د لاسرسۍ وړ لېنکونه

تازه خبر
یکشنبه ۲۴ چنګاښ ۱۴۰۳ کابل ۰۳:۰۵

افغانستان

د افغانستان لپاره د ملګرو ملتونو د ځانګړي همغږي کوونکي پر تازه ارزونه بحث شوی

د افغانستان لپاره د ملګرو ملتونو ځانګړی همغږی کوونکی فریدون سینیرلي اوغلو
د افغانستان لپاره د ملګرو ملتونو ځانګړی همغږی کوونکی فریدون سینیرلي اوغلو

په ملګرو ملتونو کې د افغانستان د تېر جمهوري نظام دایمي استازي نصیر احمد فایق په ملګرو ملتونو کې د کاناډا، قطر او بریتانیا د دایمي استازولیو مننه کړې چې د افغانستان په اړه یې 'د افغانستان د دوستانو ډلې' پرونۍ غونډه تنظیم کړې وه.

په پرونۍ غونډه کې د افغانستان لپاره د ملګرو ملتونو د ځانګړي همغږي کوونکي فریدون سینیرلي اوغلو پر تازه ارزونه بحث شوی دی.

فایق نن په خپله ایکس شبکه کې لیکلي، د ارزونې د سپارښتنو د اجرا لپاره هر ډول فوري اقدام باید په ځانګړو شرایطو او د لارې په یوې نقشې پورې مشروط وي او د اقداماتو د یوه پروګرام له لارې مخ ته لاړ شي.

د ملګرو ملتونو امنیت شورا تېره چهارشنبه د تړلو دروازو تر شا په خپله خصوصي غونډه کې د سینیرلي اوغلو پر ارزونه بحث وکړ.

د فریدون سینیرلي اوغلو د افغانستان د وضعیت په باب په خپله ارزونه کې چې د ملګرو ملتونو سرمنشي انتونیو ګوټېرېش هم تایید کړې، راتلونکي لیدلوري ته کتنه کړې ده.

دغه راپور چې څه باندې دوې اوونۍ مخکې امنیت شورا ته وړاندې شوی و، د افغانستان د اوسني بحران د حل لپاره پر 'بین الافغاني مذاکرو' او په نړیواله ټولنه کې د افغانستان د ادغام د لارو چارو وړاندیز کوي.

د ملګرو ملتونو امنیت شورا په مارچ میاشت کې د دغه سازمان له سرمنشي انټونیو ګوټېرېش څخه وغوښتل چې د افغانستان د وضعیت په اړه يوه خپلواکه ارزونه وکړي او په افغانستان کې د طالبانو تر واکمنۍ لاندې د موجوده ننګونو د حل لپاره د یوې متحدې او همغږې نړیوالې تګلارې په اړه خپل وړاندیزونه د نومبر تر ١٧ وړاندې کړي.

د سینیرلي اوغلو ارزونه وړاندیز کوي چې په افغانستان کې د تلپاتې سولې او اقتصادي پرمختګ د ټینګښت او د ټولګډونه حکومت د رامنځته کولو لپاره باید یو ملي بحث پیل شي.

د ورځې تازه خبرونه دلته ولولئ

ملالې یوسفزۍ له پاکستانه د بې اسناده افغان کډوالو د جبري ایستلو د لړۍ درول غوښتي

د نوبل د سولې جایزې ګټونکې ملاله یوسفزۍ
د نوبل د سولې جایزې ګټونکې ملاله یوسفزۍ

د نوبل د سولې جایزې ګټونکې ملالې یوسفزۍ له پاکستانه غوښتنه کړې چې د بې اسناده افغان کډوالو جبري ایستل ودروي.

هغې ویلي، په ځانګړي ډول د هغو ښځو او نجونو "تیاره برخلیک" ته اندېښمنه ده چې بېرته افغانستان ته لېږل کېږي.

ملالې، د فرانسې له خبري اژانس سره په پرونۍ مرکه کې ویلي، افغانستان ته د افغان کډوالو پر جبري اخراج ژوره اندېښنه لري.

ملالې یوسفزۍ چې په ۲۰۱۴م کال کې د نوبل د سولې جایزه ګټلې وه، دا څرګندونې داسې وخت کړي چې پاکستان د نومبر میاشتې له لومړۍ نېټې د بې اسناده افغان کډوالو ډله‌ییز اخراج پیل کړی دی.

که څه هم اسلام اباد ویلي چې د استوګنې د اسنادو لرونکي افغان کډوال، د یوه بل کال په مخه هم په هغه هېواد کې اوسېدلی شي، خو د بې اسناده کډوالو ایستل به دوام کوي.

