نړۍ
امریکا د سپاه پاسداران پر یوه چارواکي او ځینو نورو کسانو بندیزونه ولګول
د امریکا متحدو ایالتونو پرون د ایران د سپاه پاسداران پر یوه چارواکي او ځینو نورو کسانو بندیزونه ولګول.
پر دغو کسانو تور دی چې غوښتل یې د نړۍ په بېلابېلو برخو کې د امریکا د ملي امنیت د پخواني سلاکار جان بولټن، ځینو نورو کسانو او د امریکا د حکومت د یوه بل چارواکي د وژلو لپاره په پراخو توطئیو کې همکاري وکړي.
د ادعا له مخې د جان بولټن د وژلو دسیسه ښه مستنده شوې او د امریکا څارنوالانو او پخوانیو حکومتي چارواکو دا د ایران د سپاه پاسداران یوه دوامداره هڅه ګڼلې، چې غواړي د پخواني ولسمشر ډونالډ ټرمپ د مهال چارواکي په نښه کړي.
ویل شوي دغه پخواني امریکايي چارواکي په ۲۰۲۰م کال په هغه هوايي حمله کې دخیل ګڼل شوي چې د ایران د قدس ځواکونو قوماندان قاسم سلیماني یې وواژه.
په پرونیو بندیزونو کې په ایران او ترکیه کې درې کسان، یو شرکت چې د ایران له قدس ځواک سره همکاري لري او د ایران د استخباراتي ادارې دوه چارواکي په نښه شوي دي.
د امریکا خزانې وزارت ویلي، دغو کسانو غوښتل د امریکا چارواکي، خبریالان او هغه ایراني مخالفان ووژني، چې په بهر کې ژوند کوي.
د ورځې تازه خبرونه دلته ولولئ
شنکر: پر هندي کمپنیو د امریکا د احتمالي بندیزونو په اړه د خبرو خبر ورکړ
وروسته له هغې چې متحدو ایالتونو وویل هندي کمپنۍ به چې د ایران د چابهاربندر په پروژه کې ښکېلې دي، د بندیزونو له خطر سره مخامخې شي، د هند د بهرنیو چارو وزیر وایي، کمپنۍ به یې د دغه ستراتیژیک بندر پر ګټو د پوهېدو لپاره کار وکړي.
ایران او هند روانه اوونۍ د دغه بندر د پراختیا او تجهیز لپاره یو تړون لاسلیک کړ چې نوي ډیلي ته اجازه ورکوي چې د لسو کلونو لپاره یې له تاسیساتو کار واخلي.
هغه هم داسې مهال چې د هند حکومت په لویدیځه او مرکزي آسیا کې د سوداګرۍ د ودې لپاره هڅې کوي.
د فرانسپرس خبري آژانس د راپور له مخې، د هند د بهرنیو چارو وزیر اس جې شنکر سې شنبې ناوخته په کلکته کې یوې غونډې ته وویل چې دا مسله د خبرو اترو او قناعت له لارې حل کیدای شي چې خلک په دې پوه شي چې دا واقعاً د هرچا په ګټه ده.
هغه زیاته کړه که د چابهار بندر په اړه د امریکا پخواني دریځ ته ځیرشو نو ګورو چې متحدو ایالتونو د چاربهار د بندر ستاینه کړې او هغه یې ډېر مهم بللی دی.
متحدو ایالتونو، په افغانستان کې د پوځي حضور په مهال دغه پروژه ځکه منلې وه چې نوی ډیلی یې په کابل کې د خپل ملاتړي حکومت یو ارزښتناک شریک باله.
خو د امریکا د بهرنیو چارو وزارت مرستیال ویاند ویدانټ پاټیل د دوشنبې په ورځ وویل، هرهغه څوک یا کمپنۍ چې له ایران سره د سوداګرۍ معاملې کوي، باید په دې پوه شي چې ځان د بندیزونو له خطر سره مخامخ کوي.
