د لاسرسۍ وړ لېنکونه

تازه خبر
سه شنبه ۸ کب ۱۴۰۲ کابل ۰۵:۱۷

افغانستان

طالب چارواکي: پاکستان پرون هم ۶ زره افغان کډوال واېستل

له پاکستانه د یو شمېر تازه ایستل شويو افغان کډوالو موقت کمپ
له پاکستانه د یو شمېر تازه ایستل شويو افغان کډوالو موقت کمپ

د طالبانو چارواکي وايي، پرون شنبه هم د سپین بولدک او تورخم له لارې افغانستان ته څه باندې ۶۰۰۰ افغان کډوال اخراج کړای شوي دي.

د طالبانو د کډوالو او راستنېدونکو چارو وزارت نن په یوه خبرپاڼه کې ویلي، چې له هرې کورنۍ سره ۱۰زره افغانۍ مرسته هم شوې ده.

د وزارت په وینا، د سپین بولدک له لارې په اخراج شویو کې ۸۲ بندیان هم شامل دي.

دغه وزارت له ایرانه هم پرون شنبه د څه باندې ۲۰۰۰ کسانو د ستنېدو خبر ورکړی، چې ځینې یې په جبري ډول ایستل شوي دي.

د طالبانو د کډوالو د راستنېدونکو چارو وزارت سرپرست تېره اوونۍ وویل چې د سپین بولدک او تورخم له لارې د اخراج شویو افغانانو شمېر تر درېیو لکو زیات دی.

د نومبر له لومړیو له پاکستانه د بې اسناده افغان کډوالو د ایستلو بهیر روان دی.

ځینو افغانانو شکایت کړی، چې د قانوني اسنادو له لرلو سره- سره له پاکستانه اخراج شوي دي.

د ورځې تازه خبرونه دلته ولولئ

ایران: ۱۱۳۶ تنه افغانان د حبس د پاتې مودې د تېرولو لپاره افغانستان ته لېږل شوي

ارشیف: د ایران د یوه زندان څنډه
ارشیف: د ایران د یوه زندان څنډه

ایراني چارواکي وايي، له زرو زیات افغان بندیان په تېر یوه کال کې د ایران له محبسونو څخه افغانستان ته سپارل شوي دي.

ایسنا خبري آژانس د ایران د عدلیې وزارت د محکومانو د لېږد د څانګې په حواله خبر ورکوي چې ایران ته د طالبانو د حکومت د څارنوالۍ د پلاوي له سفر وروسته په تېره یوه کال کې د ایران له زندانونو څخه ۱۱۳۶ تنه افغانان د حبس د پاتې مودې د تېرولو لپاره افغانستان ته لېږل شوي دي.

د ایسنا د خبر له مخې د ایران د عدلیې وزارت یوه چارواکي عسکر جلالیان په تهران کې د افغان سفارت له سرپرست سره په کتنه کې ویلي چې د دواړو هېوادو ترمنځ د محکومانو د انتقال، د مجرمانو د سپارلو او د مدني او جنایي چارو په قضايي برخه کې د همکارۍ موافقه لاسلیک شوې.

د خبر له مخې له ۱۳۹۲ کال راهیسې ۳۰۱۵ تنه افغان بندیان په ګډ سرحد کې افغان چارواکو ته سپارل شوي دي.

نژدې یوه میاشت مخکې د طالبانو د حکومت کابینې د بهرنیو چارو وزارت ته دنده وسپارله چې له نورو هېوادونو سره خبرې وکړي او له زندانونو د افغان بندیانو دخلاصون لارې چارې ولټوي.

د افغانستان په ځینو سیندیزو حوزو کې د اوبو زیاتیدو او سېلابونو اټکل شوی

تصویر له ارشیفه
تصویر له ارشیفه

د هواپېژندنې ادارو له سبا چارشنبې نیولې د جمعې تر ورځې د هېواد په ځینو سیندیزو حوزو کې د اوبو د کچې د لوړېدو او سېلابونو اټکل کړی.

