د لاسرسۍ وړ لېنکونه

تازه خبر
چهارشنبه ۲۷ چنګاښ ۱۴۰۳ کابل ۰۶:۵۲

افغانستان

افغان کرکټ ملي لوبډلې له پاکستان سره تر سیالۍ وړاندې تمرینات کړي

افغان کرکټ ملي لوبډله
افغان کرکټ ملي لوبډله

د افغانستان کرکټ بورډ وايي، ملي لوبډلې پرون د پاکستان پر وړاندې د راروانو سیالیو لپاره د چمتووالي تمرینات وکړل.

ټاکل شوې په متحده عرب اماراتو کې د افغانستان او پاکستان د کرکټ ملي ټیمونه درې شل اووره نړیوالې سیالۍ وکړي.

لومړۍ سیالۍ به راروانه جمعه، دویمه د مارچ پر شپږویشتمه او درېیمه د مارچ پر اووه ویشتمه وشي.

وروسته له هغې چې اسټرالیا په افغانستان کې د ښځو پر وړاندې د طالبانو د سخت دریځ له امله له افغان لوبډلې سره له سیالیو ډډه وکړه، د افغانستان د کرکټ بورډ مشرتابه ژمنه کړې وه چې د کرکټ له سترو هېوادونو سره به د دوه اړخیزو لوبو پر چمتوالي جدي کار کوي.

د ورځې تازه خبرونه دلته ولولئ

د پاکستان د بهرنيو چارو وزارت په اسلام‌اباد کې د طالبانو مرستیال سفیر احضار کړی

په اسلام اباد کې د افغانستان سفارت
په اسلام اباد کې د افغانستان سفارت

د پاکستان د بهرنیو چارو وزارت نن په اسلام‌اباد کې د طالبانو د سفارت مرستیال احضار کړی او له هغه یې غوښتې چې د دوی حکومت دې د هغو وسله‌والو ډلو پر ضد لاس په کار شي چې روانه اوونۍ یې په پاکستان کې پر یوه پوځي مرکز برید وکړ.

وسله‌والو د دوشنبې په ورځ په بنو کې د پوځ پر یوه مرکز حمله وکړه چې د پاکستاني سرچینو په وینا د دې برید له امله اته پاکستاني پوځيان ووژل شول.

د ياد برید مسوولیت د حافظ ګل بهادر ډلې منلی دی.

پاکستان ادعا کوي چې دا ډله له افغانستانه د پاکستان د خاورې دننه عملیات کوي.

طالبانو تر اوسه په‌دې اړه څه نه‌دي ویلي، خو تر دې مخکې یې د اسلام‌اباد دا ډول تورونه رد کړي چې وسله‌والې ډلې په افغانستان کې شته او یا د دوی حکومت چاته اجازه ورکوي چې د افغانستان خاوره د بل هېواد پر ضد وکاروي.

د خبريالانو ملاتړ سازمانونه: طالبانو په کندهار کې ازاد خبريال محمديار مجروح نيولی

د افغانستان په عمومي نقشه کې د کندهار ولایت موقعیت
د افغانستان په عمومي نقشه کې د کندهار ولایت موقعیت

د خبریالانو د ملاتړ دوو سازمانونو د ازاد خبریال محمدیار مجروح د نیولو خبر ورکړی دی.

د افغانستان د خبریالانو مرکز نن په یوه بیان کې ویلي چې محمد یار مجروح په کندهار کې نیول شوی او باید سمدستي پرته له کوم قید او شرطه ازاد شي.

بل لور ته د افغانستان د خبریالانو د ملاتړ سازمان په خپله ایکس‌پاڼه یا پخواني ټویټر کې دا نیونه غندلې او د طالبانو له حکومته یې غوښتي چې د بیان د ازادۍ درناوی دې وکړي.

طالبانو تر اوسه په‌دې اړه څه نه‌دي ویلي.

د پاریس ښاروالې په سیند کې لامبو وکړه

۶۵ کلنې ان هیدالګو په‌دې ډول غوښتل چې خلکو ته دا وښیي چې دا سیند پاک دی.
۶۵ کلنې ان هیدالګو په‌دې ډول غوښتل چې خلکو ته دا وښیي چې دا سیند پاک دی.

