د اسراییل د استخباراتو د ادارې رییس ډیویډ بارني قطر ته ځي چې په غزه کې د اوربند او د یرغملو د خلاصون لپاره خبرې له سره پیل کړي.

دا خبره یوې باخبرې سرچینې د خپل هویت پټ ساتلو په شرط رویترز خبري آژانس ته کړې او ویلي یې دي چې ښایي خبرې نن ترسره شي.

دغې سرچینې ویلي چې بارني به د قطر له صدراعظم شیخ محمد بن عبدالرحمن الثاني سره چې هڅه کوي چې اسراییل او حماس سره نژدې کړي، وګوري.

امریکا او اروپایي ټولنه حماس د یوې ترهګرې ډلې په توګه پېژني.

په عین حال کې د لبنان حزب‌الله ویلي چې د دوی مشر سعید حسن نصرالله ، د حماس له جګپوړي چارواکي خلیل الحیه سره په کتنه کې د غزې تړانګې پر وروستي وضعیت او د یوه اوربند په اړه خبرې کړې دي.

حزب‌الله او اسراییل د تېر کال د اکټوبر له میاشتې راهیسې چې پر اسراییل د حماس له برید وروسته په غزه کې جګړه پیل شوې، په خپلو کې نښتې کړې دي.

د دوی دواړو ترمنځ د نښتو له زیاتېدو سره د دې ویره زیاته شوې چې ښایي په سیمه کې د جګړې لمن پراخه شي.

د خیبرپښتونخوا ایالت د مردان ښار په جلاله پل سیمه کې نن په یوې چاودنه کې درې کسان وژل شوي او د دوو پولیسو په ګډون اته کسان ژوبل شوي دي.

د مردان د پولیسو مشر ظهور افريدي ویلي چې له دغه پله سره له وړاندې چاودېدونکي مواد ځای پرځای شوي وو چې د پوليسو د یوه موټر د تېرېدو په وخت پرې چاودلي.

په ژوبل شویو کسانو کې ماشومان او ښځې هم شامل دي.

ټپیان د درملنې لپاره د مردان روغتون ته انتقال شوي دي.

د مردان د پوليسو په وينا، د پېښې په اړه پلټنې روانې دي.

د دې پېښې مسولیت چا یا کومې ډلې په غاړه نه دی اخیستی.

وروسته له هغې چې په پاکستان کې د تېلو پلورونکو د حکومت د مالیو لوړولو پر وړاندې د کاري اعتصاب غوښتنه وکړه، نن په ټول پاکستان کې د تېلو د توزیع یو شمېر ټانکونه تړل شوي دي.

حکومت د مالیو د لوړولو لپاره دغه نوی اقدام د دې لپاره کړی چې د مالي کسر د کمولو لپاره عواید زیات کړي.

د پاکستان حکومت د عوایدو د راټولولو دغه ستونزمن هدف د دې لپاره ټاکلی چې د پیسو د نړیوال صندوق یا آی‌ایم‌ایف (IMF) نوې مرسته ترلاسه کړي، خو هغه د خلکو له پراخې غصې سره مخامخ شوی.

د پاکستان د تېلو پلورونکو اتحادیې (PPDA) رییس عبدالسمیع خان رویټرز ته ویلي چې له اسلام آباد او راولپنډۍ پرته د پاکستان په ټولو ښارونو کې د تېلو پلورونکو او د تېلو د توزیع ټانکونو اعتصاب کړی دی.

هغه زیاته کړې چې دغه اعتصاب د حکومت د هغې پرېکړې پر وړاندې شوی چې د تیلو پلورونکو پر عوایدو یې ۰،۵ فیصده مالیه وضع کړې ده.

پاکستان د سږ مالي کال لپاره چې د جولای له لومړۍ پیل شوی، د مالیو د راټولولو له درکه د ۴۷ میلیارد ډالرو عوایدو د ترلاسه کولو هدف ټاکلی چې دا د مخکیني کال پرتله نژدې ۴۰ سلنه زیاتوالی ښیي.

د پاکستان حکومت هڅه کوي چې د کورنیو ناخالصو تولیداتو له درکه په بودیجه کې کسر ۵،۹ سلنې ته راټیټ کړي.

تېر کال دغه کسر۷،۴ سلنه و.

د بریتانیا په پارلماني ټاکنو کې کارګر ګوند له ۱۴کلونو وروسته اکثریت څوکۍ وګټلې.

که څه هم لا د ټولو څوکیو نتیجه نه ده معلومه، خو د ۵۰۰ معلومو شویو څوکیو له ډلې ۳۸۹ د کایر ستارمر په مشرۍ کارګر ګوند خپلې کړي.

د بریا لپاره ۳۲۶ څوکۍ اړینې دي.

اوسني صدراعظم ریشي سوناک چې ګوند یې لویه ماته خوړلې کارګر ګوند ته مبارکي ورکړې ده.

د کارګر ګوند مشر کایر ستارمر تر بریا وروسته وینا کې وویل چې "بدلون اوس پیلېږي او بریتانیا بېرته د کارګر طبقې خدمت کې راولو."

نن په ایران کې د ولسمشرۍ د دویم پړاو انتخابات دي.

په دې ټاکنو کې د تېر پړاو دوه مخکښ کاندیدان مسعود پزشکیان او سعید جلیلي سیالي کوي.

دوی او نورو کاندیدانو یوه هم تېر پړاو کې د بریا لپاره کافي رایې نه وې وړې.

مسعود پزشکیان له اصلاح غوښتونکو کاندیدانو دی او سعید جلیلي هم له تُندلارو نظام پلوه کسانو څخه دی.

