د اسټرالیا د کرکټ ادارې یوځل بیا ویلي چې په افغانستان کې د ښځو د حقونو تر تامینېدو پورې له دغه هېواد سره دوه اړخیزې لوبې نه کوي.

کریک انفو ویبپاڼې نن چهارشنبه د اسټرالیا د کرکټ د اجرایوي مشر نیک هاکلي په حواله ویلي چې دوی د افغانستان له کرکټ بورد سره وخت نا وخت پر دې مسئله غږېږي او هیله کوي چې راتلونکې کې بېرته لوبې پيل کړي.

اسټرالیا له ۲۰۲۲م کال راهیسې درې ځله په همدې دلایلو له افغانستان سره د کرکټ پلان شوې دوه اړخیزې لوبې لغوه کړي، خو لوبډله یې بیا په پنځوس اوریز او شل اوریز نړیوال جام کې له افغانستان سره مخامخ شوې ده.

افغان لوبډلې په شل اوریز نړیوال جام کې چې تازه پای ته ورسېد، اسټرالیا ته ماتې ورکړه.

د اسټرالیا کرکټ بورد داسې مهال افغانستان کې د ښځو د حقونو پر تامین ټینګار کوي چې تازه په اسټرالیا کې د افغانستان د کرکټ یو شمېر ښځینه لوبغاړو د کرکټ له نړیوالې شورا غوښتي چې دوی ته په کډوالۍ کې د لوبډلې د جوړېدو اجازه ورکړي.

د کرکټ نړیوالې شورا تراوسه د افغان کرکټرانو دغه لیک ته ځواب نه دی ورکړی.

دوحې ته د طالبانو د حکومت د تللي پلاوي مشر او د حکومت ویاند ذبیح‌الله مجاهد وایي، د غونډې په څنډه کې یې له امریکایي استازو سره د زندانیاتو پر تبادلې هم خبرې کړي دي.

مجاهد نن چهارشنبه په کابل کې خبریالانو ته وویل، دوه امریکایي اتباع دا مهال د دوی په زندان کې دي او په خبره یې د ازادۍ لپاره یې باید د طالبانو د حکومت شرطونه ومنل شي.

هغه وايي: "له امریکایي استازو سره د خبرو پر مهال ځینې مسایل چې باقي پاته وو، تر بحث لاندې راغلل. هغو کې د دوو امریکایي اتباعو موضوع هم چې افغانستان کې بندیان دي یاده شوه. د هغوی د خلاصون په اړه مخکې هم مونږ دوی سره بحثونه کړي وو. د افغانستان شرایط باید ومنل شي، مونږ هم اتباع لرو چې امریکا او ګوانتانامو کې بندیان دي. مونږ باید د امریکایانو په بدل کې خپل اتباع را خلاص کړای شو. څرنګه چې هغوی ته امریکایي اتباع مهم دي، مونږ ته افغانان مهم دي."

مجاهد دا معلومات ورنه کړل چې څه شمېر افغانان دا مهال په ګوانتانامو او د امریکا په زندانونو کې بندیان دي.

مجاهد دوحې ته د خپل پلاوي سفر هم ګټور یاد کړ او وې ویل، یوه لاسته راوړنه یې داوه چې غونډه د دوی له شرایطو سره سمه ترسره شوه.

د دوحې په غونډه کې د افغان ميرمنو او مدني فعالانو ځای خالي و.

د ایران د بشري حقونو سازمان خبر ورکړی چې دوه تنه افغان اتباع د شیراز په زندان کې اعدام شوي دي.

دغه سازمان پرون د جولای په دویمه راپور ورکړ چې دغه دوه کسان، علي‌الله بخش او افضل‌الله بخش نومېدل او یکشنبه د شیراز په عادل آباد زندان کې اعدام شوي.

علي او افضل سره نږدې خپلوان بلل شوي او درې کاله وړاندې د مخدره موادو اړوند جرمونو په تړاو بندیان شوي وو.

ایران یو له هغو هېوادونو دی چې د اعدامونو کچه په‌کې لوړه ده او له همدې امله د بشري حقونو د ډلو له خوا پرې نیوکې کېږي.

د طالبانو حکومت تېر کال ویلي وو چې په ایران کې اوه زره افغان بندیان دي، خو دا نه ده څرګنده، چې څومره یې په اعدام محکوم شوي دي.

