د لاسرسۍ وړ لېنکونه

تازه خبر
پنجشنبه ۳ کب ۱۴۰۲ کابل ۰۹:۲۲

نړۍ

د اسراییل پوځ د غزې په جنوب کې مهم ښارګوټی کلابند کړی

د غزې جنوب کې د اسراییلو له لوري د روانو عملیاتو یو انځور
د غزې جنوب کې د اسراییلو له لوري د روانو عملیاتو یو انځور

د اسراییل پوځ چې د غزې په جنوب کې مهم ښارګوټی یې کلابند کړی، د سخت دریځې حماس ډلې چې متحده ایالات او اروپایي ټولنه یې یوه ترهګره ډله پېژني، له وسله‌والو سره جګړه کوي.

د اسراییل پوځ په روانه جګړه کې چې له پیله یې دوه میاشتې تېرېږي، د دې سیمې په سړکونو او ودانیو کې یوه تر ټولو سخته جګړه مخ ته وړي.

اسراییل په دې سیمه کې پر جګړې وروسته له هغې تمرکز کړی چې د غزې په شمالي برخه کې یې پراخ پوځي عملیات ترسره کړل چې په نتیجه کې یې د دې سیمې ډېرې برخې په کنډواله بدلې شوې او نږدې دوه میلیونه خلک هم خپلو کورونو پرېښودو ته اړ شوي دي.

پرون سې شنبې لیدل کېدل چې د اسراییلو ټانکونه، زغروالې نقلیه وسیلې او بلډوزرونه د غزې په جنوبي سیمه خان یونس سیمه کې ګرځي راګرځي.

د ورځې تازه خبرونه دلته ولولئ

امریکا: ایران روسیې ته بالستیک توغندي لېږدولي

د ایران توغندي
د ایران توغندي

امریکا د تهران او مسکو ترمنځ پوځي همکارۍ ته په اندېښنې سربېره له ایران څخه روسیې ته د څو بالستیک توغندو د لېږد راپور ور کړی دی.

د رویټرز خبري اژانس د چهارشنبې په ورځ راپور ورکړی چې ایران د روان کال د جنورۍ راهیسې په څلورو بستو کې په سلهاوو توغندي روسيې ته انتقال کړي دي.

یوه ایراني چارواکي چې د نوم له ښودلو ډډه کوي، رویټرز ته ویلي، په راتلونکو اوونیو کې به څو نورې بستې هم روسیې ته وسپارل شي.

که څه هم تراوسه اوکرایني او لوېدیځو چارواکو د رویټرز راپور په ښکاره تایید کړی نه دی، خو امریکا په دې اړه خبرداری ورکړی دی.

د امریکا د بهرنیو چارو وزارت یوه ویاند ازادي راډیو سره په خبرو کې ویلي، که څه هم دوی کولی شي په دې اړه مستقیماً خپل نظر څرګند کړي، خو د هغه په خبره د ایران او روسیې پوځي همکاري هغه څه دي چې باید ټوله نړۍ اندېښمنه کړي.

سوات کې د واده په نیت له کوره تښتېدلي ماشومان نیول شوي

له ارشیفه د سوات یو تصویر
له ارشیفه د سوات یو تصویر

د خیبرپښتونخوا په سوات کې هغه ماشومان نیول شوي چې د واده په نیت له کوره تښتیدلي وو.

د سوات پولیسو نن د ازادي راډيو مشال څانګې ته ویلي، له یوه هوټله يې هغه اتلس کلن هلک او دیارلس کلنه نجلی نیولي چې له اسلام اباده د واده کولو لپاره له کوره تښیدلي وو.

د پولیسو په خبره، له دوی سره یوه لسه کلنه ماشومه هم ده چې له کوره په تېښته کې يې ورسره مرسته کړی ده.

پولیسو دا هم ویلي، د نجلۍ پلار په اسلام اباد کې د پولیسو په حوزه کې شکایت کړی چې د هغه لور د واده لپاره په زوره تښتول شوې ده.

د خیبرپښتونخوا په ګډون په پاکستان کې ورته نورې پېښې هم شوي، خو ډېر وخت رسنیزې شوې نه دي.

اسراییلي پوځیانو د غزې پر رفح ښار هوایي بریدونه پيل کړل

د رفح څو اوسیدونکي
د رفح څو اوسیدونکي

اسراییلي پوځیانو نن پنجشنبه ( د فبرورۍ ۲۲مه) د غزې په جنوب کې پر رفح هوایي بریدونه پيل کړل.

دا بریدونه وروسته له هغه پيل شول چې اسراییل دغه ښار ته چې ویل کیږي شاوخوا یو نیم میلیون فلسطینیانو په کې پنا اخیستې، د سرتېرو د لېږلوګواښ کړی و.

نړیوال قدرتونه هڅه کوي چې د اسراییل او حماس سخت دریځې ډلې ترمنځ چې امریکا او اروپایي ټولنه یې ترهګر بولي، اوربند ټينګ کړي، خو تراوسه د جګړې د پای ته رسولو دغو هڅو نتیجه نه ده ورکړې.

