د لاسرسۍ وړ لېنکونه

تازه خبر
چهارشنبه ۱۲ تله ۱۴۰۲ کابل ۱۱:۵۴

افغانستان

مککال: د طالبانو رسميت پېژندل له ښځو سره د دوی په چلند پورې تړلی

د امریکا د استازو جرګې د بهرنیو چارو کمېټې مشر مایکل مککال

د امریکا د استازو جرګې د بهرنیو چارو کمېټې مشر مایکل مککال وايي، تر څو چې طالبان له ښځو سره په خپل چلند کې بدلون رانه‌وړي او بشري حقونه رعایت نه‌کړي، حکومت به یې په رسمیت ونه پېژندل شي.

هغه له امریکا غږ اشنا راډیو سره په مرکه کې وویل، که طالبان ښځې د خپلې ټولنې برخه ونه ګرځوي، د کانګرس دواړه ګوندونه به د طالبانو حکومت په رسمیت ونه پېژني.

ده ټینګار وکړ، طالبان باید ښځو ته د ملکیت په سترګه ونه ګوري بلکې برابر چلند ورسره وکړي.

د ورځې تازه خبرونه دلته ولولئ

ارزګان: ترافیکي پېښه کې ۲ تنه مړه او ۲ نور ټپيان شول

د ارزګان د مرکز ترینکوټ ښار یوه څنډه - ارشیف

په ارزګان ولایت کې د طالبانو سیمه ییز چارواکي، په مرکز ترینکوټ کې په یوه ترافیکې پیښه کې د دوو کسانو د مړینې او د دوو نورو د ټپي کېدو خبر ورکوي.

د ارزګان د امنیه قوماندانۍ له خوا په خپره شوي خبرپاڼه کې راغلي، چې دا پیښه تیر ماښام د ترینکوټ ښار اړوند د کندهار اډې ته نژدې له یوه موټر سره د یوه موټر سایکل د ټکر له کبله شوې ده.

د ولایتي روغتون مسولینو رسنیو ته وویل چې د ټپیانو حالت د ډاډ وړ دی.

د طالبانو چارواکو او پاکستان مېشتو افغان کډوالو د کډوالو په نیول کیدو او ځورولو اندېښنه وښوده

د پاکستاني پولیسو له لوري یو شمېر بندي شوي افغان کدوال - تصویر له ارشیفه

د طالبانو چارواکو په پاکستان کې د دېره افغان کډوالو د نیونو او ځورونو په اړه اندېښنه ښودلې.

په اسلام آباد کې د افغانستان سفارت چې طالبان یې اداره کوي، پرون د یو بیان په خپرولو سره ویلي چې لږترلږه څلور تنه افغان کډوال د پاکستاني امنیتي ځواکونو له خوا تر نیول کېدو وروسته مړه شوي او جسدونه یې یا په روغتون او یا نورو ځایونو کې موندل شوي دي.

افغان سفارت همداراز ویلي دي چې په تېرو دوو اونیو کې د پاکستان په بېلابېلو سیمو کې نژدې زر تنه افغان کډوال نیول شوي، چې تقریبا نیمايي یې په دې هېواد کې د استوګنې قانوني اسناد هم لري.

دا څرګندونې داسې مهال کېږي، چې د پاکستان موقت حکومت پرون په دې هېواد کې دېرهناقانونه کډوالو ته د نومبر تر لومړۍ نېټې پورې مهلت ورکړ چې له دې هېواد ووځي.

د خوړو نړیوال پروګرام: د غرونو تر شا به ډېر افغانان د سږ ژمي ستونزې بې لاسنیوي وزغمي

په یوه لرې پرته سیمه کې مېشت بې وزله افغانان - ارشیف

د خوړو نړیوال پروګرام وايي، په افغانستان کې سخت ژمی په مخکې دی او زیات وګړي به د غرونو تر شا په یخنۍ کې راګیر پاتې وي.

د ملګرو ملتونو د دې ادارې د اسیا پسفیک څانګې پرون په خپله اېکس شبکه کې لیکلي، د دوی د افغانستان دفتر د بودجې له کموالي سره مخامخ دی.

د خوړو نړیوال پروګرام وايي، د دې لپاره چې په افغانستان کې د هر اړ افغان لاسنیوی وشي، په کار ده دوی ته سم د لاسه بودجه ورکړل شي.

په افغانستان کې د خوړو نړیوال پروګرام ویاند وحیدالله اماني تېره اوونۍ ازادي راډیو ته ویلي وو، د بودجې د کموالي له امله دوی یوازې کولی شي په میاشت کې له ۱۵ ملیونو زیاتو اړو وګړو څخه یوازې درېیو ملیونو کسانو ته خوراکي توکي ورسوي.

د خوړو نړیوال پروګرام وايي، په افغانستان کې یو ملیارد ډالرو ته اړتیا لري.

