د اسراییلو د اپوزیسیون د تر ټولو لوی ګوند مشر نن وویل چې که واکمن ایتلاف په غزه کې د اوربند له معاملې لاس واخلي، نو دی به په پارلمان کې د صدراعظم بنیامین نتنیاهو ملاتړ وکړي څو په واک کې پاتې شي.

نتنیاهو د حکومت چارواکو ته صلاحیت ورکړی چې په غزه کې د جګړې د پای ته رسولو او د اسراییلي برمته وو د خوشې کولو لپاره له فلسطینۍ حماس ډلې سره د احتمالي اوربند په اړه خبرې بیا پیل کړي.

امریکا او اروپايي ټولنه حماس یوه تروریستي ډله بولي، خو له نتنیاهو سره په ایتلاف کې شاملو ځینو تندلارو ملتپالو ویلي چې که اسراییل د حماس له پوره ځپلو مخکې اوربند ومني، نو دوی به له ایتلاف څخه ووځي.

د یاش اتید ګوند مشر یاعیر لاپید د پارلمان یوې غونډې ته وویل چې د برمته وو مسئله تراوسه نه ده حل شوې او نتنیاهو باید د خپل حکومت د دوام او برمته وو ترمنځ یو غوره کړي.

د لبنان حزب‌الله ادعا وکړه چې د جولان د اشغال شویو لوړو پر حرمون غره یې د اسراییل پر یوه استخباراتي مرکز د بې پیلوټه الوتکې په وسیله برید کړی دی.

ټایمزاف اسراییل ورځپاڼې پرون یکشنبې د اسراییل د پوځي او طبي سرچینو په حواله خبر ورکړ چې د اسراییل پر شمالي سیمو د حزب‌الله په راکټي او توغندويي بریدونو کې څلور تنه ټپیان شوي چې د دوو تنو حال یې نازک دی.

دا راپور وايي چې حزب‌الله پرون یکشنبې په خپل لومړي برید کې شاوخوا شل توغندي د بر جلیل په لور توغولي چې د اسراییل په خاوره کې دننه موقعیت لري او په لړ کې یې یو اسراییلی ټپي شوی دی.

د حزب‌الله او اسراییل ترمنځ نښتې له پیله د دواړو هېوادونو تر سرحدي سیمو پورې محدودې دي او دواړو خواوو ډېر کم د یو بل د خاورې ژورې په نښه کړې دي.

د هنګري صدراعظم ویکتور اوربان د مسکو او کییف له سفر وروسته چین ته رسېدلی او نن دوشنبه یې له ولسمشر شي جین پینګ سره کتلي دي.

د رویټرز خبري اژانس د راپور له مخې مسکو ته د اوربان سفر او له ولادمیر پوتین سره یې د اوکراین د سولې د احتمالي معاملې په اړه خبرو، ځینې اروپایي مشران په غسه کړي دي.

چین چې د روسیې نژدې متحد دی، د اوکراین د سولې لپاره یوه شپږ مادیزه طرح وړاندیز کړې ده.

اوربان پر خپله ایکس پاڼه یا پخواني ټویټر لیکلي، چین د سیمې هغه قدرت دی چې کولای شی د روسیې او اکراین ترمنځ سولې ته شرایط برابر کړي.

دوه میاشتې وړاندې د چین ولسمشر شي جین پینګ هم د هنګري پلازمېنې بوداپست ته سفر کړی و.

هنګري له اوکراین سره چې د روسیې جګړه په کې روانه ده، ۱۳۶ کیلو متره ګډه پوله لري.

د پښتون ژغورنې غورځنګ مشر منظور پښتین وایي، د پاکستان حکومت باید ژر تر ژره د دوی پر همکار ګیله‌من وزیر د برید عاملان ونیسي.

پر ګیله‌من وزیر پرون یکشنبه په اسلام اباد کې د چړې برید شوی او نوموړی په روغتون کې بستر دی.

منظور پښتین خبریالانو ته ویلي، که د پاکستان پولیس د برید د عاملانو په موندلو کې پاتې راځي، دا به د ده په ټکو د دې ښکاروندیي وکړي چې حکومت برید کې لاس لري.

هغه وايي: "یقیناً پر ګیله‌من باندې برید، د ټول قوم او ملت لپاره انتهایي دردونکی دی، د اسلام اباد له پولیسو غواړو چې دوی ژر تر ژره دا قاتلین (برید کوونکي) ونیسي. که نه عام ولس به دوی هم په دې کې ملوس وشماري."

