د لاسرسۍ وړ لېنکونه

تازه خبر
یکشنبه ۶ کب ۱۴۰۲ کابل ۰۴:۱۷

نړۍ

د تاجکستان ولسمشر له نړیوال بانک څخه د کاسا زر پروژې د بېرته پیل غوښتنه وکړه

د تاجکستان ولسمشر، امام علي رحمان
د تاجکستان ولسمشر، امام علي رحمان

د تاجکستان د ولسمشر مطبوعاتي دفتر وایي چې ولسمشرامام رحمان د نړیوال بانک له مشراجی بنګا Ajay Banga سره په کتنه کې ټینګار وکړ چې اړتیا ده د برېښنا د لوړ ولتاژ لرونکې کاسا زر پروژې چارې بېرته پیل شي.

د روسیې د انترفاکس خبري آژانس د راپورله مخې، په دې کتنه کې چې په دوبۍ کې د ملګروملتونو د اقلیم د بدلون د ۲۸ م کنفرانس په څنډه کې ترسره شوه، ولسمشر رحمان ټینګار وکړ چې د دغې سترې پروژې چې د افغانستان له لارې د مرکزي آسیا د انرژۍ مارکیټ له جنوبي آسیا سره نښلوي، کار یې باید له سره پیل شي.

د راپورله مخې، د دغې پروژې په عملي کیدو سره به له قرغزستان او تاجکستان څخه ۱۳۰۰ مېګاواټه برېښنا افغانستان او پاکستان ته لېږدول کیږي.

د آسیا پراختیایي بانک ترڅنګ نړیوال بانک چې په افغانستان کې د سترو پروژو له مهمو تمویلوونکو ګڼل کېږي، د تېرکال په دوبي کې اعلان وکړ چې افغانستان او پاکستان ته د کاسا ۱۰۰۰ په نوم د برېښنا غځولو د پروژې له تمویل څخه لاس اخلي.

د ورځې تازه خبرونه دلته ولولئ

د اوکراین ولسمشر د سویډن د دفاع له وزیر سره وکتل

د اوکراین ولسمشر او د سویډن د دفاع وزیر
د اوکراین ولسمشر او د سویډن د دفاع وزیر

د اوکراین ولسمشر ولودمیر زلینسکي د سویډن له دفاع وزیر پاول یوهنسن سره پرون په کییف کې وکتل.

دا کتنه پر اوکراین د روسیې د غیرموجه یرغل د دوو کلونو پوره کېدو په مناسبت وشوه او دواړه مشرانو کییف ته د سویډن د پوځي مرستو د بلې بستې پر ورکړه او د وسلو د ګډ تولید پر امکاناتو بحث وکړ.

زلینسکي پرون چې د روسیې د یرغل دوه کاله پوره شول، ویلي: دا هغه ورځ ده چې غمیزه پیل شوه او دا ډېره مهمه ده چې زموږ ملګري دلته زموږ تر څنګ دي.

د اوکراین ولسمشر، اوکراین ته د سویډن د دفاع وزیر سفر له اوکراین سره د پیوستون مهمه نښه وبلله.

سویډن تېره سې شنبه اعلان وکړ چې اوکراین ته به د ۶۸۲ ملیون ډالرو په ارزښت پوځي مرسته ورکړي.

دا له کله چې روسیې پر اوکراین یرغل پیل کړی، د سویډن د مرستو پنځلسمه بسته ده.

د اوو صنعتي هېوادونو مشران: د روسیې د جګړې پر وړاندې د اوکراین ملاتړ ته دوام ورکوو

د اوکراین یو شمېر سرتېري
د اوکراین یو شمېر سرتېري

د جي اووه یا د نړۍ د اوو لویو صنعتي هېوادونو رهبرانو پرون د اړتیا تر وخته، د روسیې په وړاندې په جګړه کې د اوکراین د ملاتړ ژمنه وکړه.

دغو هېوادونو ویلي چې دوی به داسې لارې چارې ولټوي چې مسکو پر اوکراین د خپل یرغل له کبله د اړولو زیانونو بیه پرې کړي.

د جي اووه ډلې رهبرانو پرون د اوکراین له ولسمشر ولودمیر زلینسکي سره پر اوکراین د روسیې د غیرموجه یرغل د دوو کلونو پوره کېدو په مناسبت د ویډیو کنفرانس له لارې خبرې وکړې.

