د لاسرسۍ وړ لېنکونه

تازه خبر
یکشنبه ۳۱ چنګاښ ۱۴۰۳ کابل ۰۲:۱۸

نړۍ

پر تسلیحاتي موافقې د روسیې او شمالي کوریا ممکنه سلا کېدل؛ امریکا: دا کار به سرغړونه وي

د امریکا د بهرنیو چارو وزارت یوه ویاند ودانت پاټېل
د امریکا د بهرنیو چارو وزارت یوه ویاند ودانت پاټېل

د امریکا متحد ایالتونه وايي، که روسیه له شمالي کوریا سره پر تسلیحاتي موافقې سلا وکړي، دا کار به د ملګرو ملتونو د امنیت شورا له پرېکړه لیکونو څرګنده سرغړونه وي.

د امریکا د بهرنیو چارو وزارت یوه ویاند ودانت پاټېل پرون سې شنبه د اګست ۱۵مه وویل، د شمالي کوریا او روسیې ترمنځ د وسلو پر سر هر ډول معامله به د امنیت شورا یو لړ پرېکړه لیکونه په غوڅ ډول نقض کړي.

دا څرګندونې وروسته له هغې کېږي چې د روسیې ولسمشر ولادمیر پوتین او د شمالي کوریا مشر کیم جونګ اون پرون په داسې حال کې چې پیونګ یانګ د شمالي کوریا د خپلواکۍ ورځ نمانځله، په خپلو کې د خپلو اړیکو د پراختیا په باب خبرې وکړې.

د ورځې تازه خبرونه دلته ولولئ

غزه کې د اسراييلو په درې هوايي بريدونو کې ۱۳کسان وژل شوي

غزه کې د بمبارۍ له امله د رامنځته شوې ويجاړۍ يو انځور
غزه کې د بمبارۍ له امله د رامنځته شوې ويجاړۍ يو انځور

د فلسطین روغتیايي چارواکي وايي، په غزه کې د اسرايیلو په درېیو هوايي بریدونو کې لږترلږه ۱۳ کسان وژل شوي دي.

اسوشیټیډ پریس خبري اژانس د شنبې په ورځ راپور ورکړ چې، بریدونو تېره شپه په مرکزي غزه کې د کډوالو کمپونه په نښه کړل.

طبي ډلو ویلي، په قربانیانو کې درې ماشومان او یوه ښځه هم شامله ده.

په غزه کې جګړه وروسته له هغه پیل شوه چې، حماس د اکټوبر په اوومه پر اسرايیلو برید وکړ، چې لږترلږه ۱۲۰۰ کسان یې ووژل او شاوخوا ۲۵۰ یې یرغمل کړل.

امریکا او اروپايي اتحادیه حماس د یوه تروریستي سازمان په توګه پېژني.

د حماس تر کنټرول لاندې غزې تړانګې کې د روغتیا وزارت ویلي، په جګړو کې تر اوسه شاوخوا ۳۹ زره کسان وژل شوي دي.

په عین حال کې په غزه کې د اوربند په اړه په قاهره کې خبرې د پرمختګ په حال کې دي.

د امریکا په ګډون نړیوالو منځ‌ګړو پر اسرايیلو او حماس فشار ته دوام ورکړی چې، د اوربند او د پاتې یرغمل بندیانو د خلاصون په اړه یوې موافقې ته ورسيږي.

بيلاروس کې د جرمني يو وګړی په اعدام محکوم شوی

۳۰ کلن کریګر د ۲۰۲۳ کال په نومبرکې نیول شوی
۳۰ کلن کریګر د ۲۰۲۳ کال په نومبرکې نیول شوی

د جرمني د بهرنیو چارو وزارت پرون جمعه تایید کړه چې، د دې هېواد یو وګړی په بیلاروس کې په مرګ محکوم شوی دی.

دې وزارت د محکوم شوي کس نوم نه‌دی په ډاګه کړی خو په مینسک کې مېشتې د ویاسنا په نوم د بشري حقونو ډلې پرون په اعدام د محکوم شوي کس نوم ریکو کریګر Rico Krieger وښود.

دې ډلې ویلي چې ۳۰ کلن کریګر چې د ۲۰۲۳ کال په نومبرکې نیول شوی، د مینسک سیمه‌ییزې محکمې د جون په ۶مه محاکمې ته غوښتی و او د جون په ۲۴مه هم ورته دغه سزا ورکړل شوې ده.

