د وړاندوینې له مخې، د باران اندازه به د ۱۵ او ۳۰ ملي مترو ترمنځ وي او د واورې اندازه به د ۱۰ او ۴۰ سانتي مترو ترمنځ وي.

د هوا پېژندنې ادارې دا هم ویلي چې په مرکزي سیمو او سالنګونو کې به قوي بادونه وچلیږي.

افغانستان د اقلیمي بدلون په وړاندې د لسو ‌ډېرو زیان منونکو هیوادونو څخه یو دی.

د ملګرو ملتونو د بشري چارو د همغږۍ دفتر (OCHA) په خپل وروستي رپوټ کې ویلي چې په تیرو دوو اونیو کې د افغانستان په ځینو شمالي او ختیځو ولایتونو کې د درنو واورو، بارانونو او سختې سړې هوا له امله لږ تر لږه ۱۰ کسان وژل شوي او ۱۷ نور ټپیان شوي دي.

د راپورونو له مخې حمزه الفت د ۲۰۲۳ کال په لومړیو کې په کابل کې نیول شوی وو. هغه د ښځو او فعالانو په اعتراضي لاریونو او غونډو کې د ګډون په خاطر بندي کړای شوی وو.

د بشري حقونو فعالان ادعا کوي چې د طالبانو ځواکونو حمزه الفت په زندان کې سخت شکنجه کړی او د همدغو شکنجو او پاتې تاثیراتو په خاطر هغه تر ازادۍ څه وخت وروسته د ناروغیو او ټپونو په خاطر ساه ورکړې ده.

د طالبانو حکومت لا د حمزه الفت په مړینه او په زندان کې د هغه د شکنجې په تړاو څه غبرګون نه دی ښوولی.
مخکې هم ګڼو راپورونو کې طالبان تورن شوي چې د بشري حقونو فعالان، ښځې او خبریالان یې نیولي او په زندانونو کې سخت شکنجه او ان په ځینو باندې تېری کړی دی.

طالبانو بیا اکثر دا تورونه رد کړي دي.

د پاکستان پوځ په دغه بیان کې یو وار بیا ویلي چې افغانستان کې د طالبانو له حکومت غواړي د خپلې خوا پولې امنیت ونیسي. د پاکستان د پوځ بیان زیاتوي چې د طالبانو حکومت باید خپل مسوولیت ادا او اجازه ورنکړي چې له افغان خاورې د پاکستان ضد فعالیت ترسره شي.

د طالبانو حکومت بیا مخکې په وار وار ویلي هیڅ ډلې ته به اجازه ورنکړي چې د ګاونډیو هیوادونو امنیت ته د ګواښ لپاره د افغانستان خاوره وکاروي.

د پاکستان پوځ داسې وخت دا ادعا کړې چې تېره اوونۍ یې د کونړ ګڼې سرحدي سیمې په توپونو ویشتلي او تر هغه مخکې یې هم په پکتیکا کې بمباري کړې.

د دغو پرله پسې سرحدي نښتو له امله د پاکستان او افغانستان ترمنځ اړیکې ډېرې ترینګلې شوې دي.

د افغانستان د بغلان ولایت اوسېدونکی همدردجان تېموري چې اوس د انګلستان په پلازمینې لندن کې مېشت دی، د ځايي " مېل هېل وېلج" د دویمې لوبډلې لوبډلمشر ټاکل شوی دی.

نوموړي له ازادي راډیو سره په خپلو خبرو کې وویل، میل هیل ویلج کرکټ کلب له تېرو ۱۵۷ کلونو راهیسې فعالیت کوي چې په لومړي ځل یې یو افغان د دویم کلب لوبډلمشر ټاکل شوی دی.

د ښاغلي تېموري په وینا، هغه ته د کلب له ۱۳۲ غړیو څخه ۸۰ کسانو رایه ورکړې ده چې خپل سریلانکايي سیال څخه د ۶۰ رایو په تفاوت مخکې شوی دی.

د نوموړي په وینا دې لوبډلمشرۍ دا فرصت ورکړی دی چې انګلستان ته د نویو راغلیو افغان کډوالو هغو ځوانانو ته د لوبو ذمینه سازي وکړي چې له کرکټ سره مینه لري.