د دې یرغل له کبله د اوکراین په لسګونو زره کسان وژل شوي، د دغه هېواد د قلمرو زیاته برخه ویجاړه شوې او اقتصاد یې زیانمن شوی دی.

د اوو لویو صنعتي هېوادونو رهبرانو په یوه ګډه اعلامیه کې ویلي، په داسې حال کې چې په اوکراین کې روانه جګړه درېیم کال ته داخله شوه، د اوکراین وګړي او حکومت د اړتیا تر وخته پر موږ حساب کولی شي.

د اسراییل کابینې حماس سره د مذاکرې پر اقداماتو بحث وکړ

د اسراییل د کابینې غونډه
د اسراییل د کابینې غونډه

د اسراییل جنګي کابینې تېره شپه د یرغمل شویو د خلاصون او له حماس سره د اوربند لپاره د مذاکرو پر نورو اقداماتو بحث وکړ.

دا په داسې حال کې ده چې په جګړه ځپلې غزې تړانګه کې پرون شنبه د پراخېدونکي بشري بحران په باب اندېښنې نورې هم زیاتې شوې.

د فرانسې خبري اژانس د یوه چارواکي د یوې محلي رسنۍ د راپور پر اساس لیکلي چې د اسراییل یو هیئت د یرغمل شویو د خلاصون پر سر د نویو مذاکرو لپاره پاریس ته تللی و چې بېرته ستون شو او د اسراییل جنګي کابینې ته یې د دغو خبرو په باب معلومات ورکړل.

د محلي رسنیو د راپورونو له مخې، د اسراییل جنګي کابینې موافقه وکړه چې د مذاکرو د دوام لپاره په راروانو ورځو کې یو هیئت قطر ته ولېږي.

د امریکا متحد ایالتونه او اروپايي ټولنه توندلارې ډله حماس یو تروریستي سازمان ګڼي.

حماس ډلې د اکتوبر میاشتې پر اوومه پر اسراییل په حملې سره لږ تر لږه ۱۲۰۰ کسان ووژل او شا و خوا ۲۴۰ نور کسان یرغمل کړل.

اسراییل د حماس تر حملې وروسته د حماس ډلې د وسلوالو خلاف په غزې تړانګه کې هوايي او ځمکني پوځي عملیات پیل کړل.

د حماس تر ولکې لاندې د غزې روغتیا وزارت ویلي، چې د اسرائیل د دغو حملو له کبله تر اوسه نېږدې ۳۰زره کسان وژل شوي او شا و خوا ۷۰ زره کسان ټپیان شوي دي، هغه شمېرې چې خپلواکو سرچینو تایید کړي نه دي.

ملګرو ملتونو خبرداری ورکړی چې د غزې ۲ ملیونه او ۲ لکه اوسېدونکي له قحطۍ سره مخامخ دي.

د برازیل د ولسمشر ادعا؛ اسراییل د فلسطینانو نسل وژنه کوي

د برازیل ولسمشر، لوئیس ایناسیو لولا دا سیلوا
د برازیل ولسمشر، لوئیس ایناسیو لولا دا سیلوا

د برازیل ولسمشر لوئیس ایناسیو لولا دا سیلوا پرون شنبه ادعا وکړه چې اسراییل د فلسطینیانو په وړاندې نسلوژنه کوي.

هغه تېره اوونۍ په غزه کې د اسراییل پوځي عملیات د نازیانو له خوا د هالوکاست له عامه وژنې سره تشبېه کړې وه چې دغو څرګندونو یې انتقادونه پارولي وو.

اسراییل د نسلوژنې ادعاوې رد کړي او وايي، دغه جګړه یې د توندلارې ډلې حماس پر خلاف ده.

د امریکا متحد ایالتونه او اروپايي ټولنه حماس ډله یو تروریستي سازمان ګڼي.

د حماس تر ولکې لاندې د غزې روغتیا وزارت پرون ویلي چې د مخکنیو ۲۴ ساعتونو پر مهال د اسراییل په بمباریو کې د ۹۲ وژل شویو فلسطینیانو مړي روغتونونو ته لېږدول شوي دي.

د دغه وزارت په وینا، د اکتوبر له اوومې په روانه جګړه کې تر ۲۹زرو ۶۰۶ ډېر کسان وژل شوي او نږدې ۷۰زره نور ټپیان شوي، هغه شمېرې چې خپلواکو سرچینو تایید یا رد کړي نه دي.