د طالبانو د حکومت د اوبو او انرژۍ وزارت پر ایکس پاڼه په یوه بیان کې خبرداری ورکړی چې په ځینو سیمو کې د نسبتا تېزو بارانونو او واورو د ورېدو له کبله ښايي سېلابونه راووځي.

د بیان له مخې، د ورښتونو او سېلابونو اټکل تر ډېره د فراه، هلمند، ارغنداب، خاشرود، ترنک، غزني، پکتیا، پکتیکا، لوګر، میدان، غوربند، پنجشیر، لغمان او کونړ سیندونو په اوږدو کې کېږي.

نوموړي وزارت د دې سیمو له خلکو غوښتي چې د سېلابونو پرمهال د سیندونو له غاړو لیرې شي او د کوزنیو سیمو خلکو ته هم پر وخت خبرداری ورکړي.

ملګري ملتونه: د افغانستان لپاره د ځانګړي استازي ټاکلو کوم مهالوېش نه دی اعلان شوی

په نیویارک کې د ملګرو ملتونو ودانۍ
په نیویارک کې د ملګرو ملتونو ودانۍ

ملګري ملتونه وايي چې د افغانستان لپاره د دې سازمان د ځانګړي استازي د ټاکلو لپاره تراوسه کوم مهالوېش نه دی اعلان شوی.

د ملګرو ملتونو امنیت شورا تېر ماښام د تړلو دروازو تر شا غونډه وکړه او د دې شورا دوره یي مشرې د ګیانا استازې کارولین ردودریګوز له غونډې مخکې وویل د افغانستان لپاره د ځانګړي استازي ټاکل د غونډې په اجنډا کې شامله ده.

د ملګرو ملتونو ویاند ستیفان دوجاریک بېګا ناوخته خبریالانو ته وویل چې د ځانګړي استازي د ټاکلو مسئله په جدي ډول تعقیبېږي او کار پرې روان دی.

داسې ښکاري چې ملګرو ملتونو د افغانستان د ځانګړي استازي په توګه تراوسه څوک نه دي نومولي، خو دوجاریک وویل چې کله کوم څوک غوره شو نو اعلان به شي.

طالبانو د ملګرو ملتونو د ځانګړي استازي له ټاکلو سره مخالفت کړی او ویلي یې دي چې د افغانستان لپاره د ملګروملتونو د مرستندوی دفتر یوناما په شتون کې د دې سازمان د بل ځانګړي استازي ټاکلو ته اړتیا نه شته.

د امنیت شورا ۱۱ غړو د ښځو پر وړاندې د طالبانو ځپونکي سیاستونه وغندل

د ملګرو ملتونو سازمان لوګو
د ملګرو ملتونو سازمان لوګو

د ملګرو ملتونو د امنیت شورا څه باندې دوه پردرېیمې برخې غړیو د دوشنبې په ورځ له طالبانو وغوښتل چې د ښځو او نجونو په وړاندې له شپږم ټولګي پورته د نجونو پرزده کړو بندیز او د ښځو د کار او ازاد تګ راتګ د حق په ګدون ټول ځپونکي او تبعیضي سیاستونه او فرمانونه لغوه کړي.

په هغې کې اعلامیه کې چې د امنیت شورا بېګا د افغانستان په اړه د بندو دروازو ترشا له غونډې وروسته خپره کړې، د دې شورا له پنځلسو غړیو یوولسو یې د ۲۰۲۱ کال په اګست کې واک ته د طالبانو له رسیدو راهیسې پرښځو او نجونو د دوی له لوري ځپنه غندل شوي او یو ځل بیا یې په عامه، سیاسي، اقتصادي، کلتوري او ټولنیز ژوند کې؛ په ځانګړې توګه د افغانستان په اوسنۍ واکمنۍ کې چې د نړیوال تعامل د زیاتوالي لټه کوي، د پرېکړې کولو په ټولو سطحو کې د هغوی پرمساوي مشارکت ټینګار کړی دی.