د جرمني د بهرنیو چارو وزارت په یوه بیان کې ویلي چې، برلین د اعدام دغه سزا د مجازاتو یو ظالمانه او غیرانساني بڼه بولي او هغه ترهر ډول شرایطو لاندې غندي.

بیلا روس یوازینی اروپایي هېواد دی چې تر اوسه د اعدام له سزا څخه کار اخلي.

د خيبرپښتونخوا بنو کې سوداګرو پرلت کړی

بنو کې لاريونوال
بنو کې لاريونوال

د خیبرپښتونخوا په بنو کې د سوداګرۍ خونو او د سوداګرو ټولنې پرلت کړی دی.

دا اعتصاب وروسته له‌دې کېږي چې پرون (جمعه) پر لاریونوالو ډزې وشوې.

د ننني پرلت تنظیموونکي وايي، تر څو چې یې غوښتنې پوره شوي نه وي، پرلت ته دوام ورکوي.

د سوداګرو د اتحادیې مشر ناصرخان بنګښ نن (شنبه) د ازادي راډیو مشال څانګې ته وویل چې، دوی له عزم استحکام عملیاتو سره د مخالفت ترڅنګ په خپله سیمه کې د امنیت غوښتنه کوي.

هيټي کې د کډوالو کښتۍ کې د اورلګېدنې له امله ۴۰ کسان مړه شوي

د ملګروملتونو د کډوالۍ د نړیوال سازمان وايي، د هیټي په شمالي ساحل کې د کډوالو په کښتۍ کې د اور لګېدو له امله لږترلږه ۴۰ تنه مړه شوي دي.

د دې ادارې په وینا د دې بېړۍ ۴۱ تنه سپرلۍ د هیټي د ساحلي ګارد له‌خوا ژغورل شوي دي.

ویل شوي چې، دا کښتۍ د کیپ هایتین له ساحلي ښار څخه ۲۲۰ کیلومتره لېرې د تورکس او کایکاس ټاپوګانو ته روانه وه.

د بریتانیا دا دوه ټاپوګان په کربین سمندرګي کې موقعیت لري.

په نړۍ کې له انټرنټي پرچاوۍ وروسته چارې بېرته په عادي کېدو دي

دا ستونزه د مایکروسافټ په وینډوز سیستم کې د اپډېټ له کبله پېښه شوه.
دا ستونزه د مایکروسافټ په وینډوز سیستم کې د اپډېټ له کبله پېښه شوه.

د پنجشنبې او جمعې په ورځو په کمپیوټري سیستمونو کې له پراخې ګډوډۍ وروسته په نړۍ کې الوتنې او نور خدمات په تدریج د عادي کېدو لور ته روان دي، خو په بریتانیا کې لا هم د الوتکو د الوت په پروګرامونو کې خنډونه شته.

په کمپیوټري او انترنیټي سیستمونو کې د ستونزې د پېښېدو له کبله د الوتنو ترڅنګ د بانکونو، روغتونونو او ګڼو نورو کاروبارونو چارې ټکنۍ شوې.

دا ستونزه د مایکروسافټ په وینډوز سیستم کې د اپډېټ له کبله پېښه شوه.

د مایکروسافټ رييسانو د رامنځته شوي خنډ له کبله بښنه غوښتې او ویلي یې دي چې، حل‌لار یې موندلې خو وخت ته اړتیا ده.

د خيبرپښتونخوا ايالتي اسمبلۍ د "عزم استحکام" پوځي عملياتو پيلولو سره مخالفت وښوده

د پاکستان پوځيان، انځور - ارشيف
د پاکستان پوځيان، انځور - ارشيف

د خیبرپښتونخوا ایالتي اسمبلۍ د پاکستان د مرکزي حکومت له لوري د عزم استحکام په نوم د پوځي عملیاتو له پیلولو سره مخالفت وکړ.

د پښتونخوا ایالتي جرګې یو پرېکړه‌لیک تصویب کړ چې په‌کې ویل شوي، مرکزي حکومت دې د خیبرپښتونخوا په اړه تر هر ډول پرېکړې مخکې د دې ایالت موافقه او مشوره ترلاسه کړي.

د خیبرپښتونخوا ایالتي حکومت د عمران خان د تحریک انصاف ګوند په لاس کې دی.

