د لاسرسۍ وړ لېنکونه

تازه خبر
پنجشنبه ۱۰ غبرګولی ۱۴۰۳ کابل ۰۶:۵۰

افغانستان

امریکا په افغانستان کې د خپل یوه وګړي د نیول کېدو خبر ترلاسه کړی

ارشیف: د امریکا بیرغ
ارشیف: د امریکا بیرغ

د امریکا د بهرنیوچارو وزارت وايي چې په افغانستان کې د یوه امریکايي وګړي د نیول کېدو خبرونه یې ترلاسه کړي دي.

دې وزارت پرون په یوه بیان کې وویل چې اوسمهال په دې اړه د ویلو لپاره څه نه لري، خو امریکايانو ته یې خبرداری ورکړی چې افغانستان ته له سفر کولو دې ډډه وکړي، ځکه د بهرنیو چارو وزارت په وینا، په افغانستان کې د امریکايي وګړو د اختطاف یا د هغوی پر وړاندې د تشدد ګواښ ډېر دی.

دا څرګندونې داسې مهال کېږي چې د 'آی اې ایم' په نوم د نړیوالې مرستندویې ټولنې ۱۸ کارکوونکي په دې وروستیو کې په غور ولایت کې نیول شوي دي.

سرچینو ازادي راډیو ته ویلي چې په دې کسانو کې یو امریکایی هم شامل دی.

په غور کې د طالبانو سیمه‌ییزو چارواکو ادعا کړې چې دا کسان عیسویت دین ته د خلکو په رابللو کې ښکېل وو.

د ورځې تازه خبرونه دلته ولولئ

کرکټ؛ د افغانستان او عمان سیالي بې پایلې تمامه شوه

افغان کرکټ ملي لوبډله
افغان کرکټ ملي لوبډله

د کرکټ شل اوریز نړیوال جام د چمتووالي سیالیو په ترڅ کې افغانستان له عمان سره سیالي پیل کړې وه خو ورښت بې پایلې تمامه کړه.

دغه سیالي چې د مې میاشتې په ۲۹مه نېټه د چهارشنبې په ماښام د کابل پر وخت ۹:۳۰ بجې پیل شوې وه، پچه یې افغان لوبډلمشر وګټله او توپ اچونه یې غوره کړه.

عمان د ۳ لوبغاړو تر سوځېدو وروسته ۱۵۴ منډې وکړې.

یادې لوبډلې ته لوبډلمشر عاقب الیاس ۶۶ ناسوځېدلې، ذېشان مقصود او کېشپ پرجاپټي هر یوه ۳۵-۳۵ منډې وکړې.

افغان لوري ته نوین الحق او عظمت الله عمرزي یوه یوه وېکټ وسوځوله او درېیمه رن اوټ شوه.

د افغانستان د توپوهنې پاڼۍ د ورښت له امله ترسره نه شوه او سیالي هم بې پایلې شوه.

د ویلو ده چې افغان لوبډله به د چمتووالي بله سیالي د مې په ۳۱مه له سکاټلنډ سره ترسره کوي.

د اروپایي ټولنې او د قطر چارواکو د افغانستان پر وضعیت خبرې کړي

د افغانستان لپاره د اروپایي ټولنې ځانګړي استازی توماس نیکلاسن
د افغانستان لپاره د اروپایي ټولنې ځانګړي استازی توماس نیکلاسن

د افغانستان لپاره د اروپایي ټولنې ځانګړي استازي توماس نیکلاسن د قطر د بهرنیو چارو وزارت له استازي فیصل بن عبدالله الحنزاب سره د افغانستان پر وضعیت خبرې کړي دي.

د قطر د بهرنیو چارو وزارت پرون ناوخته پر خپله ایکس پاڼه یا پخواني ټویټر یوه خبرپاڼه کې ویلي چې په دوحه کې شوې دغې ناسته کې دواړو لوریو د افغانستان پر تحولاتو او هغه هېواد کې سولې او ثبات ته د رسېدو په هدف په نړیوالو ګډو هڅو خبرې وکړې.

دغه لیده کاته داسې مهال شوي چې ټاکل شوې یوه میاشت وروسته قطر د افغانستان په اړه د یوې بلې غونډې کوربه وي.

دغې غونډه کې طالبانو ته هم بلنه ورکړل شوې ده.

د طالبانو د بهرنیو چارو وزارت یوه چارواکي پرون دغې غونډه کې ګډون ته لېوالتیا ښودلې، خو ویلې یې دي، په تمه دي چې ملګري ملتونه ورسره د غونډې ټول جزییات شریک کړي.

طالبانو د دوحې په دویمه غونډه کې چې تېره فبروري میاشته کې جوړه شوې وه، ګډون ونه کړ.

