د لاسرسۍ وړ لېنکونه

تازه خبر
دوشنبه ۱ زمری ۱۴۰۳ کابل ۰۷:۰۵

افغانستان

د روغتيا سازمان: افغانستان کې مو ۲۰۴ روغتيايي مرکزونه پر طبي وسايلو مجهز کړي

انځور - ارشيف
انځور - ارشيف

د روغتیا نړیوال سازمان د افغانستان څانګه وایي، دغه هېواد کې يې ۲۰۴ روغتیایي مرکزونه او ۶۷ د وینې بانکونه په طبي وسایلو مجهز کړي دي.

دغې ادارې د یکشنبې په ورځ ویلي، د دغو مرکزونو په تجهیز سره د عاجلو درملنو او د فزیکي پياوړتیا د هڅو ملاتړ کوي.

د روغتیا نړیوال سازمان د افغانستان څانګې پر خپله ټویټرپاڼه لیکلي، د وینو په بانکونو کې يې لسګونه کسان د وینې اخیستو په برخه کې روزلي هم دي.

د روغتیا نړیوال سازمان تر دې وړاندې افغانستان کې د ۱۵۵ نورو طبي کڅوړو د مرستو خبر ورکړی دی.

په تېرو دوو کلونو کې د افغانستان پر اقتصاد سربېره د روغتیا برخه هم متاثره شوې او له دغه سکتوره د نړیوالو ملاتړ په هغې کچه نه‌دی چې پخوا کلونو کې و.

د ورځې تازه خبرونه دلته ولولئ

د نورستان په منډول کې د لومړي ځل لپاره د ټیلیفون اسانتیاوې چمتو شوې

ارشیف: په افغانستان کې د یوې مخابراتي شبکې انتن
ارشیف: په افغانستان کې د یوې مخابراتي شبکې انتن

د نورستان په منډول ولسوالۍ کې د لومړي ځل لپاره د ټیلیفون اسانتیاوې چمتو شوې.

په نورستان کې د طالبانو د مخابراتو رییس خالد فاتح ازادي راډیو ته وویل چې افغان بیسیم شبکې په منډول کې د ټیلیفوني خدماتو د وړاندې کولو لپاره یو انتن ولګاوه چې ورسره د منډول شاوخوا اویا فیصده خلک د ټیلیفوني اړیکو له اسانتیا برخمن شول.

د منډول اوسېدونکي وايي، پخوا به يي خپلو خپلوانو او دوستانو سره د اړیکې لپاره په ساعتونو مزل کاوه څو داسې ځاي ته ورسېږي چې هلته ټلیفون کار ورکړي.

منډول د نورستان لوېديځه برخه کې پرته ولسوالي ده چې شاوخوا ۱۳۵۰۰۰ نفوس لري.

ایراني چارواکو یو افغان او اوه نور کسان اعدام کړي

ارشیف
ارشیف

ایراني چارواکو پرون یو افغان او اوه نور کسان اعدام کړي دي.

د ایران د بشري حقونو د څار یوه سازمان هنګو خبر ورکړی یو افغان او دری نور بندیان د مخدره موادو سره تړلیو جرمونو په تور په قزلحصار زندان کې اعدام شوي دي.

د افغان اعدام شوي بندي هویت لا نه دی څرګند.

د هنګو سازمان په خبره څلور نور کسان چې یوه ښځه هم په‌کې شامله ده د شیراز په عادل آباد زندان کې اعدام شوي دي.

ایران کې شاوخوا اوه زره افغانان په بېلابېلو جرمونو بند ته اچول شوي، خو معلومه نه ده چې څومره کسان له دې ډله په اعدام محکوم شوي.

د راپورونو له مخې ایران کې سږ کال په لومړیو څلورو میاشتو کې ۱۴ افغانان اعدام شوي چې اکثر یې د مخدره موادو اړوند جرمونو باندې محکوم وو.

ایران باندې تل د بشري حقونو د سازمانونو نیوکې چې محکومین مدافع وکیل ته له اړین لاسرسي پرته اعداموي.

رمضان بشردوست د طالبانو له‌خوا د ده د بندي کېدو اوازې دروغ وبللې

د تېر جمهوري نظام د ولسي جرګې غړی رمضان بشر دوست
د تېر جمهوري نظام د ولسي جرګې غړی رمضان بشر دوست

د تېر جمهوري نظام د ولسي جرګې غړي رمضان بشردوست ازادي راډیو سره خبرو کې وویل چې د ده د بندي کېدو په اړه خپرې شوې اوازې دروغ دي.

دی وایي، دا اوازه د کوم یوټیوب چینل له لوري په نامعلوم دلیل خپره شوې وه چې تر هغه وروسته ځینو رسنیو او د تېر جمهوري حکومت د ولسي جرګې مشر میررحمان رحماني یې هم په اړه په خپله ایکسپاڼه اندېښنه څرګنده کړې وه.

