د طالبانو د حکومت د مخابراتو او معلوماتي ټکنالوجۍ وزارت وایي، افغانستان کې د فعالو سیم کارتونو شمېر ۲۳ میلیونو ته رسېدلی دی.

د دغه وزارت ویاند عنایت الله الکوزي پرون یکشنبه په یوه خبرپاڼه کې ویلي، دوی د خصوصي شرکتونو په مرسته توانېدلي چې لس میلیونه سیمکارتونه په قانوني ډول ثبت کړي او په وینا یې د ۱۳ میلیونه نورو هغو د ثبت لړۍ هم روانه ده.

د دغه کار هدف له سیمکارتونو د ناوړه کارونې مخنیوی ښودل شوی دی.

دا پروسه د تېر جمهوري نظام پر مهال وروسته له هغه پيل شوه چې په بازارونو کې له راجستر پرته د سیمکارتونو پلور او پېر د خلکو شکایتونه زیات کړي وو.

په افغانستان کې داسې مهال د فعالو سیمکارتونو شمېر ۲۳ میلیونو ته رسېږي چې افغانان وخت ناوخت د مخابراتي خدمتونو په ځانګړې توګه انټرنېټ له لوړې بیې او کمزوري کیفیت څخه شکایتونه کوي.

د طالبانو ځواکونو د افغانستان په ختیځ کې د اسلامي دولت یا داعش خراسان څانګې د یوه مهم قوماندان د وژلو ادعا کړې ده.

المرساد په نوم د طالبانو اړوندې یوې ورځپاڼې او څو نورو د طالبانو اړوندو شبکو، د جولای په ۷ مه راپور ورکړی، ذاکرالله چې په ابو شېر هم مشهور و، د ننګرهار ولایت په مومند درې ولسوالۍ کې د عملیاتو په ترڅ کې وژل شوی دی.

ویل شوي چې دی د ننګرهار په اچین سرحدي ولسوالۍ کې د داعش نظامي قومندان و.

دا ادعا خپلواکو سرچینو نه ده تایید کړې.

وروسته له هغه چې طالبانو د ۲۰۲۱م کال په اګست کې پر افغانستان واک تر لاسه کړ، داعش د هېواد په بېلابېلو ولایتونو کې د څو وژونکو بریدونو مسوولیت منلی دی.

په دغو بریدونو کې زیاتره مذهبي اقلیتونه په نښه او وژل شوي دي.

په متحده عربي اماراتو کې د افغانستان د الکترونیکي تذکرو د ویش مرکز پرانیستل شوی دی.

د طالبانو تر کنټرول لاندې د احصایې او معلوماتو ملي ادارې پرون خبر ورکړی چې په اماراتو په تېره بیا ابوظبۍ ښار کې افغانانو ته د اسانتیا په هدف یې دا مرکز پرانیستی دی.

د دې ادارې د بیان په اساس له دې مرکزه به هلته مېشتو افغانانو ته د تذکرو د ویش سربېره، د تولد کارتونه، د وفات پارچې او د الکترونیکي تذکرو تر توزیع وروسته اړوند خدمات وړاندې شي.

د احصایې او معلوماتو د ادارې مشر فقیرمحمد زیار په ابوظبۍ کې په دې مناسبت غونډې ته ویلي چې هڅه کوي ورته مراکز په نورو هېوادونو کې هم د افغانانو د اسانتیاو په هدف پرانېزي.

په متحده عربي اماراتو کې اکثر افغانان په سوداګرۍ، کارګري او خدماتي کارونو بوخت دي.

په اماراتو کې د افغان سوداګرو د ټولنې د شمېرو په اساس لږ تر لږه درې لکه افغانان هلته مېشت دي.

د ازبکستان ولسمشر شوکت میرضیایف د افغانستان د روان وضعیت په اړه د اندېښنې په څرګندولو سره وویل چې د نړۍ په نورو برخو کې د شخړو له امله له افغانستانه د نړیوالې ټولنې پام اوښتی دی.

میرضیایف د شنبې په ورځ د جولای په شپږمه په شوشا کې د ترک توکمو هېوادونو د همکاریو د شورا په غونډه کې د وینا پر مهال له افغانستان سره د مرستو د لا زیاتې همغږۍ غوښتنه وکړه.

د ده په وينا، د افغانستان وضعيت د نړيوالې ټولنې له پامه غورځول شوى دى.

د ازبکستان ولسمشر د افغانستان له خلکو سره د مرستو پر دوام ټینګار وکړ او ویې ویل چې د افغانستان د مالي زېرمو د کنګل حالت پای ته رسیدا به هلته وضعیت ښه کړي.

د طالبانو تر کنټرول لاندې د افغانستان د احصائیې او معلوماتو ریاست وايي چې په متحده عربي اماراتو کې یې د الکترونیکي تذکرو د وېش مرکز پرانیستی دی.

دې ادارې د یکشنبې په ورځ په یوه بیان کې لیکلي چې دغه مرکز په ابوظبي کې مېشتو افغانانو ته د اسانتیاوو د برابرولو لپاره په کار پیل کړی دی.

د دې خبرپاڼې پر بنسټ، دغه مرکز د شنبې په ورځ پرانیستل شو او په دې مراسمو کې یو شمېر طالب چارواکو هم حضور درلود.

د طالبانو د احصایې او معلوماتو ادارې د سږني کال په اعلامیه کې ویلي چې په ۱۴۰۲ کال کې یې په افغانستان کې درې میلیونه او ۱۲۴ زره کسانو ته الکترونیکې تذکرې ویشلي دي.

د افغانستان د ۲۰ کلنو ځوانانو د فوټبال ملي لوبډله د مرکزي اسیا یا کافا په اتلولیو کې خپله دویمه سیالي نن یکشنبه د جولای په ۷مه نېټه له تاجکستان سره ترسره کوي.