طالبانو د پوهنې وزارت په پکتیا ولایت کې د لسو نویو ښوونځیو د جوړولو د پیل خبر ورکړی دی.

د طالبانو تر کنټرول لاندې باختر خبري اژانس د جولای په دویمه راپور ورکړ چې دغه ښوونځي به د پکتیا ولایت په نهو ولسوالیو کې د یوې غیر انتفاعي موسسې په همکارۍ جوړ شي.

د دغو ښوونځيو د جوړولو لګښت څه باندې ۱۹۶ میلیونه افغانۍ اټکل شوی دی.

دا ښوونځي داسې وخت جوړېږي چې له شپږم ټولګي څخه د پورته نجونو پر وړاندې له څه باندې ۱۰۰۰ ورځو راهیسې ښوونځي تړل شوي او ښځې له یو نیم کال راهیسې پوهنتونونو ته له تلو هم منع دي.

د طالبانو د حکومت د صنعت او سوادګرۍ وزیر نورالدین عزیزي نن سهار سې شنبې د جولای دویمه د یوه پلاوي په مشری ازبکستان ته لاړ.

د طالبانو د تر کنټرول لاندې باختر خبري اژانس د عزیزي له قوله د دې سفر موخه په ازبکستان کې په هغه څلور ورځني نندارتون کې چې شاوخوا ۲۵۰ افغان سوادګرو په کې برخه اخلي، ګډون بللی دی.

وړاندې د عزیزي له قوله ویلي شوي وو چې دوی به په دې سفر کې خپل تجارتي پروګرامونه د ازبکستان له چارواکو سره شریک کړي.

ټاکل شوې نن د ازبکستان په پلازمېنه تاشکند کې د افغاني تولیداتو درې ورځنی نندارتون پرانیستل شي.

د طالبانو حکومت تر کنترول لاندې ملي تلوېزیون ویلي، په دې نندراتون کې به افغاني غالۍ، لاسي صنایع، قیمتي کاڼي، وچه مېوه او ځني نور محصولات نندارې ته وړاندې شي.

طالب چارواکو په دې نندارتون کې د ښځینه صنعتکارانو او سوداګرو د ګډون او نه ګډون په اړه تراوسه څه ویلي نه دي.

د طالبانو تر کنټرول لاندې باختر خبري اژانس وايي، له پرون راهیسې له پاکستانه نژدې درې سوه کورنۍ بېرته افغانستان ته راستنې شوي دي.

دې اژانس نن پر خپلې ایکسپاڼې یا پخواني ټویټر لیکلي، له دغو کورنیو ۵۳ يې د کندهار د سپین بولدک، ۴۴ يې د نیمروز د وریښمو پل او ۱۲۱ نورې يې د اسلام کلا له لارې بېرته هېواد ته راغلي دي.

د اژانس پر اساس، له دې ډلې شپږ کورنۍ خپلو سیمو ته لېږدول شوې، او پر یو شمېر نورو کورنیو مرستې هم ویشل شوي دي.

دا افغانان په داسې حال کې بېرته افغانستان ته ستنیږې چې له پاکستان څخه یوازې په تېرې جون میاشت کې ۲۲زره افغان کډوال افغانستان ته راستانه کړای شوي وو.

په دوحه کې د طالبانو د شپږ کسیز پلاوي مشر او د طالبانو د حکومت ویاند ذبیح‌الله مجاهد وايي، د افغانستان لپاره د ایران له ځانکړي استازي سره يې د اړیکو پر پراختیا او سیمه‌ییز اتصال خبرې کړي دي.

مجاهد نن پر خپلې ایکسپاڼې یا پخواني ټویټر لیکلي، دا خبرې يې په دوحه کې د ایران له ځانګړي استازي حسن کاظمي قمي سره په کتنه کې کړي دي.

مجاهد پر ایکسپاڼې په یو بل پیغام کې د افغانستان لپاره د پاکستان د ځانګړي استازي اصف دراني او په دوحه کې د دغه هیواد له سفیر سره د کتنې هم ویلي دي.

د قطر پلازمېنه دوحه د جون په ۳۰مه او د جولای په لومړی نېټه د سرطان لسمه او یوولسمه د ملګرو ملتونو په کوربه‌توب د افغانستان په اړه د یوې ناستې کوربه وه.