د فرانسې خبري اژانس د راپور له مخې تر اوسه له ۶۰۰زرو ډېر افغان کډوال ایستل شوي دي.

د بشري حقونو څارونکو خبرداری ورکړی چې افغانستان ته ځینې ایستل شوي کسان ښايي د طالبانو له‌خوا مجازات شي.

افغانستان ته له پاکستان او ایرانه د زرګونو افغان کډوالو د ستنېدو خبر ورکړل شوی

ارشیف: له پاکستانه ایستل شوي افغان کډوال
ارشیف: له پاکستانه ایستل شوي افغان کډوال

افغانستان ته له پاکستان او ایرانه د زرګونو افغان کډوالو د ستنېدو خبر ورکړل شوی دی.

د طالبانو د کډوالو او راستنېدونکو چارو وزارت نن په یوه خبرپاڼه کې لیکلي چې د روانې چنګاښ یا سرطان میاشتې له ۱۹مې د همدې میاشتې تر ۲۱مې پورې ۸زره ۳۷۷ افغان کډوال له ایران او ۱۳۵۳ نور له پاکستانه افغانستان ته ستانه شوي دي.

په خبرپاڼه کې نه دي ویل شوي چې دغه افغان کډوال په جبري ډول که په خپله خوښه خپل هېواد ته ستانه شوي دي.

د نومبر میاشتې له لومړۍ نېټې له پاکستانه د بې اسناده افغان کډوالو ډله‌ییز اخراج روان دی، ورسره ایران هم د افغان کډوالو د ایستلو لړۍ ګړندۍ کړې ده.

طالبان: د پاکستان له زندانونو خوشې شوي لس کسان افغانستان ته رسېدلي

د پاکستان سند کې د یوه زندان مخه
د پاکستان سند کې د یوه زندان مخه

د طالبانو سرحدي چارواکو نن شنبه خبر ورکړی، هغه ۱۰ تنه افغانان چې د پاکستان په زندانونو کې بندیان وو، له بنده خوشې او وړمه ورځ خپل هېواد ته ورسېدل.

د ننګرهار په تورخم کې د طالبانو سرحدي امریت ځینو رسنیو ته ویلي، دغه کسان د قانوني اسنادو نه درلودلو له کبله دوه کاله او شپږمیاشتې بندیان وو چې له ډیورند کرښې افغانستان ته اوښتي دي.

همدغه امریت په جلا مورد ویلي، هغه ماشوم هم چې ۲ کاله او شپږمیاشتې یې د پاکستان په یوه زندان کې تېر کړي وو، د هغه کورنۍ ته وسپارل شو.

طالبان: پاکستان د افغانستان د مېوو او سبزیجاتو د ۳۰۰ لاریو د اوښتو مخه نیولې

په ننګرهار کې تورخم ته نږدې د افغان سوداګرو د سوداګریزو توکو بار موټرې
په ننګرهار کې تورخم ته نږدې د افغان سوداګرو د سوداګریزو توکو بار موټرې

په اسلام اباد کې د طالبانو سفارت ویلي چې پاکستان د افغانستان د مېوو او سبزیجاتو د ۳۰۰ لاریو د اوښتو مخه نیولې ده.

دغه سفارت پرون جمعه ویلي، چې د طالبانو د سفارت سرپرست سردار احمد شکېب د پاکستان د سوداګرۍ وزارت د بهرني تجارت له مشرې ماریا کازي سره په کتنه کې پر دې ستونزه خبرې وکړې.

دغه سفارت په یوه بلان کې ویلي چې د افغان سوداګرو د مېوو او سبزیجاتو دغه لارۍ د موقتو جوازونو نه درلودلو په پلمه په تورخم، سپین بولدک او خرلاڅي کې درول شوي دي.

پاکستان وخت ناوخت د افغانستان د مېوو په موسم کې په یوه او بله بهانه د افغان سوداګرو د مالونو او تولیداتو د اوښتو مخه نیسي.

د افغانستان د سوداګرۍ او پانګونې خونې تل ټینګار کړی، چې سیاست باید له تجارت جلا شي.

له افغانستان سره د نړیوال پیوستون د نښې په توګه لسګونه زرګونه لاسلیکونه راټول شوي

ارشیف: په کابل کې د معترضو مېرمنو د لاریون یو انځور
ارشیف: په کابل کې د معترضو مېرمنو د لاریون یو انځور

د بخښنې نړیوال سازمان، له افغانستان سره د نړیوال پیوستون د نښې په توګه تر درې لکه ۵۴زره ۸۴۷زیات لاسلیکونه راټول کړي دي.

