د لاسرسۍ وړ لېنکونه

تازه خبر
یکشنبه ۶ کب ۱۴۰۲ کابل ۰۴:۳۸

افغانستان

د اروپایي ټولنې استازی: د محکمې له پریکړې پرته د افغان فعالانو نیول غیر قانوني دي

د افغانستان لپاره د اروپایي ټولنې ځانګړی استازی - ارشیف
د افغانستان لپاره د اروپایي ټولنې ځانګړی استازی - ارشیف

د افغانستان لپاره د اروپایي ټولنې ځانګړی استازی ټوماس نیکلاسن وایي، په افغانستان کې د محاکمې له پریکړې پرته د هغو افغانانو نیونه چې د خپلو او د نورو د حقونو دفاع کوي، غیرقانوني ده.

نیکلاسن نن سې شنبې په خپله ایکس پاڼه کې ویلي، چې دغه نیونې همدارنګه د کورني مشروعیت او رغنده خبرو اترو لپاره اړین باور هم کمزوری کوي.

نیکلاسن دغه څرګندونې د هغه کمپاین په ملاتړکړي، چې د مطیع الله ویسا، ژولیا پارسي او ندا پرواني د خوشې کیدو لپاره پیل شوی دی.

په عین حال کې د اروپایي ټولنې د بهرنیو چارو او امنیتي پالیسیو د مشرجوزیف بوریل ویاندې نبیلا مسرالي په یوه پوست کې ویلي، چې اروپایي ټولنه واکمنو طالبانو غواړي چې غیرقانوني نیونې ودروي او دغه فعالان او د هغوی د کورنۍ غړي سمدستي خوشې کړي.

د زده کړې د فعال او قلم لار ټولنې مشرمطیع الله ویسا له شپږ میاشتې راهیسې له طالبانو سره بندي دی او دوه نورې ښځینه فعالانې په دې وروستیو کې نیول شوي دي.

د ورځې تازه خبرونه دلته ولولئ

مولوي کبیر: کورني او بهرني بنسټونه دې د وچکالۍ ځپلو لاسنیوی وکړي

د طالبانو د ریاست الوزرا سیاسي مرستیال، مولوي عبدالکبیر
د طالبانو د ریاست الوزرا سیاسي مرستیال، مولوي عبدالکبیر

د طالبانو د ریاست الوزرا سیاسي مرستیال له کورنیو او بهرنیو بنسټونو او مرستندویو ادارو وغوښتل چې په افغانستان کې د وچکالۍ ځپلو لاسنیوی وکړي.

ملي راډیو ټلویزیون چې د طالبانو په کنټرول کې دی پرون په خپله ایکس شبکه یا پخواني ټویټر کې لیکلي چې مولوي عبدالکبیر دا خبره د لغمان ولایت له کوچیانو او قومي مشرانو سره په کتنه کې کړې ده.

وړاندې لیکل شوي چې مولوي عبدالکبیر ویلي، وچکالۍ په افغانستان کې د ملیونونو وګړو ژوند له ستونزو سره مخامخ کړی دی.

که څه هم نن او سبا د افغانستان په ۲۴ ولایتونو کې د واورې او باران د اورېدو، دغه راز په ځینو سیندي حوزو کې د سېلابونو د راوتلو اټکل شوی دی، خو بزګران وايي چې لا هم د تېرو کلونو د وچکالیو اغېزې ختمې شوې نه دي.

سبا د افغانستان په ۲۱ ولایتونو کې د ګوزڼ پرضد د واکسین کمپاین پيلیږي

تصویر له ارشیفه
تصویر له ارشیفه

سبا دوشنبه د افغانستان په ۲۱ ولایتونو کې د ماشومانو د ګوزڼ یا پولیو ضد واکسین ورکولو کمپاین پیلېږي.

له پولیو خلاص افغانستان بنسټ چې د روغتیا نړیوال سازمان او یونیسف یې ملاتړ کوي، په خپله وېبپاڼه کې نن لیکلي چې دغه کمپاین به په کابل، کندوز، تخار، بغلان، نورستان، کونړ، لغمان، پروان، کاپیسا، ننګرهار، پکتیا، پکتیکا، خوست، غزني، زابل، ارزګان، کندهار، هلمند، نیمروز، فراه او هرات کې تطبیق شي.

تېر میلادي کال په افغانستان کې د ګوزڼ ۶ مثبتې پېښې ثبت شوې وې چې ټولې په ننګرهار کې وې، خو سږکال کومه مثبته پېښه نه ده ثبت شوې.

افغانستان او پاکستان په نړۍ کې هغه دوه هېوادونه دي چې لا هم د ماشومانو د ګوزڼ ناروغي په کې ختمه شوې نه ده.

امیرخان متقي د یوه پلاوي په مشرۍ ترکمنستان ته لاړ

د طالبانو د بهرنیو چارو سرپرست وزیر، امیر خان متقي
د طالبانو د بهرنیو چارو سرپرست وزیر، امیر خان متقي

د طالبانو د بهرنیو چارو سرپرست وزیر، امیر خان متقي د یوه هیئت په مشرۍ نن ترکمنستان ته لاړ.