د افغانستان فوټبال فدراسیون ویلي چې یاده سیالي به د کابل پر وخت مازدیګر ۴:۰۰ بجې پیل شي.

د ویلوده چې د کافا اتلولیو په ترڅ کې افغانستان خپله لومړۍ سیالي ۴ـ۰ قرغزستان هېواد ته بایللې ده.

ټاکل شوې، سبا دوشنبه د افغانستان په بېلابېلو برخو کې ماشومانو ته د ګوزڼ یا پولیو ضد واکسین ورکولو کمپاین پیل شي.

له پولیو خلاص افغانستان بنسټ نن پر خپله ایکس­پاڼه یا پخواني ټویټر له خلکو غوښتنه کړې چې له پولیو ناروغۍ د خلاص افغانستان لپاره خپله ونډه ترسره کړي او خپلو ماشومانو ته چې عمرونه یې تر پنځو کلونو کم دي، دغه واکسین ورکړي.

افغانستان او پاکستان په نړۍ کې هغه دوه هېوادونه دي چې ګوزڼ لا هم په کې ختم شوی نه دی.

د روغتیا نړیوال سازمان د راپور له مخې، په افغانستان کې د ۲۰۲۴م کال له پیل څخه د جون تر ۳۰مې د پولیو شپږ مثبتې پېښې ثبت شوې وې او په پاکستان کې یې بیا شمېر اته پېښې ښودل شوی.

د قحطۍ د اټکل یوه نړیواله اداره وايي، په افغانستان کې د وروستیو سېلابونو له کبله تر راروانې سپټمبر میاشتې پورې د قحطۍ خطر شته.

د امریکا د نړیوال پرمختګ د ادارې اړوندې د قحطۍ د خبرداري شبکې په یوه راپور کې چې پرون خپور شو، ویلي چې وروستیو سېلابونو چې د دوامدارې وچکالۍ نښه ده او د لویو اقتصادي فعالیتونو د نشتوالي له وجې خلک خوړو او عوایدو ته لاسرسی نه لري.

په راپور کې یادونه شوې چې د افغانستان په شمال ختیځو، شمالي او جنوبي سیمو کې ښايي خلک بېړنیو مرستو ته اړتیا ولري.

نوموړې اداره اټکل کوي چې د دې قحطۍ اغېز ښايي په ځینو سیمو کې د سږني کال له اکټوبر څخه نیولې د ۲۰۲۵م کال تر جنوري میاشتې پورې دوام ورکړي.

په افغانستان کې د کمزوري اقتصاد او تېرو جګړو له کبله هسې هم د خلکو د عوایدو کچه ټیټه ده او د هغو خلکو شمېر چې د نړیوالو بشري مرستو ته اړتیا لري د ټولو وګړو له نیمایي اوړي.

د طالبانو سرپرست حکومت د کانونو او پټرولیم په وزارت او نورو وزارتونو او ادارو کې یو لړ بدلونونه اعلان کړي دي.

د طالبانو د حکومت ویاند ذبیح الله مجاهد بېګا پر خپله ایکسپاڼه د طالبانو د لوی مشر هبت‌الله آخندزاده یو فرمان خپور کړ چې له مخې یې د افغانستان بانک پخوانی سرپرست رییس ملا هدایت الله بدري د شهاب الدین دلاور پرځای د کانونو او پټرولیم د سرپرست وزیر او دلاور د سرې میاشتې د ریاست د سرپرست په توګه ګومارل شوي دي.

همداراز د افغانستان بانک پخوانی مرستیال د افغانستان بانک د سرپرست رییس په توګه ټاکل شوی دی.

په عین حال کې د سرې میاشتې مخکینی سرپرست مرستیال ملا نورالدین ترابي د پېښو پر وړاندې د مبارزې د ملي ادارې د سرپرست او د سرې میاشتې پخوانی سرپرست رییس مطیع‌الله خالص د چاپېریال ساتنې د ملي ادارې د سرپرست په توګه په دنده ګومارل شوي دي.

د صنعت او سوداګرۍ او د اطلاعاتو او فرهنګ په وزارت او یو شمېر نورو ادارو کې هم د معینانو او مرستیالانو په کچه نوې ټاکنې شوي، خو اکثر کسان پخواني چارواکي دي چې له یوې دندې څخه پر بله یوه ګومارل شوي دي.

د طالبانو حکومت د هواپېژندنې ادارې په لسو ولایتونو کې د بارانونو اټکل کړی دی.

د طالبانو د حکومت د ټرانسپورټ او هوايي چلند وزارت د هواپېژندنې ادارې په یوه بیان کې ویلي دي چې نن به په بدخشان، نورستان، کونړ، لغمان، ننګرهار، لوګر، پکتیا، پکتیکا، خوست او غزني ولایتونو کې نسبتاً دروند باران وشي چې کچه به یې د اټکل له مخې د ۱۵ او ۳۰ میلي مترو ترمنځ وي.

دې ادارې همداراز د سالنګونو په ګډون د هېواد په یو شمېر شمالي، لویدیځو، جنوبي او مرکزي سیمو کې د سختو بادونو چې چټکوالی به یې په ساعت کې د ۵۰ او ۸۰ کیلومترو ترمنځ وي، او ورسره د دوړو وړاندوینه کړې ده.

په افغانستان کې په تېرو څو اونیو کې له درنو وریاوو وروسته سختو سېلابونو د هېواد نژدې نیمايي وګړي زیانمن کړل چې په ترڅ کې یې سلګونه کسان مړه او زرګونه کورونه او زرګونه جریبه کرنیزې ځمکې یا پوره او یا څه ناڅه ویجاړ شول.