د لاسرسۍ وړ لېنکونه

تازه خبر
جمعه ۲۴ وری ۱۴۰۳ کابل ۰۷:۵۵

افغانستان

د طالبانو یو پلاوی روانه اونۍ چین ته ځي  

د طالبانو د سوداګرۍ او صنایعو سرپرست وزیر، نور الدین عزیزي
د طالبانو د سوداګرۍ او صنایعو سرپرست وزیر، نور الدین عزیزي

د طالبانو د سوداګرۍ او صنایع وزارت ویاند اخندزاد عبدالسلام جاوید نن رویټرز اژانس ته وویل، چې د سوداګرۍ او صنایع سرپرست وزیر حاجي نورالدین عزیزي به په چین کې د یو کمربند یوې لارې د پروژې په غونډه کې برخه واخلي.

دا غونډه د سې شنبې او چهارشنبې په ورځو په چین کې جوړیږي.

چین او پاکستان د مې په میاشت کې ویلي وو، چې په کابل کې واکمن طالبان به وهڅوي چې د لسګونو میلیارډو ډالرو په ارزښت له دې پروژې سره یوځای شي.

چین د نړۍ د نورو هیوادو په څیر د طالبانو حکومت په رسمیت نه پيژني، خو د طالبانو تر بیا واکمنۍ وروسته یې د افغانستان په ځینو کانونو کې پانګونې ته زړه ښه کړی دی.

د ورځې تازه خبرونه دلته ولولئ

یوناما: پښتو د نړۍ څلورمه ژبه ده چې په فضا کې پرې خبرې وشوې

ارشیف
ارشیف

په افغانستان کې د ملګرو ملتونو مرستندوی ماموریت یا یوناما نن فضا ته د انسان د ختو د نړیوالې ورځې په مناسبت په یوه پیغام کې ویلي چې پښتو د نړۍ څلورمه ژبه ده چې په فضا کې پرې خبرې وشوې.

له نن څخه ۶۳ کاله پخوا د اپرېل په دوولسمه روسي ستورمزلی یوري ګاکارین لومړنی کس و چې فضا ته یې سفر وکړ.

یوناما وايي، دې سفر مرسته وکړه چې فضا ته د انسانانو لار پرانیستل شي.

عبدالاحد مومند لومړنی افغان و چې په ۱۹۸۸م کال کې فضا ته لاړ او په فضايي تمځي کې یې ۹ ورځې تېرې کړې.

مومند له فضا څخه په افغانستان کې له خپلې مور سره خبرې وکړې.

نوموړی اوس د جرمني په شتوتګارت کې اوسي.

طالبان: ترکش ایرلاینز افغانستان ته د الوتنو بیا پیلول غواړي

د ترکش اییرلاینز یوه الوتکه
د ترکش اییرلاینز یوه الوتکه

د طالبانو د ټرانسپورټ او هوايي چلند وزارت وايي، د ترکیې هوايي شرکت، ترکش ایرلاینز غواړي چې افغانستان ته الوتنې بیا پیل کړي.

د ۲۰۲۱ د اګست له ۱۵مې وروسته د ترکش اییرلاینز په شمول ګڼو بهرنیو هوايي شرکتونو افغانستان ته الوتنې ودرولې.

د طالبانو د ټرانسپورټ او هوايي چلند وزارت ویندوی احمدالله احمدي پر خپله ایکسپاڼه یا پخواني ټویټر لیکلي چې افغانستان ته د ترکش اییرلاینز د الوتنو د بیا پیلېدو په لاره کې هیڅ راز تحنیکي ستونزه نه شته.

د ترکیې هوايي شرکت پخوا د کابل- استانبول او مزارشریف - استانبول ترمنځ الوتنې کولې.