د امریکا متحدو ایالاتونو له اوږدې مودې راهیسې پر ایران د دې هیواد د اټومي او میزایلو د پروګرامونو په ګډون د یو لړ مسایلو په خاطربندیزونه لګولي دي.
د کانګرس غړي: د بایډن اداره غواړي اسراییلو ته د یو میلیارد ډالرو اضافي وسلې او مهمات واستوي
د جوبایډن ادارې د کانګرس مخکښو غړو ته ویلي چې غواړي اسراییلو ته د یو میلیارد ډالرو په ارزښت اضافي وسلې او مهمات واستوي.
د استازو جرګې درېیو غړو پرون دا خبر ورکړ، خو لا روښانه نه ده چې دا وسلې او مهمات به څه وخت اسراییلو ته واستول شي.
د بایډن ادارې په روانه میاشت کې د ۳۵۰۰ بمونو یوه بله جوپه هم اسراییلو ته استولې وه چې د هر یوه بم وزن یې له ۹۰۰ کیلوګرامو زیات و.
سپینې ماڼۍ چې په غزه کې د ملکي وګړو پر تلفاتو، اندېښنه ښودلې له دې مخکې ویلي وو چې اسراییلو ته یې د بمونو د استولو بهیر درولی دی.
د امریکا د بهرنیو چارو وزیر: ناټو کې د اوکراین د شاملیدو لپاره د پام وړ ګامونه اخلو
د امریکا د بهرنیو چارو وزیر انتوني بلېنکین کییف ته د ناڅاپي سفر پرمهال ډاډ ورکړ چې هېواد به یې په ناټو کې د اوکراین د غړیتوب په برخه کې د پام وړ ګامونه واخلي.
بلېنکین دا یادونه هم وکړه چې داسې مهال چې روسیې د اوکراین په ختیځ کې خپلو عملیاتو ته زور ورکړی، متحدایالات به د دې هېواد د امنیت او ملي حاکمیت د خوندیتوب ملاتړ وکړي.
بلېنیکن چې پرون په پلازمېنه کییف کې یوې ډلې محصلانو ته وینا کوله وویل، متحدایالتونو پر اوکراین د روسیې د یرغل له پیله د دې هېواد ملاتړ کړی.
د ښاغلي بلېنکین وینا تر ډېره پردې متمرکزه وه چې د اوکراین امنیت او د اقتصادي تاسیساتو بیا رغونه به په ناټو کې د دې هېواد غړیتوب ته لاره اواره کړي.
روسیې ادعا کوي چې پر اوکراین یې ځکه یرغل وکړ چې لویدیځ له کلونو راهیسې غوښتل د اروپا د ختیځ پر لور پرمختګ وکړي.
ولاديمير پوتين سبا چین ته په سفر ځي
د روسيې ولسمشر ولاديمير پوتين به سبا (د مۍ ۱۶) چين ته سفر وکړي.
د کرملين د وېبپاڼې د خبر له مخې، پوتين به د مې په ۱۶ او ۱۷ نېټه د چين له ولسمشر شي جين پينګ او د چين له صدراعظم لي کيانګ سره خبرې اترې وکړي.
دا د ولسمشر په توګه د پنځمې دورې لپاره د بیا انتخابیدو وروسته د ولادیمیر پوتین لومړنی بهرنی سفر دی.
پوتین، چې د نیولو حکم یي د نړیوالې جنایي محکمې لخوا صادر شوی دی، د ۲۰۲۲ کال په فبروري کې پر اوکرایین د روسیې د غیر موجه برید له پيل را وروسته ډېر کم بهر تللی دی.
ګرجستان: پارلمان د "بهرنیو عواملو" لانجمنه لایحه تصویب کړه
د ګرجستان پارلمان، د رایو په اکثریت سره د "بهرنیو عواملو" لانجمنه لایحه تصویب کړه.
روسیه هم ورته قانون لري، او د دې لامل شوی چې له بهر تمویلیدونکې ګڼې رسنۍ یا نادولتي موسسې خپل فعالیتونه ودروي او په ځینو مواردو کې خلک د دې قانون د نه مراعتولو له امله زنداني شوي هم دي.
