د لاسرسۍ وړ لېنکونه

تازه خبر
یکشنبه ۶ غبرګولی ۱۴۰۳ کابل ۰۴:۵۵

افغانستان

د امریکا ځانګړي استازي له فضل هادي مسلمیار سره خبرې کړي

د افغانستان لپاره د واشنګټن ځانګړی استازی ټوماس وېسټ
د افغانستان لپاره د واشنګټن ځانګړی استازی ټوماس وېسټ

د افغانستان لپاره د واشنګټن ځانګړی استازی ټوماس وېسټ وايي، پرون یې د افغانستان د مشرانو جرګې له پخواني رییس فضل هادي مسلمیار سره د افغانستان پر بشري او اقتصادي وضعیت خبرې وکړې.

وېسټ تېره شپه په خپل ټویټر کې لیکلي، په دې ټلیفوني خبرو کې یې د افغانانو پر هغو غوښتنو هم بحث وکړ چې غواړي نجونې ښوونځیو او ښځې کارونو ته ستنې شي.

ټوماس وېسټ لیکلي، دوی د افغانانو ترمنځ د افغانستان د راتلونکي لپاره د ډیالوګ پر اړتیا هم خبرې وکړې.

نن پنځه سوه درویشتمه ورځ ده چې طالبانو په افغانستان کې نجونو ته تر شپږم ټولګي پورته د نور تعلیم اجازه نه ده ورکړې او په تېره ډسمبر میاشت کې یې پوهنتونو ته د ښځو او نجونو تګ هم منع کړ.

د طالبانو اقتصاد وزارت د ډسمبر پر ۲۴مه، په غیردولتي موسسو کې د ښځو او نجونو پر کار هم بندیز ولګاوه.

د ورځې تازه خبرونه دلته ولولئ

پاکستان نه ایستل شوي څه باندې ۵ سوه افغان کډوال هېواد ته ستانه شول

ارشیف
ارشیف

د طالبانو د کډوالو او بیرته را ستنیدونکو چارو وزارت وایي چې پرون شنبې ۵۶۰ کسان چې له پاکستان څخه ایستل شوي، بیرته خپل هېواد ته راستانه شول.

دې وزارت نن په خپله ایکس پاڼه یا پخواني ټویټرکې لیکلي چې دغه کسان د تورخم او سپین بولدک له لارو وطن ته راستانه شوي دي.

پاکستان له خپلې خاورې د تېرکال د نومبر په میاشت کې د افغانانو د ایستلو بهیرپیل کړی و چې په ترڅ کې یې د ملګرو ملتونو په وینا له پنځه سوه زره زیات کسان بیرته افغانستان ته ستانه کړای شوي دي.

د تعلیم فعال "مطیع‌الله ویسا" ته د اکشن ایوارډ او نقدي جایزه اعلان شوه

 د قلم لار ټولنې مشر او د تعلیم فعال مطیع‌الله ویسا
د قلم لار ټولنې مشر او د تعلیم فعال مطیع‌الله ویسا

په ډنمارک کې دانش افغان بنسټ او ډنمارک مېشتو افغانانو د قلم لار ټولنې مشر او د تعلیم فعال مطیع‌الله ویسا ته د هغه د غوره فعالیتونو له کبله د ۲۰۲۴ م کال د اکشن ایوارډ (Action Award) او نقدي جایزه اعلان کړه.

پرون شنبه په دې مناسبت ډنمارک کې په جوړه شوې غونډه کې د افغانستان د بشري حقونو لپاره د ملګرو ملتونو ځانګړي راپور ورکوونکي ریچارډ بینېټ هم برخه اخیستې وه.

بینېټ، له ۲۰۰۹م کال راهیسې د ماشومانو د تعلیم د ودې لپاره د مطیع‌الله ویسا فعالیتونه وستایل.

د بخښنې نړېوال سازمان هم له خپله اړخه مطیع‌الله ويسا ته يو ستاينليک ورکړ چې وروسته به وروسپارل شي.