رینا امیري د جایکا هڅې ستایلي

د افغان ښځو، نجونو او بشري حقونو لپاره د امریکا ځانګړې استازې رینا امیري
د افغان ښځو، نجونو او بشري حقونو لپاره د امریکا ځانګړې استازې رینا امیري

د افغان ښځو، نجونو او بشري حقونو لپاره د امریکا ځانګړې استازې رینا امیري د افغانستان او سیمې لپاره د زده‌کړې او پراختیا په چارو کې د جاپان د نړیوالې همکارۍ د ادارې سا جایکا JICA د مهمو نوښتونو مننه کړې او د افغانانو په تېره د ښځو لپاره د نورو فرصتونو د برابرولو په اړه د نورو خبرو د ترسره کېدو هیله ښودلې ده.

اغلي امیري پرون پنجشنبې په خپله ایکس پاڼه یا پخواني ټویټر کې د جاپان لپاره د امریکا له سفیر او د هغه له ټیم نه هم مننه کړې چې د افغانستان په اړه د ګټورو غونډو زمینه یې ورته برابره کړې ده.

اغلي امیري همدارنګه د افغانستان لپاره د ملګرو ملتونو د سرمنشي له پخواني ځانګړي استازي تدامیچي یاماماتو او د ساسکاوا د سولې د بنسټ له مشرې هوریبا سره د لیدنې خبر ورکړی او ویلي یې دي چې له دوی سره یې د افغانستان پر اوسني وضعیت خبرې کړې او ورڅخه مننه یې کړې چې د افغانستان په اړه یې هڅې جاري ساتلي دي.

په بدخشان کې څه باندې ۲۰۰ جریبه شاړه ځمکه په شنو کروندو بدله شوې

د افغانستان په عمومي نقشه کې د بدخشان ولایت موقعیت
د افغانستان په عمومي نقشه کې د بدخشان ولایت موقعیت

د خوړو نړیوال پروګرام یا ‌"ډبلیو‌ایف‌پي" وایي، په بدخشان ولایت کې یې د کلیوالي ټولنو په مرسته څه باندې دوه سوه جریبه شاړه ځمکه په شنو کروندو بدله کړې ده.

د دې پروګرام د افغانستان څانګې پرون پنجشنبې په خپله ایکسإپاڼه یا پخواني ټویټر کې کښلي چې دا له دې له سره مرسته کوي چې کورنۍ خوړو ته وده او خپلو ماشومانو ته خواړه برابر کړي.

د خوړو د نړیوال پروګرام په وینا، دا هغه څه دي چې دوی یې کولای شي که د اړتیا وړ بسپنه ترلاسه کړي.

په افغانستان کې د خوړو د نړیوال پروګرام د ارتباطاتو مرستیال ضیا الدین صافي څه کم دوه اوونۍ مځکې ازادي راډیو ته ویلي وو چې د خوړو نړیوال پروګرام په افغانستان کې د راروانو شپږو میاشتو په مخه د خپلو ټولو پروګرامونو لپاره ۷۶۰ میلیونه امریکايي ډالرو ته اړتیا لري.

د هغه په خبره په اوس وخت کې د افغانستان نږدې ۱۶ میلیونه وګړي چې د دې هېواد د نفوس شاوخوا یو پر درېیمه برخه کېږي، نه پوهېږي چې د بل وخت خواړه به له کومه کوي.

د افغانستان ځینو سیمو کې د واورو، ورښتونو، بادونو او سېلابونو د راوتو اټکل شوی

ارشیف: په پروان کې د باران ورېدو یو انځور
ارشیف: په پروان کې د باران ورېدو یو انځور

د طالبانو د حکومت د ټرانسپورټ او هوایي چلند وزارت د هوا پېژندنې ریاست د خبرتیا له مخې نن د وري یا حمل ۲۴مه هم د افغانستان په یو شمېر ولایتونو کې د واورې، شدیدو ورښتونو، چټکو بادونو او د سېلابونو د راوتلو اټکل کېږي.

دغه ریاست په خپله ویبپاڼه کې بدخشان، تخار، بغلان، کونړ، بلخ، پروان، پنجشېر، کاپیسا، کابل، لوګر، نورستان، پکتیا، ننګرهار، لغمان، زابل، کندهار، خوست، ارزګان، دایکندي، غور، هرات، فراه، نیمروز، بادغیس، سرپل، بامیان، میدان وردک، غزنی، فاریاب او جوزجان له خطر سره مخ ولایتونه یاد کړي دي.