په افغانستان کې د څه باندې لسو زرو ښوونځیو زده‌کوونکو ته مقوي خواړه برابرېږي

ارشیف: په افغانستان کې پر خوراکي توکو بار د خوړو نړیوال سازمان موټریز کاروان
ارشیف: په افغانستان کې پر خوراکي توکو بار د خوړو نړیوال سازمان موټریز کاروان

د خوړو نړیوال پروګرام با "ډبلیو‌ایف‌پي" د افغانستان لپاره د اروپایي ټولنې د دفتر له‌خوا د لس میلیونه ایرو د مرستې د هرکلي ترڅنګ ویلي چې په دې مرستې سره به دا پروګرام وکولای شي چې په افغانستان کې د څه باندې لسو زره ښوونځو ماشومو زده‌کونکو، نجونو او هلکانو ته په ښوونځیو کې مقوي خواړه برابر کړي.

د افغانستان لپاره د خوړو د نړیوال پروګرام مشرې هسیو وي‌لي په یوه غږیزپیغام کې چې پرون چهارشنبې یې خپور کړی ویلي چې د اروپایي ټولنې په دغې مرستې سره به دوی وکولای شي چې روان میلادي کال په افغانستان کې نژدې دوه میلیونه زده کونکو ته ښه یعنې مقوي خواړه برابر کړې.

هغې زیاته کړه، دغه پروګرام چې "ډبلیو‌ایف‌پي" له دوو لسیزو راهیسې په افغانستان کې پیل شوی، ښه اغېز لرلی.

د نوموړې په خبره ډېرو زده‌کونکو ښوونځیو ته مخه کړې او هم پر زده‌کړو د زده‌کونکو تمرکز ښه شوی دی.

افغان سېلاب ځپلو مېرمنو ته د بېړنیو روغتیایي خدمتونو د وړاندې کولو خبر ورکړل شو

د بغلان د وروستیو سېلابونو له کبله زیانمنې مېرمنې او ماشومان
د بغلان د وروستیو سېلابونو له کبله زیانمنې مېرمنې او ماشومان

د ملګرو ملتونو د نفوسو صندوق په افغانستان کې د سېلابونو زیانمنو ښځو او نجونو سره د بېړنیو روغتیایي خدمتونو د وړاندې کولو خبر ورکوي.

دې صندوق پرون چهارشنبې په یوه بیان کې ویلي چې د دې صندوق په ملاتړ په افغانستان کې ۲۱۶ ګرځنډه روغتیایي ټیمونه فعال دي او په کلیوالو سیمو او هغو سیمو کې چې لاسرسی ورته ګران دي، ښځو او نجونو ته د بېړني زېږون او رواني ملاتړ په برخو خدمات وړاندې کوي.

د ملګرو ملتونو د نفوسو صندوق ویلي، په بغلان ولایت کې چې هلته وروستیو سېلابونو ډېره وراني پېښه کړې، په اوس وخت کې یې څلور روغتیایي ټیمونه فعال چې په هر ټیم کې یو ډاکتر، یو نرس، یوه قابله، یو واکسیناتور او د درملو یو متخصص شامل دي.

په عین حال کې د افغانستان لپاره د سره صلیب نړیوالې کمېټې پرون چهارشنبې په خپله ایکس‌پاڼه له افغاني سرې میاشتې سره په ګډه په بغلان کې له سېلاب ځپلو سره د بېړنیو روغتیایي خدمتونو او موقتې سرپناه د برابرولو خبر ورکوي.

خو د دې کمېټې په وینا، په بغلان کې د سېلابونو زیانمنې زر کورنۍ سخت بشري مرستو ته اړې دي.

ایف‌اې‌او: ۹ میلیونه افغانان به د غنمو د ویشل شویو تخمونو پر مټ ځان لپاره خواړه برابر کړي

ارشیف: په سرپل کې بزګران د غنمو د رېبلو پر مهال
ارشیف: په سرپل کې بزګران د غنمو د رېبلو پر مهال

د ملګروملتونو د خوړو او کرڼې اداره یا "ایف‌اې‌او" وایي، روان ۲۰۲۴م کال په افغانستان کې لږترلږه ۹ میلیونو کسانو د غنمو د هغو تخمونو پر مټ د ځان لپاره خواړه برابر کړي چې دې ادارې ویشلې دي.

خو د دې ادارې د افغانستان څانګې پرون چهارشنبې په خپله ایکس‌پاڼه یا پخواني ټویټر کې لیکلي چې په افغانستان کې ۲۷ سلنه خلک بیا هم د خوراکي توکو له بحران یا بېړني حالت سره مخ دي.