د حماس او اسراییلو جګړه وروسته له هغه پيل شوه چې حماس ډلې د تېرې اکتوبر میاشتې په ۷مه نیټه پر اسراییلو غلچکي بریدونه وکړل چې ورسره شاوخوا ۱۲ سره اسراییلیان ووژل شول او ۲۵۰ شاوخوا نور یرغمل شول.

د دغو بریدونو په ځواب کې اسراییل پر غزې تړانګې هوایي او ځمکني بریدونه پیل کړي چې تراوسه په کې د غزې د عامې روغتیا وزارت په وینا شاوخوا ۲۹ زره فلسطینیان وژل شوي دي.

چک جمهوریت د قتل په یوه دسیسه کې تورن ګرجستانی امریکا ته وسپاره

د چک جمهوریت بیرغ
د چک جمهوریت بیرغ

چک جمهوریت د پولاد عمروف په نوم هغه ګرجستانی وګړی امریکا ته وسپاره چې نیویارک کې د یوې ایرانۍ خبریالې مسیح علي نژاد د قتل د هڅې په دسیسه کې په همکارۍ تورن دی.

د ازادۍ راډیو د خبر مرکزي څانګې د فرانس پریس په حواله لیکلي چې د چک عدلیې وزارت پرون د پراګ په نړیوال هوایي ډګر کې پولاد عمروف امریکایي مسولانو ته سپارلی.

عمروف چې د تېر ۲۰۲۳ کال په جنورۍ کې د چک د پولیسو له خوا نیول شوی و، تورن دی چې له یوه بل تورن رفعت امیروف سره یې په ګډه یوه امریکایي وګړي ته د ایرانۍ خبریالې د قتل د دسیسې جوړولو په خاطر ۳۰ زره ډالر لیږلي دي.

ایرانۍ خبریاله مسیح علي نژاد چې د ایران د رژیم سیاسي او د اجباري حجاب مخالفه وه، ۲۰۲۲ کال کې د قتل له یوې ناکامې دسیسې سره مخامخ شوه.

د هغې د قتل په دې دسیسه کې تورن درې واړه کسان نیول شوي او کیدای شي له څلویښتو کلونو زندان سره مخامخ شي.

تر دې وړاندې د دغه خبریالۍ د برمته نیونې او ایران ته یې د لېږد ناکامې هڅې هم شوې دي.

ایران د خپلو ګازو پر نل لیکو د وروستیو چاودنو پړه پر اسراییل واچوله

د وروستیو چاودنو یو اړوند تصویر
د وروستیو چاودنو یو اړوند تصویر

د ایران د نفتو وزیر جواد اوجي په دغه هېواد کې د ګازو پر نل لیکو د وروستیو چاودنو پړه پر اسراییل اچولې ده.

د ازادۍ راډیو د خبر مرکزي څانګې لیکلي چې اوجي پرون چهارشنبه په یوه خبري کانفرانس کې دغه څرګندونې وکړې خو نور جزیات یې ورنه کړل.

خبر کې راغلي چې دغه ډول څرګندونې د ایران او اسراییل ترمنځ د ناندریو د زیاتېدو ښکارندويي کوي.

په ایران کې د فبرورۍ په ۱۴مه د ګازو پر نل لیکو څو چاودنې وشوې چې لږ تر لږه پنځو ولایتونو ته یې د ګازو لېږد له ستونزو سره مخامخ کړ.

ایراني چارواکو هغه مهال د ګازو پر دوو لویو نل لیکو دا چاودنې " ویجاړونکی او ترهګریز" عمل بللی و.

برازیل د غزې او اوکراین جګړو له امله پر امنیت شورا نیوکې وکړې

د غزې یو شمېر جګړه ځپلي ماشومان
د غزې یو شمېر جګړه ځپلي ماشومان

د برازیل د بهرنیو چارو وزیر د نړۍ د شلو پیاوړیو اقتصادي هېوادونو ( جي شل) د غونډې د پرانیستو پرمهال د ملګرو ملتونو پر امنیت شورا د غزې او اوکراین د جګړو له امله انتقاد وکړ.

ماورو ویرا پرون د برازیل په پلازمینه ریو دي جینیرو کې د ( جي شل) د دوه ورځنۍ غونډې په پرانیستونکې وینا کې وویل، څو اړخیز بنسټونه له شته لانجو سره مبارزې ته چمتو نه دي او دا مساله د روانو شخړو په ارتباط د ملګرو ملتو د امنیت شورا د بې کفایتۍ ښکاروندیه ده.

برېتانیا د الکسي ناوالني پر ۶ زندان ساتونکو بندیزونه ولګول

د الکسي ناوالني د درناوي د مراسمو یوه څنډه
د الکسي ناوالني د درناوي د مراسمو یوه څنډه

د برېتانیا حکومت پر هغو شپږ کسانو چې د روسیې په شمال قطب کې د زندان د امنیتي برخې مسوولین دي، بندیز لګولی دی.