په دغه اعلامیه کې د امنیت شورا یوولسو غړیو، اکوادور، فرانسې، ګیانا، جاپان، مالتا، سیریلییون، سلوینیا، جنوبي کوریا، سویس، برېتانیا او متحدو ایالتونو یادونه کړې چې په افغانستان کې یواځې هغه وخت تلپاتې سوله ټینګېدای شي چې دا هېواد یو ټول شموله سیاست مخ ته یوسي او د ښځو او نجونو په ګډون د ټولو افغانانو د بشري حقونو درناوی وکړي.

د امریکا د بهرنیو چارو وزیر د افغان ښځو د اقتصادي مقاومت په نوم یوه ایتلاف ته نن وینا کوي

د امریکا د بهرنیو چارو وزیر انتوني بلېکین
د امریکا د بهرنیو چارو وزیر انتوني بلېکین

ټاکل شوې چې د امریکا د بهرنیو چارو وزیر انتوني بلېکین د افغان ښځو د اقتصادي مقاومت په نوم د یوه ایتلاف AWERغونډې ته نن وینا وکړي.

د امریکا د بهرنیو چارو وزارت د ویندوی له دفتره بېګا ناوخته په یوه خپره شوې اعلامیه کې ویل شوي چې دا غونډه نن د افغانستان په وخت د ماښام په اوو بجو په بهرنیو چارو وزارت کې د بوستون پوهنتون او ددې وازرت په ګډ کوربه توب جوړیږي.

د اعلامیې له مخې، د دغه ایتلاف دې غونډې ته د خصوصي سکتور، مدني ټولنې، پوهنتونونو او حکومتونو استازي بلل شوي او دوی به د دغه ایتلاف د نویو نوښتونو او دا چې هغه له نورو لوبغاړو او شریکانو سره په څه ډول پرمخ وړل کېدای او ګډ هدفونه ترلاسه کیدای شي، خبرې وکړي.

د بهرنیو چارو وزارت په وینا، د بهرنیو چارو وزارت او د بوستون پوهنتون ترمنځ دغه خصوصي ایتلاف چې په ۲۰۲۲ کال کې د ښاغلي بلېنکین له خوا رامینځته شوی، هدف یې زده کړې، کار او خصوصي سوداګرۍ ته د افغان ښځو او نجونود لاسرسي ملاتړ او په دې برخه کې د نوښتونو او همکاریو زیاتوالی ښودل شوی.

په افغاني ټولنه کې د افغان ښځو او نجونو د فعال ګډون په هدف دا غونډه داسې مهال جوړیږي چې په افغانستان کې د طالبانو د واکمنۍ په څه باندې دوه نیم کلنه موده کې نجونې له شپږم ټولګي پورته زده کړومنع شوي او ښځې هم په نادولتي موسسو او یو شمېر دولتي ادارو کې له کار کولو راګرځول شوې دي.

نن په افغانستان کې د ګوزڼ ناروغۍ پر ضد د واکسین د ۴ ورځني کمپاین دویمه ورځ ده

تصویر له ارشیفه
تصویر له ارشیفه

په پام کې ده په افغانستان کې د ماشومانو د ګوزڼ د ناروغۍ یا پولیو پرضد د واکسین د څلور ورځني کمپاین په ترڅ کې چې پرون په ۲۱ ولایتونو کې پیل شو، له پنځو کلونو کم عمره شاوخوا اوه ملیونه او شپږ لکه ماشومانو ته د واکسین څاڅکي ورکړل شي.

د طالبانو د حکومت د عامې روغتیا وزارت له کورنیو او دیني عالمانو غوښتي دي چې د دې کمپاین په تطبیق کې مرسته وکړي.