د ملګرو ملتونو د دې ادارې په وینا، د خوړو په برخه کې افغانستان مرستې ته اړتیا لري، خو کرنه کولای شي چې د خوړو له پلوه پر ځان بسیا کېدو ته وده ورکړي که یوه ښه ستراتیژي چې له سیمه‌ییز اقلیم سره سمون ولري، مخ ته ونیول شي.

دې ادارې ویلي چې د غنمو تخمونو یې له دې کارسره مرسته کړې ده.

ایټالیا په بامیان کې مغاره مېشتو کورنیو ته کورونه جوړوي

ارشیف: په بامیان کې یوه مغاره مېشتې کورنۍ
ارشیف: په بامیان کې یوه مغاره مېشتې کورنۍ

ایټالیا په بامیان ولایت کې هغو کورنیو ته کورونه جوړوي چې په سمڅو یا مغارو کې اوسېږي.

د طالبانو تر کنټرول لاندې د باختر خبري آژانس د راپور له مخې دا ژمنه د ایټالیا د فلورانس پوهنتون رییسې مریلا لودا په کابل کې د طالبانو د حکومت د کور او ښارجوړونې له سرپرست وزیر شیخ حمدالله نعماني سره په کتنه کړې ده.

د خبر له مخې، اغلې لودا ویلي چې غواړي په دې ولایت کې د درې لکه ډالرو په لګښت دوه پروژې پلي کړي.

هغې ویلي، د بامیانو په سمڅو کې د اوسېدونکو لپاره سل کورونه جوړوي او هم به د دې ولایت د زرګرانو په سیمه د رغونې او سمون یو پلان عملي کړي چې ورسره به د دې سیمې بڼه ډېره ښه شي.

د یادونې ده چې له دې مخکې هم په ځلونو، په تېره بیا په تېر جمهوریت کې د بامیانو په سمڅو کې د اوسېدونکو لپاره د کورونو د جوړولو ژمنې شوې چې تراوسه تر ډېره بریده د هماغې ژمنې په حد کې پاتې شوې دي.

ترکیې افغان سیاسي پاسپورټ لرونکو ته د ویزې معافیت لغوه کړ

د افغانستان او ترکیې بیرغونه
د افغانستان او ترکیې بیرغونه

ترکي رسنیو ویلي چې د دغه هېواد حکومت د افغانستان د سیاسي پاسپورت لرونکو کسانو ته د ویزې د معافیت هوکړه ځنډولې ده.

دغو رسنیو نن چهارشنبه ( د مې ۲۹مه) د ولسمشر رجب طیب اردوغان د یوه لاسلیک شوي فرمان په حواله ویلي چې دغه حکم به د جون له لومړۍ نېټې راهیسې عملي بڼه غوره کوي.

د ترکیې پارلمان په ۲۰۰۸ کال کې د افغان ډیپلوماتیکو پاسپورټونو لرونکو لپاره د ویزې معافیت تصویب کړ.

معلومه نه ده چې د ترکیې ډيپلوماتان به هم افغانستان ته له دې وروسته د تګ لپاره ویزې ته اړتیا ولري او که نه؟ خو هغه افغانان چې سیاسي پاسپورټونه لري ترکیې ته د تګ لپاره به ویزې ته اړتیا ولري.

د ترکیې د بهرنیو چارو وزارت یا نورو چارواکو تر اوسه د دې پرېکړې په اړه نور جزئیات نه دي ورکړي او لامل یې هم معلوم نه دی.

د طالبانو بهرنیو چارو وزارت هم سملاسي په دې اړه تبصره نه ده کړې.

د افغانستان سیاسي یا ډيپلوماتیک پاسپورتونه د پخواني حکومت پر مهال ډيپلوماتانو، لوړپوړو دولتي چارواکو او د ملي شورا غړو ته ورکول کېدل.

د طالبانو حکومت له افغانستان سره د اړیکو په اړه د روسي چارواکو د خبرو هرکلی وکړ

امیرخان متقي، د طالبانو د بهرنیو چارو وزیر - ارشیف
امیرخان متقي، د طالبانو د بهرنیو چارو وزیر - ارشیف

د طالبانو بهرنیو چارو وزارت د دوی له حکومت سره د اړیکو د ټینګښت په هدف د روسیې د ولسمشر ولادمیر پوتین او نورو چارواکو د څرګندونو هرکلی کړی دی.

دغه وزارت نن په یوه خبرپاڼه کې ویلي، دوی د روسیې فدراسیون ته څرګندوي چې " د متقابل درناوي او مشترکو مصالحو پر بنسټ " د مثبتو اړیکو د لا پراختیا په هدف " جدي سیاسي عزم" لري.

