د لاسرسۍ وړ لېنکونه

تازه خبر
پنجشنبه ۳ کب ۱۴۰۲ کابل ۰۹:۱۹

افغانستان

د پاکستان موقت صدراعظم د بې‌اسناده افغان کډوالو د ایستلو لامل په ډاګه کړ

د پاکستان موقت صدراعظم انوارالحق کاکړ
د پاکستان موقت صدراعظم انوارالحق کاکړ

د پاکستان موقت صدراعظم انوارالحق کاکړ وایي، له پاکستانه په سلګونو زره افغان کډوال ځکه ایستل کېږي چې افغانستان له خپلې خاورې د پاکستاني سختدریځو وسله‌والو د عملیاتو په مخنیوي کې پاتې راغلی دی.

د فرانس‌پرېس خبري آژانس د راپور له مخې کاکړ نن په یوه خبري کنفرانس کې وویل چې افغانان هم په ډېرو ځانوژونکو بریدونو او له پاکستاني ځواکونو سره په نورو نښتو کې ښکېل وو او زیاته یې کړه له کله چې طالبان په کابل کې واک ته رسېدلي، په پاکستان کې د ناامنیو په پېښو کې د پام وړ زیاتوالی راغلی.

هغه وویل، د ۲۰۲۱ کال د اګست له میاشتې راهیسې چې طالبان بیا پر افغانستان واکمن شوي، په پاکستان کې بریدونه شپېته سلنه زیات شوي چې په نتیجه کې یې ۲۲۶۷ تنه وژل شوي دي.

کاکړ همدارنګه وویل چې له پاکستانه د بې اسناده افغان کډوالو د وتلو لپاره د اکټوبر میاشتې تر پایه د وروستي مهلت تر پای ته رسېدو وروسته له دونیم لکه زیات افغانان خپل هېواد ته ستانه شوي دي.

د راپور له مخې پاکستان وایي، ډېری دغه افغانان په خپله خوښه خپل هېواد ته ستانه شوي، خو کابل ټینګار کوي چې اکثریت یې په زوره ایستل شوي دي.

د پاکستان د موقت صدراعظم د دغو نویو څرګندونو په اړه د طالبانو د حکومت چارواکو غبرګون نه دی ښودلی، خو د بهرنیو چارو د وزارت سیاسي مرستیال یې شېرمحمد عباس ستانکزي څو ورځې مخکې له پاکستانه د افغان کډوال ایستل ظالمانه او د نړیوالو اصولو او قوانینو خلاف عمل وباله.

ستانکزي خبرداری ورکړ چې که په دې اړه خپل دریځ بدل نه کړي نو دوی به یې هم پر وړاندې سخت غبرګون وښيي.

د ورځې تازه خبرونه دلته ولولئ

والیبال؛ د افغانستان غوره لیګ سیالیو د پایلوبې لوبډلې معلومې شوې

په کابل کې د والیبال د لوبډلو یو انځور
په کابل کې د والیبال د لوبډلو یو انځور

د افغانستان د والیبال غوره لیګ د درېیم پړاو سیالیو نیمه پایلوبې نن پنجشنبه ترسره شوې او د پایلوبې لوبډلې یې معلومې شوې.

د والیبال فدراسیون د خبر پر اساس په لومړنۍ نیمه پایلوبه کې ام البلاد د هندوکش او په دوهمې نیمه پایلوبې کې بست د سپین غر لوبډلې ته ماتې ورکړه.

پایلوبه به د جمعې په ورځ د کابل پر وخت تر ماسپښین وروسته ۲:۰۰ بجې د ام البلاد او بست لوبډلو ترمنځ ترسره شي.

د والیبال لیګ په درېیم پړاو سیالیو کې سږ کال ۸ لوبډلو په دوو ګروپونو کې سره سیالۍ وکړې.

د ویلو ده چې د یاد لیګ د لومړنيو دوه پړاوونو اتلولۍ د ام البلاد لوبډلې ګټلې وې.

کرکټ؛ د افغانستان په کورنیو سیالیو کې جلات موسی‌زي غبرګه سلیزه وهلې

جلات موسی‌زی. د موسی‌زي په پاڼۍ کې ۲۶ څلوریزې او ۱۰ شپږیزې شاملې وې.
جلات موسی‌زی. د موسی‌زي په پاڼۍ کې ۲۶ څلوریزې او ۱۰ شپږیزې شاملې وې.