په افغانستان کې د څو کلونو وچکالۍ وروسته، وروستیو ورښتتونو بزګر له خپلو کروندو د راتلونکي کال ښه حاصل ته هیله‌من کړي دي.

د طالب چارواکو ادعا؛ کونړ کې ۲ داعشیان وژل شوي او یو بل ژوندی نیول شوی

د افغانستان په نقشه کې کونړ ولایت
د افغانستان په نقشه کې کونړ ولایت

په کونړ طالب سیمه‌ییز چارواکې وايي، په دې ولایت کې يې د داعش یا اسلامي دولت ډلې دوه وسله‌وال وژلي دي.

د کونړ د امنیې قومنداني څخه په خپرې شوې اعلامیه کې ادعا شوې چې دا کسان تېره شپه د څوکۍ ولسوالۍ د دیوه‌ګل درې په سپیدار تنګي کې د یو لړ عملیاتو په پایله کې وژل شوي او یو تن يې ژوندی نیول شوی دی.

په اعلامیه کې ویلي شوي چې له نیول شوي کس تحقیقات روان دي.

تراوسه داعش وسله‌والې د خپلو دې غړیو د وژل کېدو په اړه څه نه دی ویلي، خو په دیوه‌ګل دره وخت ناوخت داعش وسله‌وال پر طالبانو د بریدونو او ورته د مرګ ژوبلې د اړوې ادعاوې کوي.

د افغانستان په یو شمېر ولایتونو کې بیا د ورښتونو او سېلابونو وړاندوېنه شوې

ارشیف
ارشیف

د طالبانو د حکومت د ترانسپورت او هوايي چلند وزارت د هواپېژندنې ادارې نن او سبا( د اپرایل ۱۱ او ۱۲ مه) د افغانستان په یو شمېر ولایتونو کې د درنې واورې، تېزو بارانونو او بادونو او د سېلابونو د راوتو اټکل کړی دی.

دې ادارې نن پر خپلې وېب پاڼې په بدخشان، تخار، بغلان، کونړ، بلخ، پروان، پنجشېر، کاپیسا، کابل، لوګر، نورستان، پکتیا، ننګرهار، لغمان، زابل، کندهار، خوست، اروزګان، دایکندي، غور، هرات، فراه، نیمروز، بادغس، سرپل، بامیان، میدان وردګ، غزني، فاریاب او جوزجان ولایتونو کې د شدیدو ورښتونو او سېلابونو د راوتو وړاندوېنه کړې ده.

د دغو ولایتونو اوسیدونکو ته ویل شوي چې د سېلونو خطر ته پام ولري.

وروستیو ورښتونو په افغانستان هغوو کروندګرو ته چې وچکالۍ ځپلي وو، هیله پیدا کړې چې په روان کال کې به يې حاصلات ښه وي.

یو امریکایي چارواکی: زموږ د مالیه ورکوونکو پیسې د بې وزلو افغانانو پر ځای د طالبانو او ملګرو جیبونو ته یې ځي

د امریکا د استازو جرګې د بهرنیو اړیکو د کمېټې مشر مایکل مک کال
د امریکا د استازو جرګې د بهرنیو اړیکو د کمېټې مشر مایکل مک کال

یو امریکايي چارواکی وايي، د امریکا د مالیه ورکوونکو پیسې بې وزلو افغانان ته نه؛ بلکې د طالبانو او د هغوی د متحدینو جیبونو ته ځي.

د امریکا د استازو جرګې د بهرنیو اړیکو د کمېټې مشر مایکل مک کال د چهارشنبې په ورځ د امریکا د نړیوالې مرستندویه ادارې(USAID) له مشرې سمانتا پاور سره په یوې کتنې کې ویلي، د امریکا بشري مرستې بې وزلو افغانانو؛ په ځانګړې توګه ښځو او ماشومان ته نه رسیږي، او پوهیږو چې دا مرستې د طالبانو جیبونو ته ځي.