په ګرجستان کې د دغه قانون وروستی تصویب پراخ ملي او نړیوال غبرګونونه راپارولي دي.
په زرګونو کسانو چې ډېری یې ځوانان دي، په پلازمېنه تبلیسي او د پارلمان د ودانۍ مخې ته مظاهرې وکړې.
متحده ایالاتو، اروپايي ټولنې او د بشري حقونو څارونکو دا لایحه غندلې ځکه د دوی په باور ورته قانون روسیه هم لري چې له امله یې ولادمیر پوتین خپل مخالفان او خپلواک بنسټونه ځپي او غږونه یې غلي کوي.
د روغتیا نړیوال سازمان د غزې د ډاکټرانو لخوا د تلفاتو اعلان شوي ارقام تایید کړل
وروسته له هغه چې اسراییل په غزه کې د تلفاتو د شمیر په اړه پوښتنې وکړې، د روغتیا نړیوال سازمان د سه شنبې په ورځ د غزې د روغتیا وزارت لخوا د وژل شویو کسانو د ارقامو په اړه ډاډ څرګند کړ او ویې ویل چې دوی په حقیقت کې د مرګژوبلې د کچې تایید ته په نږدې کېدو دي.
تېره اوونۍ د غزې د روغتیا وزارت د اکتوبر له اوومې نېټې څخه تر اوسه پورې د ۳۵ زره کسانو د وژل کېدو اعلان وکړ او ویې ویل چې څه باندې ۲۵ زره کسان په بشپړه توګه پېژندل شوي چې له نیمايي ډېر یې ښځې او ماشومان دي.
دې کار د اسراییلو تورونه وپارول چې ګواکې دا ارقام سم نه دي.
د روغتیا د نړیوال سازمان ویاندې کریسټین لینډمایر پرون وویل چې وړاندې شوي معلومات سم دي او په ټولیزه توګه د مړو شمیر له ۳۵۰۰۰ څخه ډیر دی.
زیلینسکي بلېنکن ته: اوکراین د پاټریوټ توغندیو سیستم ته سمدستي اړتیا لري
د اوکراین ولسمشر ولودیمیر زیلینسکي د متحدوایالتونو د بهرنیو چارو وزیر انټوني بلېنکن ته ویلي چې هېواد یې د پاټریوټ توغندیو سیستم ته سمدستي اړتیا لري.
ولودیمیر زیلینسکي دا غوښتنه نن په کییف کې له انټوني بلېنکن سره د کتنې پرمهال وکړه.
زیلینسکي وویل، هېواد یې داسې مهال چې روسیې د اوکراین پر شمال ختیځې خارکییف سیمې حملو ته زور ورکړی او د سیمې اوسېدونکي د روسیې د توغندیو او بې پیلوټه الوتکو تر سختو بمباریو لاندې دي نورو بېړنیو پوځي مرستو ته اړتیا لري.
بلېنکن چې په کانګرس کې د میلیاردونو ډالرو په ارزښت اوکراین ته د امریکا د مرستې له تصویبېدو څو اوونۍ وروسته نن په ناڅاپي سفر کییف ته ورسېد وویل چې د امریکا وسلې او پوځي تجهیزات دې هېواد ته پر لاره دي.
بلېنکن زیاته کړه چې دا مرسته به د روسیې پر ضد د روانې جګړې په ډګر کې لوی بدلون راولي.
په عین حال کې په خارکییف سیمه کې د اوکراین د پوځ ستر درستیز نن وویل چې اوکرایني ځواکونو د د روسیې سرحد ته نژدې د واوچانسک کوچني ښار پر لور د روسي د پوځ تازه حمله په شا تمبولې ده.
له بلې خوا د اوکراین د پوځي استخباراتو د ادارې مشر کیریلو بودانوف نن د اوکراین تلوېزیون ته وویل چې په خارکییف کې وضعیت آرام دی، خو هغه زیاته کړه چې روسیه ښايي په راروانو ورځو کې هلته اضافي ځواکونه واستوي.