د پاریس ښاروالې نن په سیند کې لامبو وکړه.

۶۵ کلنې ان هیدالګو په‌دې ډول غوښتل چې خلکو ته دا وښیي چې دا سیند پاک دی.

د فرانسې په پلازمېنه کې د دې سیند له اوبو سره د بدرفت د اوبو د یوځای کېدو له امله اندېښنې پيدا شوې وې او د فرانسې حکومت مجبوره شو چې د دې سیند پر پاکېدو یو نیم میلیارډ ډالر ولګوي چې د جولای په ۲۶مه د المپیک د لوبو لپاره چمتو شي.

تر دې پانګونې وروسته هم چې څو ځله د اوبو د کیفیت د معلومولو لپاره ازموینې ترسره شوې، نتیجه یې ناکامه وه، خو د راپورونو له‌مخې د جولای له پيله چې پرله‌پسې بارانونه وورېدل او بیا هوا لمرینه شوه نو د سیند له نویو لابراتواري معایناتو څرګنده شوه چې اوس د المپیک لوبو ته چمتو شوی دی.

پاریس د جولای له ۲۶مې د اګست تر یولسمې د المپیک لوبو کوربه دي.

متقي: لوېديځ هېوادونه دې په کابل کې خپل سفارتونه پرانېزي

د طالبانو د بهرنیو چارو سرپرست وزیر امیرخان متقي
د طالبانو د بهرنیو چارو سرپرست وزیر امیرخان متقي

د طالبانو د بهرنیو چارو سرپرست وزیر لوېدیځو هېوادو ته بلنه ورکړه چې خپل سفارتونه په کابل کې پرانېزي.

امیرخان متقي نن په کابل کې د بهرنیو چارو په وزارت کې یوې غونډې ته وویل، غرب ادعا لري چې ترهګرې ډلې په افغانستان کې پناه‌ځایونه لري، نو که چېرته دغه هېوادونه په رښتیا اندېښمن وي دوی دې راشي خپل سفارتونه دې فعال کړي او هرڅه دې له نژدې وڅاري.

نژدې درې کلونه وشول چې طالبانو کابل نیولی او تر اوسه هیڅ هېواد د دوی حکومت په رسمیت نه‌دی پېژندلی.

د پروان-باميان لار د سېلابونو د راوتلو له امله بنده شوې

ارشیف: له دې مخکې په پروان کې سېلابونو خلکو ته درنه مرګ ژوبله اړولې وه.
ارشیف: له دې مخکې په پروان کې سېلابونو خلکو ته درنه مرګ ژوبله اړولې وه.

د پروان او بامیان ولایت ترمنځ لویه لار نن سهار د سېلابونو د بهېدلو له امله د ترافیک پر مخ بنده شوه.

د طالبانو په واک کې باختر اژانس خبر ورکړ چې د پروان د شینوارو ولسوالي د سردرې په اشتر شهر کې نن سهار څلور بجې سېلابونه راوتلي چې د لارې د تړل کېدو لامل شوې دي.

تر اوسه له سیمې د دې سېلابونو له امله د مرګ‌ژوبلې د اوښتو خبر نه‌دی ورکړل شوی.

په‌داسې حال کې د پروان-بامیان لویه لار سېلابونو بنده کړې ده چې روانه اوونۍ د سېلابونو او توپان له امله په ننګرهار کې ۴۷ کسان مړه شول او شاوخوا ۳۵۰ نور ټپيان شول، دا اندېښنه شته چې د دې تلفاتو شمېر به زیات شي ځکه چې یو شمېر کسان لاهم تري تم دي.

په کونړ، لغمان او کاپیسا کې هم د روانې اوونۍ سېلابونو د ۱۳ کسانو ژوند اخیستی او په پنجشېر کې هم سېلابونه بهېدلي، خو له هغه ځای د مرګ‌ژوبلې راپورونه نه‌دي خپاره شوي.