د دې ایالت د اسمبلۍ په پرېکړه‌لیک کې راغلي، له دې وړاندې عمران خان په زغرده ویلي دي چې، پوځي عملیات ستونزې نه حل کوي.

له بلې خوا نن په بنو کې د بېلابېلو سیاسي ګوندونو په بلنه په دغه ښار کې پر لاریونوالو د پرونیو ډزو په اعتراض کې کاربندي اعلان شوې ده.

زیلینسکي له روسیې سره د تلپاتې سولې په تړاو د خبرو لپاره له ټرمپ سره ګوري

د اوکراین ولسمشر ولودیمیر زیلینسکي وايي، د جمهوريپال ګوند له کاندید ډونالډ ټرمپ سره په ټیلیفوني خبرو کې دوی موافقه کړې چې له روسیې سره د تلپاتې سولې په اړه د خبرو لپاره له یو بل سره مخامخ وویني.
د اوکراین ولسمشر ولودیمیر زیلینسکي وايي، د جمهوريپال ګوند له کاندید ډونالډ ټرمپ سره په ټیلیفوني خبرو کې دوی موافقه کړې چې له روسیې سره د تلپاتې سولې په اړه د خبرو لپاره له یو بل سره مخامخ وویني.

د اوکراین ولسمشر ولودیمیر زیلینسکي وايي، د جمهوريپال ګوند له کاندید ډونالډ ټرمپ سره په ټیلیفوني خبرو کې دوی موافقه کړې چې له روسیې سره د تلپاتې سولې په اړه د خبرو لپاره له یو بل سره مخامخ وویني.

زیلینسکي دا خبره نن شنبه پر خپله ایکسپاڼه یا پخواني ټویټر کې لیکلې ده.

زیلینسکي په خپل ټویټ کې ټینګار کړی چې "اوکراین به تل د روسیې پر وړاندې د خپلې وړتیا په پیاوړتیا کې د متحدوایالتونو د مرستې ستاینه وکړي."

ده همداراز کښلي چې د اوکراین پر ښارونو او کلیو د روسیې بریدونه هره ورځ دوام لري.

پر اوکراین د روسیې یرغل چې له کبله یې د دواړو خواوو لسګونه زره کسان وژل شوي، اوس ۲۹ میاشتې وځي.

روسیه دا مهال د اوکراین شاوخوا ۱۷ سلنه خاوره په کنټرول کې لري.

په اشغال شویو فلسطیني سیمو کې د اسراییل حضور غیر قانوني وبلل شو

په غزه کې اسراییلي ځواکونه د عملیاتو پر مهال
په غزه کې اسراییلي ځواکونه د عملیاتو پر مهال

د عدالت نړیوالې محکمې اعلان وکړ چې په اشغال شویو فلسطیني سیمو کې د اسراییل حضور "غیر قانوني دی او باید ژر تر ژره پای ته ورسېږي."

د ملګرو ملتونو دې تر ټولو لوړ قضایي ارګان د جمعې په ورځ د جولای په ۱۹ مه د خپل نظر په اعلانولو کې، چې لازم الاجرا نه دی، زیاته کړه چې اسراییل د یوه اشغالګر هېواد په توګه په لوېدیځه غاړه او د بیت المقدس په ختیځه برخه کې له خپلې خاورې سره د فلسطیني ځمکو د یوځای کولو، په دې سیمو کې د دایمي کنټرول او د یهودي مېشت‌ځایونو د جوړولو لپاره له خپل ځواک څخه کار اخلي.

د عدالت د نړیوالې محکمې د بیان له مخې د دغو اقداماتو په نتیجه کې د فلسطین په نیول شویو سیمو کې د اسراییل شتون غیر قانونی دی او باید ژر تر ژره پای ته ورسېږي.

لبنانی حقوقپوه او د دې محکمې د قاضیانو د پنځلس کسیزې ډلې مشر نواف السالم وویل: "د قاضیانو پلاوی دې نتیجې ته رسېدلی چې په لوېدیځه غاړه او د بیت المقدس په ختیځ کې د یهودانو استوګنول او د دغه هېواد په ختیځ کې یهودي مېشت‌ځایونه د جینیوا د څلورم کنوانسیون د ۴۹ مادې سرغړونه کوي."