د دغه وزارت مرستیال ویاند حافظ ضیا احمد په خپله ایکس شبکه یا پخواني ټویټر کې لیکلي چې ښاغلی متقي د ترکمنستان د بهرنیو چارو د وزیر رشید مردوف په بلنه پر دوه اړخیزو مسایلو د بحث لپاره هغه هېواد ته لاړ.

هغه زیاته کړې چې د طالبانو د هیئت په ترکیب کې د کانونو او پټرولیم وزارت، د وسپنې پټلۍ او برېښنا شرکت چارواکي شامل دي.

تر اوسه د ترکمنستان په ګډون د نړۍ یوه هېواد هم د طالبانو سرپرست حکومت په رسمیت نه دی پېژندلی، خو ترکمنستان له ګوتو په شمېر هېوادونو دی چې له طالبانو سره نږدې اړیکې لري.

د ملګرو ملتونو امنیت شورا سبا د افغانستان لپاره د ځانګړي استازي پر ټاکلو بحث کوي

له ارشیفه د ملګرو ملتونو د امنیت شورا د غونډو د تالار تصویر
له ارشیفه د ملګرو ملتونو د امنیت شورا د غونډو د تالار تصویر

ټاکل شوې د ملګرو ملتونو امنیت شورا سبا دوشنبه د افغانستان لپاره د نوي ځانګړي استازي د ټاکلو په باب بحثونه وکړي.

په ملګرو ملتونو کې د افغانستان دایمي استازولۍ ویلي چې د ملګرو ملتونو سرمنشي انتونیو ګوتیریش به امنیت شورا ته د نوي ځانګړي استازي د ټاکلو او د دوحې دوه ورځنۍ غونډې په باب راپور وړاندې کړي.

د دوحې غونډه تېره یکشنبه او دوشنبه د ملګرو ملتونو په کوربه توب وشوه چې د افغانستان پر ګڼو اړوندو مسایلو په کې خبرې وشوې.

د طالبانو حکومت چې د دوحې په غونډه کې ګډون نه و کړی، د افغانستان لپاره د ملګرو ملتونو د نوي ځانګړي استازي له ټاکلو سره مخالفت کړی دی.

اتریش کې یو افغان پناه غوښتونکی د ۳ ښځو د وژنې په تور نیول شوی

د اتریش یو شمېر پولیس - ارشیف
د اتریش یو شمېر پولیس - ارشیف

د اتریش د پلازمېنې ویانا پولیسو پرون د درېیو ښځو د وژنې په تړاو د یوه افغان پناه غوښتونکي د نیولو خبر ورکړ.

دا پېښه وروسته له هغې وشوه چې یوه کس په دانیوب سیند کې د وینو څاڅکي ولیدل او پولیسو ته یې خبر ورکړ او پولیسو تر پلټنې وروسته د سیمې په یوه بدنام نایټ کلب کې د درېیو ښځو مړي وموندل.

د ویانا د پولیسو ویاند فلیپ هاسلینګر پرون اسوشېټېډ پریس خبري اژانس ته وویل، د درېیو ښځو پر بدن د چړې په ذریعه ټپونه ښکارېدل او سم د لاسه جنايي څېړنې پیل شوې.

پولیسو هلته څلورمه ښځه هم پیدا کړې او له هغې د عیني شاهدې په توګه څېړنې شوې دي.

د هاسلینګر په وینا، د پېښې ځای ته څېرمه یو ۲۷ کلن سړی چې چاړه ورسره وه ونیول شو چې د پولیسو په وینا مشکوک سړی افغان پناه غوښتونکی دی.

سرپل: طالبانو د «بداخلاقۍ» په تور په دُرو د دوو کسانو د وهلو خبر وکړ

له ارشیفه د سرپل ولایت یو تصویر
له ارشیفه د سرپل ولایت یو تصویر

د طالبانو پر مجازاتوونکو اقداماتو د انتقادونو په منځ کې د طالبانو سترې محکمې پرون په سرپل ولایت کې د «بداخلاقۍ» په تور په دُرو د دوو کسانو د وهلو خبر وکړ.

دغې محکمې پرون شنبه په یوه خبرپاڼه کې ویلي چې د دغو تورنو کسانو دوسیې د ابتداييه محکمې له خوا نهايي شوې وې او دوی د بند موده هم تېره کړې ده.

دا لا څرګنده نه ده چې دغه کسان دقیقاً په کوم جرم تورن شوي او څومره وخت یې په زندان کې تېر کړی دی.

طالبانو تېره پنج شنبه په غزني کې دوه کسان د قتل په تور په عام محضر کې قصاص کړل چې دې اقدام یې په نړیواله سطحه انتقادونه وپارول.

