړه په ایران کې داسې پراخ اعتراضونه پیل شول چې د اسلامي جمهوریت له واکمنېدو راهیسې یې ساری نه و، لیدل شوی.

پر یوې تندلارې اسراییلي پوځي قطعه د امریکا احتمالي بندیزونه؛ اسراییلي مشرانو دا پرېکړه غندلې

د اسراییلو نیتزه یهودا ځواکونه چې ښايي امریکا پرې بندیزونه ولګوي.
د اسراییلو نیتزه یهودا ځواکونه چې ښايي امریکا پرې بندیزونه ولګوي.

اسراییلي مشرانو د امریکا هغه احتمالي پرېکړه په کلکه غندلې چې د اسراییلو پر یوه تندلارې پوځي قطعه یې بندیزونه لګولي دي.

د امریکا د حکومت دا احتمالي بندیزونه به چې ښايي نن د غويي یا ثور په درېیمه اعلان شي، د اسراییل د پوځ پر یوې قطعې د امریکا لومړی ځل بندیزونه وي او تمه ده چې د دې دوو متحدانو ترمنځ اړیکي به نور هم ترینګلي کړي.

د امریکا او اسراییلو اړیکي په غزه کې د جګړې له کبله مخکې هم ترینګلي شوي وو.

امریکايي چارواکو د اسراییل د دې قطعې نوم نه دی ښودلی، خو اسراییلي مشرانو او سیمه‌ییزو رسنیو دا قطعه د نیتزه یهودا Netzah Yehuda په نوم یاده کړې چې د راپورونو له مخې له تندلارو یهودو سرتېرو څخه جوړ کنډک دی.

د اوکراین ولسمشر د امریکا د نوې مرستې د اعلان هرکلی وکړ

د اوکراین ولسمشر ولادمیر زیلینسکي
د اوکراین ولسمشر ولادمیر زیلینسکي

د اوکراین ولسمشر ولادمیر زیلینسکي له اوکراین سره د امریکا د استازیو جرګې له خوا د ۶۰ ملیارډ ډالرو نوې مرستې هرکلی کړی، خو له واشنګټن یې غوښتي چې هرڅومره ژر چې کېدای شي دغه لایحه پر قانون بدله کړي ترڅو دې هېواد ته د وسلو د لېږد پروسه پیل شي.

ښاغلي زیلینسکي له امریکایي ان بي سي شبکې سره په مرکه چې نن یکشنبې خپره شوې، دغه راز ویلي چې د امریکا د استازیو جرګې دغه اقدام روسیې ته یوقوي پیغام ورکوي او هغه دا چې واشنګټن له کییف سره ولاړ دی او اوکراین به دوهم افغانستان نه شي.

د نوموړي په باور، دغه ملاتړ به د اوکراین ځواکونو لا پیاوړي او د روسیې په وړاندې جګړه کې به د دوی د بري چانس زیات کړي.

هغه له اوکراین سره د امریکا د مرستو په تړاو د افغانستان د پرتله کولو په باب نورڅه نه دي ویلي، خو د امریکا متحدو ایالتونو په افغانستان کې له شاوخوا شل کلن پراخ حضور وروسته د ۲۰۲۱ م کال د اګسټ میاشتې په پای کې خپل ټول ځواکونه له دې هېواده داسې مهال وایستل چې د همدې میاشتې په پنځلسمه نېټه یې طالبانو بیا افغانستان لاندې کړ.

نور راوښيه

XS
SM
MD
LG