د لاسرسۍ وړ لېنکونه

تازه خبر
سه شنبه ۲۹ غبرګولی ۱۴۰۳ کابل ۰۴:۴۰

نړۍ

زیلینسکي: اوکراین بې رحمه جګړې سره مخ دی، خو اخر یې هم ګټي

ولسمشر زیلینسکي د اوکراین له لوړپوړو پوځي مشرانو سره
ولسمشر زیلینسکي د اوکراین له لوړپوړو پوځي مشرانو سره

د اوکراین ولسمشر ولودیمیر زیلینسکي وايي، د ده د هېواد ځواکونه که څه هم د روسیې پرضد له بېرحمانه جګړې سره مخامخ دي، خو دی زیاتوي چې اوکراین به بالاخره بریالی کېږي.

ښاغلي زیلینسکي زیاته کړه، چې روسي ځواکونه چې هرڅه کوي، خو په روانه جګړه کې اوکرایني ځواکونه مخکې دي.

د اوکراین د وسله وال پوځ ستر درستیز بیګا راپور ورکړ، چې د جبهې په لومړۍ کرښه کې یې دېرش نښتې ثبت کړې دي.

د پوځ په بیان کې راغلي، چې د اوکراین پوځ د ختیځ بخموت ښار په شاوخوا کې د ایوانوفسکي ښار په جنوب او جنوب ختیځ کې د روسیې حملې په شا تمبولي دي.

بیان زیاتوي، چې د اوکراین پوځ همداراز په دې سیمه کې پر دریو سیمو هوايي حملې او پر پنځلسو سیمو توغندویې بریدونه ثبت کړي دي.

د بیان له مخې، روسي ځواکونو پر اویدیفکا ښار او د دونېڅک سیمې په پېروو مایسک سیمو هم هوايي حملې او بې نتیجې ځمکنۍ حملې کړي.

د ورځې تازه خبرونه دلته ولولئ

د ایټالیا په سواحلو کې د کښتیو ډوبېدو له کبله ۱۱ کسان مړه شوي او ۶۴ نور تري تم دي

د ایټالیا سواحلو کې د ډوبې شویو کښتیو یو انځور
د ایټالیا سواحلو کې د ډوبې شویو کښتیو یو انځور

خیریه ټولنې او ملګري ملتونه د ایټالیا په جنوبي سواحلو کې د دوو کښتیو د ډوبېدو په پېښه کې د ۱۱ کډوالو د مړینې او د ۶۴ تنو نورو د تري تم کېدو خبر ورکوي.

د جرمني یوې خیریه ټولنې چې په سیمه کې د ژغورنې یوه کشتۍ لري وايي، ژغورونکو یې له یوې ډوبې شوې لرګینې کښتۍ څخه ۵۱ کسان ژغورلي چې دوه تنه یې بېسده وو او د همدې کښتۍ په کوزنۍ برخه کې یې د لسو کسانو مړي موندلي دي.

دې ټولنې پر خپله ایکسپاڼه د پېښې له قربانیانو سره خواخوږي ښودلې او ویلي یې دي چې د دوی همکاران له دې کبله خپه او قهرجن دي.

دا تولنه همداراز وايي، د ژغورل شوي کسان یې د ایټالیا ساحلي ساتونکو ته سپارلي دي.

د کډوالو لپاره د ملګروملتو لویې کمېشنرۍ یا "یواین‌ایچ‌سي‌آر" UNHCR نن له دې جرمنۍ ټولنې سره په ګډ بیان کې وویل، په دې کښتیو کې سپاره کډوال د سوریې، مصر، پاکستان او بنګله‌دېش وګړي وو.

شمالي کوریا ته د پوتین سفر؛ له اون سره په پوځي برخو کې د همکاریو پر پراختیا خبرې کوي

د روسیې ولسمشر ولادیمیر پوتین
د روسیې ولسمشر ولادیمیر پوتین

کریملین خبر ورکړی چې ټاکل شوې د روسیې ولسمشر ولادیمیر پوتین سبا سه شنبې شمالي کوریا ته دوه ورځنی سفر پیل کړي.

د کریملین د بیان له مخې تمه ده چې پوتین به د شمالي کوریا له مشر کېم جونګ اون سره په پوځي برخو کې د دواړو هېوادونو د همکاریو پر پراختیا خبرې وکړي.

د امریکا او جنوبي کوریا چارواکي پر پیونګ یانګ تور لګوي چې له روسیې سره د پوځي ټکنالوژۍ او نورو مرستو په بدل کې د اوکراین په جګړه کې د توپچي، توغندیو او پوځي تجهیزاتو په برخو کې مرستې کوي، خو مسکو او پیونګ یانګ دواړو روسیې ته د شمالي کوریا د وسلو د استولو تورونه رد کړي دي.