د افغانستان د کورنیو لومړۍ درجه یا 'ګرېډ ون' سیالیو په ترڅ کې د فاریاب ولایتي لوبډلې لوبغاړي جلات موسی‌زي غبرګه سلیزه وهلې ده.

لومړۍ درجه ولايتي سیالۍ روانه اوونۍ د افغانستان په کندهار، ننګرهار او کونړ ولایتونو کې د ۱۲ ولایتي لوبډلو ترمنځ پیل شوي دي.

د پنجشنبې په ورځ د فبرورۍ په ۲۲مه نېټه د کندهار د کرکټ په لوبغالي کې د فاریاب او لغمان ولایتي لوبډلو ترمنځ سیالۍ کې جلات موسي‌زي په ۱۳۶ توپونو ۲۳۰ منډې کړې دي.

د موسی‌زي په پاڼۍ کې ۲۶ څلوریزې او ۱۰ شپږیزې شاملې وې.

یاده سیالي هم فاریاب لوبډلې وګټله او د دې سیالۍ د غوره لوبغاړي جایزه یې هم وګټله.

د ویلو ده چې د لومړۍ درجه ولایتي سیالیو په ترڅ کې ګڼ شمېر ځوانو لوبغاړو سلیزې وهلې دي، خو دا په روانو سیالیو کې لومړۍ غبرګه سلیزه وه.

د کندهار په میوند کې د الکترونیکي پیسو ازمایښتي پروګرام پیل شوی

د افغانستان په عمومي نقشه کې د کندهار ولایت موقعیت
د افغانستان په عمومي نقشه کې د کندهار ولایت موقعیت

د ناورې د کډوالو شورا د کندهار په میوند ولسوالۍ کې د کډوالو لپاره د الکترونیکي پیسو یو نوی ازمایښتي پروګرام پیل کړی دی.

د دې شورا په هغې اعلامیه کې چې نن د فبرورۍ ۲۲مه خپره شوې راغلي، کډوال کولی شي له دې الکترونیکي پیسو په استفادې د اړتیا وړ شیان واخلي.

په اعلامیه کې د دغو پیسو د یو تن کارونکي محمد عمر له قوله ویل شوي، له دې الکترونیکي پیسو کار اخیسته اسانه ده.

د ناروې د کډوالو شورا د دې ازماښتي پروګرام د پیل موخه کورنیو بې ځایه شویو ته د مالي خدماتو اسانه لاسرسی یاد کړی دی.

افغان نجونو ته په طبي انسټېټیوټونو کې د نوملیکنې اجازه؛ یوناما یې هرکلی وکړ

د ملګرو ملتونو بیرغ
د ملګرو ملتونو بیرغ

د افغانستان لپاره د ملګرو ملتونو مرستندویه ماموریت یوناما د طالبانو له هغې پرېکړې هرکلی کړی چې د دولسمو ټولګیو فارغو نجونو ته يې په طبي انسټېټیوټونو کې د نوملیکنې اجازه ورکړې ده.

یوناما نن پر خپلې ایکس شبکې یا پخواني ټویټر د طالبانو دا اقدام په افغانستان کې د روغتیايي خدمتونو په برخه کې د اندېښنو د له منځه وړلو لپاره یو ګام بللی او ویلي یې دي، افغان ښځې او نجونې ثانوي او لوړو زده کړو ته اړتیا لري.

طالبانو وړمه ورځ د لومړی ځل لپاره د افغانستان په شمال او جنوب کې د ۱۱ ولایتونو په طبي انسټېټیوټونو کې نجونو ته د نوملیکنې اجازه ورکړه.

له دې وړاندې دا اندېښنې زیاتې وې چې د طالبانو تر واک لاندې افغانستان د ښځینه ډاکترانو، نرسانو او قابلو له کمښت سره مخامخ دی.

طالب چارواکي: غزني کې مو ۲ تنه د خلکو مخته اعدام کړل

د غزني ولایت نقشه
د غزني ولایت نقشه

په غزني کې طالب چارواکې وايي، نن يې دوه تنه د "علي لالا سیمې" په یوه فوټبال لوبغالي کې د خلکو مخته اعدام کړل.