د مطیع‌الله ویسا ورور عطاالله ويسا په دې مناسبت جوړه شوې غونډه کې په انلاين ډول حضور درلود او ازادي راډیو ته وويل د دغو بنسټونو منندوی دی.

افغان دانش بنسټ چې وايي، له کلونو راهیسې د قلم لار ټولنې فعالیتونه څاري د ماشومانو، په ځانګړي ډول د نجونو د تعلیم د ودې لپاره د مطیع‌الله ویسا فعالیتونه وستایل.

د قلم لار ټولنې په مرسته له کلونو راهیسې د ماشومانو د تعلیم د ودې لپاره کمپاینونه او هڅې شوي چې په مرسته یې تر ۱۰۰ زیات بند ښوونځي بېرته پرانیستل شوي، تر ۳ ملیونو زیاتو ماشومانو سره د درسي توکو مرسته شوې او ۴۱ کتابتونونه جوړ شوي دي.

مطیع‌الله ویسا په بند کې د ۲۱۵ ورځو له تېرولو وروسته د تېر لمریز کال د لړم يا عقرب پر څلورمه د طالبانو له بنده خوشې شو.

د کابل-کندهار پر لویه لاره د بس چپه کېدو پېښه؛ لږترلږه دوه کسان مړه او ۳۷ نور ټپیان شوي

ارشیف: په افغانستان کې له دې مخکې د ترافیکو پېښو له کبله ګڼو کسانو ته مرګ ژوبله اوښتې ده.
ارشیف: په افغانستان کې له دې مخکې د ترافیکو پېښو له کبله ګڼو کسانو ته مرګ ژوبله اوښتې ده.

د کابل-کندهار پر لویه لاره د یوه بس د چپه کېدو په پېښه کې لږترلږه دوه کسان مړه او ۳۷ نور ټپیان شوي دي.

سیمه‌ییزو رسنیو د زابل د عامې روغتیا د رییس میرویس افغان په حواله خبرورکړی چې ویلې دي، دغه پېښه تېره شپه د زابل ولایت په شهرصفا ولسوالۍ کې شوې ده.

د چارواکو په وینا، په ټپیانو کې یولس یې ښځې دي چې د درملنې په هدف نژدې روغتون ته وړل شوي دي.

د دې پېښې د څرنګوالي په اړه نور جزییات نه‌دي ورکړل شوي.

د سړکونو خرابوالی، د چلوونکو بې احتیاطي او د ترافیکي اصولو نه رعایت په افغانستان کې د زیاتو ترافیکي پېښو اصلي علت ګڼل کېږي.

په بدخشان کې سېلابونو د یوې کورنۍ ۱۰ غړي وژلي

په بدخشان کې له دې مخکې هم سېلابونو زیانونه اړولي دي.
په بدخشان کې له دې مخکې هم سېلابونو زیانونه اړولي دي.

په بدخشان کې سېلابونو د یوې کورنۍ ۱۰ غړي وژلي دي.

ملي راډیو تلوېزیون چې طالبان یې اداره کوي نن د سیمه ییزو چارواکو له قوله راپور ورکړی چې دا کسان د بدخشان ولایت د مرکز فیض آباد په اړوندوه مورچک سیمه کې سېلاب وړي دي.

چارواکو ویلي چې یوازې د یوه تن مړی موندل شوی او د پاتې مړیو د موندلو لپاره هڅې روانې دي.

پرون له دې مخکې د فاریاب ولایت چارواکو هم ویلي وو چې روانو سېلابونو ۱۴ کسانو ته مرګ ژوبله اړولې ده.

د طالبانو تر کنټرول لاندې باختر آژانس خبر ورکړی چې دا پېښه د کوهستان ولسوالۍ په مرکز لولاش سیمه کې شوې ده.

د افغانستان په بېلابېلو سیمو کې د تېرې څه باندې یوې میاشتې سېلابونو له کبله لسګونه کسان مړه او ټپیان شوي او پراخې کرنیزې ځمکې اوبو لاندې کړې دي.

