د افغانستان د کرکټ الف لوبډله د څلور اړخیزو سیالیو او اسیا جام لپاره په چمتووالي بوخته ده.

د کرکټ بورډ ادارې د شنبې په ورځ د سپټمبر په ۲۸مه نېټه په یوه خبر کې ویلي چې د ځوانانو یا الف لوبډلې د تمریناتي کمپ دوهم پړاو یې په کابل کې پیل کړی دی.

خبر زیاتوي، یادې لوبډلې له څو ورځو راهیسې په کندز کې تمرینات ترسره کړل او د لا غوره چمتووالي په موخه اوس په کابل کې بوخت دي.

ټاکل شوې چې د افغانستان الف لوبډله د عمان په کوربتوب په راتلونکې عیسوي میاشت کې له عمان، هانګ کانګ او سریلانکا سره څلور اړخیزې سیالۍ پيل کړي او تر دې سیالیو وروسته به د ځوانانو په اسیا جام کې ګډون وکړي.

د لبنان حزب‌الله تایید کړه چې د دوی مشر حسن نصرالله د اسراییلو په یوه هوايي برید کې وژل شوی دی.

دا خبر رویټرز او اسوشېټېډ پرېس خبري اژانسونو ورکړی دی.

د اسراییلو پوځ نن وویل چې د حزب‌الله ډلې مشر حسن نصرالله یوه ورځ مخکې د لبنان په پلازمېنه بیروت کې په یو لړ هوايي بریدونو کې وژل شوی دی.

امریکا، حزب الله د یوې ترهګرې ډلې په توګه پېژني.

اروپايي ټولنه د حزب‌الله پوځي برخه په تور لېست کې شامله کړې ده.

د حزب‌الله سیاسي څانګه د لبنان په پارلمان کې استازي لري.

حزب‌الله یوه ملېشه ډله او یو سیاسي ګوند دی چې د لبنان د سویل لویه برخه کنټرولوي.

د اسراییلو د پوځ ویاند افیخای ادرعي په یوه بیان کې چې په ایکس‌پاڼه خپور شوی، ویلي چې د حزب‌الله د جنوبي محاذ قومندان علي کرکي او یو شمېر نور قوماندانان هم وژل شوي دي.

هغه زیاته کړه:"پیغام روښانه دی، موږ به هر هغه چا ته ورسېږو چې په شمال، سویل او یا نورو لرو جبهو کې اسراییلي اتباع ګواښي."

د اسراییلو دفاعي ځواکونو هم په ایکس‌پاڼه کې ویلي چې حسن نصرالله به نور د نړۍ د وېرولو توان ونه لري.

رویټرز د سرچینو په حواله راپور ورکړی چې د ایران رهبر ایت‌الله علي خامنه‌يي خوندي ځای ته وړل شوی او کلک امنیتي تدابیر نیول شوي دي.

اسراییلي رسنیو نن سهار خبر ورکړ چې د حزب‌الله د مشر لور زینب نصرالله هم د اسراییلو په برید کې وژل شوې ده.

حزب‌الله دغه راپورونه نه دي تایید کړي.

د حسن نصرالله زوی هادي په ۱۹۹۷ کال کې د اسراییلي ځواکونو پر ضد په جګړه کې وژل شوی و.

د کاناډا او انګلستان کلنۍ ګډه جایزه د افغانستان ازادو رسنیو او خپلواکو خبریالانو ته ورکړل شوه.

د کاناډا حکومت په یوه بیان کې ویلي چې د جایزې مراسم د جمعې په ورځ په نیویارک کې د ملګرو ملتونو د عمومي غونډې په څنډه کې ترسره شول.

د افغانستان د خپلواکو ژورنالیستانو په استازیتوب د امو تلوېزیون اجراییوي رییس لطف‌الله نجفي‌زاده دا جایزه ترلاسه کړه.

هغه ته دا جایزه د کاناډا د بهرنیو چارو وزیرې میلانیا جولي او د بریټانیا د مشرانو جرګې مرستیال لارډ، کالینز هایبري له خوا ورکړل شوه.

د رسنیو د ملاتړو بنسټونو په وینا، له درېیو کلونو راهیسې چې طالبان پر افغانستان واکمن شوي، طالبانو د بیان ازادي او د خبریالانو او رسنیو فعالیتونه سخت محدود کړي دي.

د اسراییلو پوځ نن شنبه یو وار بیا د لبنان پلازمېنه بیروت کې په یو شمېر سیمو چې دوی یې د حزب‌الله اهداف بولي بریدونه کړي دي.