پاکستان د افغانانو په ګډون د ټولو ناقانونه کډوالو د ویستو اعلان وکړ

پاکستان کې مېشت یو شمېر کډوال - ارشیف

پاکستان وایي، ټول غیرقانوني کډوال دې د دوی له خاورې ووځي کنه په زوره به یې وباسي.

رویټرز اژانس د پاکستان د کورنیو چارو د سرپرست وزیر سرفراز بُګتي په وینا خبر ورکړ، چې سږکال په پاکستان کې له څلرویشت ځان مرګو بریدونو څخه څوارلس افغانانانو کړې دي.

بګتي زیاته کړه، چې شاوخوا یو میلیون او درې اویا زره غیرقانوني افغان کډوال په پاکستان کې ژوند کوي او دوی باید د نومبرترلومړۍ نېټې له پاکستانه ووځي.

د طالبانو د حکومت چارواکو تراوسه د پاکستان د کورنیو چارو د سرپرست وزیر د دغو څرګندونو په اړه غبرګون ندی ښودلی.

له دې مخکې د بښنې نړیوال سازمان، امنیستي انټرنشنل په پاکستان کې د افغان کډوالو پر وضعیت اندیښنه ښودلې وه.

د دغه سازمان د جنوبی اسیا څانګې د دوشنبې په ورځ پر خپله ایکس پاڼه لیکلي، اکثره هغه افغانان چې د طالبانو د حکومت له ویرې پاکستان ته تللي، هلته ځورول کیږي، نیول کیږي او افغانستان ته ستنول کیږي.

د اروپایي ټولنې استازی: د محکمې له پریکړې پرته د افغان فعالانو نیول غیر قانوني دي

د افغانستان لپاره د اروپایي ټولنې ځانګړی استازی - ارشیف

د افغانستان لپاره د اروپایي ټولنې ځانګړی استازی ټوماس نیکلاسن وایي، په افغانستان کې د محاکمې له پریکړې پرته د هغو افغانانو نیونه چې د خپلو او د نورو د حقونو دفاع کوي، غیرقانوني ده.

نیکلاسن نن سې شنبې په خپله ایکس پاڼه کې ویلي، چې دغه نیونې همدارنګه د کورني مشروعیت او رغنده خبرو اترو لپاره اړین باور هم کمزوری کوي.

نیکلاسن دغه څرګندونې د هغه کمپاین په ملاتړکړي، چې د مطیع الله ویسا، ژولیا پارسي او ندا پرواني د خوشې کیدو لپاره پیل شوی دی.

په عین حال کې د اروپایي ټولنې د بهرنیو چارو او امنیتي پالیسیو د مشرجوزیف بوریل ویاندې نبیلا مسرالي په یوه پوست کې ویلي، چې اروپایي ټولنه واکمنو طالبانو غواړي چې غیرقانوني نیونې ودروي او دغه فعالان او د هغوی د کورنۍ غړي سمدستي خوشې کړي.

د زده کړې د فعال او قلم لار ټولنې مشرمطیع الله ویسا له شپږ میاشتې راهیسې له طالبانو سره بندي دی او دوه نورې ښځینه فعالانې په دې وروستیو کې نیول شوي دي.

د طالبانو د بهرنیو چارو وزارت سرپرست چین ته په سفر ولاړ

د طالبانو د بهرنیو چارو وزارت سرپرست، امیرخان متقي

د طالبانو د حکومت د بهرنیو چارو د سرپرست وزیر امیرخان متقي په مشرۍ یو پلاوی نن سهار د چین په رسمي بلنه دغه هېواد ته ولاړ.

د بهرنیو چارو وزارت مرستیال ویاند حافظ ضیا احمد پر خپله ایکس پاڼه لیکلي، چې دغه پلاوی د چین په شي ژانګ ایالت کې د ترانس همالیا فورم په دریمه ناسته کې ګډون کوي.

د هغه په وینا په یاده فورم کې د همالیا د غرونو شاوخوا هېوادونو پر اقتصادي همکاریو او سیمه ییز اتصال خبرې کوي.

د راپورونو له مخې، دغه دوه ورځنۍ غونډه سبا چهارشنبه د اکتوبر په څلورمه پيلیږي.

چین د طالبانو له حکومت سره غیر رسمي تعامل ساتلی او یوازینی هېواد دی، چې د طالبانو د حکومت تر بیا واکمنۍ وروسته یې کابل ته نوی سفیر لیږلی دی.

د طالبانو د بهرنیو چارو سرپرست وزیر تېره اونۍ د مسکو فارمټ شپږمې غونډه کې د ګډون په هدف لومړی مسکو او بیا د تاتارستان کازان ښار ته سفر کړی و.

روسیې او چین دواړو د لویدیځو هېوادونو برعکس په خپلو هېوادونو کې د طالبانو ډيپلوماتان هم منلي دي.