په دې زندان کې د فبروري په شپاړسمه د کرملین د مخالف سیاسي الکسي ناوالني د مړینې اعلان وشو.

د برېتانیا د بهرنیو چارو وزارت پرون په یوه بیان کې وویل چې د زندان د امنیت د برخې پر مشر وادیم کالینین او د هغه په پنځو مرستیالانو بندیزونه لګول شوي او شتمنۍ یې کنګل شوې دي.

د بیان له مخې، په دې زندان کې د ناوالني سمه درملنه نه کیده او د سانتي ګرید په منفي دوه دیرش درجو کې یې هغه پلي تګ ته هڅاوه.

د برېتانیا د بهرنیو چارو وزیر ډیویډ کامرون وویل، هغه کسان چې له ناوالني سره د ناوړه چلند مسوولین دي باید حساب ورسره وکړو.

د سوریې دولتي رسنۍ: دمشق کې د اسراییلو برید ۲ تنه وژلي

د پېښې سیمې ته منسوب تصویر
د پېښې سیمې ته منسوب تصویر

د سوریې دولتي رسنۍ وایي چې د دمشق په یوه هستوګنیزه سیمه کې د اسراییل هوایي بریدونو دوه تنه وژلي دي.

فرانس پریس خبري اژانس دا پیښه د غزې له جګړې سره همهاله په سیمه کې د لانجو د زیاتوالي تر ټولو وروستۍ بېلګه بللې ده.

فرانس پریس په سیمه کې د خپل یوه عکاس په حواله لیکلي چې هوایي برید په دمشق کې پر یوې نهه پوړیزۍ ودانۍ شوی دی.

له ۲۰۱۱ کال راهیسې چې د سوریې کورنۍ جګړه پيل شوې، اسراییل پر خپل دغه شمالي ګاونډي هېواد سلګونه هوایي بریدونه کړي دي.

فرانس پریس لیکلي چې دغه بریدونه د حزب الله په ګډون د ایران پلوه وسله والو ډلو او د سوریې د پوځ پر سنګرونو شوي دي.

اسراییل د دغه برید په اړه څه نه دي ویلي، خو وړاندې تر دې یې په ډاګه کړې چې په سوریه کې د ایران د نفوذ د مخنیوي هڅه کوي.

روسیې د ازادې اروپا/ازادي راډیو د "نامطلوبو ارګانونو" په ډله کې شامله کړه

د ازادې اروپا راډیو لوګو
د ازادې اروپا راډیو لوګو

روسیې د ازادې اروپا/ازادي راډیو د "نامطلوبو ارګانونو" په ډله کې شامله کړه.

د روسیې د عدلیې وزارت د دغه حکم له مخې، هر هغه کس چې له ازادۍ راډیو سره کار کوي، دغه راډیو تمویلوي یا ورسره مرکه کوي، له جنایي تورونو سره مخامخ کېدای شي.

د ازادي راډیو د خبر مرکزي څانګې پرون لیکلي چې دا د دغې راډیو په وړاندې د روسیې د حکومت تر ټولو جدي محدودیت ښيي.

ازادي راډیو ۱۴۲م بنسټ دی چې د روسیې له خوا په دغه نوملړ کې شاملېږي.

تر دې وړاندې روسیې د ازادې اروپا/ازادي راډیو د "بهرني اجېنټ" په لېست کې شامله کړې وه.

د ازادې اروپا/ ازادي راډیو مشر سټیفن کپوس ویلي، پر ازادۍ راډيو دا محدودیت په دې معنا دی چې د روسیې حکومت رښتینې راپور ورکونه د ځان په وړاندې یو ګواښ بولي.

د ازادې اروپا/ازادي راډیو د چک جمهوریت په پلازمېنه پراګ کې یو خپلواک غیر انتفاعي امریکایي بنسټ دی چې د امریکا د کانګرس له خوا د امریکا د نړیوالو رسنیو د ادارې په وسیله تمویلېږي.

پاکستان کې د شهباز شریف په مشرۍ د ایتلافي حکومت د جوړولو هوکړه شوې

شهباز شریف
شهباز شریف

د پاکستان د پخواني صدراعظم عمران خان سیاسي سیالان د یوه حکومت پر جوړولو سره سلا شوي دي.

دې ډلو د شهبازشریف په مشرۍ د یوه حکومت د جوړولو لپاره د واک د مشارکت جزییات پرون اعلان کړل.

دا اعلان د مسلم لیګ، پیپلز او نورو هغو ګوندونو ترمنځ چې په وروستیو انتخاباتو کې د پارلمان د کافي څوکیو په ګټلو بریالي نه شول، د تېرو څو ورځو له خبرو وروسته کېږي.

دوی پرون په یوه خبري غونډه کې وویل چې د ایتلافي حکومت د جوړولو لپاره د لازم اکثریت په ترلاسه کولو بریالي شول.

نور راوښيه

XS
SM
MD
LG