دې ناستې ته د مجاهد په مشری د طالبانو د حکومت شپږ کسیز پلاوی ورغلی و.

د دوحې په ناسته کې د افغان ښځو او مدني فعالانو استازو ته د ګډون بلنه نه وه ورکړل شوې.

دوحې ته د طالبانو د حکومت تللي پلاوي د ازبکستان، پاکستان او قطر له استازو سره پر (افغان ترانس) پروژې خبرې کړې دي.

افغان ترانس له ازبکستان څخه د افغانستان له لارې پاکستان ته د ریللار یا د ریلاګاډي پټلۍ د غځولو پروژه ده چې د درې واړو هېوادونو د تجارتي اړیکو لپاره مهمه بلل کیږي.

د طالبانو د حکومت ویاند او دوحې ته د دوی د تللي پلاوي مشر ذبیح الله مجاهد بیګا ناوخته پر خپله ایکس پاڼه/ پخواني ټویټر لیکلي، ګډونوالو د دې پروژې د کار د ژر تر ژره پيل غوښتنه وکړه.

په افغانستان کې دا ریللار، چې ۶۴۷ کیلومتره اوږدوالی لري، له مزارشریف څخه پیلیږي، له سمنګان، بغلان، بامیان، میدان وردک، لوګر او پکتیا ولایتونو څخه تېرېږي او په ډنډوپټان ولسوالي کې د پاکستان له ریللار سره یوځای کېږي.

تر دې وړاندې د ازبکستان چارواکو ویلي و چې دغه پروژه به تر ۲۰۲۷ کال پورې بشپړه شي.

د پروژې لګښت څه باندې څلورنیم میلیارده ډالره اټکل شوی دی.

په ملګرو ملتونو کې د روسیې استازی واسیلي نبنزیا وایي، مسکو پر طالبانو د لګول شویو بندیزونو په لیرې کولو غور کوي.

د یورو اکتیف خپرونې د لیکنې پر اساس، نبنزیا پرون دوشنبې دا څرګندونې داسې مهال وکړې چې د طالبانو یوه پلاوي په دوحه کې د نړیوالې ټولنې له استازو سره ناسته درلوده.

نبنزیا خپرونې ته ویلي، پر دې حقیقت سترګې نه شي پټیدای چې طالبان دا مهال افغانستان اداره کوي او باید په همدې ترتیب له هغوی سره معامله وشي.

نبنزیا ونه ویل چې دوی به څه وخت په عملي توګه طالبان د بندیزونو له لسته وباسي.

تر دې وړاندې د روسیې ولسمشر ولادمیر پوتین او د کابینې څو نورو غړو هم له طالبانو سره د اړیکو د پياوړتیا او پر هغوی د بندیزونو د لرې کولو په تړاو ورته څرګندونې کړې دي.

طالبان له ۲۰۰۳ کال راهیسې په روسیه کې د منع شویو ترهګرو ډلو په لیست کې دي.

د دوحې په درېیمه ناسته کې د طالبانو د پلاوي مشر ذبیح الله مجاهد ویلي، په افغانستان کې د ملګروملتونو د ځانګړي استازي د ګومارلو اړتیا نه شته.

مجاهد چې د ناستې په پای کې بېګا شپه خبریالانو ته غږېده وویل اوس چې د ده په خبره افغانستان کې سوله او ثبات دی د ځانګړي استازي ګمارنې ته اړتیا نشته ځکه یوناما د ملګرو ملتونو په استازیتوب موجوده ده.

د دوحې دریمه ناسته د دوو ورځو لپاره د طالبانو د پلاوي، ملګرو ملتونو او د افغانستان لپاره د بیلابیلو هېوادونو د ځانګړو استازیو تر منځ ترسره شوه.

تر دې ناستې وروسته نن په دوحه کې د افغانستان د مدني ټولنې او د بشري حقونو د مدافعینو، ملګرو ملتونو او د هېوادونو د ځانګړو استازیو یوه ناسته هم پلان شوې ده.

ځینو فعالانو په دې ناسته کې خپل ګډون رد کړی او انتقاد یې کړی چې افغان ښځې او مدني فعالان ولې د ملګرو ملتونو له خوا د دوحې اصلي ناستې ته نه وو بلل شوي.

یوه ډله بیا په ټوله کې له طالبانو سره د ملګرو ملتونو په کوربه توب د دوحې په دریمې ناستې نیوکه کړې ده.