تېرکال په افغانستان کې د پولیو شپږ پېښې ثبت شوې چې ټولې په ننګرهار ولایت کې وې، خو سږکال تراوسه د کومې نوې پېښې خبر نه دی ورکړل شوی.

افغانستان او پاکستان د نړۍ یوازیني دوه هېوادونه دي چې د ماشومانو د ګوزڼ ناروغي تراوسه پکې ده او له منځه نه ده وړل شوې.

د طالبانو د حکومت یو اقتصادي پلاوی له چابهار بندر څخه لیدنه کوي

د ایران د چابهار بندر یوه څنډه
د ایران د چابهار بندر یوه څنډه

د ایراني رسنیو د راپورونو له مخې، د طالبانو د حکومت یو اقتصادي پلاوی له چاه بهار بندر څخه لیدنه کوي.

ایرنا خبري آژانس خبر ورکړی چې د طالبانو د حکومت دا تخنیکي او اقتصادي پلاوی د چاه بهار په آزاده تجارتي او صنعتي سیمه کې د افغان سوداګرو لپاره د سوداګرۍ او پانګونو د فرصتونو د ارزونې لپاره هلته تللی دی.

ایرنا د چاه بهار د یوه چارواکي اکبر باور له قوله خبر ورکړی چې د افغان پلاوي د سفر پرمهال به په دې بندر کې د استوګنې د کورونو او د اقتصاد او هوټلدارۍ په برخو کې څو پروژې پرانیستل شي.

افغانستان چې سمندر ته خپله لاره نه لري او د پاکستان له لارې د سوداګرۍ او ترانزیت په برخو کې تل له ستونزه سره مخامخ وي، هڅه کوي چې د چاه بهار بندر له لارې له نورې نړۍ سره سوداګري پراخه کړي.

متقي د ترکمنستان د بهرنیو چارو وزیر سره د افغانستان- ترکمنستان د ترانزیت او انتقالاتو په اړه خبرې کړي

د طالبانو د حکومت او ترکمنستان د بهرنیو چارو د وزیرانو ناسته
د طالبانو د حکومت او ترکمنستان د بهرنیو چارو د وزیرانو ناسته

د طالبانو د حکومت د بهرنیو چارو وزیر له خپل ترکمنستاني سیال سره په کتنه کې د افغانستان او ترکمنستان ترمنځ د ترانزیت او انتقالاتو په اړه خبرې کړي.

د طالبانو د حکومت د بهرنیوچارو وزارت مرستیال ویاند حافظ ضیااحمد پر خپله ایکس پاڼه د دې لیدنې خبر ورکړی او لیکلي یې دي چې امیرخان متقي په عشق آباد کې د ترکمنستان د بهرنیوچارو له وزیر او مرستیال صدراعظم رشید مرادوف سره په کتنه کې د دوه اړخیزو سیاسي او اقتصادي مسایلو او همداراز د انتقالاتو او ترانزیت پر اړوندو مسایلو خبرې وکړې.

ښاغلی متقي د ترکمنستان د بهرنیوچارو د وزیر په بلنه د یوه پلاوي په مشرۍ چې د طالبانو د حکومت د کانونو او پټرولیم وزارت او د افغانستان د رېلګاډي او برېښنا د ادارو چارواکي پکې شامل دي، ترکمنستان ته تللی دی.

د ملګرو ملتونو یوې مسوولې د افغان ښځو پر وړاندې د طالبانو تبعیضي کړنې وغندلې

ارشیف: په کابل کې د معترضو مېرمنو د یوې اعتراضیه غونډې انځور
ارشیف: په کابل کې د معترضو مېرمنو د یوې اعتراضیه غونډې انځور

د ملګرو ملتونو یوه جګپوړې مسووله وايي، دوی په افغانستان کې د نجونو او ښځو پر وړاندې د طالبانو تبعیضي کړنې غندي.