په دې کتنه کې مېرمن پاور په بېلابېلو هیوادونو کې د امریکا د بشري مرستو د اغېزناکتوب په اړه خبرې کولې.

مک کال دا هم ویلي: "افغانستان په نړۍ کې د ښځو لپاره ترټولو ځورونکی رژیم لري."

امریکا په تېرو دوو کلونو کې له افغانستان سره څه باندې دوه میلیارده ډالره مرسته کړې ده.

په کتنه کې په افغانستان کې د طالبانو له خوا د بشري مرستو څخه د ناوړه استفادي په اړه هم خبرې شوې دي.

له دې وړاندې هم یو شمېر راپورونو کې ادعا شوې چې طالبان د نړیوالو مرستې بې وزلو افغانانو ته نه؛ بلکې په خپلو کې سره وېشي، خو دوی دا ادعاوې رد کړې دي.

د بشري حقونو د څار سازمان: طالبان د نړیوالو د نه حساب له امله د ښځو خلاف زړور شوي

د بشري حقونو د څار سازمان
د بشري حقونو د څار سازمان

د بشري حقونو د څار سازمان وايي، طالبانو ځکه پرله پسې د بندیزونو لګولو پالېسۍ ته مخه کړې، چې نړیوالې ټولنې ورسره حساب نه دی کړی.

دا خبرې، د څار سازمان د ښځو د حقونو مرستیالې څېړونکې، سحر فطرت په هغه ویډیو پیغام کړي چې نن د دې سازمان د ښځو د برخې مرستیالې هیدربار پر خپلې ایکس پاڼې(پخواني ټویټر) خپره کړې ده.

سحر فطرت په دې ویډیو پیغام کې وايي،­"له دوه نیمو کلونو سیسټماټیک ناوړه چلند وروسته چې طالبانو د ملګرو ملتونو او اړونده دولتونو له خوا له حساب ورکونې سره مخ نه شول، دې چارې طالبان د ښځو په نښه کولو کې لا زړور کړل چې اوس په ښکاره خپلې کړنې اعلانوي."

د بشري حقونو د څار سازمان ټینګار کوي چې حکومتونه باید طالبان د ښځو او نجونو پر وړاندې د دغو سرغړونو په خاطر مسوول وبولي.

طالبانو له بیا واکنمیدو وروسته پر افغانو ښځو او نجونو د زده کړو او کار له بندیزونو سربیره، ښځې له ورزشي کلبونو، عمومي حمانونو او تفریحي پارکونو ته له تګ راګرځولې دي.

طالبانو د حماس سیاسي مشر ته د کورنۍ د غړو د وژلو تسلیت ویلی

د طالبانو د حکومت د بهرنیو چارو سرپرست وزیر امیرخان متقي
د طالبانو د حکومت د بهرنیو چارو سرپرست وزیر امیرخان متقي

د طالبانو د حکومت د بهرنیو چارو سرپرست وزیر امیرخان متقي د حماس د سیاسي دفتر له مشر اسماعیل هنیه سره خبرو کې هغه ته د کورنۍ د ۷ غړو د وژلو تسلیت ویلی.

حماس چې اروپایي ټولنه او امریکا یې د ترهګرو په توګه پېژني تایید کړې چې د اسراییلو په برید کې تېره ورځ د اسماعیل هنیه درې زامن او څلور لمسیان وژل شوي دي.

د طالبانو ویاند ذبیح الله مجاهد پر خپله ایکس پاڼه/ پخواني ټویټر د متقي او هنیه د ټیلفوني خبرو خبر ورکړی دی.

د هنیه د کورنۍ پر دغو غړو د چهارشنبې په ورځ د غزې د شاتي په نوم د کډوالو په یوه کمپ کې برید شوی دی.

د هغه د وژل شویو زامنو نومونه هازم، امیر او محمد یاد شوي او اسراییل ادعا کړې چې پوځي فعالیتونه یې درلودل.

نور راوښيه

XS
SM
MD
LG