ایران کې داسې وخت ټاکنې ترسره کېږي چې ګڼو خلکو له رای ورکولو ډډه کړې ده.

د ولسمشرۍ لومړي پړاو ټاکنو کې د راپورونو په اساس د رایو په شرایطو له برابرو کسانو څه کم څلوېښت فیصدو ګډون کړی وو چې دا د ایران په تاریخ کې د ولسمشرۍ ټاکنو کې د ګډونوالو تر ټولو کمه فیصدي ده.

د اروپا د ملتونو د فوټبال جام کوارټرفاینل سیالۍ نن پيلېږي.

لومړۍ لوبه کې کوربه جرمني له هسپانیې سره مخ دی.

د دوی لوبه د افغانستان په وخت د شپې په اته نیمو پیلېږي. ګټونکی به یې نیمه پایلوبې ته ووځي.

په بله لوبه کې چې ناوخته پیلېږي پرتګال له فرانسې سره مخ دی.

د اروپا د ملتونو د فوټبال جام سیالۍ د جرمني په کوربه توب دوام لري او تمه ده پایلوبه یې د جولای په ۱۴مه وشي.

د اسراییل یو چارواکی وایي چې دې هېواد له حماس سره د خبرو اترو لپاره یو پلاوی استولی دی.

دې چارواکي د خپل نوم د نه افشا کېدو په شرط پرون پنجشنبې څو خبري آژانسونو ته ویلي چې د اسراییل صدراعظم بنیامین نتنیاهو د خپل هېواد له مذاکره کوونکي ټیم او د امریکا له ولسمشر جوبایډن سره د یوه اوربند په اړه خبرې کوي.

د بایډن اداره له څو میاشتې راهیسې د اسراییل او سخت دریځي حماس ډلې ترمنځ د اوربند د ټینګېدو لپاره هڅې کوي.

خو په غزه کې چې جګړه لا سخته شوې، د یوه اوربند د ټینګېدو لپاره د مصر او قطر په منځګړیتوب هڅو تراوسه نتیجه نه‌ده ورکړې.

تراوسه نه‌ده څرګنده چې د اسراییل مذاکراتي پلاوی چېرته استول شوی دی.

خو د اوربند د هڅو سره سره اسراییل په غزه کې د حماس پر وړاندې چې امریکا او اروپایي اتحادیه یې د یوې ترهګرې ډلې په توګه پېژني، جګړه لا سخته کړې ده.

د هنګري د حکومت یوه سرچینه وایي چې د دې هېواد صدراعظم ویکتور اوربان به نن جمعه د روسیې له ولسمشر ولادمیر پوتین سره د کتنې لپاره مسکو ته لاړ شي.

دې سرچینې د موضوع د حساسیت له کبله د خپل هویت د پټ ساتلو په شرط د ازادي راډیو د خبر مرکزي څانګې ته ویلي چې اوربان به په کییف کې د اوکراین له ولسمشر ولادمیر زیلینسکي سره له کتنې وروسته مسکو ته لاړ شي.

د ۲۰۲۲م کال په فبرورۍ کې چې روسیې پر اوکراین یرغل کړی، اوربان د اروپایي اتحادیې یوازینی مشر دی چې له کییف سره یې پوځي مرستو ته شا کړې ده.

هنګري اوس د اروپایي کمېسیون دوره‌يي مشري په غاړه لري.

ترکي چارواکي وايي ټاکل شوې چې د ترکیې ولسمشر رجب طیب اردوغان د اروپا د فوټبال جام د سیالیو په لړ کې د ترکیې او هالنډ ترمنځ د نیم پایلوبې لیدو ته برلین ته ولاړ شي.

دا پرېکړه وروسته له هغه وشوه چې د یو ترک لوبغاړي لانجمن حرکت د ترکیې او کوربه جرمني ترمنځ ډپیلوماتیکه لانجه جوړه کړه.

ترکیې پرون چارشنبې په انقره کې د جرمني سفیر د بهرنیو چارو وزارت ته احضار کړ څو د فوټبال په ډګر کې د ترکي لوبغاړي مریه دیمیرال د لاس پر هغه اشاره چې د تندلارو ملتپالو نښه بلل کېږي د جرمني د کورنیو چارو د وزیرې نانسي فېزر له‌خوا د شويو انتقادونو سپیناوی وکړي.

د ترکي فوټبالر د لاس اشاره له هغې تندلاري ډلې سره اړونده ګڼل کېږي چې د خړو لېوانو په نوم پېژندل کېږي.

د جرمني خبري آژانس د راپور له مخې جرمني په ځوابي اقدام کې نن په برلین کې د ترکیې سفیر احضار کړ.

د پاکستان په کراچۍ ښار کې پرله‌پسې تودوخې له پنځوس ډېر کسان وژلي دي.

د کراچۍ د پولیسو ویاندې سمیې سعید ویلي چې دا کسان په تېره یوه میاشت کې د تودوخې له پیله جل وهلي دي.

د تودوخې د دې څپې په نتیجه کې د روغتیايي چارواکو او د ژغورنکو ډلو په وینا روغتونونه له ناروغانو او سړې خونې له مړیو ډکې شوې دي.

د کراچۍ د جناح روغتون ویاند حس علي د جرمني خبري آژانس ته ویلي چې پرون د جولای په درېیمه، چې د تودوخې درجه د سانتي ګراد له ۵۵ درجو واوښته، دې روغتون ته نوي جل وهلي کسان راوستل شول.