د لاسرسۍ وړ لېنکونه

تازه خبر
پنجشنبه ۲۴ غبرګولی ۱۴۰۳ کابل ۱۲:۳۰

نړۍ

بریتانیا د روسیې واګنر ډله د ترهګرو سازمانو په لېست کې شامله کړه

د واګنر ډلې جنګیالي
د واګنر ډلې جنګیالي

د بریتانیا حکومت د جمعې په ورځ د روسیې واګنر وسله‌واله ډله د ترهګرو سازمانو په لېست کې شامله کړه.

د امریکا متحد ایالتونو دا ډله د کال په پيل کې د یوه جنایي سازمان په توګه معرفي کړې وه.

روسي چارواکو تېره میاشت وویل چې د واګنر موسس او مشر یوګني پریګوژین د الوتکې د یوې مرموزې پېښې په ترڅ کې مړ شو.

وروسته تر دې چې د جون په اخره کې پریګوژین د روسیې د جګپوړیو پوځي چارواکو پر ضد د پاڅون مشري وکړه د روسیې د ولسمشر ولادیمیر پوتین په ۲۳کلنې واکمنۍ کې یې تر بل هر وخت سخت ګواښ رامنځته کړ؛ همهغه و چې دا ډله بېلاروس ته ولېږدېده.

د بریتانیا د کورنیو چارو وزیرې سویلا براورمان مخکې ویلي وو چې واګنر ډله د کریمیلن سیاسي اهداف مخته وړي.

د ورځې تازه خبرونه دلته ولولئ

یواین‌ایچ‌سي‌آر: تېره میاشت په نړۍ کې ۱۲۰ میلیونه کسان بې‌ ځایه شوي

ارشیف: د فرانسې او بریتانیا په اوبو کې د بېلابېلو هېوادونو د کډوالو کښتۍ. دوی هڅه کوي چې په داسې لارو ځانونه نورو هېوادونو ته ورسوي.
ارشیف: د فرانسې او بریتانیا په اوبو کې د بېلابېلو هېوادونو د کډوالو کښتۍ. دوی هڅه کوي چې په داسې لارو ځانونه نورو هېوادونو ته ورسوي.

د ملګروملتونو د کډوالو لویه کمېشنري یا "یواین‌ایچ‌سي‌آر" وایي، تېره میاشت په نړۍ کې دومره ډېر کسان د جګړې، شخړو، تاوتریخوالي او ځورونې له امله له خپلو سیمو بې ځایه کېدو ته اړ شوي چې مخکې یې ساری نه‌دی لیدل شوی.

"یواین‌ایچ‌سي‌آر" په هغه راپور کې، چې نن پنجشنبې یې خپور کړی ویلي چې په تېره مې میاشت کې په نړۍ کې ۱۲۰ میلیونه کسان بې ځایه شوي چې دا د مخکېني کال پرتله نژدې لس سلنه زیاتوالی ښیي.

د دې ادارې په وینا، دا د ټولې نړۍ د نفوس شاوخوا یونیم سلنه ده.

د ملګرو ملتونو د کډوالو د لویې کمېشنرۍ په خبره، له څه باندې دوه درېیمه برخه بې ځایه شوي کسان په کور دننه بې ځایه شوي کډوال دي.

د هغو کسانو له ډلې چې له خپلو هېوادونو تښتېدلي، دوه پر درېیمه یې تر اوسه په ګاونډیو هېوادونو کې پاتې دي.

د دې ادارې په خبره، دوی چې معمولاً تر سختو شرایطو لاندې ژوند کوي، هیله‌من دي چې ژر به بېرته خپلو هېوادونو ته ستانه شي.

په دې راپور کې همدارنګه په نړیواله کچه د بې ځایه شویو افغانانو شمېر نږدې ۱۰،۹میلیونه ښودل شوی او ویل شوي چې نږدې ټول په خپل هېواد کې دننه یا په ګاونډیو هېوادونو کې اوسي.

پر کریفي ریح د روسیې توغنديز برید؛ لږ تر لږه ۸ کسان وژل شوي او ۲۱ ټپیان دي

په کریفي ریح کې ژغورونکې ډلې هڅه کوي څو له خارو لاندې مړي او ټپیان وباسي.
په کریفي ریح کې ژغورونکې ډلې هڅه کوي څو له خارو لاندې مړي او ټپیان وباسي.