د جنیوا د څلورم کنوانسیون ۴۹ ماده په نیول شویو سیمو کې د "جبري انتقال او اخراج" مسئلې ته ځانګړې شوې چې په یوه برخه کې یې راغلي چې "نیواکګر حکومت نه شي کولای خپل نفوس یا د هغه یوه برخه هغو ځمکو ته انتقال کړي چې اشغال کړې یې دي."

په بنګله‌دېش کې د لاریونونو د ځپلو په دوام درې نور کسان وژل شوي

په بنګله‌دېش کې د روانو تاوتریخجنو لاریونونو یو انځور
په بنګله‌دېش کې د روانو تاوتریخجنو لاریونونو یو انځور

په بنګله‌دېش کې سیمه ییزو رسنیو خبر ورکړی چې لږ تر لږه درې تنه نور د هغو مظاهرو د ځپلو په دوام کې وژل شوي چې څو ورځې وړاندې د محصلانو له‌خوا پخوانیو پوځیانو ته په دندو کې د ونډو د ورکولو پر ضد پیل شوې وې.

رویټرز خبري اژانس پرون جمعه د خپلو خبریالانو په حواله راپور ورکړ چې پولیسو د مظاهره چیانو د تیت پرک کولو لپاره اوښکې بهوونکی ګاز کارولي او د بنګله‌دېش په پلازمېنه ډاکه کې په څو ځایونو کې اورونه لیدل شوي دي.

ټیلیفوني او انټرنېټي اړیکې هم پرې شوي او د تلوېزیون خپرونې بندې شوې دي.

حکومت د ناکراریو د مخنیوي لپاره د پنجشنبې له ورځې د موبایل ټیلیفون خدمات هم بند کړي دي.

د بنګله‌دېش ورځپاڼو راپور ورکړی چې د لاریون کوونکو له‌خوا ډېری سړکونه بند شوي او د هېواد د رېل پټلۍ په اوږدو کې د رېلګاډو خدمات درېدلي دي.

د ډاکې د "پروتوم‌ال" ورځپاڼې د راپور له مخې، د پنجشنبې په ورځ د بنګله‌دېش له ۶۴ سیمو څخه په ۴۷ کې د سړکونو د اعتراضونو په ترڅ کې لږ تر لږه ۲۷ تنه وژل شوي او شاوخوا ۱۵۰۰ نور ټپیان شوي دي.

رویټرز اژانس وايي چې دا ارقام په خپلواک ډول تاییدولی نه شي او د بنګله‌دېش پولیسو او حکومت تر اوسه په دې اړه څه نه دي ویلي.

بېلاروس د جرمني یو وګړی په مرګ محکوم کړی

۳۰ کلن کریګر چې د ۲۰۲۳م کال په نومبر کې نیول شوی دی.
۳۰ کلن کریګر چې د ۲۰۲۳م کال په نومبر کې نیول شوی دی.

د جرمني د بهرنیو چارو وزارت پرون جمعه تایید کړه چې د دی هېواد یو وګړی په بېلاروس کې په مرګ محکوم شوی دی.

دې وزارت د محکوم شوي کس نوم نه‌دې په ډاګه کړی، خو په مینسک کې مېشتې د ویاسنا په نوم د بشري حقونو ډلې پرون د ورځې په لومړیو کې په اعدام د محکوم شوي کس نوم ریکو کریګر وښود.

دې ډلې ویلي چې ۳۰ کلن کریګر چې د ۲۰۲۳م کال په نومبر کې نیول شوی، د مینسک سیمه‌ییزې محکمې د جون په ۶ محاکمې ته غوښتی و او د جون په ۲۴مه هم ورته دغه سزا ورکړل شوې ده.

د دې ډلې په خبره هغه د کالینوسکي په نوم ډلې سره چې په تړاو تورن شوی دی.

ویل کېږي دا هغه ډله ده چې په‌کې د بېلاروس د حکومت ضد جلاوطنه کسان راټول شوي او د اوکراین لپاره مبارزه کوي.

دې ډلې دا تور رد کړی دی.

د جرمني د بهرنیو چارو وزارت په یوه بیان کې ویلي چې برلین د اعدام دغه سزا د مجازاتو یو ظالمانه او غیرانساني بڼه بولي او هغه تر هر ډول شرایطو لاندې غندي.

بېلاروس یوازینی اروپایي هېواد دی چې تراوسه د اعدام له سزا څخه کار اخلي.

نور راوښيه

XS
SM
MD
LG