تازه بریدونه یوه ورځ وروسته له هغه شوي چې په بیروت کې د حزب‌الله ډلې د قوماندې مرکز د اسراییل د توغندیزو بریدونو هدف وګرځېد.

د ایران له ملاتړ برخمن حزب‌الله ډلې د مشر حسن نصرالله د برخلیک په اړه سمدستي څه جزییات نه‌شته او نه هم د دوی ډلې څه ویلي.

خو اسراییلي رسنیو راپور ورکړی چې د حسن نصرالله لور زینب نصرالله وژل شوې ده.

د حسن نصرالله زوی هم په ۱۹۹۷م کال کې له اسراییلو سره په جګړه کې وژل شوی و.

حزب‌الله د امریکا له‌خوا ترهګره ډله ګڼل کېږي او اروپايي ټولنې بیا د دې ډلې پوځي څانګه په تور لېست کې اچولې ده.

اخوا د ملګرو ملتونو سرمنشي انتونیو ګوتېریش په منځني ختیځ کې د سمدستي اوربند د ټینګښت غوښتنه کړې ده.

هغه ویلي، په لبنان کې جګړه به د نورو بهرنیو قدرتونو په ښکېلولو سره وضعیت لا کړکېچن کړي.

ګوتېریش دا څرګندونې په داسې حال کې کړي چې د اسراییلو او حزب‌الله ترمنځ شخړې زور اخیستی دی.

نن د سپټمبر ۲۸مه اطلاعاتو ته د لاسرسي نړیواله ورځ ده.

سږ کال د دې ورځې شعار اطلاعاتو ته د لاسرسي اصلي جریان او عامه سکتور کې ګډون دی.

دا ورځ نړیوال داسې وخت نمانځي چې افغانستان کې خبریالان او د رسنیز فعالان د طالبانو حکومت د اطلاعاتو په نه شریکولو تورنوي.

یو شمېر خبریالانو ازادي راډیو ته وویل طالبان هغه مساییل له دوی سره شریکوي چې ګټې یې په‌کې نغښتې وي، خو د څېړنیو راپورونو، د پېښو د جزییاتو او نورو خبري مساییلو په اړه له دوی سره معلومات نه شریکوي.

طالبان چې د ۲۰۲۱م کال په اګست کې واک ته ورسېدل د ګڼو نورو برخو تر څنګ یې رسنۍ هم محدودي کړي او دا محدودیت ورځ تر بلې زیاتېږي.

تر ټولو وروستی، طالبانو شاوخوا یوه اوونۍ مخکې په رسنیو کې پر سیاسي خپرونو بندیز لګولی دی.

د اوکراین ولسمشر ولودمیر زیلینسکي وایي، د امریکا له پخواني ولسمشر ډونالډ ټرمپ سره یې ډېرې معنی لرونکې خبرې ترسره کړې.

دا په داسې حال کې ده چې د انتقاد کوونکو په خبره د ټرمپ د روسیې پلوه دریځ په خاطر د دواړو مشرانو ترمنځ اړیکې ښې نه‌دي.

د امریکا د ولسمشرۍ لپاره د جمهوریپالو له کاندیډ ټرمپ سره تر کتنې وروسته زیلینسکي پر ټیلیګرام ولیکل چې له هغه سره یې غونډه ډېره معنی لرونکې وه او زیاته یې کړه چې ټرمپ ته یې د بري پلان توضیح کړ.

د زیلینسکي په خبره: "دغه پلان د اوکراین وضعیت او دا چې جګړه زموږ د خلکو لپاره څه نتیجې لري، په جزییاتو بیانوي."

ټرمپ له زیلینسکي سره له خبرو مخکې چې هغه یې هم په خوا کې ولاړ و وویل چې که د نومبر د میاشتې انتخابات وګټي، نو به دوی له دواړو لورو سره کار وکړي چې په اوکراین کې جګړه پای ته ورسېږي.

د امریکا متحده‌ایالاتو پرون جمعه اعلان وکړ چې د عراق له حکومت سره یې یوه موافقه کړې چې له مخې یې په دې هېواد کې د امریکا پوځي ماموریت تر راتلونکې کال پورې پای ته رسېږي.

د دغې موافقې له مخې به په عراق کې امریکایي ځواکونه چې نژدې دوه لسیزې په دې هېواد کې حضور لري، له خپلو ځینو اډو ووځي.