تراوسه رسمي سرچینو د ګیله‌من وزیر د روغتیایي وضعیت په اړه معلومات نه دي ورکړي، خو د ټولنیزو رسنیو په انځورونو کې لیدل کېږي چې هغه د روغتون په یوه بستر داسې مهال پروت دی چې پر سر یې پټۍ لګېدلې او جامې یې په وینو دي.

ګیله‌من وزیر د پښتون ژغورنې غورځنګ هغه فعال دی چې انتقادي شعرونه هم لیکلي او د راپورونو له مخې څه موده مخکې د پاکستان د حکومت په زندان کې شکنجه شوی هم دی.

د فرانسې د عمومي ټاکنو لومړنۍ پایلې ښيي چې د کیڼ اړخو ایتلاف په غیر متوقع ډول له نورو څخه مخکې دی.

په دې توګه د ښي اړخي افراطي ګوند مشره مارین لوپین د کیڼ اړخي ایتلاف څخه وروسته پاتې ده.

اوس که دا نتیجه وروستۍ شي، دا به د فرانسې پارلمان په درېیو لویو ډلو وویشي چې مختلف نظریات تعقیبوي.

تر پرون ماښام د جولای په اوومه، تمه کېده چې کیڼ اړخي ایتلاف به د ۱۷۲ او ۲۱۵ ترمنځ څوکۍ وګټي.

تمه کېږي چې د ولسمشر ایمانویل مکرون په مشرۍ مرکزي ایتلاف به ۱۸۰ څوکۍ وګټي.

د ښي اړخه ګوند مشره مارین لو پین، چې تمه کېده د سږ کال ټاکنې به وګټي، په درېیم ځای کې راغلې.

ټاکل شوې د اروپا د ملتونو د جام نیمه پایلوبې سبا د جولای ۹مه پیل شي.

په لومړۍ لوبه کې به هسپانیا له فرانسې سره مخ شي.

د دې لوبې ګټونکی به وروستي پړاو یا فاینل ته لار ومومي.

هسپانیا د جرمني په وړاندې په بریا سره نیمه پایلوبې ته لار پيدا کړې او فرانسې هم پرتګال ته ماته ورکړې ده.

انګلستان به په دوهمه نیمه پایلوبه بله ورځ له هالنډ سره لوبه کوي.

د اروپا د ملتونو جام فاینل د یکشنبې په ورځ جولای ۱۴مه د برلین د فوټبال په لوبغالي کې ترسره کېږي.

د اروپا د ملتونو په جام کې د فوټبال د نړیوال جام برعکس د درېیم مقام د ټاکلو لپاره لوبه نه کېږي.

د پښتون ژغورنې غورځنګ یا "پي‌ټي‌ایم" یو مخکښ غړی او منتقد شاعر ګیله‌من وزیر د یکشنبې په ورځ په اسلام‌اباد کې د ځینو کسانو په برید کې ټپي شوی دی.

د پښتون ژغورنې غورځنګ غړو ویلي چې ګیله‌مان د اسلام اباد په ډي سکټور سیمه کې د چړې په ګوزارونو سخت ټپي او روغتون ته وړل شوی دی.

لا رسماً چارواکو د ګیله‌من وزیر د ټپي کېدو په اړه څه نه دي ویلي، خو د پښتون ژغورنې غورځنګ غړو له هغې ډلې سهېل نور خان په خپله ایکسپاڼه تور لګولی چې پر ګیله‌من او زکیم خان باندې د ازاد خان انور په نوم د تحریک انصاف ګوند یوه غړي او د هغه کسانو برید کړی دی.

ګیله‌من وزیر چې د پښتون ژغورنې غورځنګ د بنسټګر منظور احمد پښتین له نږدې ملګرو دی څو میاشتې د پاکستان امنیتي ادارو بندي او د راپورونو له مخې شکنجه کړی و.

د پښتون ژرغونې غورځنګ یا "پي‌ټي‌ایم" PTM یو مخکښ غړی ګیله‌من وزیر نامعلومو کسانو سخت ټپي کړی دی.

په نوموړي دغه برید د پاکستان پلازمېنې اسلام اباد د بي۱۷ B17 په نامه ښارګوټي کې نن مازدیګر ناوخته شوې ده.