بینېټ‌ د محرم د مراسمو په ګډون مذهبي ازادیو ته د درناوي غوښتنه کړې

د افغانستان د بشري حقونو لپاره د ملګروملتونو ځانګړی استازی ریچارډ بینېټ
د افغانستان د بشري حقونو لپاره د ملګروملتونو ځانګړی استازی ریچارډ بینېټ

د افغانستان د بشري حقونو لپاره د ملګروملتونو ځانګړي استازي په افغانستان کې د محرم د لسمې د مراسمو په ګډون مذهبي ازادیو ته د درناوي غوښتنه کړې.

ریچارډ بینېټ بېګا ناوخته پر خپل ایکس‌پاڼه په یوه بیان کې ویلي چې هیله لري د عاشورا مراسم په آزادۍ او امنیت کې او له وېرې پرته ترسره شي.

هغه ویلي چې د مذهبي عبادتونو، مراسمو او د عاشورا د نمانځنې د ځانګړو سیمبولونو په ګډون مذهبي آزادیو ته باید درناوی وشي.

په افغانستان کې پرون د محرم د لسمې لمانځنې مراسم د امن په شرایطو کې په تکیه‌خانو کې دننه ترسره شول او طالبانو د محرم لاریونونو ته اجازه ورنه‌کړه.

سېف ده چلډرن: د وروستيو سېلابونو له امله ۱۵۰۰ افغان ماشومان بې‌کوره شوي

ارشیف: په ننګرهار کې یوه سېلاب ځپلې سیمه
ارشیف: په ننګرهار کې یوه سېلاب ځپلې سیمه

د ماشومانو د ساتنې موسسې یا "سيف ده چلډرن" ویلي، ۱۵۰۰ افغان ماشومان په وروستیو خونړیو سېلونو کې بې‌کوره شوي دي.

دې موسسې سه‌شنبه په یوه اعلامیه کې ویلي، د ننګرهار، کونړ او لغمان په هغو ولسوالیو کې چې توپانونه او بارانونه شوي لږترلږه اته‌نیم لکه ماشومان اوسېږي.

له‌دې ډلې د دې ادارې په خبره د یو نیم زر ماشومانو کورونه ړنګ شوي او اوس بې‌کوره پاتې دي.

په ننګرهار کې لږترلږه د څلورو سوو کورونو د تخریب خبره شوې ده.

"سېف ده چلډرن" اندېښنه ښوولې چې په ختیځو سیمو کې دا طبیعي پېښې دوه میاشتې وروسته له هغه وشوې چې په بغلان او نورو ولایتونو کې مرګونو سېلونو سلګونه کسانو ته مرګ‌ژوبله واړوله چې لویه برخه یې ماشومان وو.

لسګونه زره کسان هم بې‌کوره کېدو ته اړ شول چې ماشومان او ښځې په‌کې تر ټولو زیاتې اغېزمنې شوي.

ایراني رسنۍ: د افغانستان له پولې سره د تېلو ۴۰۰ ټانکره درول شوي

د افغانستان او ایران ترمنځ سرحدي سیمه
د افغانستان او ایران ترمنځ سرحدي سیمه

ایراني رسنیو راپور ورکړی چې د افغانستان له پولې سره د تېلو ۴۰۰ ټانکره درول شوي دي.

د ایران د کار دولتي اژانس ایلنا د سه‌شنبې په ورځ ویلي چې درې اوونۍ کېږي دا ټانکر له کوم دلیل پرته افغانستان ته نه پرېښودل کېږي.

د ایلنا د راپور له‌مخې په دغو ۴۰۰ ټانکرو کې د عراق ډیزل تېل بار او د ایران له لارې افغانستان ته استول کېږي.

د موټرو چلوونکو ویلي، بې‌برخلیکه ولاړ دي او طالب چارواکي افغانستان ته د ننوتلو اجازه نه ورکوي.

طالبانو تازه په دې تړاو څه نه‌دي ویلي، خو مخکې یې لسګونه ټانکره ایراني تېل د ټیټ کیفیت په خاطر بېرته هغه هېواد ته استولي دي.