په عین حال کې د هواپېژندنې ادارو د افغانستان په ځینو سیمو کې د نورو درنو ورښتونو او سېلابونو اټکل کړی.

ملګرو ملتونو په افغانستان کې وروستي سېلابونه ویجاړوونکي بللي

په غور کې د سېلابونو له کبله د اوښتو زیانونو یوه څنډه
په غور کې د سېلابونو له کبله د اوښتو زیانونو یوه څنډه

د کډوالو په چارو کې د ملګرو ملتونو لویې کمېشنرۍ په افغانستان کې وروستي سېلابونه ویجاړوونکي بللي دي.

د دې ادارې عمومي دفتر پرون پر خپله ایکس­پاڼه یا پخواني ټویټر لیکلي چې خلک د هرڅه تر بایللو وروسته هڅه کوي چې بېرته عادي ژوند ته راوګرځي او خپل کورونه جوړ کړي.

د کډوالو په چارو کې د ملګرو ملتونو لویه کمشنري وايي، دوی له خپلو شریکانو سره په سېلاب ځپلو سیمو کې دي او سېلاب ځپلو ته اضطراري مرستې رسوي.

د خوړو نړیوال پروګرام ویلي، د روانې میلادي میاشتې په سېلابونو کې ۵۴۰ کسان مړه او په زرګونو نور ژوبل شوي، خو ګومان کېږي واقعي شمېر تر دې زیات وي.

طالبانو په کاپیسا کې ۸ ټُنه نفرایټ ډبرې استخراج کړي

ارشیف: د افغانستان د یوه کان انځور
ارشیف: د افغانستان د یوه کان انځور

په کاپیسا کې د طالبانو یوه محلي چارواکي د تېرو اتو میاشتو پر مهال د اته ټُنه نفرایټ (Nephrite) ډبرو د استخراج خبر ورکړ.

د کاپیسا لپاره د طالبانو د کانونو او پټرولیم سرپرست رئیس عنایت الله ابلاغ پرون شنبه رسنیو ته ویلي چې دغه ډبرې به له کاپیسا لومړی ننګرهار او بیا له افغانستانه بهر ولېږل شي.

نفرایټ یو ډول قیمتي ډبره ده چې په غاړګیو، غوږوالیو او نورو ګاڼو دغه راز زینتي لوښو کې کارول کېږي.

څه کم درې کاله مخکې پر افغانستان د طالبانو د ولکې له بیا ټینګولو وروسته له بېلابېلو هېوادونو او شرکتونو سره د افغانستان د کانونو په باب قراردادونه شوي دي.

ځینې کتونکي شکایت لري چې په دغو قراردادونو کې شفافیت نه شته او د کانونو د سپړنې چارې هم معیاري نه دي.

طالب چارواکو د داخلي بېځایه شویو د شمېرو د همغږۍ په هدف غونډه کړې

ارشیف: په کابل کې داخلي بېځایه شوې کورنۍ
ارشیف: په کابل کې داخلي بېځایه شوې کورنۍ

د طالبانو د کډوالو او راستنېدونکو چارو وزارت په افغانستان کې د داخلي بېځایه شویو د شمېرو د همغږۍ په هدف د غونډې خبر ورکړ.

دغه وزارت پرون په یوه اعلامیه کې ویلي چې دغه غونډه د داخلي بېځایه شویو په ریاست کې شوې وه او پر دې بحث شوی چې ملي او نړیوالو بنسټونو ته د داخلي بېځایه شویو واحدې شمېرې وړاندې شي.

په غونډه کې د داخلي بېځایه شویو د ستونزو اوارول، د دوی مرسته او د دوی د شمېرو برابرول مهم ګڼل شوي دي.

په اعلامیه کې راغلي چې ټاکل شوې، د دغو مسایلو په باب په افغانستان کې د ملګرو ملتونو له مرستندوی ماموریت یا یوناما سره هم غونډه وشي.