بایډن د سپوږمۍ پر سطحه د امریکا د فضايي وسیلې کښته کېدل هیجان پارونکی ګام وباله

د امریکا د فضایي پرمختګ یو اړوند تصویر
د امریکا د فضایي پرمختګ یو اړوند تصویر

د امریکا متحدو ایالتونو ولسمشر جو بایډن د سپوږمۍ پر سطحه د امریکا د فضايي وسیلې د کښته کېدو بریا، د فضايي اکتشافاتو په نوي عصر کې یو هیجان پاروونکی ګام وباله.

ښاغلي بایډن پرون په یوه اعلامیه کې وویل چې د اودیسیوس فضايي بېړۍ ناسته، د امریکا د نبوغ، نوښت او کنجکاوۍ له کبله ممکنه شوه.

دغه فضايي وسیله چې په امریکا کې جوړه شوې وه، د یوه خصوصي شرکت له خوا په تېرو ۵۰ کلونو کې د لومړي وار لپاره تېره پنج شنبه د سپوږمۍ پر سطحې کښېناسته.

د اوکراین ولسمشر او د ایټالیا صدراعظمې دوه اړخیز امنیتي تړون لاسلیک کړ

د عکس ښي لور ته د اوکراین ولسمشر ولودومیر زیلینسکي او چپ لور ته د ایټالیا صدراعظمه جیورجیو ملیوني د امنیتي تړون د لاسلیک پر مهال
د عکس ښي لور ته د اوکراین ولسمشر ولودومیر زیلینسکي او چپ لور ته د ایټالیا صدراعظمه جیورجیو ملیوني د امنیتي تړون د لاسلیک پر مهال

د اوکراین ولسمشر ولودومیر زیلینسکي او د ایټالیا صدراعظمې جیورجیو ملیوني نن په کییف کې دوه اړخیز امنیتي تړون لاسلیک کړ.

تر دې مخکې اوکراين له بريتانيا، جرمني، فرانسې او ډنمارک سره امنيتي تړونونه لاسليک کړي وو.

د دغو تړونونو هدف د اوکراین د امنیت ملاتړ دی تر څو چې دغه هېواد د ناټو غړی شي.

په اوکراین د روسیې د یرغل د دوه کلنېدو په مناسبت، د ایټالیا، کاناډا، بلجیم او د اروپا د کمېسیون مشران یوځل بیا د اوکراین د ملاتړ د څرګندولو لپاره کییف ته ولاړل.

د ۲۰۲۲م کال د فبرورۍ په ۲۴مه پر اوکراین د روسیې غیر موجه یرغل پیل شو.

د ناوالني مړی د هغه مور ته وسپارل شو

ناوالني د وړمې جمعې د فبروري په ۱۶مې د روسیې د یامالو نینتس سیمې په زندان کې مړ شو.
ناوالني د وړمې جمعې د فبروري په ۱۶مې د روسیې د یامالو نینتس سیمې په زندان کې مړ شو.

د کرملین د سیاسي مخالف او سخت منتقد الکسي ناوالني مړی د هغه مور ته وسپارل شو.

ناوالني د وړمې جمعې د فبروري په ۱۶مې د روسیې د یامالو نینتس سیمې په زندان کې مړ شو.

د ناوالني ویاندې کیرا یارمیش نن په ایکس شبکه یا پخواني ټویټر کې لیکلي چې د ناوالني مړی د هغه مور ته سپارل شوی دی.

ناوالني د ۲۰۲۱ کال په جنورۍ کې له جرمني څخه تر راستنېدو وروسته د مسکو په هوايي ډګر کې ونیول شو.

هغه د مسمومیت له امله د درملنې لپاره جرمني ته وړل شوی و.

په هغه وخت کې ناوالني د روسیې حکومتي اجنټان د هغه په مسمومولو کې په لاس لرلو تورن کړل.

کرکټ؛ د ایرلینډ ملي لوبډله اماراتو ته رسېدلې

د ایرلینډ کرکټ ملي لوبډلې لوبغاړي
د ایرلینډ کرکټ ملي لوبډلې لوبغاړي

ټاکل شوې چې د روانې میاشتې په وروستۍ اوونۍ کې د افغانستان او ایرلینډ د کرکټ ملي لوبډلې د درې لوبلړیو لړۍ پیل کړي.

افغان کرکټ بورډ ادارې نن د فبروۍ په ۲۴مه نېټه خبر ورکړی چې د ایرلینډ ملي لوبډله د عربي متحده اماراتو د ابوظبۍ ښار ته ور رسېدلې ده.