خو د اسوشېټېډپرېس خبري آژانس د راپور له مخې، د امریکا حکومت په دې اړه چې ایا په عراق کې یو شمېر امریکایي سرتېري به چې اوس یې شمېر شاوخوا ۲۵۰۰ ته رسېږي، پاتې کېږي او که دغه اعلان له دې هېواد څخه د امریکایي ځواکونو د بشپړ وتلو په معنی دی، له زیاتو جزییاتو ورکولو ډډه وکړه.

په عراق کې د امریکا په مشرۍ د ائتلافي ځواکونو ماموریت په دې هېواد کې د سخت دریځې اسلامي دولت ډلې یا داعش پر وړاندې جګړې متمرکز دی.

د امریکا د بهرنیو چارو وزیر انټوني بلېنکن وایي، د لبنان په پلازمېنه بیروت کې د حزب‌الله پر مرکزي دفتر د اسراییل د وروستي پراخ برید سره سره په منځني ختیځ کې د شخړو د هواري لپاره د ډیپلوماسۍ لاره تراوسه پرانیستې، خو هغه ټینګار وکړ چې اسراییل او حزب‌الله دواړه باید جګړه ودروي.

په عین حال کې ایران، روسیې او د هغوی متحدینو د بیروت په څنډه کې دغه بریدونه چې د اسراییل ټي‌وي په وینا، هدف یې د حزب‌الله مشر حسن نصرالله و، غندلي او تهران هغه جنګي جنایت وباله.

د اسراییل پوځ د دغو بریدونو پخلی وکړ، خو په مستقیم ډول یې تایید نه‌کړه چې په دغو بریدونو کې د حزب‌الله ډلې چې امریکایې د یوې ترهګرې ډلې په توګه پېژني، مشر حسن نصرالله په نښه شوی و.

تراوسه د هغه د برخلیک په اړه زیات جزییات نه‌شته او اړوند یې ډېر ګونګوسې روانې دی.

په عین حال کې د لبنان صدراعظم نجیب میقاتي هم له نړیوالې ټولنې وغوښتل چې اسراییل د لبنان پر وړاندې د ده په خبره د ډلوژنې د جګړې له پرمخ بیولو راوګرځوي.

د امریکا ولسمشر ویلي، متحده‌ایالات په بیروت کې د حزب‌الله د قوماندې پر مرکز د اسراییلو له برید خبر نه درلود او په دې حمله کې کوم رول نه لري.

بایډن زیاته کړې چې په بیروت د اسراییلو د دغه برید په اړه ډېرو جزییاتو ته اړتیا لري.

تر دې مخکې د امریکا دفاع وزارت پنټاګون ویلي چې دوی ته د یاد برید په اړه خبرداری نه و ورکړل شوی او د امریکا دفاع وزیر لویډ آسټن هغه وخت له خپل اسراییلي سیال سره خبرې کولې چې دا برید روان و.

د اسراییلو پوځ ویلي چې په بیروت کې یې د حزب‌الله د قوماندې مرکز هدف ګرځولی دی.

د راپورونو له مخې، لږ تر لږه څلور ودانۍ د بیروت په ضاحیه سیمه کې بشپړې نړېدلي دي.

د شپې تر ناوخته د دوو کسانو د وژل کېدو او د ۷۶ نورو د ټپي کېدو خبر ورکړل شوی و.

اسراییلي رسنیو ویلي چې د دغه برید هدف د حزب‌الله ډلې مشر حسن نصرالله و.

د امریکا عدلیې وزارت د سپټمبر په ۲۷مه د ایران د سپاه پاسداران انقلاب اسلامي په درېیو غړو جنايي تورونه لګولي.

لامل یې د ډونالډ ټرمپ د ولسمشرۍ ټاکنو د کمپاین د هک کولو او د نومبر د پنځمې نېټې د انتخاباتو د ګډوډولو هڅې یادې شوي دي.

دا تورونه د ولسمشر جو بایډن د ادارې هغه وروستي اقدامات دي چې غواړي د جمهوري غوښتونکي ډونالډ ټرمپ او د هغه د ډیموکراتیک سیالې کامالا هاریس تر منځ د نومبر میاشتې راروانې ولسمشرۍ ټاکنې د بهرنیو لاسوهنو له ګواښه خوندي کړي.

د امریکا د خزانې وزارت هم ویلي چې د ایران د سپاه پاسداران پر اوو غړو یې بندیزونه لګولي دي.

د دغو بندیزونو او جنایي تورونو سره مخامخ اشخاصو په اړه جزییات نه دي رسنیز شوي.