د اسراییل صدراعظم د خپل هېواد کابینه ړنګه کړه

د اسراییل د کابینې یو انځور
د اسراییل د کابینې یو انځور

د اسراییل صدراعظم د خپل هېواد د جګړې کابینه، چې د غزې د جګړې له پیله یې د جګړې په پرېکړو کې مرکزي رول درلود، ړنګه کړه.

بنیامین نتنیاهو نن دوشنبې د جون ۱۷مه د حکومت وزیرانو ته خبر ورکړ چې د جګړې د کابینې په منحلولو سره به اوس د وزیرانو له یوې محدودې ډلې سره په مشوره "حساسې پرېکړې" کوي.

نتنیاهو د جګړې د کابینې د منحلولو پرېکړه وروسته له هغې وکړه چې د حکومت له ایتلاف څخه دوه جګپوړي وزیران بني ګانتز او ګادي ایسنکوټ او د هغو ګوند "هیوادني اتحاد" رسماً ووتل.

بني ګانتز او ګادي ایسنکوټ چې دواړه د اسراییل د پوځ پخواني لوی درستیزان وو، د تېر کال د اکټوبر په ۷مه نېټه د اسراییل پر خاوره د حماس د سختدریځې ډلې له بریده یوه اوونۍ وروسته د دې لپاره په ايتلافي حکومت کې شامل شول چې د جګړې د ملاتړ لپاره د حکومت په پرېکړو کې برخه واخلي.

حماس د امریکا او اروپايي ټولنې له خوا یوه تروریستي ډله ګڼل کېږي.

بني ګانټز او ګادي ایسنکوټ تېره اوونۍ اعلان وکړ چې د جګړې په کابینه کې د دوی د پاته کېدو وخت پای ته رسېدلی او نور د نتنیاهو پر پرېکړو اغېز نه شي کولی.

حوثي یاغیانو په سره او عرب سمندرګيو کې پر دوو ملکي کښتو بریدونه کړي

په سره سمندرګي کې د امریکا یوه بېړۍ
په سره سمندرګي کې د امریکا یوه بېړۍ

د یمن حوثي یاغیانو د یکشنبې په ورځ اعلان وکړ چې په سور سمندرګي او عرب سمندرګي کې یې پر دوو ملکي کښتیو، چې د امریکا له جنګي بېړۍ سره یوځای وې، بریدونه کړي دي.

د حوثي یاغیانو ویاند یحیی سريع ویلي چې دې ملېشه ډلې د امریکا پر جنګي بېړۍ او "کیپټن پاریس" او "هیپي کنډور" بېړیو د بېړۍ ضد توغندیو او بې پیلوټه الوتکو په وسیله برید وکړ.

خو دا معلومه نه ده چې ایا د امریکا جنګي بېړۍ هم لګېدلې او که نه ده.

تر دې څو ساعته مخکې، د بریتانیا د سمندري سوداګرۍ عملیاتي ادارې چې په یمن کې د المخا د جنوب په ۴۰ مایلۍ کې یوې کښتۍ ته نژدې د دوو چاودنو خبر ورکړ، او ویې ویل چې بېړۍ او عمله یې خوندي دي او خپلې لارې ته دوام ورکوي.

ایران پلوه حوثي یاغیانو، چې صنعا او د یمن ډېره برخه یې په کنټرول کې ده، له تېر نومبر راهیسې په سور سمندرګي کې پر نړیوالو بېړیو لسګونه بریدونه کړي او ادعا کوي چې د غزې په جګړه کې د فلسطینیانو ملاتړ کوي.

نړیوال جام؛ بنګله‌دېش هم د اتو غوره لوبډلو پړاو ته لار پیدا کړه

د بنګله‌دېش لوبغاړي د لوبې پر مهال
د بنګله‌دېش لوبغاړي د لوبې پر مهال

د کرکټ شل اوریز نړیوال جام د ګروپي پړاو په ننیو سیالیو کې بنګله‌دېش خپلې سیالې نیپال او سریلانکا بیا نیدرلنډ ته ماتې ورکړې.

دغه سیالۍ چې نن دوشنبه د کابل پر وخت سهار وختي پیل شوې وې، د بنګله‌دېش لوبډلې د ۲۱ منډو په توپیر نيپال ته او سریلانکا د ۸۳ منډو په توپیر نیدرلنډ ته ماتې ورکړې.

د یادو سیالیو تر پایلو وروسته په ‌ډي D ګروپ کې تر سویلي افریقا وروسته بنګله‌دېش دویم مقام خپل کړ او د اتو غوره لوبډلو پړاو ته یې لار پیدا کړه.