د خیبرپښتونخوا په شمالي وزیرستان کې چاودنې لږترلږه څلور کسان وژلي
د خیبرپښتونخوا په شمالي وزیرستان سیمه کې د یوې بې پیلوټه الوتکې لهخوا د توغول شوي میزایل په چاودنه کې لږترلږه څلور کسان وژل شوي دي.
اسوشېټېډپرېس خبري آژانس د خیبرپښتونخوا د پولیسو د مشر هدایتالله له قوله لیکي چې وايي، پېښه نن سهار وختي هغه مهال وشوه چې دا توغندی پر یوه کور ولګېد.
د هغه په وینا، په مړو کې ماشومان هم شامل دي.
ویل شوي چې وژل شویو کسانو ظاهراً له وسلهوالو ډلو سره یې اړیکي نه لرل او ولسي وګړي وو.
د راپورونو له مخې د سیمې اوسېدونکو د وژل شویو کسانو مړي د اعتراض لپاره د پوځ د یوې قرارګاه مخې ته کېښودل او د دې پېښې د عاملانو غوښتنه یې وکړه.
تراوسه مالومه نه ده چې دا توغندی به چا ویشتلی وي او چارواکو ویلي چې په دې اړه یې تحقیقات پیل کړي.
د اسوشېټېډپرېس خبري آژانس د راپور له مخې په سیمه کې د ډرون ډېری حملې د امریکا یا د پاکستان د پوځ له خوا کېږي.
د پاکستان تر ولکې لاندې کشمیر؛ د برېښنا او غنمو بیې ټیټې او له تاوتریخوالي ډک اعتراضونه پای ته ورسېدل
د پاکستان تر ولکې لاندې کشمیر کې معترضانو وروسته له هغه د تاوتریخوالي د ډکو مظاهرو د پای ته رسېدو غوښتنه وکړه چې چارواکو د برېښنا او غنمو د بیو له ټیټولو سره موافقه وکړه.
د عوامي ایکشن د کمېټې په نوم په سیمه کې د مدني حقونو ائتلاف چې دا مظاهرې یې تنظیم کړې وې، نن وویل چې د پاکستاني کشمیر په مرکز مظفرآباد ښار کې پلان شوې اعتراضونه یې وروسته له هغه کنسل کړل چې چارواکو د دوی غوښتنې ومنلې.
په دې مظاهرو کې چې د تېرې اونۍ د جمعې په ورځ پیل شوې وې، د پولیسو او معترضانو ترمنځ په نښتو کې څلور کسان چې یو پولیس هم پکې وو، ووژل شول او د چارواکو په وینا له سلو زیات پولیس هم پکې ټپیان شول.
بېګا ناوخته د کشمیر د سیمه ایزې ادارې مشر اعلان وکړ چې د برېښنا او غنمو بیې ټیټې شوې دي.
آل ثاني: د غزې د اوربند خبرې د اسراییلي ځواکونو د عملیاتو دوام بې نتیجې کړي
د قطر د بهرنیو چارو وزیر وايي چې په غزه کې د اوربند په اړه خبرې په رفح کې د اسراییلي ځواکونو د پوځي عملیاتو له کبله بې نتیجې پاتې دي.
شېخ محمد بن عبدالرحمان آل ثاني نن وویل چې په خاص ډول په تېرو څو اونیو کې منځګړو په خبرو کې د پرمختګ نښې ولیدلې، خو له بده مرغه کارونه پر سم لوري ولاړل نه او ځکه نو خبرې په بې نتیجې حالت کې دي.
د آل ثاني په وینا، په رفح کې د اسراییلو پوځي عملیات د دې شاتګ باعث شول.
په روانه مې میاشت کې په رفح کې د پوځي عملیاتو پرمهال اسراییلو له رفح سره د مصر پوله چې د بشري مرستو د رسولو اصلي لاره ده، بنده کړه.
د بشري حقونو ډلو ویلي دي چې دا اقدام به په غزه کې وضعیت نور هم خراب کړي.