دا په داسې حال کې ده چې نن یکشنبه د بشردوست په ګډون په تخار ولایت کې د تېر جمهوري حکومت د ولایتي شورا مشر روح‌الله رووف یوبل او د پروډیسر، ویاند، پروډیوسر، سینمایي فعال او لیکوال سید رحیم سعیدي او په کندهار کې د ازاد خبریال محمد یار مجروح د نیول کېدو په اړه هم راپورونه خپاره شوي دي.

خو د سعیدي او مجروح خپلوانو ازادي راډیو سره خبرو کې د طالبانو د حکومت له لوري د دوی نیول کېدل تایید کړي دي.

د طالبانو د حکومت د استخباراتو عمومي ریاست ویاند خلیل همراز د دغو دوو کسانو د خپلو د ادعاوو په اړه د ازادي راډیو پوښتنې ځواب نه کړې.

ګیبریسیوس: ملګري ملتونه د افغانانو په تېره د ښځو او ماشومانو ملاتړ ته دوام ورکوي

د ارزګان د ولایتي روغتون یوه څنډه
د ارزګان د ولایتي روغتون یوه څنډه

د روغتیا د نړیوال سازمان یا "ډبلیوایچ‌او" مشر وايي، د ملګرو ملتونو دا اړونده اداره به د افغانستان د ټولو خلکو په تېره د ښځو او ماشومانو ملاتړ ته دوام ورکړي څو هغو ته روغتیايي اسانتیاوې چمتو کړي.

تیدروس ادهانوم ګیبریسیوس دا خبره د طالبانو د حکومت د روغتیا له سرپرست وزیر نورجلال جلالي سره تر کتنې وروسته پر خپله ایکسپاڼه لیکلې ده.

هغه لیکلي چې له جلالي سره د تېرې اونۍ په کتنه کې یې د ماشومانو د ګوزڼ د ناروغۍ یا پولیو پر ضد د هڅو د ګړندي کولو او په افغانستان کې د نورو ساري ناروغیو د مخنیوي په اړه هم بحث وکړ.

د "ډبلیوایچ‌او" WHO مشر زیاتوي چې له جلال سره یې زده‌کړو او کار ته د ښځو د انډول حق د یقیني کولو په اړه هم خبرې کړي.

ښاغلي ګیبریسیوس نه دي ویلي چې دا کتنه په کوم ځای کې شوې، خو د طالبانو د حکومت د عامې روغتیا وزارت پرون په یو بیان کې وویل، جلال چې د روغتیا په برخه کې د پرمختګونو او له دې وزارت سره د نړیوالو ادارو د همغږۍ په اړه د خبرو لپاره له یوه پلاوي سره سویس ته تللی هلته له ګیبریسیوس سره لیدلي دي.

د افغانستان په اتو ولایتونو کې د باران ورېدو او سېلابونو د راوتلو اټکل شوی

په لغمان کې د وروستیو سېلابونو خلکو ته زیانونه اړولي دي.
په لغمان کې د وروستیو سېلابونو خلکو ته زیانونه اړولي دي.

نن د افغانستان د ختیځ په شمول چې تېره اوونۍ سېلابونو ځپلي، په اتو ولایتونو کې د بارانونو او د سېلابونو د بهېدو امکانات شته.

د طالبانو د ټرانسپورټ او هوایي چلند وزارت په یوه بیان کې ویلي چې په ننګرهار، کونړ، نورستان، لغمان، همداراز په بدخشان، لوګر، پکتیا او خوست کې د بارانونو او ورسره د سېلابونو د بهېدو اټکل کېږي.

د خبرپاڼې له مخې د افغانستان په یو شمېر شمالي، مرکزي او لوېدیځو ولایتونو کې د سختو بادونو اټکل شوی چې سرعت به یې په ساعت کې له پنځوسو تر نوي کیلومترو پورې وي.

د ملګرو ملتونو د یوه راپور له مخې چې د تېرې اوونۍ په پای کې خپور شو په ننګرهار، کونړ، نورستان او لغمان کې وروستیو سېلابونو او توپان تر ۴۰ ډېر کسان ووژل او له۳۴۰ ډېر کسان یې ټپيان کړل.

د طالبانو له لوري د سینما د یوه لوبغاړي د نیولو راپور ورکړل شوی

ارشیف: په کابل کې وسله‌وال طالبان
ارشیف: په کابل کې وسله‌وال طالبان

د سینما د لوبغاړي رحیم سعیدي یو شمېر خپلوان وایي چې سعیدي طالبانو نیولی دی.

دوی ادعا کوي چې سعیدي د تېرې اوونۍ له یکشنبې راهیسې د طالبانو استخباراتو بیولی دی.

طالبانو تر اوسه په دې اړه څه نه دې ویلي او خپلواکو سرچینو هم دا خبر تر دې دمه نه دی تایید کړی.

سعیدي د افغانستان د سینما د لوبغاړو د ټولنې غړی دی او له یو شمېر تلوېزیونونو سره یې کار کړی دی.

ژیرنوف: مسکو ښايي په افغانستان کې نورې کونسلګرۍ پرانېزي

په کابل کې د روسیې سفارت
په کابل کې د روسیې سفارت

په کابل کې د روسیې سفیر وایي، مسکو ښایي په افغانستان کې نورې کونسلګرۍ پرانېزي.