دغه راز همدردجان تېموري خپله لوبډلمشري یوازې یو امتیاز نه ګڼي، بلکې وايي چې له دې لارې به د دې فرصت هم ترلاسه کړي چې د افغانستان د کرکټ یو روښانه انځور د خپل کلب او نورو کلبونو لوبغاړو ته وړاندې کړي.

د ویلو ده چې اوس مهال په لسګونه افغان ځوانان د برېټانیا په بیلابیلو کلبونو کې کرکټ کوي چې یو شمېر یې د انګلستان مهمو لوبډلو ته هم رسېدلي دي.

انځور: همدرد جان تېموري

د طالبانو تر کنټرول لاندې ستره محکمه وايي، ایران به ډېر ژر ۱۵۰۰ افغان بنديان افغانستان ته وسپاري.

د طالبانو سترې محکمې نن (یکشنبې، د مرغومي ۳۰مه) په یوه خبرپاڼه کې ویلي چې د عبدالمالک حقاني په مشرۍ د دې محکمې یوه پلاوي، چې تهران ته تللی، د ایران د قضاییه قوې د نړیوالو چارو له مرستیال، کاظم غریب‌آبادي، سره لیدلي دي.

په خبرپاڼه کې راغلي چې په دې کتنه کې دواړو خواوو د عدلي او قضايي همکاریو د پیاوړتیا او د بندیانو د انتقال پر موضوع خبرې کړي دی.

د طالبانو د سترې محکمې په خبرپاڼه کې افغانستان ته د بندیانو د انتقال د دقیق وخت او شرایطو په اړه څه نه دي ویل شوي.

عبدالمالک حقاني او د ایران د قضاییه قوې د نړیوالو چارو مرستیال، کاظم غریب آبادي، د هغو افغانانو د اعدام پر بدیلو لارو چارو هم خبرې کړي چې په ایران کې په اعدام محکوم شوي دي.

عبدالمالک حقاني د جمعې په ورځ (جدي په ۲۸مه) د یو پلاوي په مشرۍ ایران ته لاړ.

په افغانستان کې د ایران د سوداګرۍ اتشه وايي، په تېرو دوو کلونو کې د تهران او کابل ترمنځ سوداګري اړیکو پر له پسې وده کړې ده.

د ایران د دولتي خبري اژانس، ایرنا د راپور له مخې، حسین روستايي پرون (شنبې) وویل چې په ۲۰۲۴ کال کې د دواړو هېوادونو د سوداګري تبادلو اندازه د وړم کال پرتله نژدې ۸۴ سلنه زیاته شوې ده.

حسین روستايي همداراز وویل چې افغانستان په ۲۰۲۴ کال کې له ایران څخه د څه باندې ۳ میلیارده او۱۴۳ میلیون ډالرو واردات کړي دي. حال دا چې په ۲۰۲۲ کې ایران، افغانستان ته د یو میلیارد او۷۱۴ میلیون ډالرو صادرات لرل.

خو د دې په مقابل کې افغانستان په ۲۰۲۴ کال کې ایران ته د ۵۴ میلیون ډالرو صادرات لرل، چې د ۲۰۲۳ کال پرتله ۲۹ میلیون ډالره زیاتوالی پکې راغلی دی.

د ایران د ګمرکونو د ادارې د رسمي شمېرو له مخې، افغانستان په اوس وخت کې د ایراني صادراتو پنځم لوی هدف دی.

له فیلیپین څخه شاوخوا ۲۰۰ افغانان، چې د کډوالۍ ویزې یې نهايي شوې وې، متحدو ایالتونو ته لېږدول شوي دي.

په مانیلا ک د امریکا د سفارت ویاند نن (یکشنبه) اسوشیتیډ پریس اژانس ته وویل، چې دا افغانان په څو ډلو کې تېره اوونۍ په سوداګریزو الوتنو کې له فلیپین څخه امریکا ته واستول شول.

سفارت په یوه خبرپاڼه کې د فیلیپین له حکومت څخه د کډوالو په چارو کې د همکارۍ له امله مننه کړې ده.

دا افغانان، چې ډېری یې ماشومان دي، د جنورۍ پر ۶مه نېټه فیلیپین ته رسیدلي وو.

تمه کېده، چې دغه افغانان به تر څو میاشتو پورې په فیلیپین کې پاتې شي، خو د دوی د ویزو پروسه په بېساري ډول ګړندۍ شوې ده.