د طالبانو سترې محکمې نن د (فبرورۍ ۲۲ مه) په یوې اعلامیه کې ویلي، د دغو کسانو د ­"قصاص" پرېکړه د دوی د مشر ملا هبت الله اخندزاده د فرمان او درېیو محکمو له حکم وروسته شوې ده.

د غزني د اطلاعاتو او فرهنګ ریاست د چهارشنبې په ورځ په یوه اعلامیه کې له خلکو غوښتي وو چې د اعدام ځای ته دې د برېښنايي وسایلو له ور وړلو ډډه وکړي.

له دې وړاندې طالبانو د ۲۰۲۳ کال په جون میاشت کې په لغمان کې یو تن د پنځو کسان د قتل په تور په عام محضر کې اعدام کړی و.

واک ته له راستنېدو وروسته د طالبانو تر مشرۍ لاندې په عام محضر کې لومړنی تایید شوی اعدام د ۲۰۲۲ کال په ډسمبر مياشت، په فراه کې د سلګونو نندارچیانو او د لوړ پوړو طالب چارواکو په وړاندې ترسره شو.

ستانکزی: افغانستان هغه مهال پرمختګ کولی شي چې نر او ښځې یې زده کړې وکړي

د طالبانو د بهرنیو چارو د وزارت سیاسي مرستیال شیر محمد عباس ستانکزی
د طالبانو د بهرنیو چارو د وزارت سیاسي مرستیال شیر محمد عباس ستانکزی

د طالبانو د بهرنیو چارو د وزارت سیاسي مرستیال شیر محمد عباس ستانکزي یو ځل بیا ویلي، زده کړه پر ښځې او نر فرض ده او افغانستان هغه مهال پرمختګ کولی شي چې نر او ښځې يې زده کړې وکړي.

ښاغلي ستانکزي دا څرګندونې نن په کابل کې د نجونو د یوې دینې مدرسې په فراغت غونډه کې کړي دي.

هغه د خپلو خبرو په یوې برخه کې وویل، هیڅ ملک بې له علمه ترقي نشي کولی، یوازېنۍ لار او دروازه چې د ترقۍ لپاره ده، هغه که د اخرت دی او که د دنیا هغه علم دی، او د علم دروازې باید خلاصې شي، علم په ټولو ښځو او نارینو فرض دی.

ښاغلي ستانکزي له دې وړاندې هم ویلي و، هېڅوک داسې کوم دلیل نه‌لري چې ووایي، د ښځو تعلیم فرض نه‌دی.

هغه زیاته کړې وه: "ژر تر ژره دې د زده کړو زمینه برابره شي او د ټولو پر مخ د ښوونځیو دروازې پرانیستل شي."

خو یو شمېر نورو طالب چارواکو بیا ویلي وو چې دنیايي زده کړه مباح ده.

واک ته د طالبانو له ستنیدو وروسته، له شپږم ټولګیو پورته د ټولو نجونو پر مخ د ښوونځیو دروازې تړل شوي او د ۲۰۲۲ کال په ډیسمبر کې نجونې له پوهنتوني زده کړو هم راوګرځول شوې.

"فریډم نو": طالبان دې منیژه صدیقي بې قیدو شرطه را خوشې کړي

منیژه صدیقي، یوه معترضه مېرمنه
منیژه صدیقي، یوه معترضه مېرمنه

د بشري حقونو سازمان "فریډم نو" یو ځل د طالبانو له بنده د یوې معترضې ښځې منیژې صدیقي د بې قید او شرطه خوشې کېدو غوښتنه وکړه.

دغه سازمان چې مرکز يې په واشنګټن کې دی، پرون د (فبرورۍ ۲۱مه) پر خپلې ایکس پاڼې، پخواني ټویټر لیکلي، مېرمن صدیقي د طالبانو په زندان کې د "شکنجې او ناوړه چلند" له خطر سره مخ ده.

د بښنې نړیوال سازمان په یوه راپور کې ویلي، د ۲۰۲۳ د اکتوبر له نهمې راهیسې مېرمن صدیقي نادرکه وه چې وروسته د طالبانو په زندان کې وموندل شوه.

د ۲۰۲۱ کال له اګسټ راهیسې چې طالبان یو ځل بیا پر افغانستان واکمن شوي، په پرله پسې ډول يې ښځینه مظاهره کوونکې او د بشري حقونو مدافعان نیولي او بندیان کړي دي.