د اوکراین پر کریفي ریح ښار د روسیې د بالستیک توغندي په برید کې لږ تر لږه ۸ تنه وژلي او ۲۱ نور یې ټپیان کړي دي.

کریفي ریح د دنیپرو پیتروفسک سیمې یو لوی ښار دی چې د اوکراین د ولسمشر ولودمیر زیلینسکي پلرنی ټاټوبی دی.

د اوکراین د کورنیو چارو وزیر ایهور کلیمینکو ویلي چې د پروني برید په وژل شویو او ټپیانو کې ماشومان هم شته.

برید له هغه راپور وروسته شوی چې په کې راغلي، امریکا به اوکراین سره د نورو پټریوټ توغندیز سیستم مرسته وکړي.

د اوکراین د جنوب پوځي چارواکو ویلي چې په برید کې یوه دولتي ودانۍ او د هستوګنیزو اپارتمانونو یو بلاک زیانمن شوی دی.

ایران په ۲۰۲۲م کال نیول شوی فرانسوی وګړی خوشې کړی

لویس ارنود تېر کال په ایران کې د هغه هېواد ملي امنیت ته د ګواښ په جرم په پنځه کاله حبس محکوم شو، خو اوس د عمان په منځګړیتوب خوشې شوی دی.
لویس ارنود تېر کال په ایران کې د هغه هېواد ملي امنیت ته د ګواښ په جرم په پنځه کاله حبس محکوم شو، خو اوس د عمان په منځګړیتوب خوشې شوی دی.

ایراني چارواکو هغه فرانسوی وګړی له بنده ازاد کړی چې د ۲۰۲۲م کال په سپتمبر کې په ایران کې نیول شوی و.

د فرانسې ولسمشر ایمانویل مکرون پرون ناوخته پر خپلې ایکسپاڼه یا پخواني ټویټر ولیکل چې لویس ارنود خوشې دی او د پنجشنبې په ورځ به فرانسې ته ورسېږي.

د فرانسې دغه تبعه چې بانکي سلاکار دی، تېر کال په ایران کې د هغه هېواد ملي امنیت ته د ګواښ په جرم په پنځه کاله حبس محکوم شو، خو اوس د عمان په منځګړیتوب خوشې شوی دی.

پر نوموړی تور دی چې ۲۰۲۲م کال کې یې په ایران کې د حکومت ضد مظاهرو کې برخه اخیستې، خو کورنۍ یې دا تورونه رد کړي دي.

د فرانسې ولسمشر له ایرانه غوښتي چې د دوی درې نور اتباع هم چې هلته زنداني دي، خوشې کړي.

په سور سمندرګي کې حدیدې بندر ته نژدې د یونان پر یوې باري بېړۍ برید شوی

د حدیدې بندر یوه څنډه
د حدیدې بندر یوه څنډه

پر سوداګري کښتیو د یمن د حوثي یاغیانو د بریدونو په دوام کې، پرون چهارشنبې په سور سمندرګي کې حدیدې بندر ته نژدې یوې کوچنۍ کښتۍ د یونان پر یوې باري بېړۍ برید وکړ او د هغې انجن یې زیانمن کړ.

د بریتانیا امنیتي شرکت، امبري اعلان وکړ چې پر "توتور" نومي کښتۍ د یمن د حدیدې بندر له جنوب لوېدیځ څخه شاوخوا ۶۸ میایله لېرې برید شوی او په دې برید کې د یمن د حوثي یاغیانو د بریدونو نښې لیدل کېږي.

د بریتانیا د سمندري سوداګرۍ عملیاتو هم اعلان وکړ چې یوې کوچنۍ سپینې کښتۍ، چې له ۵ تر ۷ مترو اوږده وه، د دې بار وړونکې بېړۍ له لاندینۍ برخې سره ټکر وکړ.

د یونان د بېړۍ چلونې دوو سرچینو د نوم د نه ښودلو په شرط وویل چې کښتۍ، چې د لایبریا بیرغ پرې رپېده، په قصدي برید کې زیانمنه شوې ده.

د یونان د بېړۍ چلونې وزارت یوې سرچینې هم پیښه تایید کړې او ویلي یې دي: "بیړۍ د هند پر لور روانه وه."