لاسلیکوونکو په ګډه د طالبانو له چارواکو غوښتنه کړې چې په افغانستان کې بشري حقونه رعایت کړي.

د بخښنې نړیوال سازمان د جنوبي اسیا څانګې پرون په خپله ایکس­شبکه کې لیکلي چې: "په افغانستان کې بشري وضعیت په خرابېدو دی، نو موږ باید په افغانستان کې د حساب ورکولو او عدالت لپاره خپلې ګډې غوښتنې ته دوام ورکړو.:

طالبانو په افغانستان کې د بشري حقونو د ناوړه وضعیت په باب مخکېني راپورونه رد کړي وو او په افغانستان کې یې دا وضعیت سم ښودلی دی.

طالبانو له پاکستاني چارواکو سره د صادراتي توکو پر بندېدو خبرې کړي

د چمن سرحدي سیمه
د چمن سرحدي سیمه

په اسلام اباد کې د طالبانو سفارت خبر ورکړی چې د دوی یوه پلاوي پرون د پاکستان د سوداګرۍ وزارت له چارواکو سره د افغانستان صادراتي توکو پر بندېدو خبرې وکړې.

باختر اژانس چې طالبان یې کنټرولوي پرون خبر ورکړی چې د طالبانو د سفارت پلاوي د پاکستان د سوداګرۍ وزارت د بهرنۍ سوداګرۍ له مشرې مېرمن ماریا کازي سره د افغانستان د تازه مېوو او سبزیجاتو پر صادراتو د اضافي مالیې لګولو اقدام، هم افغان بزګرانو او هم د پاکستان د کورني بازار په زیان بللی دی.

له اکټوبر میاشتې راهیسې پر چمن دروازه او خرلاڅي اعتراضونه روان دي او برخه‌وال یې افغانستان ته د تګ راتګ لپاره د ویزې او پاسپورټ د شرط لیرې کېدو غوښتنه لري.

دغو اعتراضونو د مالي او سوداګریزو توکو لېږد رالېږد هم ټکنی کړی او د دې تر څنګ پاکستان په وروستیو کې د افغانستان پر ځینو مالونو اضافي مالیه وضعه کړې ده.

د کانکور ازموینې وروستی پړاو په کابل کې بشپړ شو

ارشیف: په افغانستان کې د کانکور ازموینو له بهیره یو انځور
ارشیف: په افغانستان کې د کانکور ازموینو له بهیره یو انځور

د ۱۴۰۳لمریز کال د کانکور ازموینې وروستی پړاو پرون په کابل کې بشپړ شو.

د ازموینې په دغه پړاو کې ټول ګډونوال هلکان وو او هېڅ کومه نجلۍ یا ښځه په دوی کې نه ښکارېده.

د ازموینې ملي ادارې سرپرست عبدالباقي حقاني ویلي چې د سږ کال د کانکور ازموینو پایلې به په لسو ورځو کې اعلان شي.

د حقاني په وینا، دا چې د ګډونوالو شمېر زیات وو، دوی دغه ازموینه په پنځو پړاوونو کې واخیسته او تر سلو زرو ډېرو کسانو په کې ګډون وکړ.

په افغانستان کې لا هم نجونو ته تر شپږم ټولګي پورته د نور تعلیم اجازه نه ده ورکړل شوې.

طالبانو د ۲۰۲۲م کال په ډسمبر میاشت کې د هېواد په ټولو پوهنتونونو کې د ښځینه محصلانو تګ منع کړ، لا هم په پوهنتونو کې د نجونو د لوړو زده کړو د بیا پیل څرک نه تر سترګو کېږي.

په افغانستان کې د بریتانیا د ډیپلوماټیک حضور د بیا احیا غوښته وشوه

د بریتانیا بیرغ
د بریتانیا بیرغ

افغانستان کې د ښځو ملاتړ او پر مرستو د څارنې لپاره د بریتانیا د ډیپلوماټیک حضور د بیا احیا غوښته وشوه

د بریتانیا د حکومت د مرستو پر څارنې یو کمېشنر وایي، هېواد یې باید په افغانستان کې د ښځو د ملاتړ او د بریتانیا پر مرستو د څارنې لپاره خپل ډیپلوماټیک حضور بیرته احیا کړي.

هوګ بیلي چې په مې میاشت کې کابل ته تللی، ویلي چې د ده په باور افغان ښځې او غیردولتي موسسې د لوېدیځو هېوادونو د ډيپلوتانو د حضور هرکلی کوي او وایي٬ هغوی کولای شي چې د ښځو په اړه خپل نظریات له طالبانو سره شریک کړي.