نن د سرطان ۲۶مه په افغانستان کې د جمهوريت د تاسيس ۵۱مه کليزه ده

نن جمعه د ثور اوومه د افغانستان د لومړني جمهور رییس سردار محمد داود پر ضد د کودتا له ۴۶ کلیزې سره برابره ده.
نن جمعه د ثور اوومه د افغانستان د لومړني جمهور رییس سردار محمد داود پر ضد د کودتا له ۴۶ کلیزې سره برابره ده.

نن د سرطان ۲۶مه په افغانستان کې د جمهوريت د تاسيس ۵۱مه کليزه ده.

له نن څخه ۵۱ کاله وړاندې داود خان د ځوانو افسرانو په مرسته د محمد ظاهر شاه د څلور لسیزو شاهي نظام نسکور او د لومړي ځل لپاره يې په افغانستان کې د جمهوریت بنسټ کېښود.

سردار محمد داود خان د کودتا له بریا وروسته په لومړنۍ وینا کې ولس ته وویل، دا کار یې د اصلاحاتو او د اصلاحاتو په وړاندې د پرتو خنډونو د لرې کولو په هدف کړی دی.

د کودتا پر مهال د افغانستان پاچا محمد ظاهر شاه د روم په بهرني سفر بوخت و او د مهمو چارو سرپرستي د هغه د تره د زوی سردارولي پر غاړه وه.

د سردار داود خان د جمهوریت په لومړنیو کلونو کې په بېړه پر پنځو کلنو کې پر انکشافي پلانونو کار وشو.

ان ځینې مهمې پروژې لکه د سلما بند، د کمال خان بند او یو شمېر نورې چې په دې وروستیو کلونو کې بشپړې شوې، هغه مهال طراحي او ډیزاین شوې وې.

داود خان په افغانستان پنځه کال واکمني وکړه، خو د ۱۳۵۷ کال د ثور په اوومه نېټه د خلق دیموکرات ګوند پرې کودتا وکړه چې په پایله کې داود خان د کورنۍ له ۱۷ غړیو سره یو ځای ووژل شو.

طالبان: له‌دې وروسته به د پاسپورټ غوښتونکو ته يوه اوونۍ کې پاسپورټ ورکول کېږي

په هرات کې د پاسپورټ دفتر مخې ته د خلکو ګڼه ګوڼه
په هرات کې د پاسپورټ دفتر مخې ته د خلکو ګڼه ګوڼه

د طالبان تر کنټرول لاندې د پاسپورټ عمومي ریاست وايي، له‌دې وروسته د پاسپورټ غوښتونکي په یوه اوونۍ کې پاسپورټ ترلاسه کولی شي.

د پاسپورټ ریاست عمومي رییس عبدالکریم حسیب نن په یوې خبرې غونډه کې وویل: "هفته‌وار به خلکو ته نوبت ورکول کېږي، په کومه اوونۍ کې چې چا ثبت نام وکړ، په همغه اوونۍ کې به يې نوبت رسېږي او خپل پاسپورټ به ترلاسه کوي."

د حسیب په خبره، د نوملیکنې سایت به هفته‌وار خلاص وي او د ظرفیت مطابق به په‌کې د پاسپورټ د غوښتونکو نومونه ثبتېږي.

بل پلو، نن د کورنیو چارو وزارت ویاند عبدالمتین قانع ویلي، سبا به د کابل په درېیو برخو دارالامان، قلعه زمان خان او تنګي تره خېل کې د پاسپورټونو د وېش څانګې پرانېزي.

د هغه په خبره، له دې څانګو به په ورځني ډول دوه زره پاسپورټونه متقاضیانو ته وېشل کېږي.

پر افغانستان د طالبانو له بیاځلي واکمنېدو راهیسې ډېر شمېر خلک د پاسپورټ د اخیستلو په برخه کې له ګڼو ستونزو سره لاس او ګرېوان وو چې د دوی په خبره، د پاسپورټ اخیستلو لپاره باید میاشتې میاشتې انتظار وباسي.

نور راوښيه

XS
SM
MD
LG