په ګروپي پړاو کې یوازې دوه سیالۍ پاتې چې لومړۍ به یې نن د نیوزیلینډ او پي‌این‌جي ترمنځ ترسره شي او دویمه به یې سبا سه شنبه د کابل پر وخت سهار ۵:۰۰ بجې د افغانستان او ویسټ اینډیز ترمنځ پيل شي.

که څه هم د اتو غوره لوبډلو په پړاو کې د افغانستان لومړني دوه سیالان هندوستان او اسټرالیا له وړاندې معلوم وو، خو درېیم سیال یې بنګله‌دېش تر بېګانیو سیالیو وروسته معلوم شو.

د جون په ۲۰مه نېټه به افغانستان لومړۍ سیالي له هندوستان سره ترسره کړي، بیا د جون میاشتې په ۲۳مه نېټه د اسټرالیا او افغانستان سیالي ده او د دې پړاو په وروستۍ لوبه کې به افغان لوبډله له بنګله‌دېش سره د جون په ۲۵مه نېټه سیالي وکړي.

د کرکټ نړیوالې شورا د خبر پر اساس د اتو غوره لوبډلو په پړاو کې به د هر ګروپ دوه مخکښې لوبډلې نیمه پایلوبه ولوبوي او ګټونکې لوبډلې به یې بیا د جون په ۲۹مه نېټه پایلوبه ترسره کړي.

اوکرایني چارواکي: روسیې خپلو بریدونو ته زور ورکړی

پر اوکراین د روسیې د بریدونو یو انځور
پر اوکراین د روسیې د بریدونو یو انځور

د اوکراین د لوی درستیز دفتر وايي، روسیې پر اوکراین خپلو بریدونو ته زور ورکړی دی.

دغه دفتر پرون د جوزا په ۲۷مه، په خپله ماښامنۍ ارزونه کې د روسیې د بریدونو د زیاتوالي خبر ورکړ.

په همدې حال کې په سویس کې د اوکراین د سولې دوه ورځنۍ غونډه د اوکراین او یو شمېر نورو هېوادونو د مشرانو په ګډون پرون پای ته ورسېده.

د اوکراین د لوی درستیز د دفتر اټکل ښيي چې د یکشنبې په ورځ ۸۸ نښتې شوي دي.

د دفتر د ارزونې له مخې، روسیې د ورځې په اوږدو کې خپل یرغلیز عملیات زیات کړي او هڅه کوي چې اوکراییني پوځي واحدونه له خپلو ځایونو څخه وباسي.

د راپور پر بنسټ، دا عملیات په عمده توګه د پوک روفسک سیمه کې زیات شوي، دا هغه سیمه ده چې روسي پوځیان په کې د پرمختګ هڅه کوي.

یورو جام؛ انګلستان او نیدرلینډ خپلو سیالانو ته ماتې ورکړې

د انګلستان او سربیا له لوبې یو انځور
د انګلستان او سربیا له لوبې یو انځور

د اروپا د یورو جام په سیالیو کې نن یکشنبه د جون په ۱۶مه نېټه هم درې سیالۍ ترسره شوې چې نیدرلنډ له پولنډ او انګلستان له سربیا سیالۍ وګټلې، خو د ډنمارک او سلوانیا سیالي مساوي پای ته ورسېده.

د ورځې لومړۍ لوبه د نیدرلنډ او پولنډ ترمنځ وه چې ۲ـ۱ نیدرلنډ وګټله.

په دویمې سیالۍ کې بیا ډنمارک او سلوانیا د یوه یوه ګول په وهلو سیالي مساوي پای ته ورسوله.

د ورځې په وروستۍ سیالۍ کې به انګلستان ۱ـ۰ د سربیا لوبډله ماتې کړه او په روان جام کې یې خپله لومړۍ سیالي وګټله.

یادې سیالۍ چې د جرمني په کوربه‌توب پیل شوي دي ۲۴ اروپايي هېوادونه پکې په شپږو ګروپونو کې سره سیالۍ کوي.

ټاکل شوې چې د دوشنبې په ورځ د جون په ۱۷مه نېټه هم درې سیالۍ ترسره شي، لومړۍ لوبه به د اوکراین ـ رومانیې، دویمه د بلجیم ـ سلواکیا او درېیمه د اتریش او فرانسې ترمنځ وي.

تحریک طالبان پاکستان یا "ټي‌ټي‌پي" یو اړخیزه درې ورځنی اوربند اعلان کړی

د تحریک طالبان پاکستان غړي
د تحریک طالبان پاکستان غړي

تحریک طالبان پاکستان یا "ټي‌ټي‌پي" ډلې د لوی اختر په مناسبت یو اړخیزه درې ورځنی اوربند اعلان کړی دی.

د دغې ډلې ویاند محمد خراساني د جون پر ۱۶مه رسنیو ته په استولي بیان کې ویلي چې اوربند به د جون پر ۱۷مه، ۱۸مه او ۱۹مه وي.