پر طالبانو یو انتقاد دا دی چې په ټولو ادارو کې یې خپل کسان ګمارلي او د محاکمې په بهیر کې شفافیت نه شته.

په اروپا کې د افغان حقوقپوهانو سراسري ټولنه: افغانستان کې دې اساسي قانون انفاذ شي

د افغانستان د پرځیدلي جمهوري نظام اساسي قانون - تصویر له ارشیفه
د افغانستان د پرځیدلي جمهوري نظام اساسي قانون - تصویر له ارشیفه

په اروپا کې د افغانستان د حقوقپوهانو سراسري ټولنې یو وار بیا په افغانستان کې د اساسي قانون د انفاذ غوښتنه وکړه.

د دې ټولنې مشر میر عبدالواحد سادات پرون له ازادۍ راډیو سره په خبرو کې دا موضوع یاده کړه او ویې ویل:

" د عدم مشروعیت بحران د ختمولو لپاره په افغانستان کې د اساسي قانون نافذ کول، اساسي شرط او یوازنۍ لار ده."

طالبانو شا و خوا دوه نیم کاله مخکې پر افغانستان د ولکې له بیاټینګولو وروسته ټول قوانین ملغی اعلان کړل او وايي ټولې چارې د شریعت د حکمونو له مخې پرمخ بیايي.

د طالبانو د حکومت ویاند ذبیح اله مجاهد د جمعې په ورځ ویلي، په افغانستان کې د اساسي قانون نه شتون، د قانونی خلا په معنی نه دی.

د افغانستان په ۲۴ ولایتونو کې د ورښتونو او سېلابونو اټکل شوی

تصویر له ارشیفه
تصویر له ارشیفه

د طالبانو د اوبو او انرژۍ وزارت نن او سبا دوشنبه د افغانستان په ځینو سیندي حوزو کې د اوبو د سطحې لوړېدو او د سېلابونو د راوتلو اټکل کړی دی.

دغه وزارت پرون د هواپېژندنې ادارو د اټکل له مخکې ویلي چې د ناڅاپي اورښتونو او سېلابونو راوتلو ډېر اټکل د هریرود او هلمند په سيندي حوزو کې شوی دی.

تر دې مخکې د افغانستان د هواپېژندنې ادارې تر سبا دوشنبې په ۲۴ ولایتونو کې د درنو اورښتونو، واورې اورېدو او د سېلابونو د راوتلو اټکل کړی و.

د اوبو او انرژۍ وزارت وايي د فراه، خاشرود، هلمند، ارغنداب، ترنک او غزني په سیندونو کې هم د اوبو د سطحې لوړېدو اټکل شوی دی.

وزارت د دغو سیندونو په څنډو کې له استوګنو خلکو غوښتنه کړې چې مخکې له مخکې خبر وي او د خوندیتوب اصولو ته پام وکړي.

د افغانستان په اکثر ولایتونو کې د واورو، بارانونو او سېلابونو د بهېدو اټکل شوی

ارشیف
ارشیف

سبا او بل سبا د افغانستان په اکثر ولایتونو کې د درنو واورو، بارانونو او سېلابو د بهېدلو اټکل کېږي.

د طالبانو د ټرانسپورټ او هوایي چلند د وزارت د هوا پېژندنې د ریاست په وینا، په کابل، سمنګان، غور، دایکندي، رزګان، زابل، کندهار، هلمند، نیمروز، فراه، هرات، بامیان، میدان وردګ، بادغیس، جوزجان، سرپل، غزني، پکتیکا، خوست، پکتیا، لوګر، پروان او بغلان کې یکشنبه او دوشنبه د ورښتونو امکانات شته.

په افغانستان کې که یوه لور ته اورښتونو ته بې کوره خلک اندېښمن دي، بل لور ته بزګران خوښ دي چې د وچکالۍ مخه به تر یوه بریده ورسره ونیول شي.

د میدان وردګ په جلریز کې د سېلاب ځپلیو لپاره ۷۵ کورونه جوړ شول

د افغانستان په عمومي نقشه کې د میدان وردګ ولایت موقعیت
د افغانستان په عمومي نقشه کې د میدان وردګ ولایت موقعیت

د میدان وردګ ولایت په جلریز ولسوالي کې د سېلاب ځپلیو لپاره ۷۵ کورونه جوړ شول.

دا کورونه د جلریز ولسوالي په تکاني سیمه کې 'ډي آر سي' موسسې ودان کړي چې په هر کور کې درې پخې کوټې، یو پخلنځی او یو تشناب شته.

د سیمې خلکو ازادي راډیو ته وویل چې د دې کورونو شاوخوا دېوالونه نه شته، سړکونه یې نه دي تېر شوي، ښوونځی او کلینیک هم نه دی ورته جوړ شوی.

د جلریز ولسوالي په تکاني سیمه کې اووه میاشتې مخکې سېلابونه راغلي وو چې د سر او مال زیان یې اړولی و.

نور راوښيه

XS
SM
MD
LG