په ملګرو ملتونو کې د ګیانا سفیرې کارولین رودریګوزبرکیټ چې د امنیت شورا دوره یي مشره ده، د ښځو، سولې او امنیت لپاره د ګډو ژمنو د ډلې په استازیتوب اعلامیه ولوستله او د طالبانو تر حاکمیت لاندې په افغانستان کې یې د بشري حقونو په رعایت ټینګار وکړ.

دغه څرګندونې د افغانستان په اړه د ملګرو ملتونو د امنیت شورا د نننۍ غونډې تر پیل مخکې شوې دي.

په خبرپاڼه کې راغلي چې د دې ډلې غړي د طالبانو له حکومته غواړي چې ژر تر ژره د ښځو پر وړاندې خپلې تګلارې لغوه کړي چې په کې له شپږم ټولګي څخه پورته د نجونو پر زده کړو بندیز، د ښځو پر کار بندیز، د هغوی پر تګ راتګ بندیز او د بیان پر ازادۍ بندیزونه شامل دي.

د افغانستان لپاره د ملګرو ملتونو د ځانګړي استازي د ټاکلو په اړه د يوې پوښتنې په ځواب کې مېرمن رودريګوز برکيټ وويل چې تر اوسه دې څوکۍ ته څوک نه دي نومول شوي.

د افغانستان لپاره د ملګرو ملتونو د ځانګړي استازي ټاکنه د امنیت شورا د نننۍ غونډې له مهمو موضوعاتو څخه ده چې طالبانو یې له وړاندې خپل مخالفت ښودلی دی.

د افغانستان په اړه د 'ریچارډ بینېټ' راپور د بشري حقونو شورا ته وړاندې کېږي

د افغانستان لپاره د ملګرو ملتونو ځانګړی راپور ورکوونکی ریچارډ بینېټ
د افغانستان لپاره د ملګرو ملتونو ځانګړی راپور ورکوونکی ریچارډ بینېټ

د افغانستان لپاره د ملګرو ملتونو ځانګړی راپور ورکوونکی ریچارډ بینېټ وایي چې په افغانستان کې د بشري حقونو د وضعیت په اړه د ده نوی راپور به د راتلونکې پنجشنبې په ورځ د فبرورۍ په ۲۹مه د ملګرو ملتونو د بشري حقونو د شورا ۵۵مې غونډې ته وړاندې شي.

بینېټ دا خبره نن دوشنبې په خپله ټولنیزه شبکه ایکس‌پاڼه یا پخواني ټویټر کې کړې، خو د محتوا په اړه یې نور جزییات نه دي ورکړي.

خو هغه ویلي چې په دې غونډه کې به چې د افغانستان په وخت د ماښام په شپږ نیمې بجې پیلېږي، دا راپوروړاندې شي او د دولتونو او مدني ټولنې ترمنځ به نظریات تبادله شي.

دا به په روانه اوونۍ کې دوهم ځل وي چې د ملګرو ملتونو دوه مهم ارګانونه د افغانستان پر وضعیت خبرې کوي.

ټاکل شوې د ملګرو ملتونو امنیت شورا نن دوشنبې د تړلو دروازو تر شا په یوه غونډه کې د افغانستان پر وضعیت بحث وکړي.

ټاکل شوې د ملګرو ملتونو عمومي منشي انټونیو ګوټېرېش په دې غونډه کې په ټوله کې د افغانستان د وضعیت، د نوموړي په مشرۍ په دوحه کې د تېرې اوونۍ د غونډې او همدارنګه د افغانستان لپاره د ملګرو ملتونو د یوه ځانګړې استازې د ټاکنې پر مسئلو خپل راپور وړاندې وکړي.

دا غونډې داسې مهال جوړېږي چې پر افغانستان واکمن طالبان له بشري حقونو په تېره د نجونو او ښځو د زده کړې او کار په برخو کې پرجدي سرغړونو تورن شوي دي.

نور راوښيه

XS
SM
MD
LG