دیمیتري ژیرنوف دا خبره پرون د روسیې تاس اژانس ته وکړه او زیاته یې کړه چې د اوس لپاره دې ته اړتیا نه شته، خو په راتلونکې کې هېڅ شی څوک ردولی نه شي.

افغانستان او روسیې له ۱۹۱۹م کال راهیسې دیپلوماتیک اړیکې ټینګې کړي او په کابل کې یې سفارت پرانېست، بیا یې یو وخت په مزارشریف کې کونسلګري پرانیسته او د اړتیا له مخې یې څو نورې کونسلګرۍ هم په بېلابېلو ښارونو کې پرانیستې.

د طالبانو حکومت د روسیې په ګډون هېڅ هېواد په رسمیت نه دی پېژندلی، خو روسیه له هغو څو ګوتو په شمېرو هېوادونو څخه یو دی چې د ۲۰۲۱م کال له اګست وروسته چې طالبانو کابل ونیو، دوی په افغانستان کې خپل سفارت بند نه کړ او په مسکو کې یې هم د افغانستان سفارت طالبانو ته وسپاره.

اسټرالیا یو شمېر افغان کورنیو ته د تاوان ورکولو مسئله څېړي

ارشیف: په افغانستان کې د اسټرالیايي ځواکونو د عملیاتو یو انځور
ارشیف: په افغانستان کې د اسټرالیايي ځواکونو د عملیاتو یو انځور

تمه ده چې اسټرالیا د هغو افغانانو کورنیو ته تاوان ورکړي چې په افغانستان کې د اسټرالیایي ځواکونو له لوري په غیرقانوني ډول وژل شوي دي.

په ۲۰۲۰م کال کې داسې راپور خپور شوی و چې په‌کې ادعا شوې وه چې د اسټرالیا پوځیانو د ۲۰۰۵م او ۲۰۱۶م کلونو ترمنځ په افغانستان کې ۳۹ زندانیان او ملکي افغانان وژلي دي.

د اسټرالیایي پوځي چارواکو په وینا، د لوی درستیز له لوري د ۲۰۲م کال د خپاره شوي راپور تر تایید وروسته به اسټرالیا د وژل شویو افغانانو کورنیو ته د تاوان د ورکولو مسئله وڅېړي.

اسټرالیا د نړیوالو ځواکونو په ډله کې شاوخوا ۴۰۰ عسکر افغانستان ته استولی وو.

پروان کې د يوې چاودنې له امله دوه کسان وژل شوي او شپږ ټپيان دي

په پروان کې یوې چاودنې ۲ کسان وژلي او شپږ نور یې ټپیان کړي دي.

په پروان کې د طالبانو د امنیه قومندانۍ ویاند فضل الرحیم مسکین یار په یوه اعلامیه کې ویلي چې، چاودنه په یوه کباړ اوسپنه کې د ماین له امله وه.

مړه او ټپیان ټول ملکیان دي او د کباړ اوسپنې به یې ټولولې.

په دې اړه نور جزییات نه دي ورکړل شوي.

د افغانستان لپاره د روسیې سفیر: د روسيې او افغانستان ترمنځ سوداګري ډېره شوې

د افغانستان لپاره د روسیې سفیر دیمیتري ژیرنوف
د افغانستان لپاره د روسیې سفیر دیمیتري ژیرنوف

د افغانستان لپاره د روسیې سفیر وایي، د روسیې او افغانستان ترمنځ دوه اړخیزه سوداګري څو چنده شوې ده.

دیمیتري ژیرنوف Dmitry Zhirnov د روسیې له تاس خبري اژانس سره په مرکه کې ویلي چې د تېلو د تولید په برخه کې د مسکو او کابل ترمنځ همکاري له مخکې پیل شوې او هغه مخ په پراخېدو ده.

د راپور له‌مخې نوموړي دا څرګندونې د طالب چارواکو د هغو څرګندونو په غبرګون کې وکړې چې ویلي یې دي، نیت لري د خوړو د خوندیتوب او د تېلو د تولید په برخه کې له روسیې سره همکارۍ ته پراختیا ورکړي.

په کابل کې د روسیې سفیر وویل، دوه اړخیزه سوداګري اوس څو برابره زیاته شوې او هغه هم تر ډېره په‌دې خاطر چې روسیې افغانستان ته د غنمو، اوړو، غوړیو او د موټرو د تېلو په ګډون د ځینو توکو صادرات زیات کړي دي.

د روسیې سفیرهمدارنګه وویل، د افغانستان کام آیرخصوصي هوایي شرکت لېوالتیا ښودلې چې له کابل څخه مسکو ته مستقیمې الوتنې پیل کړي او زیاته یې کړه چې د اړتیا په صورت کې به روسیه ورسره مرسته وکړي.

د ښاغلي ژیرنوف په وینا روسیه یو له هغو محدودو هېوادونو څخه دی چې، د افغانستان د آریانا هوایي شرکت ته یې اجازه ورکړې چې په اوونۍ کې یو وار د مسکو او کابل ترمنځ الوتنې وکړي.

نور راوښيه

XS
SM
MD
LG