یو شمېر سیاسي جریانونه: د افغانستان د ناورین په حل کې پر طالبانو یو اړخیز ټینګار به دا ناورین نور هم ژور کړي

د قطر پلازمېنه دوحه
د قطر پلازمېنه دوحه

د طالبانو یو شمېر مخالف سیاسي جریانونه او د ښځو د حقونو بنسټونه، د افغانستان په اړه د دوحې وروستۍ ناستې ته په غبرګون کې وايي، د افغانستان د بحران په حل کې د طالبانو پر رول یو اړخیز ټینګار به دا بحران لا بدتر کړي.

دغه سیاسي جریانونه چې د ملي مقاومت شورا، د اسلامي یووالي ګوند، د آزادۍ جبهه او د افغان ښځو یو شمېر اعتراضي خوځښتونه هم پکې شامل دي، په خپلې دویمې ګډه اعلامیه کې ویلي، د دوحه ناسته هیڅ داسې پایلې ته ونه رسېده چې په افغانستان کې د تېرې نیمې پېړۍ د کړکېچ د بنسټیزو مسایلو حل راوباسي.

د فبرورۍ په ۱۸-۱۹ مه د افغانستان په اړه د قطر په پلازمېنه دوحه کې د ملګرو ملتونو په کوربه توب ناسته جوړه شوې وه چې د افغانستان لپاره د هېوادونو د ځانګړيو استازو، نړیوالو سازمانونو او بنسټونو ترڅنګ یو شمېر افغانان هم وربلل شوي وو.

طالبانو په دې ناسته ګډون رد کړی و.

طالبان نن ۲ تنه په غزني کې د قتل په تور اعداموي

د غزني ولايت په نقشه کې
د غزني ولايت په نقشه کې

په غزني کې طالب چارواکي وايي، نن به د علي لالا سیمې د فوټبال په لوبغالي کې د قتل په تور دوه تنه په عام محضر کې اعدام کړي.

د دې ولایت د اطلاعاتو او کلتور ریاست پرون په یوه خبرپانه کې ویلي، دغه پرېکړه د طالبانو د مشر ملاهبت الله اخندزاده د فرمان او د درېیو محکمو د حکم پر بنسټ شوې ده.

په خبرپاڼه کې د تورنو کسانو د هویت په اړه څه نه دي ویل شوي.

په خبرپانه کې له خلکو غوښتل شوي چې د اعدام ځای ته له ځان سره برېښنايي وسایل ور نه وړي.

له دې وړاندې طالبانو د ۲۰۲۳ کال په جون میاشت کې په لغمان کې یو تن د پنځو کسان د قتل په تور په عام محضر کې اعدام کړی و.

واک ته له راستنېدو وروسته د طالبانو تر مشرۍ لاندې په عام محضر کې لومړنی تایید شوی اعدام د ۲۰۲۲ کال په ډسمبر مياشت، په فراه کې د سلګونو نندارچیانو او د لوړ پوړو طالب چارواکو په وړاندې ترسره شو.

د خوړو نړیوال پروګرام: د نورستان د واورې ښوېیدو له زیانمنو سره مو مرسته وکړه

د نورستان ولایت یوه څنډه
د نورستان ولایت یوه څنډه

د خوړو نړیوال پروګرام( ډبلیو ایف پي) وایي، په نورستان کې یې د واورو د ښوېیدو له امله اغېزمن شویو کسانو ته انرژي لرونکي بسکټ ورکړي دي.

د افغانستان لپاره د ( ډبلیو ایف پي) ادارې پرون په خپله ایکسپاڼه کې لیکلي دي چې د دې پېښې له متاثرو شویو سره به نورې مرستې هم وکړي.

د ملګرو ملتونو د مرستو د همغږۍ ادارې( اوچا) د ارزونې له مخې، د یکشنبې د ورځې د واورې د ښوېیدو له امله یو ویشت کسان مړه شوي او اتلس کورونه نړیدلي دي.

اوچا پرون په خپله ایکسپاڼه کې څرګنده کړه چې د دې برف کوچ له امله نور دیرش کورونه څه زیانمن شوي او دوه سوه پنځوس کورونه د نړیدو له خطر سره مخامخ دي.

نور راوښيه

XS
SM
MD
LG