د کرکټ نړیوال جام؛ نن درې سیالۍ کېږي

د بنګله‌دېش لوبډلې لوبغاړي د یوې تېرې لوبې پر مهال
د بنګله‌دېش لوبډلې لوبغاړي د یوې تېرې لوبې پر مهال

د کرکټ د نړیوال شل اوره جام سیالیو په دوام کې به نن درې سیالۍ وشي.

په سي ګروپ کې د ویسټ اینډیز او نیوزیلنډ سیالي ده.

د نن ورځې دوهمه سیالي به د افغانستان په وخت د ماښام په ۷ بجې په ډي ګروپ کې د بنګله‌دېش او نیدرلنډ (هالنډ) ترمنځ وي.

همداراز د انګلستان او عمان سیالي د افغانستان د شپې په یوولس نیمې بجې پیلېږي.

سبا به د افغانستان لوبډله له پاپونیوګینې سره مخامخ شي.

دا به د افغانستان درېیمه سیالي وي.

افغانستان تر دې وړاندې یوګنډا او نیوزیلنډ په لوی توپیر مات کړي او تر دې دمه نه یوازې د خپل ګروپ د جدول په سر کې دی بلکې د نومرو له نظره تر ټولو لوړ ځای لري.

پرون هند په نیویارک کې امریکا ته په ۷ ویکټونو او ۱۰ توپونو ماته ورکړه.

هند اوس په خپل اې ګروپ کې لومړی ځای لري.

امریکا د القاعده د لوړپوړي غړي "حمزه الغامدي" پر سر پنځه میلیونه ډالره جایزه اعلان کړې

د امریکا د بهرنیو چارو وزارت
د امریکا د بهرنیو چارو وزارت

د امریکا د بهرنیو چارو وزارت د القاعده شبکې د یوه لوړپوړي غړي حمزه الغامدي پر سر پنځه میلیونه ډالره جایزه اعلان کړې ده.

دغه وزارت پرون سه شنبه په یوه بیان کې د القاعده د دغه مشر بشپړ نوم حمزه صالح بن سعید الغامدي یاد کړی او عمر یې هم شاوخوا ۶۰ کاله ښودل شوی دی.

د دغه وزارت د عدالت لپاره د جایزو څانګې د القاعده د دغه سعودي تبعه احتمالي موقعیتونه د افغانستان پلازمېنه کابل، د ننګرهار توره بوره او سعودي عربستان یاد کړي دي.

دوی ویلي چې الغامدي د القاعده شبکې د بنسټ ایښودونکي اسامه بن لادن یو تر ټولو باوري ملګری و او هغه له بن لادن سره یوځای افغانستان کې د پخواني شوروي اتحاد له سرو لښکرو سره هم جګړه کړې ده.

د ملګرو ملتونو امنیت شورا څلور میاشتې وړاندې ویلي وو چې القاعده شبکې په افغانستان کې اته روزنیز مرکزونه جوړ کړي او د دې شبکې لوړپوړي چارواکي لا هم په دغه هېواد کې حضور لري.

طالبانو تر دې وړاندې دغه ډول راپورونه په کلکه رد کړي او ویلې یې دي، د القاعده هیڅ غړی په افغانستان کې نه‌شته.

د امریکا لانګ وار ژورنال ورځپاڼې تازه د القاعده شبکې د اوسني مشر سیف العدل په حواله ویلي چې خپل ملګري یې هڅولي چې د پوځي زده کړو لپاره افغانستان ته ولاړ شي.

اسراییلي ځواکونو د حزب‌الله یو لوړپوړی قومندان او درې نور وسله‌وال وژلي

په لبنان کې د حزب الله پر غړیو د اسراییلي ځواکونو د برید یو انځور
په لبنان کې د حزب الله پر غړیو د اسراییلي ځواکونو د برید یو انځور

د اسراییل هوایي ځواکونو د لبنان د حزب‌الله ډلې یو لوړپوړی قومندان او درې نور وسله‌وال وژلي دي.

رویټرز خبري اژانس د دریو سرچینو په حواله چې نومونه یې نه دي یاد شوي لیکلي چې دغه بریدونه د سه شنبې په ورځ ناوخته شوي دي.

د رویټرز په وینا حزب‌الله د خپل وژل شوي‌ قومندان وژنه تایید کړې او هغه یې طالب عبدالله چې په ابو طالب مشهور و، یاد کړی دی.