د کابل - جلال اباد د لویې لارې اصلي مسیر بیرته پرانیستل شو

د لارې د تړل کیدو ورځې - ارشیف

د طالبانو د حکومت د فواید عامې وزارت د کابل- جلال اباد لویې لارې د اصلي مسیر د بیرته پرانستلو خبر ورکړی دی.

دغه وزارت پر خپله ایکس پاڼه لیکلي، چې دغه لاره د غره د ښویدو له کبله تړل شوې وه او له درې ورځنیو هڅو وروسته پرون ماښام بیرت پرانستل شوه.

د دوی په ټکو، د لارې د بندوالي پر مهال موټرو پر یوه فرعي لاره باندې تګ راتګ کاوه.

د کابل- جلال اباد لویه لاره د تېرې سنبلې یا وږي میاشتې په وروستیو کې هم په ماهیپر سیمه کې د غره ښوېدو له کبله څو ورځې بنده وه. چې هغه مهال موټرو ته د کاپیسا او یا هم لته بند له لارې د تګ راتګ سپارښتنه شوې وه.

د بښنې نړیوال سازمان په پاکستان کې د افغان کډوالو د نیونو په اړه اندېښنه ښودلې

په پاکستان کې د یو شمېر افغان کډوالو د اوسیدو قانوني اسناد

د بښنې نړیوال سازمان په پاکستان کې د افغان کډوالو پر وضعیت اندیښنه ښودلې ده.

د دغه سازمان د جنوبی اسیا څانګې د دوشنبې په ورځ پر خپله ایکس پاڼه لیکلي، اکثره هغه افغانان چې د طالبانو د حکومت له ویرې پاکستان ته تللي، هلته ځورول کیږي، نیول کیږي او افغانستان ته ستنول کیږي.

د بښنې نړیوال سازمان په دې برخه کې پر نړیوالو هم نیوکه کړې او ویلي یې دي، دې ستونزې ته یې پام نه دی کړی.

په اسلام اباد کې د افغان کډوالو شورا ازادي راډیو ته وویل، چې تر پرون دوشنبې ماښام پورې هم د افغان کډوالو د نیولو لړۍ روانه وه.

د دغې شورا په وینا، یوازې د تېرې یکشنبې په ورځ پاکستاني پولیسو اسلام اباد او راولپنډۍ کې شاوخوا ۸ سوه کډوال ونیول، چې سم نیمایي یې وروسته له هغې خوشې شول چې معلومه شوه د اوسیدو قانوني اسناد لري.

یونیسف: اګسټ کې مو د سختې خوارځواکۍ ځپلو ۶۰ زرو افغان ماشومانو درملنه کړې

یو شمېر خوارځواکۍ ځپلي افغان ماشومان - ارشیف

یونیسف یا د ملګرو ملتونو د ماشومانو وجهي صندوق وايي، په تېر اګست میاشت کې په سختې خوارځواکۍ اخته شپېتو زرو ماشومانو درملنه کړې ده.

دې ادارې دا خبره پرون په یوه اعلامیه کې کړې ده.

یونیسف په عین حال کې په شدیدې نس ناستې د ۸۷ زره نورو ماشومانو د اخته کېدو په اړه اندېښنه ښودلې.

یونیسف په خپله ایکس پاڼه په یوه بیان کې زیاته کړې، چې د محلي ټولګیو له لارې یې له ۶۸۲ زرو زیاتو ماشومانو سره مرسته کړې چې خپلو درسونو ته دوام ورکړي.

یونیسف ویلي، چې د ژمي په درشل کې له اړمنو کورنیو سره د مرستې لپاره د ۹۲ میلیونه ډالرو بودیجې ته اړتیا ده.

تر دې مخکې د ملګرو ملتونو بېلابېلو ادارو په افغانستان کې د بشري مرستو د دوام لپاره د بودیجې د کموالي خبرداری ورکړی دی.

د طالبانو حکومت: کابل کې د سیروم جوړولو یوه فابریکه پرانیستل شوه

د سیروم یو تصویر له ارشیفه

د طالبانو د حکومت د سوداګرۍ او صنایعو وزارت په کابل کې د سیروم د تولید د یوې فابریکې د پرانیستلو خبر ورکړ.

دغه فابریکه د ۲۵ میلیونو ډالرو په لګښت جوړه شوې، چې په ورځني ډول د بېلابېلو طبي سیرومونو د ۱۱۰ زره کڅوړو د تولید ظرفیت لري او څه باندې زرو تنو ته یې کاري فرصتونه برابر کړي دي.

افغانستان د خپلې اړتيا وړ ډېر درمل له بهر څخه واردوي او خلک شکايت کوي، چې يو شمېر دغه درمل په ځانګړي ډول له ګاونډيو هېوادونو څخه واردېږي، چې کيفيت يې ښه نه وي.

نور راوښيه

XS
SM
MD
LG