تحریک طالبان پاکستان ډلې دا بیان داسې وخت خپور کړی چې د جون پر ۱۶مه د سعودي عرب په ګډون د نړۍ په بېلابېلو هېوادونو کې لوی اختر ونمانځل شو، خو پاکستان او په افغانستان کې د طالبانو حکومت د جون پر ۱۷مه لوی اختر اعلان کړی دی.

د پاکستان حکومت لا د ټي ټي پي له لوري د اوربند اعلان په اړه څه نه دي ویلي.

تحریک طالبان پاکستان د ۲۰۲۲م کال له پای راهیسې په پاکستان، په تېره په خیبر پښتونخوا، کې پر امنیتي سرتېرو او پولیسو بریدونه زیات کړي دي.

اسلام اباد تحریک طالبان پاکستان یوه ترهګره ډله بولي او وايي چې دا ډله خپل اکثر بریدونه له افغانستانه پلانوي هغه تور چې د طالبانو حکومت په کلکه رد کړی دی.

غزې له میاشتو میاشتو ناکراریو وروسته یوه نسبتاً ارامه ورځ تېره کړه

د غزې یوه څنډه
د غزې یوه څنډه

غزې له میاشتو میاشتو ناکراریو وروسته پرون یوه نسبتاً ارامه ورځ تېره کړه.

دا ارامي وروسته له هغه رامنځته شوه چې اسراییلي پوځ د غزې په جنوبي سیمو کې د خپلو تعرضي عملیاتو یوه ورځنۍ تاکتیکي وقفه اعلان کړه.

دا وقفه د غزې په تړانګه کې د قحطۍ په اړه د ملګرو ملتونو د پرله پسې خبرداریو وروسته، غزې ته د لا زیاتو بشري مرستو د لیږد لپاره د مناسبو شرایطو د برابرولو په هدف اخیستل شوې.

د اسراییلو پوځ وايي، دغه تاکتیکي وقفه به هره ورځ د سهار له ۸ پیل او د ماښام تر ۷ بجو به دوام وکړي.

دا لا څرګنده نه ده چې دغه تاکتیکي وقفه به څومره وخت دوام وکړي.

د غزې په تړانګه کې د اسراییلو او د حماس د سخت دریځې ډلې ترمنځ له سختې جګړې اته میاشتې زیاتې واوښتې.

حماس د امریکا او اروپايي ټولنې له‌خوا د یوه تروریستي سازمان په توګه پېژندل کېږي.

د اوکراین په ختیځ کې یو روسی خبریال وژل شوی

فرانس پرېس خبري اژانس د روسي رسنۍ (New.Ru) له قوله راپور ورکړی چې د دې رسنۍ خبریال نیکیتا سیتساګي تېره ورځ د جون په ۱۶مه د اوکراین د بې پیلوټه الوتکې په برید کې وژل شوی دی.
فرانس پرېس خبري اژانس د روسي رسنۍ (New.Ru) له قوله راپور ورکړی چې د دې رسنۍ خبریال نیکیتا سیتساګي تېره ورځ د جون په ۱۶مه د اوکراین د بې پیلوټه الوتکې په برید کې وژل شوی دی.

د اوکراین په ختیځ کې یو روسی خبریال د بې پیلوټه الوتکې په برید کې وژل شوی دی.

فرانس پرېس خبري اژانس د روسي رسنۍ (New.Ru) له قوله راپور ورکړی چې د دې رسنۍ خبریال نیکیتا سیتساګي تېره ورځ د جون په ۱۶مه د اوکراین د بې پیلوټه الوتکې په برید کې وژل شوی دی.

دغې رسنۍ ادعا کړې چې دغه برید د ووګلیدار ښار ته څېرمه شوی چې له تېرو درېیو میاشتو راهیسې د روسیې او اوکرایني ځواکونو ترمنځ د سختو نښتو ډګر دی.

د فرانسې خبري اژانس د راپور له مخې، د روسیې د بهرنیو چارو وزارت د دغه خبریال وژنه تایید کړې او ادعا یې کړې چې د اوکراین یوې بې پیلوټه الوتکې په قصدي ډول دا روسی خبریال په نښه کړی چې راپور یې چمتو کاوه.

دوه ورځې وړاندې د اوکراين په ختيځ دونيتسک سيمه کې يو بل روسی خبريال هم وژل شوی و.

د روسیې ولسمشر ولادیمیر پوتین د روانې میاشتې په پیل کې وویل چې د هغه هېواد او اوکراین ترمنځ د جګړې له پیل راهیسې لږ تر لږه ۳۰ روسي خبریالان وژل شوي دي.

دا ارقام تر اوسه خپلواکو سرچینو نه دي تایید کړي.

نور راوښيه

XS
SM
MD
LG