د امریکا د بهرنیو چارو وزارت د معلوماتو له مخې، په تېرو دریو کلونو کې متحدو ایالتونو شاوخوا ۱۶۰ زره افغانان په خپل هېواد کې مېشت کړي دي.

د طالبانو د بهرنيو چارو وزارت سياسي مرستيال شيرمحمد عباس ستانکزی وايي چې د نجونو د زده کړو د مخنیوي لپاره هیڅ توجیه نه شته.

ده د طالبانو له مشر څخه وغوښتل چې د افغان ښځو او نجونو پر زده کړو بنديزونه لېرې کړي ځکه چې دې کار ته هیڅ پلمه نه شته.

عباس ستانکزي دا څرګندونې پرون (شنبې) د خوست ولايت په یوه دیني مدرسه کې په وينا کې وکړې.

ده د غونډې ګډونوالو ته وويل، د ښځو او نجونو د زده کړو د منع کولو لپاره هېڅ دليل او شرعي توجیه نشته، او په ضمني ډول یې دا بندیز د طالبانو د مشر ملاهبت الله اخوندزاده شخصي نظر وباله.

طالبانو د ۲۰۲۱ په اګست کې له واک ته رسیدو وروسته له شپږم ټولګي پورته نجونې له زده کړو په تدریج منع کړې او په پیل کې یې وویل چې دا بندیز به موقتي وي خو اوس په دې اړه چې د نجونو ښوونځي به تر کله بند وي یا ولې بند دي، څه نه وايي.

د طالبانو د ټولګټو وزارت وايي، چې د درنې واورې او سخت توفان له کبله د سالنګونو لویه لار نن سهار بیا د ټرافیکو پرمخ وتړل شوه.

د دغه وزارت ویاند محمد اشرف حق شناس پر خپله ایکسپاڼه لیکلي، چې د درنې واورې، توفان او د لید ساحې د محدودیت له کبله د سالنګونو لویه لار نن سهار وختي درې بجې د لنډ وخت لپاره وتړل شوه.

حق شناس له خلکو غوښتنه کړې، چې تر بلې خبرتیا پورې د سالنګ پر لوري حرکت ونه کړي.

تر دې مخکې مخکې هم د درنې واورې او توفان له کبله د جمعې په ورځ ناوخته دغه لار د هر ډول موټرو پرمخ تړل شوې وه، خو تر څو ساعتونو وروسته د شنبې په سهار د کوچنیو مسافروړونکو موټرو پرمخ پرانیستل شوه. د طالبانو ټولګټو وزارت تېره شپه اعلان وکړ، چې د واورې او وقفه يي توفان له کبله د بامیان د قوناق، شاتو او حاجي ګک کوتلونو لارې هم د ټرافیکو پرمخ تړل شوې دي.

د طالبانو ټولګټو وزارت، د درنې واورې له کبله په موقت ډول د بامیان د قوناق، شاتو او حاجي ګک کوتلونو د لارو د تړل کېدو خبر ورکړ. د دغه وزارت ویاند محمد اشرف حق شناس تېره شپه پر خپله ایکسپاڼه لیکلي، چې په بامیان کې د ټولګټو ریاست له قراردادي شرکتونو سره په همغږۍ د دغو مسیرونو د پاکولو او خلاصولو هڅه کوي.

د فرانسپرس خبري اژانس د راپور له مخې د کردانو نیمه خپلواکې ادارې شنبه په یوه اعلامیه کې ویلي چې ترکیې یو وار بیا په تشرین بندر کې د خلکو غونډه هدف ګرځولې او په دغه برید سره څلور ملکیان وژل شوي او ۱۵ نور ټپیان دي.

په لندن کې د سوریې د بشري حقونو څارونکې ډلې ویلي هم د ترکیې د بې پيلوټه الوتکې په یوه برید کې د لږ تر لږه دریو ملکیانو د وژل کېدو خبر ورکړی.

خو ترکیه بیا د کردستان د کارګرانو د ممنوعه ګوند پي. کا . کا اړوند د خلق مدافعینو ځواکونه تورنوي چې له څلورو لسیزو راهیسې د ترکیې د حکومت پر ضد وسله وال فعالیتونه کوي.

ترکیې له ۲۰۱۶ کال راهیسې د کردانو په مشرۍ د سوریې د ډموکراټیکو ځواکونو اس. ډي . اف پر ضد څو عملیاتونه ترسره کړي دي.