"پي‌ټي‌ایم' او د اسلام‌اباد پولیسو په دې اړه تر دې دمه په رسمي ډول څه نه دي ویليو خو ګیله‌من وزیر ته نږدې کسانو ازادي راډیو ته تایید کړه چې هغه اوسمهال د اسلام اباد په "پي‌آی‌ایم‌ایس" روغتون کې تر درملنې لاندې دی او روغتیايي وضعیت یې نازک دی.

سرچینه وایي، لا معلومه نه ده چې پر ګیله‌من وزیر دا برید چا کړی دی، خو هغه تر دې څو میاشتې مخکې هم نامعلومو کسانو بندي کړی و.

نوموړي له راخلاصېدو وروسته ادعا کړې وه چې د پاکستان استخباراتي ادارو نیولی او سخت شکنجه کړی دی.

ګیله‌من وزیر د پښتون ژغورنې غورځنګ مخکښ غړی او په ټولنیزو رسنیو د پاکستان ضد څرګندونو او پښتنو ته د حق غوښتلو له کبله مشهور دی.

دا پېښه داسې مهال رامنځته کېږي چې همدا نن د پښتون ژغورنې غورځنګ غړو د پاکستان د پوځ له لورې د "عزم استحکام " پوځي عملیاتو په غبرګون کې د پراخه لاریونونو خبر ورکړی دی.

د یورو جام د کوارټرفاینل په پړاو کې تېره شپه د جولای په ۶مه نېټه لومړۍ سیالي د انګلستان او سویس ترمنځ ترسره شوه چې د پينالټي شوټونو په پړاو کې انګلستان وګټله.

د یادې سیالۍ د دویمې نیمايي په پينځه اویایمې دقیقې کې سویس لومړی ګول ترسره کړ او انګلستان بیا په اتیایمه دقیقه کې د مساوي ګول وواهه.

یاده سیالي د لوبې تر ټاکلي او اضافي وخته پورې مساوي روانه وه چې بلاخره د پینالټي شوټونو په وسیله انګلستان ۵ـ۴ وګټله.

دغه راز د ورځې بله منځلوبه د ترکیې او نیدرلینډ/هالنډ ترمنځ ترسره شوه چې ۲ـ۱ نیدرلینډ وګټله.

که څه هم د دې سیالۍ په لومړۍ نیمايي کې ترکیې ګول وهلی و، خو نیدرلینډ په دویمې نیمايي کې دوه ګولونه ووهل او نیمه پایلوبې ته ووتل.

ټاکل شوې ده چې د نیمه پایلوبې پړاو د جولای په ۹مه نېټه د هسپانیې او فرانسې ترمنځ پیل شي او دویمه نیمه پایلوبه به د انګلستان او نیدرلینډ ترمنځ د جولای په ۱۰مه نېټه وي.

د ویلو ده چې د یورو جام پایلوبه د جولای په ۱۴مه نېټه د جرمني په برلین ښار کې ترسره کېږي.

حماس ډلې، د سرتېرو او نارینه‌وو په ګډون د اسراییلي برمته شویو د خوشې کولو د پیل لپاره د امریکا د متحدو ایالتونو وړاندیز ومانه.

ویل شوي دغه یرغمل شوي کسان به د هغې موافقې چې په غزه کې د جګړې د ختمولو لپاره ده، تر لومړي پړاو ۱۶ ورځې وروسته خوشې کېږي.

د امریکا متحد ایالتونه او اروپايي ټولنه حماس ډله یو تروریستي سازمان ګڼي.

د حماس یوه لوړرتبه چارواکي چې نه یې غوښتل نوم یې واخیستل شي، د شنبې په ورځ له رویټرز خبري اژانس سره په خبرو کې دا موضوع تایید کړه.

حماس ډلې له خپلې هغې غوښتنې تر شا شوې چې لومړی یې له اسراییل غوښتي وو د موافقې تر لاسلیک مخکې د دایمي اوربند ژمنه وکړي.

یوه فلسطیني چارواکي چې د سولې د ټینګښت لپاره له نړیوالو هڅو خبر و، ویلي که اسراییل یې ومني، د یرغمل شویو د خلاصون لپاره د امریکا وړاندیز ښايي د یوې موافقې چوکاټ ته زمینه برابره کړي چې په مرسته یې په غزه کې د اسراییل او حماس ترمنځ نهه میاشتنۍ جګړه ختمه شي.