خبر کې د اسراییلي لوري په حواله راغلي چې حزب‌الله د دغو هوایي بریدونو په غچ کې د جولان په لوړو چې د اسراییل له‌خوا اشغال شوي ، پنځوس توغندي ویشتلي دي.

د لبنان حزب‌الله ډله چې د ایران له ملاتړه برخمنه ده، د تېر کال د اکټوبر له ۷ مې چې د غزې جګړه پیل شوې، له اسراییلي ځواکونو سره بریدونه تبادله کوي.

اسراییل او څو فلسطیني وسله‌والې ډلې په "جنګي جنایتونو" تورنې شوې

په غزه کې اسراییلي ځواکونه د جګړې پر مهال
په غزه کې اسراییلي ځواکونه د جګړې پر مهال

د ملګرو ملتونو خپلواکو څېړونکو نن اسراییل او څو فلسطیني وسله‌والې ډلې په "جنګي جنایتونو" تورنې کړې.

د ملګرو ملتونو د دغه څېړونکي کمېسیون مشرې ناوي پیلې ویلي، دا مهمه ده چې له ټولو هغو کسانو سره چې دغو جنایتونو کې ښکېل دي، حساب کتاب وشي.

د اسوشېټېډپرېس خبري اژانس په وینا، یاد کمېسیون د ۲۰۲۳م کال د اکټوبر له ۷مې وروسته موده کې چې د اسراییل او حماس جګړه پيل شوې، د جنګي جنایتونو یادونه کړې ده.

حماس چې د امریکا او اروپایي ټولنې له‌خوا د ترهګرو په توګه پېژندل کېږي، د تېر کال په اکټوبر کې پر اسراییلو غلچکي او پراخ برید سره ۱۲۰۰ کسان ووژل او ۲۵۰ نور یې برمته کړل.

له همغې نېټې اسراییلو پر غزې غچ اخیستونکي بریدونه پيل کړي چې تراوسه په کې د غزې د روغتیا وزارت په وینا، څه باندې ۳۷ زره فلسطینیان وژل شوي دي.

د عربستان چارواکي: تر اوسه شاوخوا یونیم میلیون مسلمانان مکې ته رسېدلي

د بیت الله شریف یوه څنډه
د بیت الله شریف یوه څنډه

د سعودي عربستان چارواکي وايي، تر نننۍ ورځې پورې شاوخوا یونیم میلیون مسلمانان د نړۍ له بېلابېلو هېوادونو څخه مکې ښار ته رسېدلي او په پام کې ده چې راروانه اوونۍ به د حج په کلنیو مراسمو کې برخه واخلي.

د سعودي عربستان د حج مسوولو چارواکو نن وویل چې سلګونه زره نور کسان به هم د جمعې تر ورځې پورې چې د حج مراسم پیلېږي دې هېواد ته ورسېږي.

په دوی کې به له سعودي عربستان څخه هم یو شمېر خلک شامل وي.

تمه ده سږ کال د حچ په مراسمو کې د ګډونوالو شمېر د تېر کال پرتله زیات وي.

په ۲۰۲۳م کال کې ۱،۸ میلیون مسلمانانو په دې مراسمو کې ګډون کړی وو.

په امریکا کې د تاجکستان ۸ وګړي له داعش سره د اړیکو په شک نیول شوي

ارشیف
ارشیف

باخبره سرچینې وايي، د تاجکستان ۸ وګړي له اسلامي دولت ډلې یا داعش سره د اړیکو په شک په وروستیو ورځو کې په امریکا کې نیول شوي دي.

دې سرچینو چې نه غواړي نومونه یې خپاره شي ویلي چې دا کسان په نیویارک، فیلادیلفیا او لاس انجلس کې نیول شوي دي.

د سرچینو په وینا، دا کسان چې له جنوبي سرحدونو څخه امریکا ته ننوتي وو، د مهاجرت له قوانینو د سرغړونې په تور په توقیف کې دي.

له داعش ډلې سره د دې مشکوکو کسانو د اړیکو د څرنګوالي په اړه سمدستي څه نه دي ویل شوي، خو سرچینو ویلي چې د دې کسانو پته د امریکا د تحقیقاتو د فدرال ادارې یا "ایف بي آی" FBI د تروریزم ضد څانګې لګولې ده.

نور راوښيه

XS
SM
MD
LG