د ګارډین ورځپاڼې د پنجشنبې د ورځې راپور له مخې بیلي له افغانستان سره د مرستو د ارزونې په اړه خپل راپور یوه خپلواکه کمېسیون ته سپارلی او همدارنګه یې د بریتانیا او افغانستان ترمنځ د ډیپلوماتیکو اړیکو د بیرته ټینګېدو سپارښتنه کړې ده.

د ۲۰۲۱م کال په اګسټ کې جې طالبان بیا پر افغانستان واکمن شول، بریتانیا خپل ټول ډیپلوماتان له کابله وایستل.

خو په تېرو نژدې درېیو کلونو کې د نژدې درېیو ملیاردو ډالرو مرستې چې له افغانستانه سره شوي، بریتانیا یې له امریکا وروسته دوهم مرستندویه برخه وال دی.

دغه مرستې طالبانو ته نه ورکول کېږي بلکې هغه د غیردولتي موسسو له خوا اړوکسانو ته ورکول کېږي.

برادر په شپږو ولایتونو کې د صادراتو د پروسس زونونو د جوړولو خبر ورکړ

د طالبانو د حکومت اقتصادي مرستیال ملاعبدالغني برادر
د طالبانو د حکومت اقتصادي مرستیال ملاعبدالغني برادر

د طالبانو د حکومت د ریاست ‌الوزرا اقتصادي مرستیال د کابل په ګډون د هېواد په شپږو ولایتونو کې د صادراتو د پروسس زونونو د جوړولو خبر ورکوي.

ملا عبدالغني برادر اخند پرون پنجشنبې د صادراتو د ملي ورځې په نمانځغونډه کې وویل چې دغه زونونه به د افغانستان پر صادراتو د پام وړ مثبتې اغېزې وکړي.

هغه ملي سوداګر وهڅول چې د خامو موادو د صادراتو پر ځای پاخه شوي تولیدي توکي صادر کړي ځکه په خبره یې، په کور دننه د خامو موادو په پروسس سره نویو کارخونو ته د فعالیت زمینه برابرېږي.

ملا عبدالغني برادر همدارنګه د شفافه او د باور وړصادراتو د مسلې د یقیني کولو لپاره له ټولو امنیتي ارګانونو وغوښتل چې د قاچاق مخه ونیسي او متخلفانو ته سختې سزاوې ورکړي.

نوموړي دغه راز له سوداګرو غوښتي چې د کرنیزو محصولاتو د خرابېدو د مخنیوي لپاره له نړیوالو معیارونو سره سم سړې خونې جوړې کړي.

د عربستان سفیر کابل ته له ستنېدو وروسته د طالبانو د بهرنیو چارو له سرپرست وزیر سره کتلي

د طالبانو د بهرنیو چارو سرپرست وزیر امیرخان متقي
د طالبانو د بهرنیو چارو سرپرست وزیر امیرخان متقي

د افغانستان لپاره د سعودي عربستان سفیر کابل ته له ستنېدو وروسته د طالبانو د بهرنیو چارو له سرپرست وزیر سره کتلي دي.

د طالبانو د بهرنیو چارو وزارت مرستیال ویاند حافظ ضیا احمد پرون پنجشنبې په خپله ایکسپاڼه یا پخواني ټویټر کې لیکلي چې په دې کتنه کې پر دوه اړخیزو اړیکو تمرکز وشو.

د راپورونو له مخې د سعودي عربستان ډیپلوماتان د ۲۰۲۳م کال په فبرورۍ کې د امنیتي دلایلو له امله له کابل څخه وتلي وو.

هغه مهال جاسم بن محمد الخالدي په کابل کې سفیر و چې اوس یې فیصل بن طلق البقمي ځایناستی ټاکل شوی دی.

د طالبانو د بیانونو له مخې د سعودي عربستان سفیر امیرخان متقي ته ویلي چې د دواړو هېوادونو ترمنځ اړیکي مخ په پراخېدو دي.

همدارنګه ویل شوي چې د سعودي سفیر له افغانستان سره د خپل هېواد د بشري مرستو پر دوام ټینګار کړی دی.

سعودي عربستان چې یو له درېیو هېوادونو و چې د طالبانو مخکینۍ واکمنۍ یې په رسمیت پېژندلې وه، د نړۍ د نورو هېوادونو په څیر د طالبانو د سرپرست حکومت له په رسمیت پېژندلو ډډه کړې ده.

نور راوښيه

XS
SM
MD
LG