د کډوالو په چارو کې د ملګرو ملتونو د لویې کمېشنرۍ د معلوماتو له مخې، دا مهال په افغانستان کې د داخلي بېځایه شویو شمېر درې میلیونه او دوه نیم لکه دی او پنځه میلیونه او درې لکه نور افغانان په ګاونډیو هېوادونو کې د پناه غوښتونکو په توګه ثبت شوي دي.

طالبان: د فاریاب په کوهستان کې سېلابونو ۱۴ کسانو ته مرګ‌ژوبله اړولې

په فاریاب کې له دې مخکې هم سېلابونو زیانونه اړولي دي.
په فاریاب کې له دې مخکې هم سېلابونو زیانونه اړولي دي.

د طالبانو چارواکو تایید کړې چې د فاریاب په کوهستان ولسوالۍ کې سېلابونو ۱۴کسانو ته مرګ‌ژوبله اړولې ده.

دا سېلابونه تازه د کوهستان ولسوالۍ په مرکز لولاش ښار کې راوتلي دي.

باختر اژانس چې طالبان یې کنټرولوي نن په فاریاب کې د سېلونو له امله د مرګ‌ژوبلو شمېرې خپرې کړي دي.

فاریاب د افغانستان له هغو ولایتونو چې سېلونو پکې تېر یوه میاشت کې ډېر ورانی کړی او لسګونه کسانو ته یې مرګ‌ژوبله رسولې ده.

اخوا د هوا پېژندنې ادارې بیا هم په یو شمېر ولایتونو کې د درنو اورښتونو او سېلابونو اټکل کړی دی.

د کندهار یوه فابریکه کې اور لګېدنه؛ چارواکي: انساني تلفات نه لري

ارشیف
ارشیف

د راپورونو له مخې نن د کندهار په یوه فابریکه کې اور ولګېد چې د چارواکو په وینا انساني تلفات نه لري.

د طالبانو د حکومت د کورنیوچارو وزارت ویاند عبدالمتین قانع پر ایکس شبکې په یوه بیان کې ویلي دي چې دا پېښه د کندهار ښار په پنځمه ناحیه کې د نل‌لیکو د جوړولو په یوه فابریکه کې د برښنا د شارټي په نتیجه کې وشوه.

په بیان کې راغلي چې د اور وژنې ځواک دا اور مړ کړی، خو په پېښه کې مالي زیانونه اوښتي دي.

په افغانستان کې عموماً د برښنا د شارټۍ او د خوندیتوب د اصولو د نه رعایت له کبله وخت ناوخت اور پېښې رامنځته کېږي.

ویسټ: ترکي چارواکو سره مې د امنیتي مسایلو او افغانانو په اړه خبرې وکړې

د افغانستان لپاره د امریکا ځانګړی استازی ټام ویسټ
د افغانستان لپاره د امریکا ځانګړی استازی ټام ویسټ

د افغانستان لپاره د امریکا ځانګړی استازی ټام ویسټ وايي، انقرې ته د تېرو دوو ورځو سفر پرمهال یې د ترکیې د همکارۍ او همغږۍ د ادارې له مشر سره په کتنه کې یې د امنیتي مسایلو او د افغانانو د ملاتړ په اړه خبرې کړي.

ښاغلي ویسټ نن پر خپله ایکس پاڼه لیکلي دي چې له سیرکان کایالر سره یې د اسلامي دولت ډلې یا داعش د خراسان څانګې پر وړاندې د هڅو د همغږۍ، د افغانستان په شمال کې د وروستیو سېلونو له زیانمنو خلکو سره د مرستو او د افغانانو د بشري حقونو د ملاتړ پر مسایلو خبرې وکړې.

ښاغلي ویسټ همداراز لیکلي دي چې په دې کتنه کې یې د افغانستان د کلتوري ساتنې، بېړنیو مرستو او له روزنیزو پروژو څخه د ترکیې د ملاتړ په اړه معلومات ترلاسه کړل.

ښاغلي ویسټ له دې مخکې په دوحه کې له قطري چارواکو سره د افغانستان په اړوند د دوحې د راروانې غونډې په اړه خبرې کړې وې.

نور راوښيه

XS
SM
MD
LG