که څه هم کرکټ بورډ ادارې د افغان ملي لوبډلې د تمریناتو په تړاو په رسمي ډول څه نه دي ویلي، خو سرچینو ازادي راډیو ته منلې چې له تېرې یوې اوونۍ راهیسې د ټېسټ په نوملړ کې احتمالي شامل لوبغاړي په ابوظبۍ کې په تمریناتو بوخت دي.

ټاکل شوې چې د دواړو هېوادونو ترمنځ لومړۍ ټېسټ سیالۍ د ابوظبۍ په ښار کې د فبروۍ په ۲۸مه نېټه پیل شي او د مارچ تر ۳یمې نېټې دوام وکړي.

تر یوازینۍ ټېسټ سیالۍ وروسته به د دواړو هېواودنو ترمنځ د ۳ یو ورځنیو سیالیو لوبلړۍ د مارچ په ۷مه نېټه پیل او په ۱۲مه به پای ته ورسېږي.

په دې سفر کې د افغانستان او ایرلینډ ترمنځ د مارچ په ۱۵مه نېټه د شل اوریزو سیالیو لوبلړۍ پیلېږي او په ۱۸مه نېټه پای ته رسېږي.

د یو ورځنیو او شل اوریزو سیالیو لوبلړۍ به د شارجه په لوبغالي کې ترسره شي.

د ایرلینډ ملي لوبډلې د دې سفر لپاره له تېرې یوې میاشتې راهیسې خپلې درې واړه لوبډلې اعلان کړي دي.

د ویلو ده چې د افغانستان کرکټ بورډ لا هېڅ لوبلړۍ ته رسمي لوبډله نه ده اعلان کړې.

پاکستاني پولیسو په کراچۍ کې لسګونه اعتراض کوونکي نیولي

د پاکستان پولیس
د پاکستان پولیس

پاکستاني پولیسو نن په لسګونو اعتراض کوونکي د کراچۍ په ښار کې نیولي دي.

دې اعتراض کوونکو د پاکستان د فبروري د اتمې نېټې په انتخاباتو کې د درغلیو ادعا کوله.

اعتراض کوونکي د سند د ایالتي پارلمان د لوړې د مراسمو تر پیلېدو مخکې د پارلمان د ودانۍ مخې ته راغونډ شوي وو.

د پاکستان تحریک انصاف، ستر ډیموکراتیک ایتلاف یا 'جي ډي اې' او جماعت اسلامي پلویانو په دې اعتراضیه غونډه کې برخه اخیستې وه.

د لوېدیځ یو شمېر مشران کییف ته رسېدلي

د ایټالیا د حکومت د بیان له مخې د اروپایي کمېسیون مشره اورزلا ون دیر لین له پولنډ څخه په رېلګاډي کې کییف ته ولاړه.
د ایټالیا د حکومت د بیان له مخې د اروپایي کمېسیون مشره اورزلا ون دیر لین له پولنډ څخه په رېلګاډي کې کییف ته ولاړه.

د لوېدیځ یو شمېر مشران تېره شپه کییف ته ورسېدل.

د ایټالیا د حکومت د بیان له مخې د اروپایي کمېسیون مشره اورزلا ون دیر لین له پولنډ څخه په رېلګاډي کې کییف ته ولاړه چې له دې سره د ایټالیا صدراعظمه جورجیا ملوني، د کاناډا صدراعظم جستن ترودو او د بلجیم صدراعظم الکساندر دي کرو هم مله وو.

دا مشران غواړي چې پر اوکراین د روسیې د یرغل د دوهم کال د پوره کېدو په مناسبت خپله خواخوږي له اوکراین سره شریکه کړي.

په دې ترڅ کې د دې جګړې د دوهم کاله له پوره کېدو سره سم مسکو خپل پيغام په دې ډول استولی چې دفاع وزیر یې د اوکراین هغو سیمو ته تللی چې روسیي پوځیانو نیولي دي.

ټاکل شوې چې صدراعظمه ملوني به د ویډیو کنفرانس له لارې د نړۍ د اوو سترو صنعتي هېوادونو د ډیموکراسۍ مشرانو ته هم د ګډون بلنه ورکړي، دې غونډې ته به د اوکراین ولسمشر ولودمیر زیلینسکي وینا وکړي.

نور راوښيه

XS
SM
MD
LG