دا په داسې حال کې ده چې د یکشنبې په ورځ د مۍ په ۲۶ مه د روسیې د بهرنیو چارو وزیر سرګي لاوروف د ترهګرو او ممنوعه ډلو له لسته د طالبانو د ایستلو هیله څرګنده کړه.

لاوروف طالبان په افغانستان کې "اصلي ځواک " بللی او ویلي یې دي چې دا ممکنه ده مسکو طالبان د هغو ډلو له لیست څخه وباسي چې بندیزونه یې پرې لګولي دي.

د روسیې ټاس خبري اژانس د دوشنبې په ورځ د مې په ۲۷ مه د افغانستان لپاره د روسیې ولسمشر ځانګړي استازي ضمیر کابلوف له قولي لیکلي وو چې د "ترهګرو " له نوملړه د طالبانو د حکومت ایستلو پرته د رسمیت پېژندلو په اړه به له وړاندې اقدام وي.

د یادونې ده چې پرون سه شنبه د مې په ۲۸ د روسیې ولسمشر ولادیمیر پوتین هم د یوې قانوني مرجع په توګه د طالبانو د رسمیت پېژندلو او د "ترهګرو ډلو " له لیسته د هغوی د ایستلو په اړه ویلي چې مسکو باید د افغانستان لیدلوری په پام کې ولري او اړیکې ورسره جوړې کړي.

د طالبانو حکومت د دوحې راتلونکې غونډې ته محتاطانه هیله څرګنده کړې

له ارشیفه د طالبانو د بهرنیو چارو وزیر امیرخان متقي تصویر
له ارشیفه د طالبانو د بهرنیو چارو وزیر امیرخان متقي تصویر

د طالبانو د حکومت بهرنیو چارو وزارت د دوحې راتلونکې غونډه کې ګډون ته محتاطانه هیله څرګنده کړې ده.

دغه خبره د دغه وزارت مرستیال ویاند ضیا احمد د ستراتیژیکو مطالعاتو مرکز له یوه بحث وروسته نن چهارشنبه پر خپله ایکس پاڼه/ پخواني ټویټر خپره کړې.

وړاندې راغلي، د دوحې د لومړۍ او دویمې غونډې پرتله دا ځل د غونډې د جوړونکو تعامل کې مثبت بدلون راغلی دی.

د طالبانو بهرنیو چارو وزارت وایي، ټاکل شوې د دوی استازي د دوحې د راتلونکې غونډې په اصلي بحثونو کې ګډون وکړي، خو په وینا یې لا هم په تمه دي چې ملګري ملتونه ورسره د غونډې د څرنګوالي وروستي جزیات شریک کړي.

د افغانستان په اړه د دوحې دوه مخکینۍ غونډې د ۲۰۲۳ کال په مې او د ۲۰۲۴ کال په فبرورۍ کې جوړې شوې وې.

ټاکل شوې درېیمه غونډه کې د جون له دېرشمې د جولای تر لومړۍ نېټې په دوحه کې جوړه شي.

یوناما: افغانستان کې د ماین پاکانو شمېر خورا کم شوی

ارشیف
ارشیف

په افغانستان کې د ملګرو ملتونو مرستندوی ماموریت یوناما وایي، په دغه هېواد کې د ماین پاکۍ د کارکوونکو شمېر د پام وړ کم شوی دی.

فرانس پریس خبري اژانس نن چهارشنبه د یوناما د ماین پاکولو څانګې د مشر نایک پوند ( Nick Pond) په حواله ویلي، ۲۰۱۱ کال کې پنځلس نیم زره ماین پاکانو افغانستان کې فعالیت کاوه، خو اوس یې شمېر درې زرو ته کم شوی دی.

د ماین پاکانو د شمېر د کمېدو لامل نه دی په ډاګه شوی، خو یوناما ویلي چې افغانستان کې د ماینونو خطر لا هم پر خپل ځای دی او هره ورځ یو کس په کې وژل کيږي.

د ملګرو ملتونو شمېرې ښيي چې د ۲۰۲۳ کال له جنورۍ څخه د سږ کال تر اپریل میاشتې پورې نژدې ۹۰۰ افغانان د ماینونو په چاودنو کې وژل یا ټپیان شوي دي چې دوه اتیا په سلو کې یې ماشومان دي.

خبر کې راغلي، د طالبانو له بیا واکمنۍ راهیسې خلک هغو سیمو ته سفرونه کوي چې پخوا ورته د جګړې له کبله نه شوای تلی، خو زیاته شوې چې خښ شوي ماینونه د خلکو دغه ازادي ګواښي.

نور راوښيه

XS
SM
MD
LG